| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[293] 3. காயனிப்³பி³ந்த³ஜாதகவண்ணனா
[293] 3. Kāyanibbindajātakavaṇṇanā
பு²ட்ட²ஸ்ஸ மேதி இத³ங் ஸத்தா² ஜேதவனே விஹரந்தோ அஞ்ஞதரங் புரிஸங் ஆரப்³ப⁴ கதே²ஸி. ஸாவத்தி²யங் கிரேகோ புரிஸோ பண்டு³ரோகே³ன அட்டிதோ வேஜ்ஜேஹி படிக்கி²த்தோ. புத்ததா³ரோபிஸ்ஸ ‘‘கோ இமங் படிஜக்³கி³துங் ஸக்கோதீ’’தி சிந்தேஸி. தஸ்ஸ ஏதத³ஹோஸி – ‘‘ஸசாஹங் இமம்ஹா ரோகா³ வுட்ட²ஹிஸ்ஸாமி, பப்³ப³ஜிஸ்ஸாமீ’’தி. ஸோ கதிபாஹேனேவ கிஞ்சி ஸப்பாயங் லபி⁴த்வா அரோகோ³ ஹுத்வா ஜேதவனங் க³ந்த்வா ஸத்தா²ரங் பப்³ப³ஜ்ஜங் யாசி. ஸோ ஸத்து² ஸந்திகே பப்³ப³ஜ்ஜஞ்ச உபஸம்பத³ஞ்ச லபி⁴த்வா நசிரஸ்ஸேவ அரஹத்தங் பாபுணி. அதே²கதி³வஸங் பி⁴க்கூ² த⁴ம்மஸபா⁴யங் கத²ங் ஸமுட்டா²பேஸுங் – ‘‘ஆவுஸோ, அஸுகோ நாம பண்டு³ரோகீ³ ‘இமம்ஹா ரோகா³ வுட்டி²தோ பப்³ப³ஜிஸ்ஸாமீ’தி சிந்தெத்வா பப்³ப³ஜிதோ சேவ அரஹத்தஞ்ச பத்தோ’’தி. ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி . புச்சி²த்வா ‘‘இமாய நாமா’’தி வுத்தே ‘‘ந, பி⁴க்க²வே, இதா³னி அயமேவ; புப்³பே³ பண்டி³தாபி ஏவங் வத்வா ரோகா³ வுட்டா²ய பப்³ப³ஜித்வா அத்தனோ வுட்³டி⁴மகங்ஸூ’’தி வத்வா அதீதங் ஆஹரி.
Phuṭṭhassa meti idaṃ satthā jetavane viharanto aññataraṃ purisaṃ ārabbha kathesi. Sāvatthiyaṃ kireko puriso paṇḍurogena aṭṭito vejjehi paṭikkhitto. Puttadāropissa ‘‘ko imaṃ paṭijaggituṃ sakkotī’’ti cintesi. Tassa etadahosi – ‘‘sacāhaṃ imamhā rogā vuṭṭhahissāmi, pabbajissāmī’’ti. So katipāheneva kiñci sappāyaṃ labhitvā arogo hutvā jetavanaṃ gantvā satthāraṃ pabbajjaṃ yāci. So satthu santike pabbajjañca upasampadañca labhitvā nacirasseva arahattaṃ pāpuṇi. Athekadivasaṃ bhikkhū dhammasabhāyaṃ kathaṃ samuṭṭhāpesuṃ – ‘‘āvuso, asuko nāma paṇḍurogī ‘imamhā rogā vuṭṭhito pabbajissāmī’ti cintetvā pabbajito ceva arahattañca patto’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti . Pucchitvā ‘‘imāya nāmā’’ti vutte ‘‘na, bhikkhave, idāni ayameva; pubbe paṇḍitāpi evaṃ vatvā rogā vuṭṭhāya pabbajitvā attano vuḍḍhimakaṃsū’’ti vatvā atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ ப்³ராஹ்மணகுலே நிப்³ப³த்தித்வா வயப்பத்தோ குடும்ப³ங் ஸண்ட²பெத்வா வஸந்தோ பண்டு³ரோகீ³ அஹோஸி. வேஜ்ஜாபி படிஜக்³கி³துங் நாஸக்கி²ங்ஸு, புத்ததா³ரோபிஸ்ஸ விப்படிஸாரீ அஹோஸி. ஸோ ‘‘இமம்ஹா ரோகா³ வுட்டி²தோ பப்³ப³ஜிஸ்ஸாமீ’’தி சிந்தெத்வா கிஞ்சிதே³வ ஸப்பாயங் லபி⁴த்வா அரோகோ³ ஹுத்வா ஹிமவந்தங் பவிஸித்வா இஸிபப்³ப³ஜ்ஜங் பப்³ப³ஜித்வா அபி⁴ஞ்ஞா ச ஸமாபத்தியோ ச உப்பாதெ³த்வா ஜா²னஸுகே²ன விஹரந்தோ ‘‘எத்தகங் காலங் ஏவரூபங் ஸுக²ங் நாம நாலத்த²’’ந்தி உதா³னங் உதா³னெந்தோ இமா கா³தா² ஆஹ –
