| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༡༩. ཀཱཡགཏཱསཏིཝགྒོ
19. Kāyagatāsativaggo
༥༦༣. ‘‘ཡསྶ ཀསྶཙི, བྷིཀྑཝེ, མཧཱསམུདྡོ ཙེཏསཱ ཕུཊོ ཨནྟོགདྷཱ ཏསྶ ཀུནྣདིཡོ ཡཱ ཀཱཙི སམུདྡངྒམཱ; ཨེཝམེཝཾ, བྷིཀྑཝེ, ཡསྶ ཀསྶཙི ཀཱཡགཏཱ སཏི བྷཱཝིཏཱ བཧུལཱིཀཏཱ ཨནྟོགདྷཱ ཏསྶ ཀུསལཱ དྷམྨཱ ཡེ ཀེཙི ཝིཛྫཱབྷཱགིཡཱ’’ཏི།
563. ‘‘Yassa kassaci, bhikkhave, mahāsamuddo cetasā phuṭo antogadhā tassa kunnadiyo yā kāci samuddaṅgamā; evamevaṃ, bhikkhave, yassa kassaci kāyagatā sati bhāvitā bahulīkatā antogadhā tassa kusalā dhammā ye keci vijjābhāgiyā’’ti.
༥༦༤-༥༧༠. ‘‘ཨེཀདྷམྨོ, བྷིཀྑཝེ, བྷཱཝིཏོ བཧུལཱིཀཏོ མཧཏོ སཾཝེགཱཡ སཾཝཏྟཏི… མཧཏོ ཨཏྠཱཡ སཾཝཏྟཏི… མཧཏོ ཡོགཀྑེམཱཡ སཾཝཏྟཏི… སཏིསམྤཛཉྙཱཡ སཾཝཏྟཏི… ཉཱཎདསྶནཔྤཊིལཱབྷཱཡ སཾཝཏྟཏི… དིཊྛདྷམྨསུཁཝིཧཱརཱཡ སཾཝཏྟཏི… ཝིཛྫཱཝིམུཏྟིཕལསཙྪིཀིརིཡཱཡ སཾཝཏྟཏི། ཀཏམོ ཨེཀདྷམྨོ? ཀཱཡགཏཱ སཏི། ཨཡཾ ཁོ, བྷིཀྑཝེ, ཨེཀདྷམྨོ བྷཱཝིཏོ བཧུལཱིཀཏོ མཧཏོ སཾཝེགཱཡ སཾཝཏྟཏི… མཧཏོ ཨཏྠཱཡ སཾཝཏྟཏི… མཧཏོ ཡོགཀྑེམཱཡ སཾཝཏྟཏི… སཏིསམྤཛཉྙཱཡ སཾཝཏྟཏི… ཉཱཎདསྶནཔྤཊིལཱབྷཱཡ སཾཝཏྟཏི… དིཊྛདྷམྨསུཁཝིཧཱརཱཡ སཾཝཏྟཏི… ཝིཛྫཱཝིམུཏྟིཕལསཙྪིཀིརིཡཱཡ སཾཝཏྟཏཱི’’ཏི།
564-570. ‘‘Ekadhammo, bhikkhave, bhāvito bahulīkato mahato saṃvegāya saṃvattati… mahato atthāya saṃvattati… mahato yogakkhemāya saṃvattati… satisampajaññāya saṃvattati… ñāṇadassanappaṭilābhāya saṃvattati… diṭṭhadhammasukhavihārāya saṃvattati… vijjāvimuttiphalasacchikiriyāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato mahato saṃvegāya saṃvattati… mahato atthāya saṃvattati… mahato yogakkhemāya saṃvattati… satisampajaññāya saṃvattati… ñāṇadassanappaṭilābhāya saṃvattati… diṭṭhadhammasukhavihārāya saṃvattati… vijjāvimuttiphalasacchikiriyāya saṃvattatī’’ti.
