| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
9. අසඞ්‌ඛතසංයුත්‌තං
9. Asaṅkhatasaṃyuttaṃ
1. පඨමවග්‌ගො
1. Paṭhamavaggo
1. කායගතාසතිසුත්‌තං
1. Kāyagatāsatisuttaṃ
366. සාවත්‌ථිනිදානං . ‘‘අසඞ්‌ඛතඤ්‌ච වො, භික්‌ඛවෙ, දෙසෙස්‌සාමි අසඞ්‌ඛතගාමිඤ්‌ච මග්‌ගං. තං සුණාථ. කතමඤ්‌ච, භික්‌ඛවෙ, අසඞ්‌ඛතං? යො, භික්‌ඛවෙ, රාගක්‌ඛයො දොසක්‌ඛයො මොහක්‌ඛයො – ඉදං වුච්‌චති, භික්‌ඛවෙ, අසඞ්‌ඛතං. කතමො ච, භික්‌ඛවෙ, අසඞ්‌ඛතගාමිමග්‌ගො? කායගතාසති. අයං වුච්‌චති, භික්‌ඛවෙ, අසඞ්‌ඛතගාමිමග්‌ගො’’.
366. Sāvatthinidānaṃ . ‘‘Asaṅkhatañca vo, bhikkhave, desessāmi asaṅkhatagāmiñca maggaṃ. Taṃ suṇātha. Katamañca, bhikkhave, asaṅkhataṃ? Yo, bhikkhave, rāgakkhayo dosakkhayo mohakkhayo – idaṃ vuccati, bhikkhave, asaṅkhataṃ. Katamo ca, bhikkhave, asaṅkhatagāmimaggo? Kāyagatāsati. Ayaṃ vuccati, bhikkhave, asaṅkhatagāmimaggo’’.
‘‘ඉති ඛො, භික්‌ඛවෙ, දෙසිතං වො මයා අසඞ්‌ඛතං, දෙසිතො අසඞ්‌ඛතගාමිමග්‌ගො. යං, භික්‌ඛවෙ, සත්‌ථාරා කරණීයං සාවකානං හිතෙසිනා අනුකම්‌පකෙන අනුකම්‌පං උපාදාය, කතං වො තං මයා. එතානි, භික්‌ඛවෙ, රුක්‌ඛමූලානි, එතානි සුඤ්‌ඤාගාරානි. ඣායථ 1, භික්‌ඛවෙ, මා පමාදත්‌ථ; මා පච්‌ඡා විප්‌පටිසාරිනො අහුවත්‌ථ. අයං වො අම්‌හාකං අනුසාසනී’’ති. පඨමං.
‘‘Iti kho, bhikkhave, desitaṃ vo mayā asaṅkhataṃ, desito asaṅkhatagāmimaggo. Yaṃ, bhikkhave, satthārā karaṇīyaṃ sāvakānaṃ hitesinā anukampakena anukampaṃ upādāya, kataṃ vo taṃ mayā. Etāni, bhikkhave, rukkhamūlāni, etāni suññāgārāni. Jhāyatha 2, bhikkhave, mā pamādattha; mā pacchā vippaṭisārino ahuvattha. Ayaṃ vo amhākaṃ anusāsanī’’ti. Paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1-11. කායගතාසතිසුත්‌තාදිවණ්‌ණනා • 1-11. Kāyagatāsatisuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1-11. කායගතාසතිසුත්‌තාදිවණ්‌ණනා • 1-11. Kāyagatāsatisuttādivaṇṇanā
