| Library / Tipiṭaka / තිපිටක • Tipiṭaka / මජ්‌ඣිමනිකාය (අට්‌ඨකථා) • Majjhimanikāya (aṭṭhakathā) |
9. කායගතාසතිසුත්‌තවණ්‌ණනා
9. Kāyagatāsatisuttavaṇṇanā
153-4. එවං මෙ සුතන්‌ති කායගතාසතිසුත්‌තං. තත්‌ථ ගෙහසිතාති පඤ්‌චකාමගුණනිස්‌සිතා. සරසඞ්‌කප්‌පාති ධාවනසඞ්‌කප්‌පා. සරන්‌තීති හි සරා, ධාවන්‌තීති අත්‌ථො. අජ්‌ඣත්‌තමෙවාති ගොචරජ්‌ඣත්‌තස්‌මිංයෙව. කායගතාසතින්‌ති කායපරිග්‌ගාහිකම්‌පි කායාරම්‌මණම්‌පි සතිං. කායපරිග්‌ගාහිකන්‌ති වුත්‌තෙ සමථො කථිතො හොති, කායාරම්‌මණන්‌ති වුත්‌තෙ විපස්‌සනා. උභයෙන සමථවිපස්‌සනා කථිතා හොන්‌ති.
153-4.Evaṃme sutanti kāyagatāsatisuttaṃ. Tattha gehasitāti pañcakāmaguṇanissitā. Sarasaṅkappāti dhāvanasaṅkappā. Sarantīti hi sarā, dhāvantīti attho. Ajjhattamevāti gocarajjhattasmiṃyeva. Kāyagatāsatinti kāyapariggāhikampi kāyārammaṇampi satiṃ. Kāyapariggāhikanti vutte samatho kathito hoti, kāyārammaṇanti vutte vipassanā. Ubhayena samathavipassanā kathitā honti.
පුන චපරං…පෙ.… එවම්‌පි, භික්‌ඛවෙ, භික්‌ඛු කායගතාසතිං භාවෙතීති සතිපට්‌ඨානෙ චුද්‌දසවිධෙන කායානුපස්‌සනා කථිතා.
Puna caparaṃ…pe… evampi, bhikkhave, bhikkhu kāyagatāsatiṃ bhāvetīti satipaṭṭhāne cuddasavidhena kāyānupassanā kathitā.
156. අන්‌තොගධාවාස්‌සාති තස්‌ස භික්‌ඛුනො භාවනාය අබ්‌භන්‌තරගතාව හොන්‌ති. විජ්‌ජාභාගියාති එත්‌ථ සම්‌පයොගවසෙන විජ්‌ජං භජන්‌තීති විජ්‌ජාභාගියා. විජ්‌ජාභාගෙ විජ්‌ජාකොට්‌ඨාසෙ වත්‌තන්‌තීතිපි විජ්‌ජාභාගියා. තත්‌ථ විපස්‌සනාඤාණං, මනොමයිද්‌ධි, ඡ අභිඤ්‌ඤාති අට්‌ඨ විජ්‌ජා. පුරිමෙන අත්‌ථෙන තාහි සම්‌පයුත්‌තධම්‌මාපි විජ්‌ජාභාගියා. පච්‌ඡිමෙන අත්‌ථෙන තාසු යා කාචි එකා විජ්‌ජා විජ්‌ජා, සෙසා විජ්‌ජාභාගියාති එවං විජ්‌ජාපි විජ්‌ජාය සම්‌පයුත්‌තා ධම්‌මාපි විජ්‌ජාභාගියාතෙව වෙදිතබ්‌බා. චෙතසා ඵුටොති එත්‌ථ දුවිධං ඵරණං ආපොඵරණඤ්‌ච, දිබ්‌බචක්‌ඛුඵරණඤ්‌ච, තත්‌ථ ආපොකසිණං සමාපජ්‌ජිත්‌වා ආපෙන ඵරණං ආපොඵරණං නාම. එවං ඵුටෙපි මහාසමුද්‌දෙ සබ්‌බා සමුද්‌දඞ්‌ගමා කුන්‌නදියො අන්‌තොගධාව හොන්‌ති, ආලොකං පන වඩ්‌ඪෙත්‌වා දිබ්‌බචක්‌ඛුනා සකලසමුද්‌දස්‌ස දස්‌සනං දිබ්‌බචක්‌ඛුඵරණං නාම. එවං ඵරණෙපි මහාසමුද්‌දෙ සබ්‌බා සමුද්‌දඞ්‌ගමා කුන්‌නදියො අන්‌තොගධාව හොන්‌ති.
