| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
১৯. কাযগতাসতিৰগ্গো
19. Kāyagatāsativaggo
৫৬৩. ‘‘যস্স কস্সচি, ভিক্খৰে, মহাসমুদ্দো চেতসা ফুটো অন্তোগধা তস্স কুন্নদিযো যা কাচি সমুদ্দঙ্গমা; এৰমেৰং, ভিক্খৰে, যস্স কস্সচি কাযগতা সতি ভাৰিতা বহুলীকতা অন্তোগধা তস্স কুসলা ধম্মা যে কেচি ৰিজ্জাভাগিযা’’তি।
563. ‘‘Yassa kassaci, bhikkhave, mahāsamuddo cetasā phuṭo antogadhā tassa kunnadiyo yā kāci samuddaṅgamā; evamevaṃ, bhikkhave, yassa kassaci kāyagatā sati bhāvitā bahulīkatā antogadhā tassa kusalā dhammā ye keci vijjābhāgiyā’’ti.
৫৬৪-৫৭০. ‘‘একধম্মো, ভিক্খৰে, ভাৰিতো বহুলীকতো মহতো সংৰেগায সংৰত্ততি… মহতো অত্থায সংৰত্ততি… মহতো যোগক্খেমায সংৰত্ততি… সতিসম্পজঞ্ঞায সংৰত্ততি… ঞাণদস্সনপ্পটিলাভায সংৰত্ততি… দিট্ঠধম্মসুখৰিহারায সংৰত্ততি… ৰিজ্জাৰিমুত্তিফলসচ্ছিকিরিযায সংৰত্ততি। কতমো একধম্মো? কাযগতা সতি। অযং খো, ভিক্খৰে, একধম্মো ভাৰিতো বহুলীকতো মহতো সংৰেগায সংৰত্ততি… মহতো অত্থায সংৰত্ততি… মহতো যোগক্খেমায সংৰত্ততি… সতিসম্পজঞ্ঞায সংৰত্ততি… ঞাণদস্সনপ্পটিলাভায সংৰত্ততি… দিট্ঠধম্মসুখৰিহারায সংৰত্ততি… ৰিজ্জাৰিমুত্তিফলসচ্ছিকিরিযায সংৰত্ততী’’তি।
564-570. ‘‘Ekadhammo, bhikkhave, bhāvito bahulīkato mahato saṃvegāya saṃvattati… mahato atthāya saṃvattati… mahato yogakkhemāya saṃvattati… satisampajaññāya saṃvattati… ñāṇadassanappaṭilābhāya saṃvattati… diṭṭhadhammasukhavihārāya saṃvattati… vijjāvimuttiphalasacchikiriyāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato mahato saṃvegāya saṃvattati… mahato atthāya saṃvattati… mahato yogakkhemāya saṃvattati… satisampajaññāya saṃvattati… ñāṇadassanappaṭilābhāya saṃvattati… diṭṭhadhammasukhavihārāya saṃvattati… vijjāvimuttiphalasacchikiriyāya saṃvattatī’’ti.
৫৭১. ‘‘একধম্মে , ভিক্খৰে, ভাৰিতে বহুলীকতে কাযোপি পস্সম্ভতি, চিত্তম্পি পস্সম্ভতি, ৰিতক্কৰিচারাপি ৰূপসম্মন্তি, কেৰলাপি ৰিজ্জাভাগিযা ধম্মা ভাৰনাপারিপূরিং গচ্ছন্তি। কতমস্মিং একধম্মে? কাযগতায সতিযা। ইমস্মিং খো, ভিক্খৰে, একধম্মে ভাৰিতে বহুলীকতে কাযোপি পস্সম্ভতি, চিত্তম্পি পস্সম্ভতি, ৰিতক্কৰিচারাপি ৰূপসম্মন্তি, কেৰলাপি ৰিজ্জাভাগিযা ধম্মা ভাৰনাপারিপূরিং গচ্ছন্তী’’তি।
571. ‘‘Ekadhamme , bhikkhave, bhāvite bahulīkate kāyopi passambhati, cittampi passambhati, vitakkavicārāpi vūpasammanti, kevalāpi vijjābhāgiyā dhammā bhāvanāpāripūriṃ gacchanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate kāyopi passambhati, cittampi passambhati, vitakkavicārāpi vūpasammanti, kevalāpi vijjābhāgiyā dhammā bhāvanāpāripūriṃ gacchantī’’ti.
৫৭২. ‘‘একধম্মে, ভিক্খৰে, ভাৰিতে বহুলীকতে অনুপ্পন্না চেৰ অকুসলা ধম্মা নুপ্পজ্জন্তি, উপ্পন্না চ অকুসলা ধম্মা পহীযন্তি। কতমস্মিং একধম্মে? কাযগতায সতিযা। ইমস্মিং খো, ভিক্খৰে, একধম্মে ভাৰিতে বহুলীকতে অনুপ্পন্না চেৰ অকুসলা ধম্মা নুপ্পজ্জন্তি, উপ্পন্না চ অকুসলা ধম্মা পহীযন্তী’’তি।
572. ‘‘Ekadhamme, bhikkhave, bhāvite bahulīkate anuppannā ceva akusalā dhammā nuppajjanti, uppannā ca akusalā dhammā pahīyanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate anuppannā ceva akusalā dhammā nuppajjanti, uppannā ca akusalā dhammā pahīyantī’’ti.
