| Library / Tipiṭaka / তিপিটক • Tipiṭaka / মজ্ঝিমনিকায (টীকা) • Majjhimanikāya (ṭīkā) |
৯. কাযগতাসতিসুত্তৰণ্ণনা
9. Kāyagatāsatisuttavaṇṇanā
১৫৩-৪. তপ্পটিসরণানং কামাৰচরসত্তানং পটিসরণট্ঠেন গেহা কামগুণা, গেহে সিতা আরব্ভ পৰত্তিযা অল্লীনাতি গেহস্সিতা। সরন্তীতি ৰেগসা পৰত্তন্তি। ৰেগেন হি পৰত্তি ধাৰতীতি ৰুচ্চতি। সঙ্কপ্পাতি যে কেচি মিচ্ছাসঙ্কপ্পা, ব্যাপাদৰিহিংসাসঙ্কপ্পাদযোপি কামগুণসিতা এৰাতি। গোচরজ্ঝত্তস্মিংযেৰাতি পরিগ্গহিতে কম্মট্ঠানে এৰ ৰত্তন্তি। তঞ্হি ধম্মৰসেন উপট্ঠিতায ভাৰনায গোচরভাৰতো ‘‘গোচরজ্ঝত্ত’’ন্তি ৰুত্তং। অস্সাসপস্সাসকাযে গতা পৰত্তাতি কাযগতা, তং কাযগতাসতিং। সতিসীসেন তংসহগতে ভাৰনাধম্মে ৰদতি অস্সাসপস্সাসকাযাদিকে তংতংকোট্ঠাসে সমথৰত্থুভাৰেন পরিগ্গহেত্ৰা সতিযা পরিগ্গহিতত্তা; তথাপরিগ্গহিতে ৰা তে আরব্ভ অনিচ্চাদিমনসিকারৰসেন পৰত্তা কাযারম্মণা সতী সতিভাৰেন ৰত্ৰা একজ্ঝং দস্সেন্তো ‘‘কাযপরিগ্গাহিক’’ন্তিআদিমাহ।
153-4. Tappaṭisaraṇānaṃ kāmāvacarasattānaṃ paṭisaraṇaṭṭhena gehā kāmaguṇā, gehe sitā ārabbha pavattiyā allīnāti gehassitā. Sarantīti vegasā pavattanti. Vegena hi pavatti dhāvatīti vuccati. Saṅkappāti ye keci micchāsaṅkappā, byāpādavihiṃsāsaṅkappādayopi kāmaguṇasitā evāti. Gocarajjhattasmiṃyevāti pariggahite kammaṭṭhāne eva vattanti. Tañhi dhammavasena upaṭṭhitāya bhāvanāya gocarabhāvato ‘‘gocarajjhatta’’nti vuttaṃ. Assāsapassāsakāye gatā pavattāti kāyagatā, taṃ kāyagatāsatiṃ. Satisīsena taṃsahagate bhāvanādhamme vadati assāsapassāsakāyādike taṃtaṃkoṭṭhāse samathavatthubhāvena pariggahetvā satiyā pariggahitattā; tathāpariggahite vā te ārabbha aniccādimanasikāravasena pavattā kāyārammaṇā satī satibhāvena vatvā ekajjhaṃ dassento ‘‘kāyapariggāhika’’ntiādimāha.
সতিপট্ঠানেতি মহাসতিপট্ঠানসুত্তে (দী॰ নি॰ ২.৩৭৮; ম॰ নি॰ ১.১১১), চুদ্দসৰিধেন কাযানুপস্সনা কথিতা, চুণ্ণকজাতানি অট্ঠিকানি পরিযোসানং কত্ৰা কাযানুপস্সনা নিদ্দিট্ঠা, ইধ পন কেসাদীসু ৰণ্ণকসিণৰসেন নিব্বত্তিতানং চতুন্নং ঝানানং ৰসেন উপরিদেসনায ৰড্ঢিতত্তা অট্ঠারসৰিধেন কাযগতাসতিভাৰনা।
Satipaṭṭhāneti mahāsatipaṭṭhānasutte (dī. ni. 2.378; ma. ni. 1.111), cuddasavidhena kāyānupassanā kathitā, cuṇṇakajātāni aṭṭhikāni pariyosānaṃ katvā kāyānupassanā niddiṭṭhā, idha pana kesādīsu vaṇṇakasiṇavasena nibbattitānaṃ catunnaṃ jhānānaṃ vasena uparidesanāya vaḍḍhitattā aṭṭhārasavidhena kāyagatāsatibhāvanā.
