| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
១៩. កាយគតាសតិវគ្គោ
19. Kāyagatāsativaggo
៥៦៣. ‘‘យស្ស កស្សចិ, ភិក្ខវេ, មហាសមុទ្ទោ ចេតសា ផុដោ អន្តោគធា តស្ស កុន្នទិយោ យា កាចិ សមុទ្ទង្គមា; ឯវមេវំ, ភិក្ខវេ, យស្ស កស្សចិ កាយគតា សតិ ភាវិតា ពហុលីកតា អន្តោគធា តស្ស កុសលា ធម្មា យេ កេចិ វិជ្ជាភាគិយា’’តិ។
563. ‘‘Yassa kassaci, bhikkhave, mahāsamuddo cetasā phuṭo antogadhā tassa kunnadiyo yā kāci samuddaṅgamā; evamevaṃ, bhikkhave, yassa kassaci kāyagatā sati bhāvitā bahulīkatā antogadhā tassa kusalā dhammā ye keci vijjābhāgiyā’’ti.
៥៦៤-៥៧០. ‘‘ឯកធម្មោ, ភិក្ខវេ, ភាវិតោ ពហុលីកតោ មហតោ សំវេគាយ សំវត្តតិ… មហតោ អត្ថាយ សំវត្តតិ… មហតោ យោគក្ខេមាយ សំវត្តតិ… សតិសម្បជញ្ញាយ សំវត្តតិ… ញាណទស្សនប្បដិលាភាយ សំវត្តតិ… ទិដ្ឋធម្មសុខវិហារាយ សំវត្តតិ… វិជ្ជាវិមុត្តិផលសច្ឆិកិរិយាយ សំវត្តតិ។ កតមោ ឯកធម្មោ? កាយគតា សតិ។ អយំ ខោ, ភិក្ខវេ, ឯកធម្មោ ភាវិតោ ពហុលីកតោ មហតោ សំវេគាយ សំវត្តតិ… មហតោ អត្ថាយ សំវត្តតិ… មហតោ យោគក្ខេមាយ សំវត្តតិ… សតិសម្បជញ្ញាយ សំវត្តតិ… ញាណទស្សនប្បដិលាភាយ សំវត្តតិ… ទិដ្ឋធម្មសុខវិហារាយ សំវត្តតិ… វិជ្ជាវិមុត្តិផលសច្ឆិកិរិយាយ សំវត្តតី’’តិ។
564-570. ‘‘Ekadhammo, bhikkhave, bhāvito bahulīkato mahato saṃvegāya saṃvattati… mahato atthāya saṃvattati… mahato yogakkhemāya saṃvattati… satisampajaññāya saṃvattati… ñāṇadassanappaṭilābhāya saṃvattati… diṭṭhadhammasukhavihārāya saṃvattati… vijjāvimuttiphalasacchikiriyāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato mahato saṃvegāya saṃvattati… mahato atthāya saṃvattati… mahato yogakkhemāya saṃvattati… satisampajaññāya saṃvattati… ñāṇadassanappaṭilābhāya saṃvattati… diṭṭhadhammasukhavihārāya saṃvattati… vijjāvimuttiphalasacchikiriyāya saṃvattatī’’ti.
៥៧១. ‘‘ឯកធម្មេ , ភិក្ខវេ, ភាវិតេ ពហុលីកតេ កាយោបិ បស្សម្ភតិ, ចិត្តម្បិ បស្សម្ភតិ, វិតក្កវិចារាបិ វូបសម្មន្តិ, កេវលាបិ វិជ្ជាភាគិយា ធម្មា ភាវនាបារិបូរិំ គច្ឆន្តិ។ កតមស្មិំ ឯកធម្មេ? កាយគតាយ សតិយា។ ឥមស្មិំ ខោ, ភិក្ខវេ, ឯកធម្មេ ភាវិតេ ពហុលីកតេ កាយោបិ បស្សម្ភតិ, ចិត្តម្បិ បស្សម្ភតិ, វិតក្កវិចារាបិ វូបសម្មន្តិ, កេវលាបិ វិជ្ជាភាគិយា ធម្មា ភាវនាបារិបូរិំ គច្ឆន្តី’’តិ។
571. ‘‘Ekadhamme , bhikkhave, bhāvite bahulīkate kāyopi passambhati, cittampi passambhati, vitakkavicārāpi vūpasammanti, kevalāpi vijjābhāgiyā dhammā bhāvanāpāripūriṃ gacchanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate kāyopi passambhati, cittampi passambhati, vitakkavicārāpi vūpasammanti, kevalāpi vijjābhāgiyā dhammā bhāvanāpāripūriṃ gacchantī’’ti.