156.Antogadhāvāssāti tassa bhikkhuno bhāvanāya abbhantaragatāva honti. Vijjābhāgiyāti ettha sampayogavasena vijjaṃ bhajantīti vijjābhāgiyā. Vijjābhāge vijjākoṭṭhāse vattantītipi vijjābhāgiyā. Tattha vipassanāñāṇaṃ, manomayiddhi, cha abhiññāti aṭṭha vijjā. Purimena atthena tāhi sampayuttadhammāpi vijjābhāgiyā. Pacchimena atthena tāsu yā kāci ekā vijjā vijjā, sesā vijjābhāgiyāti evaṃ vijjāpi vijjāya sampayuttā dhammāpi vijjābhāgiyāteva veditabbā. Cetasā phuṭoti ettha duvidhaṃ pharaṇaṃ āpopharaṇañca, dibbacakkhupharaṇañca, tattha āpokasiṇaṃ samāpajjitvā āpena pharaṇaṃ āpopharaṇaṃ nāma. Evaṃ phuṭepi mahāsamudde sabbā samuddaṅgamā kunnadiyo antogadhāva honti, ālokaṃ pana vaḍḍhetvā dibbacakkhunā sakalasamuddassa dassanaṃ dibbacakkhupharaṇaṃ nāma. Evaṃ pharaṇepi mahāsamudde sabbā samuddaṅgamā kunnadiyo antogadhāva honti.
ඔතාරන්‌ති විවරං ඡිද්‌දං. ආරම්‌මණන්‌ති කිලෙසුප්‌පත්‌තිපච්‌චයං. ලභෙථ ඔතාරන්‌ති ලභෙය්‍ය පවෙසනං, විනිවිජ්‌ඣිත්‌වා යාව පරියොසානා ගච්‌ඡෙය්‍යාති අත්‌ථො. නික්‌ඛෙපනන්‌ති නික්‌ඛිපනට්‌ඨානං.
Otāranti vivaraṃ chiddaṃ. Ārammaṇanti kilesuppattipaccayaṃ. Labhetha otāranti labheyya pavesanaṃ, vinivijjhitvā yāva pariyosānā gaccheyyāti attho. Nikkhepananti nikkhipanaṭṭhānaṃ.
157. එවං අභාවිතකායගතාසතිං පුග්‌ගලං අල්‌ලමත්‌තිකපුඤ්‌ජාදීහි උපමෙත්‌වා ඉදානි භාවිතකායගතාසතිං සාරඵලකාදීහි උපමෙතුං සෙය්‍යථාපීතිආදිමාහ. තත්‌ථ අග්‌ගළඵලකන්‌ති කවාටං.
157. Evaṃ abhāvitakāyagatāsatiṃ puggalaṃ allamattikapuñjādīhi upametvā idāni bhāvitakāyagatāsatiṃ sāraphalakādīhi upametuṃ seyyathāpītiādimāha. Tattha aggaḷaphalakanti kavāṭaṃ.
158. කාකපෙය්‍යොති මුඛවට්‌ටියං නිසීදිත්‌වා කාකෙන ගීවං අනාමෙත්‌වාව පාතබ්‌බො. අභිඤ්‌ඤාසච්‌ඡිකරණීයස්‌සාති අභිඤ්‌ඤාය සච්‌ඡිකාතබ්‌බස්‌ස. සක්‌ඛිභබ්‌බතං පාපුණාතීති පච්‌චක්‌ඛභාවං පාපුණාති. සති සති ආයතනෙති සතිසති කාරණෙ. කිං පනෙත්‌ථ කාරණන්‌ති? අභිඤ්‌ඤාව කාරණං. ආළිබන්‌ධාති මරියාදබද්‌ධා.
158.Kākapeyyoti mukhavaṭṭiyaṃ nisīditvā kākena gīvaṃ anāmetvāva pātabbo. Abhiññāsacchikaraṇīyassāti abhiññāya sacchikātabbassa. Sakkhibhabbataṃpāpuṇātīti paccakkhabhāvaṃ pāpuṇāti. Sati sati āyataneti satisati kāraṇe. Kiṃ panettha kāraṇanti? Abhiññāva kāraṇaṃ. Āḷibandhāti mariyādabaddhā.
යානීකතායාති යුත්‌තයානං විය කතාය. වත්‌ථුකතායාති පතිට්‌ඨාකතාය. අනුට්‌ඨිතායාති අනුප්‌පවත්‌තිතාය. පරිචිතායාති පරිචයකතාය. සුසමාරද්‌ධායාති සුට්‌ඨු සමාරද්‌ධාය සුසම්‌පග්‌ගහිතාය. සෙසං සබ්‌බත්‌ථ උත්‌තානමෙවාති.
Yānīkatāyāti yuttayānaṃ viya katāya. Vatthukatāyāti patiṭṭhākatāya. Anuṭṭhitāyāti anuppavattitāya. Paricitāyāti paricayakatāya. Susamāraddhāyāti suṭṭhu samāraddhāya susampaggahitāya. Sesaṃ sabbattha uttānamevāti.
පපඤ්‌චසූදනියා මජ්‌ඣිමනිකායට්‌ඨකථාය
Papañcasūdaniyā majjhimanikāyaṭṭhakathāya
කායගතාසතිසුත්‌තවණ්‌ණනා නිට්‌ඨිතා.
Kāyagatāsatisuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / මජ්‌ඣිමනිකාය • Majjhimanikāya / 9. කායගතාසතිසුත්‌තං • 9. Kāyagatāsatisuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / මජ්‌ඣිමනිකාය (ටීකා) • Majjhimanikāya (ṭīkā) / 9. කායගතාසතිසුත්‌තවණ්‌ණනා • 9. Kāyagatāsatisuttavaṇṇanā
