| Library / Tipiṭaka / తిపిటక • Tipiṭaka / సంయుత్తనికాయ • Saṃyuttanikāya |
౯. అసఙ్ఖతసంయుత్తం
9. Asaṅkhatasaṃyuttaṃ
౧. పఠమవగ్గో
1. Paṭhamavaggo
౧. కాయగతాసతిసుత్తం
1. Kāyagatāsatisuttaṃ
౩౬౬. సావత్థినిదానం . ‘‘అసఙ్ఖతఞ్చ వో, భిక్ఖవే, దేసేస్సామి అసఙ్ఖతగామిఞ్చ మగ్గం. తం సుణాథ. కతమఞ్చ, భిక్ఖవే, అసఙ్ఖతం? యో, భిక్ఖవే, రాగక్ఖయో దోసక్ఖయో మోహక్ఖయో – ఇదం వుచ్చతి, భిక్ఖవే, అసఙ్ఖతం. కతమో చ, భిక్ఖవే, అసఙ్ఖతగామిమగ్గో? కాయగతాసతి. అయం వుచ్చతి, భిక్ఖవే, అసఙ్ఖతగామిమగ్గో’’.
366. Sāvatthinidānaṃ . ‘‘Asaṅkhatañca vo, bhikkhave, desessāmi asaṅkhatagāmiñca maggaṃ. Taṃ suṇātha. Katamañca, bhikkhave, asaṅkhataṃ? Yo, bhikkhave, rāgakkhayo dosakkhayo mohakkhayo – idaṃ vuccati, bhikkhave, asaṅkhataṃ. Katamo ca, bhikkhave, asaṅkhatagāmimaggo? Kāyagatāsati. Ayaṃ vuccati, bhikkhave, asaṅkhatagāmimaggo’’.
‘‘ఇతి ఖో, భిక్ఖవే, దేసితం వో మయా అసఙ్ఖతం, దేసితో అసఙ్ఖతగామిమగ్గో. యం, భిక్ఖవే, సత్థారా కరణీయం సావకానం హితేసినా అనుకమ్పకేన అనుకమ్పం ఉపాదాయ, కతం వో తం మయా. ఏతాని, భిక్ఖవే, రుక్ఖమూలాని, ఏతాని సుఞ్ఞాగారాని. ఝాయథ 1, భిక్ఖవే, మా పమాదత్థ; మా పచ్ఛా విప్పటిసారినో అహువత్థ. అయం వో అమ్హాకం అనుసాసనీ’’తి. పఠమం.
‘‘Iti kho, bhikkhave, desitaṃ vo mayā asaṅkhataṃ, desito asaṅkhatagāmimaggo. Yaṃ, bhikkhave, satthārā karaṇīyaṃ sāvakānaṃ hitesinā anukampakena anukampaṃ upādāya, kataṃ vo taṃ mayā. Etāni, bhikkhave, rukkhamūlāni, etāni suññāgārāni. Jhāyatha 2, bhikkhave, mā pamādattha; mā pacchā vippaṭisārino ahuvattha. Ayaṃ vo amhākaṃ anusāsanī’’ti. Paṭhamaṃ.
Footnotes:
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / సంయుత్తనికాయ (అట్ఠకథా) • Saṃyuttanikāya (aṭṭhakathā) / ౧-౧౧. కాయగతాసతిసుత్తాదివణ్ణనా • 1-11. Kāyagatāsatisuttādivaṇṇanā
టీకా • Tīkā / సుత్తపిటక (టీకా) • Suttapiṭaka (ṭīkā) / సంయుత్తనికాయ (టీకా) • Saṃyuttanikāya (ṭīkā) / ౧-౧౧. కాయగతాసతిసుత్తాదివణ్ణనా • 1-11. Kāyagatāsatisuttādivaṇṇanā