៥៧២. ‘‘ឯកធម្មេ, ភិក្ខវេ, ភាវិតេ ពហុលីកតេ អនុប្បន្នា ចេវ អកុសលា ធម្មា នុប្បជ្ជន្តិ, ឧប្បន្នា ច អកុសលា ធម្មា បហីយន្តិ។ កតមស្មិំ ឯកធម្មេ? កាយគតាយ សតិយា។ ឥមស្មិំ ខោ, ភិក្ខវេ, ឯកធម្មេ ភាវិតេ ពហុលីកតេ អនុប្បន្នា ចេវ អកុសលា ធម្មា នុប្បជ្ជន្តិ, ឧប្បន្នា ច អកុសលា ធម្មា បហីយន្តី’’តិ។
572. ‘‘Ekadhamme, bhikkhave, bhāvite bahulīkate anuppannā ceva akusalā dhammā nuppajjanti, uppannā ca akusalā dhammā pahīyanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate anuppannā ceva akusalā dhammā nuppajjanti, uppannā ca akusalā dhammā pahīyantī’’ti.
៥៧៣. ‘‘ឯកធម្មេ , ភិក្ខវេ, ភាវិតេ ពហុលីកតេ អនុប្បន្នា ចេវ កុសលា ធម្មា ឧប្បជ្ជន្តិ, ឧប្បន្នា ច កុសលា ធម្មា ភិយ្យោភាវាយ វេបុល្លាយ សំវត្តន្តិ។ កតមស្មិំ ឯកធម្មេ? កាយគតាយ សតិយា។ ឥមស្មិំ ខោ, ភិក្ខវេ, ឯកធម្មេ ភាវិតេ ពហុលីកតេ អនុប្បន្នា ចេវ កុសលា ធម្មា ឧប្បជ្ជន្តិ, ឧប្បន្នា ច កុសលា ធម្មា ភិយ្យោភាវាយ វេបុល្លាយ សំវត្តន្តី’’តិ។
573. ‘‘Ekadhamme , bhikkhave, bhāvite bahulīkate anuppannā ceva kusalā dhammā uppajjanti, uppannā ca kusalā dhammā bhiyyobhāvāya vepullāya saṃvattanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate anuppannā ceva kusalā dhammā uppajjanti, uppannā ca kusalā dhammā bhiyyobhāvāya vepullāya saṃvattantī’’ti.
៥៧៤. ‘‘ឯកធម្មេ, ភិក្ខវេ, ភាវិតេ ពហុលីកតេ អវិជ្ជា បហីយតិ, វិជ្ជា ឧប្បជ្ជតិ, អស្មិមានោ បហីយតិ, អនុសយា សមុគ្ឃាតំ គច្ឆន្តិ, សំយោជនា បហីយន្តិ។ កតមស្មិំ ឯកធម្មេ? កាយគតាយ សតិយា។ ឥមស្មិំ ខោ, ភិក្ខវេ, ឯកធម្មេ ភាវិតេ ពហុលីកតេ អវិជ្ជា បហីយតិ, វិជ្ជា ឧប្បជ្ជតិ, អស្មិមានោ បហីយតិ, អនុសយា សមុគ្ឃាតំ គច្ឆន្តិ, សំយោជនា បហីយន្តី’’តិ។
574. ‘‘Ekadhamme, bhikkhave, bhāvite bahulīkate avijjā pahīyati, vijjā uppajjati, asmimāno pahīyati, anusayā samugghātaṃ gacchanti, saṃyojanā pahīyanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate avijjā pahīyati, vijjā uppajjati, asmimāno pahīyati, anusayā samugghātaṃ gacchanti, saṃyojanā pahīyantī’’ti.