১৫৬. তস্স ভিক্খুনোতি যো কাযগতাসতিভাৰনায ৰসীভূতো, তস্স ভিক্খুনো। সম্পযোগৰসেন ৰিজ্জং ভজন্তীতি সহজাত-অঞ্ঞমঞ্ঞ-নিস্সয-সম্পযুত্ত-অত্থি-অৰিগতপচ্চযৰসেন ৰিজ্জং ভজন্তি, তায সহ একীভাৰমিৰ গচ্ছন্তীতি অত্থো। ৰিজ্জাভাগে ৰিজ্জাকোট্ঠাসে ৰত্তন্তীতি ৰিজ্জাসভাগতায তদেকদেসে ৰিজ্জাকোট্ঠাসে ৰত্তন্তি। তাহি সম্পযুত্তধম্মা ফস্সাদযো। ননু চেত্থ ৰিজ্জানং ৰিজ্জাভাগিযতা ন সম্ভৰতীতি? নো ন সম্ভৰতি। যায হি ৰিজ্জায ৰিজ্জাসম্পযুত্তানং ৰিজ্জাভাগিযতা, সা তংনিমিত্তায ৰিজ্জায উপচরীযতীতি। একা ৰিজ্জা ৰিজ্জা, সেসা ৰিজ্জাভাগিযাতি অট্ঠসু ৰিজ্জাসু একং ‘‘ৰিজ্জা’’তি গহেত্ৰা ইতরা তস্সা ভাগতায ‘‘ৰিজ্জাভাগিযা’’তি ৰেদিতব্বা। সদ্ধিং পৰত্তনসভাৰাসু অযমেৰ ৰিজ্জাতি ৰত্তব্বাতি নিযমস্স অভাৰতো ৰিজ্জাভাগো ৰিয ৰিজ্জাভাগিযাপি পৰত্ততি এৰাতি ৰত্তব্বং। আপোফরণন্তি পটিভাগনিমিত্তভূতেন আপোকসিণেন সব্বসো মহাসমুদ্দফরণং আপোফরণং নাম। দিব্বচক্খুঞাণস্স কিচ্চং ফরণন্তি কত্ৰা, দিব্বচক্খুঅত্থং ৰা আলোকফরণং দিব্বচক্খুফরণন্তি দট্ঠব্বং। উভযস্মিম্পি পক্খে সমুদ্দঙ্গমানং কুন্নদীনং সমুদ্দন্তোগধত্তা তেসং চেতসা ফুটতা ৰেদিতব্বা। কুন্নদিগ্গহণঞ্চেত্থ কঞ্চিমেৰ কালং সন্দিত্ৰা তাসং উদকস্স সমুদ্দপরিযাপন্নভাৰূপগমনত্তা, ন বহি মহানদিযো ৰিয পরিত্তকালট্ঠিতিকাতি।
156.Tassa bhikkhunoti yo kāyagatāsatibhāvanāya vasībhūto, tassa bhikkhuno. Sampayogavasena vijjaṃ bhajantīti sahajāta-aññamañña-nissaya-sampayutta-atthi-avigatapaccayavasena vijjaṃ bhajanti, tāya saha ekībhāvamiva gacchantīti attho. Vijjābhāge vijjākoṭṭhāsevattantīti vijjāsabhāgatāya tadekadese vijjākoṭṭhāse vattanti. Tāhi sampayuttadhammā phassādayo. Nanu cettha vijjānaṃ vijjābhāgiyatā na sambhavatīti? No na sambhavati. Yāya hi vijjāya vijjāsampayuttānaṃ vijjābhāgiyatā, sā taṃnimittāya vijjāya upacarīyatīti. Ekā vijjā vijjā, sesā vijjābhāgiyāti aṭṭhasu vijjāsu ekaṃ ‘‘vijjā’’ti gahetvā itarā tassā bhāgatāya ‘‘vijjābhāgiyā’’ti veditabbā. Saddhiṃ pavattanasabhāvāsu ayameva vijjāti vattabbāti niyamassa abhāvato vijjābhāgo viya vijjābhāgiyāpi pavattati evāti vattabbaṃ. Āpopharaṇanti paṭibhāganimittabhūtena āpokasiṇena sabbaso mahāsamuddapharaṇaṃ āpopharaṇaṃ nāma. Dibbacakkhuñāṇassa kiccaṃ pharaṇanti katvā, dibbacakkhuatthaṃ vā ālokapharaṇaṃ dibbacakkhupharaṇanti daṭṭhabbaṃ. Ubhayasmimpi pakkhe samuddaṅgamānaṃ kunnadīnaṃ samuddantogadhattā tesaṃ cetasā phuṭatā veditabbā. Kunnadiggahaṇañcettha kañcimeva kālaṃ sanditvā tāsaṃ udakassa samuddapariyāpannabhāvūpagamanattā, na bahi mahānadiyo viya parittakālaṭṭhitikāti.
