| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
৬. ছট্ঠৰগ্গো
6. Chaṭṭhavaggo
(৬২) ১০. কাযকম্মং সনিদস্সনন্তিকথা
(62) 10. Kāyakammaṃ sanidassanantikathā
৪৬৯. কাযকম্মং সনিদস্সনন্তি? আমন্তা। রূপং রূপাযতনং রূপধাতু নীলং পীতকং লোহিতকং ওদাতং চক্খুৰিঞ্ঞেয্যং চক্খুস্মিং পটিহঞ্ঞতি চক্খুস্স আপাথং আগচ্ছতীতি? ন হেৰং ৰত্তব্বে…পে॰…।
469. Kāyakammaṃ sanidassananti? Āmantā. Rūpaṃ rūpāyatanaṃ rūpadhātu nīlaṃ pītakaṃ lohitakaṃ odātaṃ cakkhuviññeyyaṃ cakkhusmiṃ paṭihaññati cakkhussa āpāthaṃ āgacchatīti? Na hevaṃ vattabbe…pe….
কাযকম্মং সনিদস্সনন্তি? আমন্তা। চক্খুঞ্চ পটিচ্চ কাযকম্মঞ্চ উপ্পজ্জতি চক্খুৰিঞ্ঞাণন্তি? ন হেৰং ৰত্তব্বে…পে॰…।
Kāyakammaṃ sanidassananti? Āmantā. Cakkhuñca paṭicca kāyakammañca uppajjati cakkhuviññāṇanti? Na hevaṃ vattabbe…pe….
চক্খুঞ্চ পটিচ্চ কাযকম্মঞ্চ উপ্পজ্জতি চক্খুৰিঞ্ঞাণন্তি? আমন্তা। ‘‘চক্খুঞ্চ পটিচ্চ কাযকম্মঞ্চ উপ্পজ্জতি চক্খুৰিঞ্ঞাণ’’ন্তি – অত্থেৰ সুত্তন্তোতি? নত্থি। ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণ’’ন্তি – অত্থেৰ সুত্তন্তোতি? আমন্তা। হঞ্চি ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণ’’ন্তি – অত্থেৰ সুত্তন্তো, নো চ ৰত রে ৰত্তব্বে – ‘‘চক্খুঞ্চ পটিচ্চ কাযকম্মঞ্চ উপ্পজ্জতি চক্খুৰিঞ্ঞাণ’’ন্তি।
Cakkhuñca paṭicca kāyakammañca uppajjati cakkhuviññāṇanti? Āmantā. ‘‘Cakkhuñca paṭicca kāyakammañca uppajjati cakkhuviññāṇa’’nti – attheva suttantoti? Natthi. ‘‘Cakkhuñca paṭicca rūpe ca uppajjati cakkhuviññāṇa’’nti – attheva suttantoti? Āmantā. Hañci ‘‘cakkhuñca paṭicca rūpe ca uppajjati cakkhuviññāṇa’’nti – attheva suttanto, no ca vata re vattabbe – ‘‘cakkhuñca paṭicca kāyakammañca uppajjati cakkhuviññāṇa’’nti.
৪৭০. ন ৰত্তব্বং – ‘‘কাযকম্মং সনিদস্সন’’ন্তি? আমন্তা। ননু পস্সতি অভিক্কমন্তং পটিক্কমন্তং আলোকেন্তং ৰিলোকেন্তং সমিঞ্জেন্তং পসারেন্তন্তি? আমন্তা। হঞ্চি পস্সতি অভিক্কমন্তং পটিক্কমন্তং আলোকেন্তং ৰিলোকেন্তং সমিঞ্জেন্তং পসারেন্তং, তেন ৰত রে ৰত্তব্বে – ‘‘কাযকম্মং সনিদস্সন’’ন্তি।
470. Na vattabbaṃ – ‘‘kāyakammaṃ sanidassana’’nti? Āmantā. Nanu passati abhikkamantaṃ paṭikkamantaṃ ālokentaṃ vilokentaṃ samiñjentaṃ pasārentanti? Āmantā. Hañci passati abhikkamantaṃ paṭikkamantaṃ ālokentaṃ vilokentaṃ samiñjentaṃ pasārentaṃ, tena vata re vattabbe – ‘‘kāyakammaṃ sanidassana’’nti.
কাযকম্মং সনিদস্সনন্তিকথা নিট্ঠিতা।
Kāyakammaṃ sanidassanantikathā niṭṭhitā.
ছট্ঠৰগ্গো।
Chaṭṭhavaggo.
তস্সুদ্দানং –
Tassuddānaṃ –
নিযমো অসঙ্খতো, পটিচ্চসমুপ্পাদো অসঙ্খতো, চত্তারি সচ্চানি অসঙ্খতানি, চত্তারো আরুপ্পা অসঙ্খতা, নিরোধসমাপত্তি অসঙ্খতা, আকাসো অসঙ্খতো, আকাসো সনিদস্সনো, চত্তারো মহাভূতা, পঞ্চিন্দ্রিযানি, তথেৰ কাযকম্মন্তি।
Niyamo asaṅkhato, paṭiccasamuppādo asaṅkhato, cattāri saccāni asaṅkhatāni, cattāro āruppā asaṅkhatā, nirodhasamāpatti asaṅkhatā, ākāso asaṅkhato, ākāso sanidassano, cattāro mahābhūtā, pañcindriyāni, tatheva kāyakammanti.
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ১০. পথৰীধাতুসনিদস্সনাতিআদিকথাৰণ্ণনা • 10. Pathavīdhātusanidassanātiādikathāvaṇṇanā