༥༧༡. ‘‘ཨེཀདྷམྨེ , བྷིཀྑཝེ, བྷཱཝིཏེ བཧུལཱིཀཏེ ཀཱཡོཔི པསྶམྦྷཏི, ཙིཏྟམྤི པསྶམྦྷཏི, ཝིཏཀྐཝིཙཱརཱཔི ཝཱུཔསམྨནྟི, ཀེཝལཱཔི ཝིཛྫཱབྷཱགིཡཱ དྷམྨཱ བྷཱཝནཱཔཱརིཔཱུརིཾ གཙྪནྟི། ཀཏམསྨིཾ ཨེཀདྷམྨེ? ཀཱཡགཏཱཡ སཏིཡཱ། ཨིམསྨིཾ ཁོ, བྷིཀྑཝེ, ཨེཀདྷམྨེ བྷཱཝིཏེ བཧུལཱིཀཏེ ཀཱཡོཔི པསྶམྦྷཏི, ཙིཏྟམྤི པསྶམྦྷཏི, ཝིཏཀྐཝིཙཱརཱཔི ཝཱུཔསམྨནྟི, ཀེཝལཱཔི ཝིཛྫཱབྷཱགིཡཱ དྷམྨཱ བྷཱཝནཱཔཱརིཔཱུརིཾ གཙྪནྟཱི’’ཏི།
571. ‘‘Ekadhamme , bhikkhave, bhāvite bahulīkate kāyopi passambhati, cittampi passambhati, vitakkavicārāpi vūpasammanti, kevalāpi vijjābhāgiyā dhammā bhāvanāpāripūriṃ gacchanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate kāyopi passambhati, cittampi passambhati, vitakkavicārāpi vūpasammanti, kevalāpi vijjābhāgiyā dhammā bhāvanāpāripūriṃ gacchantī’’ti.
༥༧༢. ‘‘ཨེཀདྷམྨེ, བྷིཀྑཝེ, བྷཱཝིཏེ བཧུལཱིཀཏེ ཨནུཔྤནྣཱ ཙེཝ ཨཀུསལཱ དྷམྨཱ ནུཔྤཛྫནྟི, ཨུཔྤནྣཱ ཙ ཨཀུསལཱ དྷམྨཱ པཧཱིཡནྟི། ཀཏམསྨིཾ ཨེཀདྷམྨེ? ཀཱཡགཏཱཡ སཏིཡཱ། ཨིམསྨིཾ ཁོ, བྷིཀྑཝེ, ཨེཀདྷམྨེ བྷཱཝིཏེ བཧུལཱིཀཏེ ཨནུཔྤནྣཱ ཙེཝ ཨཀུསལཱ དྷམྨཱ ནུཔྤཛྫནྟི, ཨུཔྤནྣཱ ཙ ཨཀུསལཱ དྷམྨཱ པཧཱིཡནྟཱི’’ཏི།
572. ‘‘Ekadhamme, bhikkhave, bhāvite bahulīkate anuppannā ceva akusalā dhammā nuppajjanti, uppannā ca akusalā dhammā pahīyanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate anuppannā ceva akusalā dhammā nuppajjanti, uppannā ca akusalā dhammā pahīyantī’’ti.
༥༧༣. ‘‘ཨེཀདྷམྨེ , བྷིཀྑཝེ, བྷཱཝིཏེ བཧུལཱིཀཏེ ཨནུཔྤནྣཱ ཙེཝ ཀུསལཱ དྷམྨཱ ཨུཔྤཛྫནྟི, ཨུཔྤནྣཱ ཙ ཀུསལཱ དྷམྨཱ བྷིཡྻོབྷཱཝཱཡ ཝེཔུལླཱཡ སཾཝཏྟནྟི། ཀཏམསྨིཾ ཨེཀདྷམྨེ? ཀཱཡགཏཱཡ སཏིཡཱ། ཨིམསྨིཾ ཁོ, བྷིཀྑཝེ, ཨེཀདྷམྨེ བྷཱཝིཏེ བཧུལཱིཀཏེ ཨནུཔྤནྣཱ ཙེཝ ཀུསལཱ དྷམྨཱ ཨུཔྤཛྫནྟི, ཨུཔྤནྣཱ ཙ ཀུསལཱ དྷམྨཱ བྷིཡྻོབྷཱཝཱཡ ཝེཔུལླཱཡ སཾཝཏྟནྟཱི’’ཏི།
573. ‘‘Ekadhamme , bhikkhave, bhāvite bahulīkate anuppannā ceva kusalā dhammā uppajjanti, uppannā ca kusalā dhammā bhiyyobhāvāya vepullāya saṃvattanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate anuppannā ceva kusalā dhammā uppajjanti, uppannā ca kusalā dhammā bhiyyobhāvāya vepullāya saṃvattantī’’ti.
