| Library / Tipiṭaka / ติปิฎก • Tipiṭaka / องฺคุตฺตรนิกาย • Aṅguttaranikāya |
๑๒. สามญฺญวโคฺค
12. Sāmaññavaggo
๑. กายานุปสฺสีสุตฺตํ
1. Kāyānupassīsuttaṃ
๑๑๗. ‘‘ฉ , ภิกฺขเว, ธเมฺม อปฺปหาย อภโพฺพ กาเย กายานุปสฺสี วิหริตุํฯ กตเม ฉ? กมฺมารามตํ, ภสฺสารามตํ, นิทฺทารามตํ, สงฺคณิการามตํ, อินฺทฺริเยสุ อคุตฺตทฺวารตํ, โภชเน อมตฺตญฺญุตํฯ อิเม โข, ภิกฺขเว, ฉ ธเมฺม อปฺปหาย อภโพฺพ กาเย กายานุปสฺสี วิหริตุํฯ
117. ‘‘Cha , bhikkhave, dhamme appahāya abhabbo kāye kāyānupassī viharituṃ. Katame cha? Kammārāmataṃ, bhassārāmataṃ, niddārāmataṃ, saṅgaṇikārāmataṃ, indriyesu aguttadvārataṃ, bhojane amattaññutaṃ. Ime kho, bhikkhave, cha dhamme appahāya abhabbo kāye kāyānupassī viharituṃ.
‘‘ฉ , ภิกฺขเว, ธเมฺม ปหาย ภโพฺพ กาเย กายานุปสฺสี วิหริตุํฯ กตเม ฉ? กมฺมารามตํ, ภสฺสารามตํ, นิทฺทารามตํ, สงฺคณิการามตํ, อินฺทฺริเยสุ อคุตฺตทฺวารตํ, โภชเน อมตฺตญฺญุตํ – อิเม โข, ภิกฺขเว, ฉ ธเมฺม ปหาย ภโพฺพ กาเย กายานุปสฺสี วิหริตุ’’นฺติฯ ปฐมํฯ
‘‘Cha , bhikkhave, dhamme pahāya bhabbo kāye kāyānupassī viharituṃ. Katame cha? Kammārāmataṃ, bhassārāmataṃ, niddārāmataṃ, saṅgaṇikārāmataṃ, indriyesu aguttadvārataṃ, bhojane amattaññutaṃ – ime kho, bhikkhave, cha dhamme pahāya bhabbo kāye kāyānupassī viharitu’’nti. Paṭhamaṃ.