Atīte bārāṇasiyaṃ brahmadatte rajjaṃ kārente bodhisatto brāhmaṇakule nibbattitvā vayappatto kuṭumbaṃ saṇṭhapetvā vasanto paṇḍurogī ahosi. Vejjāpi paṭijaggituṃ nāsakkhiṃsu, puttadāropissa vippaṭisārī ahosi. So ‘‘imamhā rogā vuṭṭhito pabbajissāmī’’ti cintetvā kiñcideva sappāyaṃ labhitvā arogo hutvā himavantaṃ pavisitvā isipabbajjaṃ pabbajitvā abhiññā ca samāpattiyo ca uppādetvā jhānasukhena viharanto ‘‘ettakaṃ kālaṃ evarūpaṃ sukhaṃ nāma nālattha’’nti udānaṃ udānento imā gāthā āha –
127.
127.
‘‘பு²ட்ட²ஸ்ஸ மே அஞ்ஞதரேன ப்³யாதி⁴னா, ரோகே³ன பா³ள்ஹங் து³கி²தஸ்ஸ ருப்பதோ;
‘‘Phuṭṭhassa me aññatarena byādhinā, rogena bāḷhaṃ dukhitassa ruppato;
பரிஸுஸ்ஸதி கி²ப்பமித³ங் களேவரங், புப்ப²ங் யதா² பங்ஸுனி ஆதபே கதங்.
Parisussati khippamidaṃ kaḷevaraṃ, pupphaṃ yathā paṃsuni ātape kataṃ.
128.
128.
‘‘அஜஞ்ஞங் ஜஞ்ஞஸங்கா²தங், அஸுசிங் ஸுசிஸம்மதங்;
‘‘Ajaññaṃ jaññasaṅkhātaṃ, asuciṃ sucisammataṃ;
நானாகுணபபரிபூரங், ஜஞ்ஞரூபங் அபஸ்ஸதோ.
Nānākuṇapaparipūraṃ, jaññarūpaṃ apassato.
129.
129.
‘‘தி⁴ரத்து²மங் ஆதுரங் பூதிகாயங், ஜேகு³ச்சி²யங் அஸ்ஸுசிங் ப்³யாதி⁴த⁴ம்மங்;
‘‘Dhiratthumaṃ āturaṃ pūtikāyaṃ, jegucchiyaṃ assuciṃ byādhidhammaṃ;
யத்த²ப்பமத்தா அதி⁴முச்சி²தா பஜா, ஹாபெந்தி மக்³க³ங் ஸுக³தூபபத்தியா’’தி.
Yatthappamattā adhimucchitā pajā, hāpenti maggaṃ sugatūpapattiyā’’ti.
தத்த² அஞ்ஞதரேனாதி அட்ட²னவுதியா ரோகே³ஸு ஏகேன பண்டு³ரோக³ப்³யாதி⁴னா. ரோகே³னாதி ருஜ்ஜனஸபா⁴வத்தா ஏவங்லத்³த⁴னாமேன. ருப்பதோதி க⁴ட்டியமானஸ்ஸ பீளியமானஸ்ஸ. பங்ஸுனி ஆதபே கதந்தி யதா² ஆதபே தத்தவாலிகாய ட²பிதங் ஸுகு²மபுப்ப²ங் பரிஸுஸ்ஸெய்ய, ஏவங் பரிஸுஸ்ஸதீதி அத்தோ².
Tattha aññatarenāti aṭṭhanavutiyā rogesu ekena paṇḍurogabyādhinā. Rogenāti rujjanasabhāvattā evaṃladdhanāmena. Ruppatoti ghaṭṭiyamānassa pīḷiyamānassa. Paṃsuni ātape katanti yathā ātape tattavālikāya ṭhapitaṃ sukhumapupphaṃ parisusseyya, evaṃ parisussatīti attho.
