| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) |
༩. ཀཱཡགཏཱསཏིསུཏྟཝཎྞནཱ
9. Kāyagatāsatisuttavaṇṇanā
༡༥༣-༤. ཨེཝཾ མེ སུཏནྟི ཀཱཡགཏཱསཏིསུཏྟཾ། ཏཏྠ གེཧསིཏཱཏི པཉྩཀཱམགུཎནིསྶིཏཱ། སརསངྐཔྤཱཏི དྷཱཝནསངྐཔྤཱ། སརནྟཱིཏི ཧི སརཱ, དྷཱཝནྟཱིཏི ཨཏྠོ། ཨཛ྄ཛྷཏྟམེཝཱཏི གོཙརཛ྄ཛྷཏྟསྨིཾཡེཝ། ཀཱཡགཏཱསཏིནྟི ཀཱཡཔརིགྒཱཧིཀམྤི ཀཱཡཱརམྨཎམྤི སཏིཾ། ཀཱཡཔརིགྒཱཧིཀནྟི ཝུཏྟེ སམཐོ ཀཐིཏོ ཧོཏི, ཀཱཡཱརམྨཎནྟི ཝུཏྟེ ཝིཔསྶནཱ། ཨུབྷཡེན སམཐཝིཔསྶནཱ ཀཐིཏཱ ཧོནྟི།
153-4.Evaṃme sutanti kāyagatāsatisuttaṃ. Tattha gehasitāti pañcakāmaguṇanissitā. Sarasaṅkappāti dhāvanasaṅkappā. Sarantīti hi sarā, dhāvantīti attho. Ajjhattamevāti gocarajjhattasmiṃyeva. Kāyagatāsatinti kāyapariggāhikampi kāyārammaṇampi satiṃ. Kāyapariggāhikanti vutte samatho kathito hoti, kāyārammaṇanti vutte vipassanā. Ubhayena samathavipassanā kathitā honti.
པུན ཙཔརཾ…པེ॰… ཨེཝམྤི, བྷིཀྑཝེ, བྷིཀྑུ ཀཱཡགཏཱསཏིཾ བྷཱཝེཏཱིཏི སཏིཔཊྛཱནེ ཙུདྡསཝིདྷེན ཀཱཡཱནུཔསྶནཱ ཀཐིཏཱ།
Puna caparaṃ…pe… evampi, bhikkhave, bhikkhu kāyagatāsatiṃ bhāvetīti satipaṭṭhāne cuddasavidhena kāyānupassanā kathitā.
༡༥༦. ཨནྟོགདྷཱཝཱསྶཱཏི ཏསྶ བྷིཀྑུནོ བྷཱཝནཱཡ ཨབྦྷནྟརགཏཱཝ ཧོནྟི། ཝིཛྫཱབྷཱགིཡཱཏི ཨེཏྠ སམྤཡོགཝསེན ཝིཛྫཾ བྷཛནྟཱིཏི ཝིཛྫཱབྷཱགིཡཱ། ཝིཛྫཱབྷཱགེ ཝིཛྫཱཀོཊྛཱསེ ཝཏྟནྟཱིཏིཔི ཝིཛྫཱབྷཱགིཡཱ། ཏཏྠ ཝིཔསྶནཱཉཱཎཾ, མནོམཡིདྡྷི, ཚ ཨབྷིཉྙཱཏི ཨཊྛ ཝིཛྫཱ། པུརིམེན ཨཏྠེན ཏཱཧི སམྤཡུཏྟདྷམྨཱཔི ཝིཛྫཱབྷཱགིཡཱ། པཙྪིམེན ཨཏྠེན ཏཱསུ ཡཱ ཀཱཙི ཨེཀཱ ཝིཛྫཱ ཝིཛྫཱ, སེསཱ ཝིཛྫཱབྷཱགིཡཱཏི ཨེཝཾ ཝིཛྫཱཔི ཝིཛྫཱཡ སམྤཡུཏྟཱ དྷམྨཱཔི ཝིཛྫཱབྷཱགིཡཱཏེཝ ཝེདིཏབྦཱ། ཙེཏསཱ ཕུཊོཏི ཨེཏྠ དུཝིདྷཾ ཕརཎཾ ཨཱཔོཕརཎཉྩ, དིབྦཙཀྑུཕརཎཉྩ, ཏཏྠ ཨཱཔོཀསིཎཾ སམཱཔཛྫིཏྭཱ ཨཱཔེན ཕརཎཾ ཨཱཔོཕརཎཾ ནཱམ། ཨེཝཾ ཕུཊེཔི མཧཱསམུདྡེ སབྦཱ སམུདྡངྒམཱ ཀུནྣདིཡོ ཨནྟོགདྷཱཝ ཧོནྟི, ཨཱལོཀཾ པན ཝཌྜྷེཏྭཱ དིབྦཙཀྑུནཱ སཀལསམུདྡསྶ དསྶནཾ དིབྦཙཀྑུཕརཎཾ ནཱམ། ཨེཝཾ ཕརཎེཔི མཧཱསམུདྡེ སབྦཱ སམུདྡངྒམཱ ཀུནྣདིཡོ ཨནྟོགདྷཱཝ ཧོནྟི།
156.Antogadhāvāssāti tassa bhikkhuno bhāvanāya abbhantaragatāva honti. Vijjābhāgiyāti ettha sampayogavasena vijjaṃ bhajantīti vijjābhāgiyā. Vijjābhāge vijjākoṭṭhāse vattantītipi vijjābhāgiyā. Tattha vipassanāñāṇaṃ, manomayiddhi, cha abhiññāti aṭṭha vijjā. Purimena atthena tāhi sampayuttadhammāpi vijjābhāgiyā. Pacchimena atthena tāsu yā kāci ekā vijjā vijjā, sesā vijjābhāgiyāti evaṃ vijjāpi vijjāya sampayuttā dhammāpi vijjābhāgiyāteva veditabbā. Cetasā phuṭoti ettha duvidhaṃ pharaṇaṃ āpopharaṇañca, dibbacakkhupharaṇañca, tattha āpokasiṇaṃ samāpajjitvā āpena pharaṇaṃ āpopharaṇaṃ nāma. Evaṃ phuṭepi mahāsamudde sabbā samuddaṅgamā kunnadiyo antogadhāva honti, ālokaṃ pana vaḍḍhetvā dibbacakkhunā sakalasamuddassa dassanaṃ dibbacakkhupharaṇaṃ nāma. Evaṃ pharaṇepi mahāsamudde sabbā samuddaṅgamā kunnadiyo antogadhāva honti.
