| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
12. සාමඤ්‌ඤවග්‌ගො
12. Sāmaññavaggo
1. කායානුපස්‌සීසුත්‌තං
1. Kāyānupassīsuttaṃ
117. ‘‘ඡ , භික්‌ඛවෙ, ධම්‌මෙ අප්‌පහාය අභබ්‌බො කායෙ කායානුපස්‌සී විහරිතුං. කතමෙ ඡ? කම්‌මාරාමතං, භස්‌සාරාමතං, නිද්‌දාරාමතං, සඞ්‌ගණිකාරාමතං, ඉන්‌ද්‍රියෙසු අගුත්‌තද්‌වාරතං, භොජනෙ අමත්‌තඤ්‌ඤුතං. ඉමෙ ඛො, භික්‌ඛවෙ, ඡ ධම්‌මෙ අප්‌පහාය අභබ්‌බො කායෙ කායානුපස්‌සී විහරිතුං.
117. ‘‘Cha , bhikkhave, dhamme appahāya abhabbo kāye kāyānupassī viharituṃ. Katame cha? Kammārāmataṃ, bhassārāmataṃ, niddārāmataṃ, saṅgaṇikārāmataṃ, indriyesu aguttadvārataṃ, bhojane amattaññutaṃ. Ime kho, bhikkhave, cha dhamme appahāya abhabbo kāye kāyānupassī viharituṃ.
‘‘ඡ , භික්‌ඛවෙ, ධම්‌මෙ පහාය භබ්‌බො කායෙ කායානුපස්‌සී විහරිතුං. කතමෙ ඡ? කම්‌මාරාමතං, භස්‌සාරාමතං, නිද්‌දාරාමතං, සඞ්‌ගණිකාරාමතං, ඉන්‌ද්‍රියෙසු අගුත්‌තද්‌වාරතං, භොජනෙ අමත්‌තඤ්‌ඤුතං – ඉමෙ ඛො, භික්‌ඛවෙ, ඡ ධම්‌මෙ පහාය භබ්‌බො කායෙ කායානුපස්‌සී විහරිතු’’න්‌ති. පඨමං.
‘‘Cha , bhikkhave, dhamme pahāya bhabbo kāye kāyānupassī viharituṃ. Katame cha? Kammārāmataṃ, bhassārāmataṃ, niddārāmataṃ, saṅgaṇikārāmataṃ, indriyesu aguttadvārataṃ, bhojane amattaññutaṃ – ime kho, bhikkhave, cha dhamme pahāya bhabbo kāye kāyānupassī viharitu’’nti. Paṭhamaṃ.