៥៧៥-៥៧៦. ‘‘ឯកធម្មោ, ភិក្ខវេ, ភាវិតោ ពហុលីកតោ បញ្ញាបភេទាយ សំវត្តតិ… អនុបាទាបរិនិព្ពានាយ សំវត្តតិ។ កតមោ ឯកធម្មោ? កាយគតា សតិ។ អយំ ខោ, ភិក្ខវេ, ឯកធម្មោ ភាវិតោ ពហុលីកតោ បញ្ញាបភេទាយ សំវត្តតិ… អនុបាទាបរិនិព្ពានាយ សំវត្តតី’’តិ។
575-576. ‘‘Ekadhammo, bhikkhave, bhāvito bahulīkato paññāpabhedāya saṃvattati… anupādāparinibbānāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato paññāpabhedāya saṃvattati… anupādāparinibbānāya saṃvattatī’’ti.
៥៧៧-៥៧៩. ‘‘ឯកធម្មេ , ភិក្ខវេ, ភាវិតេ ពហុលីកតេ អនេកធាតុបដិវេធោ ហោតិ… នានាធាតុបដិវេធោ ហោតិ… អនេកធាតុបដិសម្ភិទា ហោតិ។ កតមស្មិំ ឯកធម្មេ? កាយគតាយ សតិយា។ ឥមស្មិំ ខោ, ភិក្ខវេ, ឯកធម្មេ ភាវិតេ ពហុលីកតេ អនេកធាតុបដិវេធោ ហោតិ… នានាធាតុបដិវេធោ ហោតិ… អនេកធាតុបដិសម្ភិទា ហោតី’’តិ។
577-579. ‘‘Ekadhamme , bhikkhave, bhāvite bahulīkate anekadhātupaṭivedho hoti… nānādhātupaṭivedho hoti… anekadhātupaṭisambhidā hoti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate anekadhātupaṭivedho hoti… nānādhātupaṭivedho hoti… anekadhātupaṭisambhidā hotī’’ti.
៥៨០-៥៨៣. ‘‘ឯកធម្មោ, ភិក្ខវេ, ភាវិតោ ពហុលីកតោ សោតាបត្តិផលសច្ឆិកិរិយាយ សំវត្តតិ… សកទាគាមិផលសច្ឆិកិរិយាយ សំវត្តតិ… អនាគាមិផលសច្ឆិកិរិយាយ សំវត្តតិ… អរហត្តផលសច្ឆិកិរិយាយ សំវត្តតិ។ កតមោ ឯកធម្មោ? កាយគតា សតិ។ អយំ ខោ, ភិក្ខវេ, ឯកធម្មោ ភាវិតោ ពហុលីកតោ សោតាបត្តិផលសច្ឆិកិរិយាយ សំវត្តតិ… សកទាគាមិផលសច្ឆិកិរិយាយ សំវត្តតិ… អនាគាមិផលសច្ឆិកិរិយាយ សំវត្តតិ… អរហត្តផលសច្ឆិកិរិយាយ សំវត្តតី’’តិ។
580-583. ‘‘Ekadhammo, bhikkhave, bhāvito bahulīkato sotāpattiphalasacchikiriyāya saṃvattati… sakadāgāmiphalasacchikiriyāya saṃvattati… anāgāmiphalasacchikiriyāya saṃvattati… arahattaphalasacchikiriyāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato sotāpattiphalasacchikiriyāya saṃvattati… sakadāgāmiphalasacchikiriyāya saṃvattati… anāgāmiphalasacchikiriyāya saṃvattati… arahattaphalasacchikiriyāya saṃvattatī’’ti.