அஜஞ்ஞங் ஜஞ்ஞஸங்கா²தந்தி படிகூலங் அமனாபமேவ பா³லானங் மனாபந்தி ஸங்க²ங் க³தங். நானாகுணபபரிபூரந்தி கேஸாதீ³ஹி த்³வத்திங்ஸாய குணபேஹி பரிபுண்ணங் . ஜஞ்ஞரூபங் அபஸ்ஸதோதி அபஸ்ஸந்தஸ்ஸ அந்த⁴பா³லபுது²ஜ்ஜனஸ்ஸ மனாபங் ஸாது⁴ரூபங் பரிபோ⁴க³ஸபா⁴வங் ஹுத்வா உபட்டா²தி, ‘‘அக்கி²ம்ஹா அக்கி²கூ³த²கோ’’திஆதி³னா நயேன பகாஸிதோ அஸுப⁴ஸபா⁴வோ பா³லானங் ந உபட்டா²தி.
Ajaññaṃ jaññasaṅkhātanti paṭikūlaṃ amanāpameva bālānaṃ manāpanti saṅkhaṃ gataṃ. Nānākuṇapaparipūranti kesādīhi dvattiṃsāya kuṇapehi paripuṇṇaṃ . Jaññarūpaṃ apassatoti apassantassa andhabālaputhujjanassa manāpaṃ sādhurūpaṃ paribhogasabhāvaṃ hutvā upaṭṭhāti, ‘‘akkhimhā akkhigūthako’’tiādinā nayena pakāsito asubhasabhāvo bālānaṃ na upaṭṭhāti.
ஆதுரந்தி நிச்சகி³லானங். அதி⁴முச்சி²தாதி கிலேஸமுச்சா²ய அதிவிய முச்சி²தா. பஜாதி அந்த⁴பா³லபுது²ஜ்ஜனா. ஹாபெந்தி மக்³க³ங் ஸுக³தூபபத்தியாதி இமஸ்மிங் பூதிகாயே லக்³கா³ லக்³கி³தா ஹுத்வா அபாயமக்³க³ங் பூரெந்தா தே³வமனுஸ்ஸபே⁴தா³ய ஸுக³திஉபபத்தியா மக்³க³ங் பரிஹாபெந்தி.
Āturanti niccagilānaṃ. Adhimucchitāti kilesamucchāya ativiya mucchitā. Pajāti andhabālaputhujjanā. Hāpenti maggaṃ sugatūpapattiyāti imasmiṃ pūtikāye laggā laggitā hutvā apāyamaggaṃ pūrentā devamanussabhedāya sugatiupapattiyā maggaṃ parihāpenti.
இதி மஹாஸத்தோ நானப்பகாரேன அஸுசிபா⁴வஞ்ச நிச்சாதுரபா⁴வஞ்ச பரிக்³க³ண்ஹந்தோ காயே நிப்³பி³ந்தி³த்வா யாவஜீவங் சத்தாரோ ப்³ரஹ்மவிஹாரே பா⁴வெத்வா ப்³ரஹ்மலோகபராயணோ அஹோஸி.
Iti mahāsatto nānappakārena asucibhāvañca niccāturabhāvañca pariggaṇhanto kāye nibbinditvā yāvajīvaṃ cattāro brahmavihāre bhāvetvā brahmalokaparāyaṇo ahosi.
ஸத்தா² இமங் த⁴ம்மதே³ஸனங் ஆஹரித்வா ஸச்சானி பகாஸெத்வா ஜாதகங் ஸமோதா⁴னேஸி, ஸச்சபரியோஸானே ப³ஹுஜனா ஸோதாபத்திப²லாதீ³னி பாபுணிங்ஸு. ‘‘ததா³ தாபஸோ அஹமேவ அஹோஸி’’ந்தி.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne bahujanā sotāpattiphalādīni pāpuṇiṃsu. ‘‘Tadā tāpaso ahameva ahosi’’nti.
காயனிப்³பி³ந்த³ஜாதகவண்ணனா ததியா.
Kāyanibbindajātakavaṇṇanā tatiyā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 293. காயனிப்³பி³ந்த³ஜாதகங் • 293. Kāyanibbindajātakaṃ
