| Library / Tipiṭaka / ತಿಪಿಟಕ • Tipiṭaka / ಮಜ್ಝಿಮನಿಕಾಯ (ಅಟ್ಠಕಥಾ) • Majjhimanikāya (aṭṭhakathā) |
೯. ಕಾಯಗತಾಸತಿಸುತ್ತವಣ್ಣನಾ
9. Kāyagatāsatisuttavaṇṇanā
೧೫೩-೪. ಏವಂ ಮೇ ಸುತನ್ತಿ ಕಾಯಗತಾಸತಿಸುತ್ತಂ। ತತ್ಥ ಗೇಹಸಿತಾತಿ ಪಞ್ಚಕಾಮಗುಣನಿಸ್ಸಿತಾ। ಸರಸಙ್ಕಪ್ಪಾತಿ ಧಾವನಸಙ್ಕಪ್ಪಾ। ಸರನ್ತೀತಿ ಹಿ ಸರಾ, ಧಾವನ್ತೀತಿ ಅತ್ಥೋ। ಅಜ್ಝತ್ತಮೇವಾತಿ ಗೋಚರಜ್ಝತ್ತಸ್ಮಿಂಯೇವ। ಕಾಯಗತಾಸತಿನ್ತಿ ಕಾಯಪರಿಗ್ಗಾಹಿಕಮ್ಪಿ ಕಾಯಾರಮ್ಮಣಮ್ಪಿ ಸತಿಂ। ಕಾಯಪರಿಗ್ಗಾಹಿಕನ್ತಿ ವುತ್ತೇ ಸಮಥೋ ಕಥಿತೋ ಹೋತಿ, ಕಾಯಾರಮ್ಮಣನ್ತಿ ವುತ್ತೇ ವಿಪಸ್ಸನಾ। ಉಭಯೇನ ಸಮಥವಿಪಸ್ಸನಾ ಕಥಿತಾ ಹೋನ್ತಿ।
153-4.Evaṃme sutanti kāyagatāsatisuttaṃ. Tattha gehasitāti pañcakāmaguṇanissitā. Sarasaṅkappāti dhāvanasaṅkappā. Sarantīti hi sarā, dhāvantīti attho. Ajjhattamevāti gocarajjhattasmiṃyeva. Kāyagatāsatinti kāyapariggāhikampi kāyārammaṇampi satiṃ. Kāyapariggāhikanti vutte samatho kathito hoti, kāyārammaṇanti vutte vipassanā. Ubhayena samathavipassanā kathitā honti.
ಪುನ ಚಪರಂ…ಪೇ॰… ಏವಮ್ಪಿ, ಭಿಕ್ಖವೇ, ಭಿಕ್ಖು ಕಾಯಗತಾಸತಿಂ ಭಾವೇತೀತಿ ಸತಿಪಟ್ಠಾನೇ ಚುದ್ದಸವಿಧೇನ ಕಾಯಾನುಪಸ್ಸನಾ ಕಥಿತಾ।
Puna caparaṃ…pe… evampi, bhikkhave, bhikkhu kāyagatāsatiṃ bhāvetīti satipaṭṭhāne cuddasavidhena kāyānupassanā kathitā.
೧೫೬. ಅನ್ತೋಗಧಾವಾಸ್ಸಾತಿ ತಸ್ಸ ಭಿಕ್ಖುನೋ ಭಾವನಾಯ ಅಬ್ಭನ್ತರಗತಾವ ಹೋನ್ತಿ। ವಿಜ್ಜಾಭಾಗಿಯಾತಿ ಏತ್ಥ ಸಮ್ಪಯೋಗವಸೇನ ವಿಜ್ಜಂ ಭಜನ್ತೀತಿ ವಿಜ್ಜಾಭಾಗಿಯಾ। ವಿಜ್ಜಾಭಾಗೇ ವಿಜ್ಜಾಕೋಟ್ಠಾಸೇ ವತ್ತನ್ತೀತಿಪಿ ವಿಜ್ಜಾಭಾಗಿಯಾ। ತತ್ಥ ವಿಪಸ್ಸನಾಞಾಣಂ, ಮನೋಮಯಿದ್ಧಿ, ಛ ಅಭಿಞ್ಞಾತಿ ಅಟ್ಠ ವಿಜ್ಜಾ। ಪುರಿಮೇನ ಅತ್ಥೇನ ತಾಹಿ ಸಮ್ಪಯುತ್ತಧಮ್ಮಾಪಿ ವಿಜ್ಜಾಭಾಗಿಯಾ। ಪಚ್ಛಿಮೇನ ಅತ್ಥೇನ ತಾಸು ಯಾ ಕಾಚಿ ಏಕಾ ವಿಜ್ಜಾ ವಿಜ್ಜಾ, ಸೇಸಾ ವಿಜ್ಜಾಭಾಗಿಯಾತಿ ಏವಂ ವಿಜ್ಜಾಪಿ ವಿಜ್ಜಾಯ ಸಮ್ಪಯುತ್ತಾ ಧಮ್ಮಾಪಿ ವಿಜ್ಜಾಭಾಗಿಯಾತೇವ ವೇದಿತಬ್ಬಾ। ಚೇತಸಾ ಫುಟೋತಿ ಏತ್ಥ ದುವಿಧಂ ಫರಣಂ ಆಪೋಫರಣಞ್ಚ, ದಿಬ್ಬಚಕ್ಖುಫರಣಞ್ಚ, ತತ್ಥ ಆಪೋಕಸಿಣಂ ಸಮಾಪಜ್ಜಿತ್ವಾ ಆಪೇನ ಫರಣಂ ಆಪೋಫರಣಂ ನಾಮ। ಏವಂ ಫುಟೇಪಿ ಮಹಾಸಮುದ್ದೇ ಸಬ್ಬಾ ಸಮುದ್ದಙ್ಗಮಾ ಕುನ್ನದಿಯೋ ಅನ್ತೋಗಧಾವ ಹೋನ್ತಿ, ಆಲೋಕಂ ಪನ ವಡ್ಢೇತ್ವಾ ದಿಬ್ಬಚಕ್ಖುನಾ ಸಕಲಸಮುದ್ದಸ್ಸ ದಸ್ಸನಂ ದಿಬ್ಬಚಕ್ಖುಫರಣಂ ನಾಮ। ಏವಂ ಫರಣೇಪಿ ಮಹಾಸಮುದ್ದೇ ಸಬ್ಬಾ ಸಮುದ್ದಙ್ಗಮಾ ಕುನ್ನದಿಯೋ ಅನ್ತೋಗಧಾವ ಹೋನ್ತಿ।
156.Antogadhāvāssāti tassa bhikkhuno bhāvanāya abbhantaragatāva honti. Vijjābhāgiyāti ettha sampayogavasena vijjaṃ bhajantīti vijjābhāgiyā. Vijjābhāge vijjākoṭṭhāse vattantītipi vijjābhāgiyā. Tattha vipassanāñāṇaṃ, manomayiddhi, cha abhiññāti aṭṭha vijjā. Purimena atthena tāhi sampayuttadhammāpi vijjābhāgiyā. Pacchimena atthena tāsu yā kāci ekā vijjā vijjā, sesā vijjābhāgiyāti evaṃ vijjāpi vijjāya sampayuttā dhammāpi vijjābhāgiyāteva veditabbā. Cetasā phuṭoti ettha duvidhaṃ pharaṇaṃ āpopharaṇañca, dibbacakkhupharaṇañca, tattha āpokasiṇaṃ samāpajjitvā āpena pharaṇaṃ āpopharaṇaṃ nāma. Evaṃ phuṭepi mahāsamudde sabbā samuddaṅgamā kunnadiyo antogadhāva honti, ālokaṃ pana vaḍḍhetvā dibbacakkhunā sakalasamuddassa dassanaṃ dibbacakkhupharaṇaṃ nāma. Evaṃ pharaṇepi mahāsamudde sabbā samuddaṅgamā kunnadiyo antogadhāva honti.
ಓತಾರನ್ತಿ ವಿವರಂ ಛಿದ್ದಂ। ಆರಮ್ಮಣನ್ತಿ ಕಿಲೇಸುಪ್ಪತ್ತಿಪಚ್ಚಯಂ। ಲಭೇಥ ಓತಾರನ್ತಿ ಲಭೇಯ್ಯ ಪವೇಸನಂ, ವಿನಿವಿಜ್ಝಿತ್ವಾ ಯಾವ ಪರಿಯೋಸಾನಾ ಗಚ್ಛೇಯ್ಯಾತಿ ಅತ್ಥೋ। ನಿಕ್ಖೇಪನನ್ತಿ ನಿಕ್ಖಿಪನಟ್ಠಾನಂ।
Otāranti vivaraṃ chiddaṃ. Ārammaṇanti kilesuppattipaccayaṃ. Labhetha otāranti labheyya pavesanaṃ, vinivijjhitvā yāva pariyosānā gaccheyyāti attho. Nikkhepananti nikkhipanaṭṭhānaṃ.