৫৭৩. ‘‘একধম্মে , ভিক্খৰে, ভাৰিতে বহুলীকতে অনুপ্পন্না চেৰ কুসলা ধম্মা উপ্পজ্জন্তি, উপ্পন্না চ কুসলা ধম্মা ভিয্যোভাৰায ৰেপুল্লায সংৰত্তন্তি। কতমস্মিং একধম্মে? কাযগতায সতিযা। ইমস্মিং খো, ভিক্খৰে, একধম্মে ভাৰিতে বহুলীকতে অনুপ্পন্না চেৰ কুসলা ধম্মা উপ্পজ্জন্তি, উপ্পন্না চ কুসলা ধম্মা ভিয্যোভাৰায ৰেপুল্লায সংৰত্তন্তী’’তি।
573. ‘‘Ekadhamme , bhikkhave, bhāvite bahulīkate anuppannā ceva kusalā dhammā uppajjanti, uppannā ca kusalā dhammā bhiyyobhāvāya vepullāya saṃvattanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate anuppannā ceva kusalā dhammā uppajjanti, uppannā ca kusalā dhammā bhiyyobhāvāya vepullāya saṃvattantī’’ti.
৫৭৪. ‘‘একধম্মে, ভিক্খৰে, ভাৰিতে বহুলীকতে অৰিজ্জা পহীযতি, ৰিজ্জা উপ্পজ্জতি, অস্মিমানো পহীযতি, অনুসযা সমুগ্ঘাতং গচ্ছন্তি, সংযোজনা পহীযন্তি। কতমস্মিং একধম্মে? কাযগতায সতিযা। ইমস্মিং খো, ভিক্খৰে, একধম্মে ভাৰিতে বহুলীকতে অৰিজ্জা পহীযতি, ৰিজ্জা উপ্পজ্জতি, অস্মিমানো পহীযতি, অনুসযা সমুগ্ঘাতং গচ্ছন্তি, সংযোজনা পহীযন্তী’’তি।
574. ‘‘Ekadhamme, bhikkhave, bhāvite bahulīkate avijjā pahīyati, vijjā uppajjati, asmimāno pahīyati, anusayā samugghātaṃ gacchanti, saṃyojanā pahīyanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate avijjā pahīyati, vijjā uppajjati, asmimāno pahīyati, anusayā samugghātaṃ gacchanti, saṃyojanā pahīyantī’’ti.
৫৭৫-৫৭৬. ‘‘একধম্মো, ভিক্খৰে, ভাৰিতো বহুলীকতো পঞ্ঞাপভেদায সংৰত্ততি… অনুপাদাপরিনিব্বানায সংৰত্ততি। কতমো একধম্মো? কাযগতা সতি। অযং খো, ভিক্খৰে, একধম্মো ভাৰিতো বহুলীকতো পঞ্ঞাপভেদায সংৰত্ততি… অনুপাদাপরিনিব্বানায সংৰত্ততী’’তি।
575-576. ‘‘Ekadhammo, bhikkhave, bhāvito bahulīkato paññāpabhedāya saṃvattati… anupādāparinibbānāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato paññāpabhedāya saṃvattati… anupādāparinibbānāya saṃvattatī’’ti.
৫৭৭-৫৭৯. ‘‘একধম্মে , ভিক্খৰে, ভাৰিতে বহুলীকতে অনেকধাতুপটিৰেধো হোতি… নানাধাতুপটিৰেধো হোতি… অনেকধাতুপটিসম্ভিদা হোতি। কতমস্মিং একধম্মে? কাযগতায সতিযা। ইমস্মিং খো, ভিক্খৰে, একধম্মে ভাৰিতে বহুলীকতে অনেকধাতুপটিৰেধো হোতি… নানাধাতুপটিৰেধো হোতি… অনেকধাতুপটিসম্ভিদা হোতী’’তি।
577-579. ‘‘Ekadhamme , bhikkhave, bhāvite bahulīkate anekadhātupaṭivedho hoti… nānādhātupaṭivedho hoti… anekadhātupaṭisambhidā hoti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate anekadhātupaṭivedho hoti… nānādhātupaṭivedho hoti… anekadhātupaṭisambhidā hotī’’ti.