༥༧༤. ‘‘ཨེཀདྷམྨེ, བྷིཀྑཝེ, བྷཱཝིཏེ བཧུལཱིཀཏེ ཨཝིཛྫཱ པཧཱིཡཏི, ཝིཛྫཱ ཨུཔྤཛྫཏི, ཨསྨིམཱནོ པཧཱིཡཏི, ཨནུསཡཱ སམུགྒྷཱཏཾ གཙྪནྟི, སཾཡོཛནཱ པཧཱིཡནྟི། ཀཏམསྨིཾ ཨེཀདྷམྨེ? ཀཱཡགཏཱཡ སཏིཡཱ། ཨིམསྨིཾ ཁོ, བྷིཀྑཝེ, ཨེཀདྷམྨེ བྷཱཝིཏེ བཧུལཱིཀཏེ ཨཝིཛྫཱ པཧཱིཡཏི, ཝིཛྫཱ ཨུཔྤཛྫཏི, ཨསྨིམཱནོ པཧཱིཡཏི, ཨནུསཡཱ སམུགྒྷཱཏཾ གཙྪནྟི, སཾཡོཛནཱ པཧཱིཡནྟཱི’’ཏི།
574. ‘‘Ekadhamme, bhikkhave, bhāvite bahulīkate avijjā pahīyati, vijjā uppajjati, asmimāno pahīyati, anusayā samugghātaṃ gacchanti, saṃyojanā pahīyanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate avijjā pahīyati, vijjā uppajjati, asmimāno pahīyati, anusayā samugghātaṃ gacchanti, saṃyojanā pahīyantī’’ti.
༥༧༥-༥༧༦. ‘‘ཨེཀདྷམྨོ, བྷིཀྑཝེ, བྷཱཝིཏོ བཧུལཱིཀཏོ པཉྙཱཔབྷེདཱཡ སཾཝཏྟཏི… ཨནུཔཱདཱཔརིནིབྦཱནཱཡ སཾཝཏྟཏི། ཀཏམོ ཨེཀདྷམྨོ? ཀཱཡགཏཱ སཏི། ཨཡཾ ཁོ, བྷིཀྑཝེ, ཨེཀདྷམྨོ བྷཱཝིཏོ བཧུལཱིཀཏོ པཉྙཱཔབྷེདཱཡ སཾཝཏྟཏི… ཨནུཔཱདཱཔརིནིབྦཱནཱཡ སཾཝཏྟཏཱི’’ཏི།
575-576. ‘‘Ekadhammo, bhikkhave, bhāvito bahulīkato paññāpabhedāya saṃvattati… anupādāparinibbānāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato paññāpabhedāya saṃvattati… anupādāparinibbānāya saṃvattatī’’ti.