೧೫೭. ಏವಂ ಅಭಾವಿತಕಾಯಗತಾಸತಿಂ ಪುಗ್ಗಲಂ ಅಲ್ಲಮತ್ತಿಕಪುಞ್ಜಾದೀಹಿ ಉಪಮೇತ್ವಾ ಇದಾನಿ ಭಾವಿತಕಾಯಗತಾಸತಿಂ ಸಾರಫಲಕಾದೀಹಿ ಉಪಮೇತುಂ ಸೇಯ್ಯಥಾಪೀತಿಆದಿಮಾಹ। ತತ್ಥ ಅಗ್ಗಳಫಲಕನ್ತಿ ಕವಾಟಂ।
157. Evaṃ abhāvitakāyagatāsatiṃ puggalaṃ allamattikapuñjādīhi upametvā idāni bhāvitakāyagatāsatiṃ sāraphalakādīhi upametuṃ seyyathāpītiādimāha. Tattha aggaḷaphalakanti kavāṭaṃ.
೧೫೮. ಕಾಕಪೇಯ್ಯೋತಿ ಮುಖವಟ್ಟಿಯಂ ನಿಸೀದಿತ್ವಾ ಕಾಕೇನ ಗೀವಂ ಅನಾಮೇತ್ವಾವ ಪಾತಬ್ಬೋ। ಅಭಿಞ್ಞಾಸಚ್ಛಿಕರಣೀಯಸ್ಸಾತಿ ಅಭಿಞ್ಞಾಯ ಸಚ್ಛಿಕಾತಬ್ಬಸ್ಸ। ಸಕ್ಖಿಭಬ್ಬತಂ ಪಾಪುಣಾತೀತಿ ಪಚ್ಚಕ್ಖಭಾವಂ ಪಾಪುಣಾತಿ। ಸತಿ ಸತಿ ಆಯತನೇತಿ ಸತಿಸತಿ ಕಾರಣೇ। ಕಿಂ ಪನೇತ್ಥ ಕಾರಣನ್ತಿ? ಅಭಿಞ್ಞಾವ ಕಾರಣಂ। ಆಳಿಬನ್ಧಾತಿ ಮರಿಯಾದಬದ್ಧಾ।
158.Kākapeyyoti mukhavaṭṭiyaṃ nisīditvā kākena gīvaṃ anāmetvāva pātabbo. Abhiññāsacchikaraṇīyassāti abhiññāya sacchikātabbassa. Sakkhibhabbataṃpāpuṇātīti paccakkhabhāvaṃ pāpuṇāti. Sati sati āyataneti satisati kāraṇe. Kiṃ panettha kāraṇanti? Abhiññāva kāraṇaṃ. Āḷibandhāti mariyādabaddhā.
ಯಾನೀಕತಾಯಾತಿ ಯುತ್ತಯಾನಂ ವಿಯ ಕತಾಯ। ವತ್ಥುಕತಾಯಾತಿ ಪತಿಟ್ಠಾಕತಾಯ। ಅನುಟ್ಠಿತಾಯಾತಿ ಅನುಪ್ಪವತ್ತಿತಾಯ। ಪರಿಚಿತಾಯಾತಿ ಪರಿಚಯಕತಾಯ। ಸುಸಮಾರದ್ಧಾಯಾತಿ ಸುಟ್ಠು ಸಮಾರದ್ಧಾಯ ಸುಸಮ್ಪಗ್ಗಹಿತಾಯ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।
Yānīkatāyāti yuttayānaṃ viya katāya. Vatthukatāyāti patiṭṭhākatāya. Anuṭṭhitāyāti anuppavattitāya. Paricitāyāti paricayakatāya. Susamāraddhāyāti suṭṭhu samāraddhāya susampaggahitāya. Sesaṃ sabbattha uttānamevāti.
ಪಪಞ್ಚಸೂದನಿಯಾ ಮಜ್ಝಿಮನಿಕಾಯಟ್ಠಕಥಾಯ
Papañcasūdaniyā majjhimanikāyaṭṭhakathāya
ಕಾಯಗತಾಸತಿಸುತ್ತವಣ್ಣನಾ ನಿಟ್ಠಿತಾ।
Kāyagatāsatisuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಮಜ್ಝಿಮನಿಕಾಯ • Majjhimanikāya / ೯. ಕಾಯಗತಾಸತಿಸುತ್ತಂ • 9. Kāyagatāsatisuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಮಜ್ಝಿಮನಿಕಾಯ (ಟೀಕಾ) • Majjhimanikāya (ṭīkā) / ೯. ಕಾಯಗತಾಸತಿಸುತ್ತವಣ್ಣನಾ • 9. Kāyagatāsatisuttavaṇṇanā