ཨོཏཱརནྟི ཝིཝརཾ ཚིདྡཾ། ཨཱརམྨཎནྟི ཀིལེསུཔྤཏྟིཔཙྩཡཾ། ལབྷེཐ ཨོཏཱརནྟི ལབྷེཡྻ པཝེསནཾ, ཝིནིཝིཛ྄ཛྷིཏྭཱ ཡཱཝ པརིཡོསཱནཱ གཙྪེཡྻཱཏི ཨཏྠོ། ནིཀྑེཔནནྟི ནིཀྑིཔནཊྛཱནཾ།
Otāranti vivaraṃ chiddaṃ. Ārammaṇanti kilesuppattipaccayaṃ. Labhetha otāranti labheyya pavesanaṃ, vinivijjhitvā yāva pariyosānā gaccheyyāti attho. Nikkhepananti nikkhipanaṭṭhānaṃ.
༡༥༧. ཨེཝཾ ཨབྷཱཝིཏཀཱཡགཏཱསཏིཾ པུགྒལཾ ཨལླམཏྟིཀཔུཉྫཱདཱིཧི ཨུཔམེཏྭཱ ཨིདཱནི བྷཱཝིཏཀཱཡགཏཱསཏིཾ སཱརཕལཀཱདཱིཧི ཨུཔམེཏུཾ སེཡྻཐཱཔཱིཏིཨཱདིམཱཧ། ཏཏྠ ཨགྒལ༹ཕལཀནྟི ཀཝཱཊཾ།
157. Evaṃ abhāvitakāyagatāsatiṃ puggalaṃ allamattikapuñjādīhi upametvā idāni bhāvitakāyagatāsatiṃ sāraphalakādīhi upametuṃ seyyathāpītiādimāha. Tattha aggaḷaphalakanti kavāṭaṃ.
༡༥༨. ཀཱཀཔེཡྻོཏི མུཁཝཊྚིཡཾ ནིསཱིདིཏྭཱ ཀཱཀེན གཱིཝཾ ཨནཱམེཏྭཱཝ པཱཏབྦོ། ཨབྷིཉྙཱསཙྪིཀརཎཱིཡསྶཱཏི ཨབྷིཉྙཱཡ སཙྪིཀཱཏབྦསྶ། སཀྑིབྷབྦཏཾ པཱཔུཎཱཏཱིཏི པཙྩཀྑབྷཱཝཾ པཱཔུཎཱཏི། སཏི སཏི ཨཱཡཏནེཏི སཏིསཏི ཀཱརཎེ། ཀིཾ པནེཏྠ ཀཱརཎནྟི? ཨབྷིཉྙཱཝ ཀཱརཎཾ། ཨཱལི༹བནྡྷཱཏི མརིཡཱདབདྡྷཱ།
158.Kākapeyyoti mukhavaṭṭiyaṃ nisīditvā kākena gīvaṃ anāmetvāva pātabbo. Abhiññāsacchikaraṇīyassāti abhiññāya sacchikātabbassa. Sakkhibhabbataṃpāpuṇātīti paccakkhabhāvaṃ pāpuṇāti. Sati sati āyataneti satisati kāraṇe. Kiṃ panettha kāraṇanti? Abhiññāva kāraṇaṃ. Āḷibandhāti mariyādabaddhā.
ཡཱནཱིཀཏཱཡཱཏི ཡུཏྟཡཱནཾ ཝིཡ ཀཏཱཡ། ཝཏྠུཀཏཱཡཱཏི པཏིཊྛཱཀཏཱཡ། ཨནུཊྛིཏཱཡཱཏི ཨནུཔྤཝཏྟིཏཱཡ། པརིཙིཏཱཡཱཏི པརིཙཡཀཏཱཡ། སུསམཱརདྡྷཱཡཱཏི སུཊྛུ སམཱརདྡྷཱཡ སུསམྤགྒཧིཏཱཡ། སེསཾ སབྦཏྠ ཨུཏྟཱནམེཝཱཏི།
Yānīkatāyāti yuttayānaṃ viya katāya. Vatthukatāyāti patiṭṭhākatāya. Anuṭṭhitāyāti anuppavattitāya. Paricitāyāti paricayakatāya. Susamāraddhāyāti suṭṭhu samāraddhāya susampaggahitāya. Sesaṃ sabbattha uttānamevāti.
པཔཉྩསཱུདནིཡཱ མཛ྄ཛྷིམནིཀཱཡཊྛཀཐཱཡ
Papañcasūdaniyā majjhimanikāyaṭṭhakathāya
ཀཱཡགཏཱསཏིསུཏྟཝཎྞནཱ ནིཊྛིཏཱ།
Kāyagatāsatisuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༩. ཀཱཡགཏཱསཏིསུཏྟཾ • 9. Kāyagatāsatisuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༩. ཀཱཡགཏཱསཏིསུཏྟཝཎྞནཱ • 9. Kāyagatāsatisuttavaṇṇanā
