| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৯. কাযগতাসতিসুত্তৰণ্ণনা
9. Kāyagatāsatisuttavaṇṇanā
১৫৩-৪. এৰং মে সুতন্তি কাযগতাসতিসুত্তং। তত্থ গেহসিতাতি পঞ্চকামগুণনিস্সিতা। সরসঙ্কপ্পাতি ধাৰনসঙ্কপ্পা। সরন্তীতি হি সরা, ধাৰন্তীতি অত্থো। অজ্ঝত্তমেৰাতি গোচরজ্ঝত্তস্মিংযেৰ। কাযগতাসতিন্তি কাযপরিগ্গাহিকম্পি কাযারম্মণম্পি সতিং। কাযপরিগ্গাহিকন্তি ৰুত্তে সমথো কথিতো হোতি, কাযারম্মণন্তি ৰুত্তে ৰিপস্সনা। উভযেন সমথৰিপস্সনা কথিতা হোন্তি।
153-4.Evaṃme sutanti kāyagatāsatisuttaṃ. Tattha gehasitāti pañcakāmaguṇanissitā. Sarasaṅkappāti dhāvanasaṅkappā. Sarantīti hi sarā, dhāvantīti attho. Ajjhattamevāti gocarajjhattasmiṃyeva. Kāyagatāsatinti kāyapariggāhikampi kāyārammaṇampi satiṃ. Kāyapariggāhikanti vutte samatho kathito hoti, kāyārammaṇanti vutte vipassanā. Ubhayena samathavipassanā kathitā honti.
পুন চপরং…পে॰… এৰম্পি, ভিক্খৰে, ভিক্খু কাযগতাসতিং ভাৰেতীতি সতিপট্ঠানে চুদ্দসৰিধেন কাযানুপস্সনা কথিতা।
Puna caparaṃ…pe… evampi, bhikkhave, bhikkhu kāyagatāsatiṃ bhāvetīti satipaṭṭhāne cuddasavidhena kāyānupassanā kathitā.
১৫৬. অন্তোগধাৰাস্সাতি তস্স ভিক্খুনো ভাৰনায অব্ভন্তরগতাৰ হোন্তি। ৰিজ্জাভাগিযাতি এত্থ সম্পযোগৰসেন ৰিজ্জং ভজন্তীতি ৰিজ্জাভাগিযা। ৰিজ্জাভাগে ৰিজ্জাকোট্ঠাসে ৰত্তন্তীতিপি ৰিজ্জাভাগিযা। তত্থ ৰিপস্সনাঞাণং, মনোমযিদ্ধি, ছ অভিঞ্ঞাতি অট্ঠ ৰিজ্জা। পুরিমেন অত্থেন তাহি সম্পযুত্তধম্মাপি ৰিজ্জাভাগিযা। পচ্ছিমেন অত্থেন তাসু যা কাচি একা ৰিজ্জা ৰিজ্জা, সেসা ৰিজ্জাভাগিযাতি এৰং ৰিজ্জাপি ৰিজ্জায সম্পযুত্তা ধম্মাপি ৰিজ্জাভাগিযাতেৰ ৰেদিতব্বা। চেতসা ফুটোতি এত্থ দুৰিধং ফরণং আপোফরণঞ্চ, দিব্বচক্খুফরণঞ্চ, তত্থ আপোকসিণং সমাপজ্জিত্ৰা আপেন ফরণং আপোফরণং নাম। এৰং ফুটেপি মহাসমুদ্দে সব্বা সমুদ্দঙ্গমা কুন্নদিযো অন্তোগধাৰ হোন্তি, আলোকং পন ৰড্ঢেত্ৰা দিব্বচক্খুনা সকলসমুদ্দস্স দস্সনং দিব্বচক্খুফরণং নাম। এৰং ফরণেপি মহাসমুদ্দে সব্বা সমুদ্দঙ্গমা কুন্নদিযো অন্তোগধাৰ হোন্তি।
156.Antogadhāvāssāti tassa bhikkhuno bhāvanāya abbhantaragatāva honti. Vijjābhāgiyāti ettha sampayogavasena vijjaṃ bhajantīti vijjābhāgiyā. Vijjābhāge vijjākoṭṭhāse vattantītipi vijjābhāgiyā. Tattha vipassanāñāṇaṃ, manomayiddhi, cha abhiññāti aṭṭha vijjā. Purimena atthena tāhi sampayuttadhammāpi vijjābhāgiyā. Pacchimena atthena tāsu yā kāci ekā vijjā vijjā, sesā vijjābhāgiyāti evaṃ vijjāpi vijjāya sampayuttā dhammāpi vijjābhāgiyāteva veditabbā. Cetasā phuṭoti ettha duvidhaṃ pharaṇaṃ āpopharaṇañca, dibbacakkhupharaṇañca, tattha āpokasiṇaṃ samāpajjitvā āpena pharaṇaṃ āpopharaṇaṃ nāma. Evaṃ phuṭepi mahāsamudde sabbā samuddaṅgamā kunnadiyo antogadhāva honti, ālokaṃ pana vaḍḍhetvā dibbacakkhunā sakalasamuddassa dassanaṃ dibbacakkhupharaṇaṃ nāma. Evaṃ pharaṇepi mahāsamudde sabbā samuddaṅgamā kunnadiyo antogadhāva honti.