༥༧༧-༥༧༩. ‘‘ཨེཀདྷམྨེ , བྷིཀྑཝེ, བྷཱཝིཏེ བཧུལཱིཀཏེ ཨནེཀདྷཱཏུཔཊིཝེདྷོ ཧོཏི… ནཱནཱདྷཱཏུཔཊིཝེདྷོ ཧོཏི… ཨནེཀདྷཱཏུཔཊིསམྦྷིདཱ ཧོཏི། ཀཏམསྨིཾ ཨེཀདྷམྨེ? ཀཱཡགཏཱཡ སཏིཡཱ། ཨིམསྨིཾ ཁོ, བྷིཀྑཝེ, ཨེཀདྷམྨེ བྷཱཝིཏེ བཧུལཱིཀཏེ ཨནེཀདྷཱཏུཔཊིཝེདྷོ ཧོཏི… ནཱནཱདྷཱཏུཔཊིཝེདྷོ ཧོཏི… ཨནེཀདྷཱཏུཔཊིསམྦྷིདཱ ཧོཏཱི’’ཏི།
577-579. ‘‘Ekadhamme , bhikkhave, bhāvite bahulīkate anekadhātupaṭivedho hoti… nānādhātupaṭivedho hoti… anekadhātupaṭisambhidā hoti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate anekadhātupaṭivedho hoti… nānādhātupaṭivedho hoti… anekadhātupaṭisambhidā hotī’’ti.
༥༨༠-༥༨༣. ‘‘ཨེཀདྷམྨོ, བྷིཀྑཝེ, བྷཱཝིཏོ བཧུལཱིཀཏོ སོཏཱཔཏྟིཕལསཙྪིཀིརིཡཱཡ སཾཝཏྟཏི… སཀདཱགཱམིཕལསཙྪིཀིརིཡཱཡ སཾཝཏྟཏི… ཨནཱགཱམིཕལསཙྪིཀིརིཡཱཡ སཾཝཏྟཏི… ཨརཧཏྟཕལསཙྪིཀིརིཡཱཡ སཾཝཏྟཏི། ཀཏམོ ཨེཀདྷམྨོ? ཀཱཡགཏཱ སཏི། ཨཡཾ ཁོ, བྷིཀྑཝེ, ཨེཀདྷམྨོ བྷཱཝིཏོ བཧུལཱིཀཏོ སོཏཱཔཏྟིཕལསཙྪིཀིརིཡཱཡ སཾཝཏྟཏི… སཀདཱགཱམིཕལསཙྪིཀིརིཡཱཡ སཾཝཏྟཏི… ཨནཱགཱམིཕལསཙྪིཀིརིཡཱཡ སཾཝཏྟཏི… ཨརཧཏྟཕལསཙྪིཀིརིཡཱཡ སཾཝཏྟཏཱི’’ཏི།
580-583. ‘‘Ekadhammo, bhikkhave, bhāvito bahulīkato sotāpattiphalasacchikiriyāya saṃvattati… sakadāgāmiphalasacchikiriyāya saṃvattati… anāgāmiphalasacchikiriyāya saṃvattati… arahattaphalasacchikiriyāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato sotāpattiphalasacchikiriyāya saṃvattati… sakadāgāmiphalasacchikiriyāya saṃvattati… anāgāmiphalasacchikiriyāya saṃvattati… arahattaphalasacchikiriyāya saṃvattatī’’ti.