៥៨៤-៥៩៩. ‘‘ឯកធម្មោ , ភិក្ខវេ, ភាវិតោ ពហុលីកតោ បញ្ញាបដិលាភាយ សំវត្តតិ… បញ្ញាវុទ្ធិយា សំវត្តតិ… បញ្ញាវេបុល្លាយ សំវត្តតិ… មហាបញ្ញតាយ សំវត្តតិ… បុថុបញ្ញតាយ សំវត្តតិ… វិបុលបញ្ញតាយ សំវត្តតិ… គម្ភីរបញ្ញតាយ សំវត្តតិ… អសាមន្តបញ្ញតាយ 1 សំវត្តតិ… ភូរិបញ្ញតាយ សំវត្តតិ… បញ្ញាពាហុល្លាយ សំវត្តតិ… សីឃបញ្ញតាយ សំវត្តតិ… លហុបញ្ញតាយ សំវត្តតិ… ហាសបញ្ញតាយ 2 សំវត្តតិ… ជវនបញ្ញតាយ សំវត្តតិ… តិក្ខបញ្ញតាយ សំវត្តតិ… និព្ពេធិកបញ្ញតាយ សំវត្តតិ។ កតមោ ឯកធម្មោ? កាយគតា សតិ។ អយំ ខោ, ភិក្ខវេ, ឯកធម្មោ ភាវិតោ ពហុលីកតោ បញ្ញាបដិលាភាយ សំវត្តតិ… បញ្ញាវុទ្ធិយា សំវត្តតិ… បញ្ញាវេបុល្លាយ សំវត្តតិ… មហាបញ្ញតាយ សំវត្តតិ… បុថុបញ្ញតាយ សំវត្តតិ… វិបុលបញ្ញតាយ សំវត្តតិ… គម្ភីរបញ្ញតាយ សំវត្តតិ… អសាមន្តបញ្ញតាយ សំវត្តតិ… ភូរិបញ្ញតាយ សំវត្តតិ… បញ្ញាពាហុល្លាយ សំវត្តតិ… សីឃបញ្ញតាយ សំវត្តតិ… លហុបញ្ញតាយ សំវត្តតិ… ហាសបញ្ញតាយ សំវត្តតិ… ជវនបញ្ញតាយ សំវត្តតិ… តិក្ខបញ្ញតាយ សំវត្តតិ… និព្ពេធិកបញ្ញតាយ សំវត្តតី’’តិ។
584-599. ‘‘Ekadhammo , bhikkhave, bhāvito bahulīkato paññāpaṭilābhāya saṃvattati… paññāvuddhiyā saṃvattati… paññāvepullāya saṃvattati… mahāpaññatāya saṃvattati… puthupaññatāya saṃvattati… vipulapaññatāya saṃvattati… gambhīrapaññatāya saṃvattati… asāmantapaññatāya 3 saṃvattati… bhūripaññatāya saṃvattati… paññābāhullāya saṃvattati… sīghapaññatāya saṃvattati… lahupaññatāya saṃvattati… hāsapaññatāya 4 saṃvattati… javanapaññatāya saṃvattati… tikkhapaññatāya saṃvattati… nibbedhikapaññatāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato paññāpaṭilābhāya saṃvattati… paññāvuddhiyā saṃvattati… paññāvepullāya saṃvattati… mahāpaññatāya saṃvattati… puthupaññatāya saṃvattati… vipulapaññatāya saṃvattati… gambhīrapaññatāya saṃvattati… asāmantapaññatāya saṃvattati… bhūripaññatāya saṃvattati… paññābāhullāya saṃvattati… sīghapaññatāya saṃvattati… lahupaññatāya saṃvattati… hāsapaññatāya saṃvattati… javanapaññatāya saṃvattati… tikkhapaññatāya saṃvattati… nibbedhikapaññatāya saṃvattatī’’ti.
កាយគតាសតិវគ្គោ ឯកូនវីសតិមោ។
Kāyagatāsativaggo ekūnavīsatimo.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ១៩. កាយគតាសតិវគ្គវណ្ណនា • 19. Kāyagatāsativaggavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១៩. កាយគតាសតិវគ្គវណ្ណនា • 19. Kāyagatāsativaggavaṇṇanā