ওতারন্তি ৰিৰরং ছিদ্দং। আরম্মণন্তি কিলেসুপ্পত্তিপচ্চযং। লভেথ ওতারন্তি লভেয্য পৰেসনং, ৰিনিৰিজ্ঝিত্ৰা যাৰ পরিযোসানা গচ্ছেয্যাতি অত্থো। নিক্খেপনন্তি নিক্খিপনট্ঠানং।
Otāranti vivaraṃ chiddaṃ. Ārammaṇanti kilesuppattipaccayaṃ. Labhetha otāranti labheyya pavesanaṃ, vinivijjhitvā yāva pariyosānā gaccheyyāti attho. Nikkhepananti nikkhipanaṭṭhānaṃ.
১৫৭. এৰং অভাৰিতকাযগতাসতিং পুগ্গলং অল্লমত্তিকপুঞ্জাদীহি উপমেত্ৰা ইদানি ভাৰিতকাযগতাসতিং সারফলকাদীহি উপমেতুং সেয্যথাপীতিআদিমাহ। তত্থ অগ্গল়ফলকন্তি কৰাটং।
157. Evaṃ abhāvitakāyagatāsatiṃ puggalaṃ allamattikapuñjādīhi upametvā idāni bhāvitakāyagatāsatiṃ sāraphalakādīhi upametuṃ seyyathāpītiādimāha. Tattha aggaḷaphalakanti kavāṭaṃ.
১৫৮. কাকপেয্যোতি মুখৰট্টিযং নিসীদিত্ৰা কাকেন গীৰং অনামেত্ৰাৰ পাতব্বো। অভিঞ্ঞাসচ্ছিকরণীযস্সাতি অভিঞ্ঞায সচ্ছিকাতব্বস্স। সক্খিভব্বতং পাপুণাতীতি পচ্চক্খভাৰং পাপুণাতি। সতি সতি আযতনেতি সতিসতি কারণে। কিং পনেত্থ কারণন্তি? অভিঞ্ঞাৰ কারণং। আল়িবন্ধাতি মরিযাদবদ্ধা।
158.Kākapeyyoti mukhavaṭṭiyaṃ nisīditvā kākena gīvaṃ anāmetvāva pātabbo. Abhiññāsacchikaraṇīyassāti abhiññāya sacchikātabbassa. Sakkhibhabbataṃpāpuṇātīti paccakkhabhāvaṃ pāpuṇāti. Sati sati āyataneti satisati kāraṇe. Kiṃ panettha kāraṇanti? Abhiññāva kāraṇaṃ. Āḷibandhāti mariyādabaddhā.
যানীকতাযাতি যুত্তযানং ৰিয কতায। ৰত্থুকতাযাতি পতিট্ঠাকতায। অনুট্ঠিতাযাতি অনুপ্পৰত্তিতায। পরিচিতাযাতি পরিচযকতায। সুসমারদ্ধাযাতি সুট্ঠু সমারদ্ধায সুসম্পগ্গহিতায। সেসং সব্বত্থ উত্তানমেৰাতি।
Yānīkatāyāti yuttayānaṃ viya katāya. Vatthukatāyāti patiṭṭhākatāya. Anuṭṭhitāyāti anuppavattitāya. Paricitāyāti paricayakatāya. Susamāraddhāyāti suṭṭhu samāraddhāya susampaggahitāya. Sesaṃ sabbattha uttānamevāti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
কাযগতাসতিসুত্তৰণ্ণনা নিট্ঠিতা।
Kāyagatāsatisuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৯. কাযগতাসতিসুত্তং • 9. Kāyagatāsatisuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৯. কাযগতাসতিসুত্তৰণ্ণনা • 9. Kāyagatāsatisuttavaṇṇanā