ওতারন্তি কিলেসুপ্পত্তিযা অৰসরং, তং পন ৰিৰরং ছিদ্দন্তি চ ৰুত্তং। আরম্মণন্তি কিলেসুপ্পত্তিযা ওলম্বনং। যাৰ পরিযোসানাতি মত্তিকাপুঞ্জস্স যাৰ পরিযোসানা।
Otāranti kilesuppattiyā avasaraṃ, taṃ pana vivaraṃ chiddanti ca vuttaṃ. Ārammaṇanti kilesuppattiyā olambanaṃ. Yāva pariyosānāti mattikāpuñjassa yāva pariyosānā.
১৫৮. অভিঞ্ঞাযাতি ইদ্ধিৰিধাদিঅভিঞ্ঞায। সচ্ছিকাতব্বস্সাতি পচ্চক্খতো কাতব্বস্স অধিট্ঠানৰিকুব্বনাদিধম্মস্স। অভিঞ্ঞাৰ কারণন্তি আহ – ‘‘সচ্ছিকিরিযাপেক্খায, অভিঞ্ঞাকারণস্স পন সিদ্ধিযা পাকটা’’তি। মরিযাদবদ্ধাতি উদকমাতিকামুখে কতা।
158.Abhiññāyāti iddhividhādiabhiññāya. Sacchikātabbassāti paccakkhato kātabbassa adhiṭṭhānavikubbanādidhammassa. Abhiññāva kāraṇanti āha – ‘‘sacchikiriyāpekkhāya, abhiññākāraṇassa pana siddhiyā pākaṭā’’ti. Mariyādabaddhāti udakamātikāmukhe katā.
যুত্তযানং ৰিয কতায ইচ্ছিতিচ্ছিতে কালে সুখেন পচ্চৰেক্খিতব্বত্তা। পতিট্ঠাকতাযাতি সম্পত্তীনং পতিট্ঠাভাৰং পাপিতায। অনুপ্পৰত্তিতাযাতি ভাৰনাবহুলীকারেহি অনুপ্পৰত্তিতায। পরিচযকতাযাতি আসেৰনদল়্হতায সুচিরং পরিচযায। সুসম্পগ্গহিতাযাতি সব্বসো উক্কংসং পাপিতায। সুসমারদ্ধাযাতি অতিৰিয সম্মদেৰ নিব্বত্তিকতায। সেসং সুৰিঞ্ঞেয্যমেৰ।
Yuttayānaṃ viya katāya icchiticchite kāle sukhena paccavekkhitabbattā. Patiṭṭhākatāyāti sampattīnaṃ patiṭṭhābhāvaṃ pāpitāya. Anuppavattitāyāti bhāvanābahulīkārehi anuppavattitāya. Paricayakatāyāti āsevanadaḷhatāya suciraṃ paricayāya. Susampaggahitāyāti sabbaso ukkaṃsaṃ pāpitāya. Susamāraddhāyāti ativiya sammadeva nibbattikatāya. Sesaṃ suviññeyyameva.
কাযগতাসতিসুত্তৰণ্ণনায লীনত্থপ্পকাসনা সমত্তা।
Kāyagatāsatisuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৯. কাযগতাসতিসুত্তং • 9. Kāyagatāsatisuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৯. কাযগতাসতিসুত্তৰণ্ণনা • 9. Kāyagatāsatisuttavaṇṇanā
