| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
6. ඡට්‌ඨවග්‌ගො
6. Chaṭṭhavaggo
(62) 10. කායකම්‌මං සනිදස්‌සනන්‌තිකථා
(62) 10. Kāyakammaṃ sanidassanantikathā
469. කායකම්‌මං සනිදස්‌සනන්‌ති? ආමන්‌තා. රූපං රූපායතනං රූපධාතු නීලං පීතකං ලොහිතකං ඔදාතං චක්‌ඛුවිඤ්‌ඤෙය්‍යං චක්‌ඛුස්‌මිං පටිහඤ්‌ඤති චක්‌ඛුස්‌ස ආපාථං ආගච්‌ඡතීති? න හෙවං වත්‌තබ්‌බෙ…පෙ.….
469. Kāyakammaṃ sanidassananti? Āmantā. Rūpaṃ rūpāyatanaṃ rūpadhātu nīlaṃ pītakaṃ lohitakaṃ odātaṃ cakkhuviññeyyaṃ cakkhusmiṃ paṭihaññati cakkhussa āpāthaṃ āgacchatīti? Na hevaṃ vattabbe…pe….
කායකම්‌මං සනිදස්‌සනන්‌ති? ආමන්‌තා. චක්‌ඛුඤ්‌ච පටිච්‌ච කායකම්‌මඤ්‌ච උප්‌පජ්‌ජති චක්‌ඛුවිඤ්‌ඤාණන්‌ති? න හෙවං වත්‌තබ්‌බෙ…පෙ.….
Kāyakammaṃ sanidassananti? Āmantā. Cakkhuñca paṭicca kāyakammañca uppajjati cakkhuviññāṇanti? Na hevaṃ vattabbe…pe….
චක්‌ඛුඤ්‌ච පටිච්‌ච කායකම්‌මඤ්‌ච උප්‌පජ්‌ජති චක්‌ඛුවිඤ්‌ඤාණන්‌ති? ආමන්‌තා. ‘‘චක්‌ඛුඤ්‌ච පටිච්‌ච කායකම්‌මඤ්‌ච උප්‌පජ්‌ජති චක්‌ඛුවිඤ්‌ඤාණ’’න්‌ති – අත්‌ථෙව සුත්‌තන්‌තොති? නත්‌ථි. ‘‘චක්‌ඛුඤ්‌ච පටිච්‌ච රූපෙ ච උප්‌පජ්‌ජති චක්‌ඛුවිඤ්‌ඤාණ’’න්‌ති – අත්‌ථෙව සුත්‌තන්‌තොති? ආමන්‌තා. හඤ්‌චි ‘‘චක්‌ඛුඤ්‌ච පටිච්‌ච රූපෙ ච උප්‌පජ්‌ජති චක්‌ඛුවිඤ්‌ඤාණ’’න්‌ති – අත්‌ථෙව සුත්‌තන්‌තො, නො ච වත රෙ වත්‌තබ්‌බෙ – ‘‘චක්‌ඛුඤ්‌ච පටිච්‌ච කායකම්‌මඤ්‌ච උප්‌පජ්‌ජති චක්‌ඛුවිඤ්‌ඤාණ’’න්‌ති.
Cakkhuñca paṭicca kāyakammañca uppajjati cakkhuviññāṇanti? Āmantā. ‘‘Cakkhuñca paṭicca kāyakammañca uppajjati cakkhuviññāṇa’’nti – attheva suttantoti? Natthi. ‘‘Cakkhuñca paṭicca rūpe ca uppajjati cakkhuviññāṇa’’nti – attheva suttantoti? Āmantā. Hañci ‘‘cakkhuñca paṭicca rūpe ca uppajjati cakkhuviññāṇa’’nti – attheva suttanto, no ca vata re vattabbe – ‘‘cakkhuñca paṭicca kāyakammañca uppajjati cakkhuviññāṇa’’nti.
470. න වත්‌තබ්‌බං – ‘‘කායකම්‌මං සනිදස්‌සන’’න්‌ති? ආමන්‌තා. නනු පස්‌සති අභික්‌කමන්‌තං පටික්‌කමන්‌තං ආලොකෙන්‌තං විලොකෙන්‌තං සමිඤ්‌ජෙන්‌තං පසාරෙන්‌තන්‌ති? ආමන්‌තා. හඤ්‌චි පස්‌සති අභික්‌කමන්‌තං පටික්‌කමන්‌තං ආලොකෙන්‌තං විලොකෙන්‌තං සමිඤ්‌ජෙන්‌තං පසාරෙන්‌තං, තෙන වත රෙ වත්‌තබ්‌බෙ – ‘‘කායකම්‌මං සනිදස්‌සන’’න්‌ති.
470. Na vattabbaṃ – ‘‘kāyakammaṃ sanidassana’’nti? Āmantā. Nanu passati abhikkamantaṃ paṭikkamantaṃ ālokentaṃ vilokentaṃ samiñjentaṃ pasārentanti? Āmantā. Hañci passati abhikkamantaṃ paṭikkamantaṃ ālokentaṃ vilokentaṃ samiñjentaṃ pasārentaṃ, tena vata re vattabbe – ‘‘kāyakammaṃ sanidassana’’nti.
කායකම්‌මං සනිදස්‌සනන්‌තිකථා නිට්‌ඨිතා.
Kāyakammaṃ sanidassanantikathā niṭṭhitā.
ඡට්‌ඨවග්‌ගො.
Chaṭṭhavaggo.
තස්‌සුද්‌දානං –
Tassuddānaṃ –
නියමො අසඞ්‌ඛතො, පටිච්‌චසමුප්‌පාදො අසඞ්‌ඛතො, චත්‌තාරි සච්‌චානි අසඞ්‌ඛතානි, චත්‌තාරො ආරුප්‌පා අසඞ්‌ඛතා, නිරොධසමාපත්‌ති අසඞ්‌ඛතා, ආකාසො අසඞ්‌ඛතො, ආකාසො සනිදස්‌සනො, චත්‌තාරො මහාභූතා, පඤ්‌චින්‌ද්‍රියානි, තථෙව කායකම්‌මන්‌ති.
Niyamo asaṅkhato, paṭiccasamuppādo asaṅkhato, cattāri saccāni asaṅkhatāni, cattāro āruppā asaṅkhatā, nirodhasamāpatti asaṅkhatā, ākāso asaṅkhato, ākāso sanidassano, cattāro mahābhūtā, pañcindriyāni, tatheva kāyakammanti.
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 10. පථවීධාතුසනිදස්‌සනාතිආදිකථාවණ්‌ණනා • 10. Pathavīdhātusanidassanātiādikathāvaṇṇanā