༥༨༤-༥༩༩. ‘‘ཨེཀདྷམྨོ , བྷིཀྑཝེ, བྷཱཝིཏོ བཧུལཱིཀཏོ པཉྙཱཔཊིལཱབྷཱཡ སཾཝཏྟཏི… པཉྙཱཝུདྡྷིཡཱ སཾཝཏྟཏི… པཉྙཱཝེཔུལླཱཡ སཾཝཏྟཏི… མཧཱཔཉྙཏཱཡ སཾཝཏྟཏི… པུཐུཔཉྙཏཱཡ སཾཝཏྟཏི… ཝིཔུལཔཉྙཏཱཡ སཾཝཏྟཏི… གམྦྷཱིརཔཉྙཏཱཡ སཾཝཏྟཏི… ཨསཱམནྟཔཉྙཏཱཡ 1 སཾཝཏྟཏི… བྷཱུརིཔཉྙཏཱཡ སཾཝཏྟཏི… པཉྙཱབཱཧུལླཱཡ སཾཝཏྟཏི… སཱིགྷཔཉྙཏཱཡ སཾཝཏྟཏི… ལཧུཔཉྙཏཱཡ སཾཝཏྟཏི… ཧཱསཔཉྙཏཱཡ 2 སཾཝཏྟཏི… ཛཝནཔཉྙཏཱཡ སཾཝཏྟཏི… ཏིཀྑཔཉྙཏཱཡ སཾཝཏྟཏི… ནིབྦེདྷིཀཔཉྙཏཱཡ སཾཝཏྟཏི། ཀཏམོ ཨེཀདྷམྨོ? ཀཱཡགཏཱ སཏི། ཨཡཾ ཁོ, བྷིཀྑཝེ, ཨེཀདྷམྨོ བྷཱཝིཏོ བཧུལཱིཀཏོ པཉྙཱཔཊིལཱབྷཱཡ སཾཝཏྟཏི… པཉྙཱཝུདྡྷིཡཱ སཾཝཏྟཏི… པཉྙཱཝེཔུལླཱཡ སཾཝཏྟཏི… མཧཱཔཉྙཏཱཡ སཾཝཏྟཏི… པུཐུཔཉྙཏཱཡ སཾཝཏྟཏི… ཝིཔུལཔཉྙཏཱཡ སཾཝཏྟཏི… གམྦྷཱིརཔཉྙཏཱཡ སཾཝཏྟཏི… ཨསཱམནྟཔཉྙཏཱཡ སཾཝཏྟཏི… བྷཱུརིཔཉྙཏཱཡ སཾཝཏྟཏི… པཉྙཱབཱཧུལླཱཡ སཾཝཏྟཏི… སཱིགྷཔཉྙཏཱཡ སཾཝཏྟཏི… ལཧུཔཉྙཏཱཡ སཾཝཏྟཏི… ཧཱསཔཉྙཏཱཡ སཾཝཏྟཏི… ཛཝནཔཉྙཏཱཡ སཾཝཏྟཏི… ཏིཀྑཔཉྙཏཱཡ སཾཝཏྟཏི… ནིབྦེདྷིཀཔཉྙཏཱཡ སཾཝཏྟཏཱི’’ཏི།
584-599. ‘‘Ekadhammo , bhikkhave, bhāvito bahulīkato paññāpaṭilābhāya saṃvattati… paññāvuddhiyā saṃvattati… paññāvepullāya saṃvattati… mahāpaññatāya saṃvattati… puthupaññatāya saṃvattati… vipulapaññatāya saṃvattati… gambhīrapaññatāya saṃvattati… asāmantapaññatāya 3 saṃvattati… bhūripaññatāya saṃvattati… paññābāhullāya saṃvattati… sīghapaññatāya saṃvattati… lahupaññatāya saṃvattati… hāsapaññatāya 4 saṃvattati… javanapaññatāya saṃvattati… tikkhapaññatāya saṃvattati… nibbedhikapaññatāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato paññāpaṭilābhāya saṃvattati… paññāvuddhiyā saṃvattati… paññāvepullāya saṃvattati… mahāpaññatāya saṃvattati… puthupaññatāya saṃvattati… vipulapaññatāya saṃvattati… gambhīrapaññatāya saṃvattati… asāmantapaññatāya saṃvattati… bhūripaññatāya saṃvattati… paññābāhullāya saṃvattati… sīghapaññatāya saṃvattati… lahupaññatāya saṃvattati… hāsapaññatāya saṃvattati… javanapaññatāya saṃvattati… tikkhapaññatāya saṃvattati… nibbedhikapaññatāya saṃvattatī’’ti.
ཀཱཡགཏཱསཏིཝགྒོ ཨེཀཱུནཝཱིསཏིམོ།
Kāyagatāsativaggo ekūnavīsatimo.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡༩. ཀཱཡགཏཱསཏིཝགྒཝཎྞནཱ • 19. Kāyagatāsativaggavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡༩. ཀཱཡགཏཱསཏིཝགྒཝཎྞནཱ • 19. Kāyagatāsativaggavaṇṇanā