৫৮০-৫৮৩. ‘‘একধম্মো, ভিক্খৰে, ভাৰিতো বহুলীকতো সোতাপত্তিফলসচ্ছিকিরিযায সংৰত্ততি… সকদাগামিফলসচ্ছিকিরিযায সংৰত্ততি… অনাগামিফলসচ্ছিকিরিযায সংৰত্ততি… অরহত্তফলসচ্ছিকিরিযায সংৰত্ততি। কতমো একধম্মো? কাযগতা সতি। অযং খো, ভিক্খৰে, একধম্মো ভাৰিতো বহুলীকতো সোতাপত্তিফলসচ্ছিকিরিযায সংৰত্ততি… সকদাগামিফলসচ্ছিকিরিযায সংৰত্ততি… অনাগামিফলসচ্ছিকিরিযায সংৰত্ততি… অরহত্তফলসচ্ছিকিরিযায সংৰত্ততী’’তি।
580-583. ‘‘Ekadhammo, bhikkhave, bhāvito bahulīkato sotāpattiphalasacchikiriyāya saṃvattati… sakadāgāmiphalasacchikiriyāya saṃvattati… anāgāmiphalasacchikiriyāya saṃvattati… arahattaphalasacchikiriyāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato sotāpattiphalasacchikiriyāya saṃvattati… sakadāgāmiphalasacchikiriyāya saṃvattati… anāgāmiphalasacchikiriyāya saṃvattati… arahattaphalasacchikiriyāya saṃvattatī’’ti.
৫৮৪-৫৯৯. ‘‘একধম্মো , ভিক্খৰে, ভাৰিতো বহুলীকতো পঞ্ঞাপটিলাভায সংৰত্ততি… পঞ্ঞাৰুদ্ধিযা সংৰত্ততি… পঞ্ঞাৰেপুল্লায সংৰত্ততি… মহাপঞ্ঞতায সংৰত্ততি… পুথুপঞ্ঞতায সংৰত্ততি… ৰিপুলপঞ্ঞতায সংৰত্ততি… গম্ভীরপঞ্ঞতায সংৰত্ততি… অসামন্তপঞ্ঞতায 1 সংৰত্ততি… ভূরিপঞ্ঞতায সংৰত্ততি… পঞ্ঞাবাহুল্লায সংৰত্ততি… সীঘপঞ্ঞতায সংৰত্ততি… লহুপঞ্ঞতায সংৰত্ততি… হাসপঞ্ঞতায 2 সংৰত্ততি… জৰনপঞ্ঞতায সংৰত্ততি… তিক্খপঞ্ঞতায সংৰত্ততি… নিব্বেধিকপঞ্ঞতায সংৰত্ততি। কতমো একধম্মো? কাযগতা সতি। অযং খো, ভিক্খৰে, একধম্মো ভাৰিতো বহুলীকতো পঞ্ঞাপটিলাভায সংৰত্ততি… পঞ্ঞাৰুদ্ধিযা সংৰত্ততি… পঞ্ঞাৰেপুল্লায সংৰত্ততি… মহাপঞ্ঞতায সংৰত্ততি… পুথুপঞ্ঞতায সংৰত্ততি… ৰিপুলপঞ্ঞতায সংৰত্ততি… গম্ভীরপঞ্ঞতায সংৰত্ততি… অসামন্তপঞ্ঞতায সংৰত্ততি… ভূরিপঞ্ঞতায সংৰত্ততি… পঞ্ঞাবাহুল্লায সংৰত্ততি… সীঘপঞ্ঞতায সংৰত্ততি… লহুপঞ্ঞতায সংৰত্ততি… হাসপঞ্ঞতায সংৰত্ততি… জৰনপঞ্ঞতায সংৰত্ততি… তিক্খপঞ্ঞতায সংৰত্ততি… নিব্বেধিকপঞ্ঞতায সংৰত্ততী’’তি।
584-599. ‘‘Ekadhammo , bhikkhave, bhāvito bahulīkato paññāpaṭilābhāya saṃvattati… paññāvuddhiyā saṃvattati… paññāvepullāya saṃvattati… mahāpaññatāya saṃvattati… puthupaññatāya saṃvattati… vipulapaññatāya saṃvattati… gambhīrapaññatāya saṃvattati… asāmantapaññatāya 3 saṃvattati… bhūripaññatāya saṃvattati… paññābāhullāya saṃvattati… sīghapaññatāya saṃvattati… lahupaññatāya saṃvattati… hāsapaññatāya 4 saṃvattati… javanapaññatāya saṃvattati… tikkhapaññatāya saṃvattati… nibbedhikapaññatāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato paññāpaṭilābhāya saṃvattati… paññāvuddhiyā saṃvattati… paññāvepullāya saṃvattati… mahāpaññatāya saṃvattati… puthupaññatāya saṃvattati… vipulapaññatāya saṃvattati… gambhīrapaññatāya saṃvattati… asāmantapaññatāya saṃvattati… bhūripaññatāya saṃvattati… paññābāhullāya saṃvattati… sīghapaññatāya saṃvattati… lahupaññatāya saṃvattati… hāsapaññatāya saṃvattati… javanapaññatāya saṃvattati… tikkhapaññatāya saṃvattati… nibbedhikapaññatāya saṃvattatī’’ti.
কাযগতাসতিৰগ্গো একূনৰীসতিমো।
Kāyagatāsativaggo ekūnavīsatimo.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১৯. কাযগতাসতিৰগ্গৰণ্ণনা • 19. Kāyagatāsativaggavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১৯. কাযগতাসতিৰগ্গৰণ্ণনা • 19. Kāyagatāsativaggavaṇṇanā
