| Library / Tipiṭaka / ติปิฎก • Tipiṭaka / มิลินฺทปญฺหปาฬิ • Milindapañhapāḷi |
๖. สติวโคฺค
6. Sativaggo
๑. กายปิยายนปโญฺห
1. Kāyapiyāyanapañho
๑. ราชา อาห ‘‘ภเนฺต นาคเสน, ปิโย ปพฺพชิตานํ กาโย’’ติ? ‘‘น โข, มหาราช, ปิโย ปพฺพชิตานํ กาโย’’ติฯ ‘‘อถ กิสฺส นุ โข, ภเนฺต, เกลายถ มมายถา’’ติ? ‘‘กิํ ปน เต, มหาราช, กทาจิ กรหจิ สงฺคามคตสฺส กณฺฑปฺปหาโร โหตี’’ติ? ‘‘อาม, ภเนฺต, โหตี’’ติฯ ‘‘กิํนุ โข , มหาราช, โส วโณ อาเลเปน จ อาลิมฺปียติ เตเลน จ มกฺขียติ สุขุเมน จ โจฬปเฎฺฎน ปลิเวฐียตี’’ติ? ‘‘อาม, ภเนฺต, อาเลเปน จ อาลิมฺปียติ เตเลน จ มกฺขียติ สุขุเมน จ โจฬปเฎฺฎน ปลิเวฐียตี’’ติฯ ‘‘กิํนุ โข, มหาราช, ปิโย เต วโณ, เตน อาเลเปน จ อาลิมฺปียติ เตเลน จ มกฺขียติ สุขุเมน จ โจฬปเฎฺฎน ปลิเวฐียตี’’ติ? ‘‘น เม, ภเนฺต, ปิโย วโณ, อปิ จ มํสสฺส รุหนตฺถาย อาเลเปน จ อาลิมฺปียติ เตเลน จ มกฺขียติ สุขุเมน จ โจฬปเฎฺฎน ปลิเวฐียตี’’ติฯ ‘‘เอวเมว โข, มหาราช, อปฺปิโย ปพฺพชิตานํ กาโย, อถ จ ปพฺพชิตา อนโชฺฌสิตา กายํ ปริหรนฺติ พฺรหฺมจริยานุคฺคหายฯ อปิ จ โข, มหาราช, วณูปโม กาโย วุโตฺต ภควตา, เตน ปพฺพชิตา วณมิว กายํ ปริหรนฺติ อนโชฺฌสิตาฯ ภาสิตเมฺปตํ มหาราช ภควตา –
1. Rājā āha ‘‘bhante nāgasena, piyo pabbajitānaṃ kāyo’’ti? ‘‘Na kho, mahārāja, piyo pabbajitānaṃ kāyo’’ti. ‘‘Atha kissa nu kho, bhante, kelāyatha mamāyathā’’ti? ‘‘Kiṃ pana te, mahārāja, kadāci karahaci saṅgāmagatassa kaṇḍappahāro hotī’’ti? ‘‘Āma, bhante, hotī’’ti. ‘‘Kiṃnu kho , mahārāja, so vaṇo ālepena ca ālimpīyati telena ca makkhīyati sukhumena ca coḷapaṭṭena paliveṭhīyatī’’ti? ‘‘Āma, bhante, ālepena ca ālimpīyati telena ca makkhīyati sukhumena ca coḷapaṭṭena paliveṭhīyatī’’ti. ‘‘Kiṃnu kho, mahārāja, piyo te vaṇo, tena ālepena ca ālimpīyati telena ca makkhīyati sukhumena ca coḷapaṭṭena paliveṭhīyatī’’ti? ‘‘Na me, bhante, piyo vaṇo, api ca maṃsassa ruhanatthāya ālepena ca ālimpīyati telena ca makkhīyati sukhumena ca coḷapaṭṭena paliveṭhīyatī’’ti. ‘‘Evameva kho, mahārāja, appiyo pabbajitānaṃ kāyo, atha ca pabbajitā anajjhositā kāyaṃ pariharanti brahmacariyānuggahāya. Api ca kho, mahārāja, vaṇūpamo kāyo vutto bhagavatā, tena pabbajitā vaṇamiva kāyaṃ pariharanti anajjhositā. Bhāsitampetaṃ mahārāja bhagavatā –
‘‘‘อลฺลจมฺมปฎิจฺฉโนฺน, นวทฺวาโร มหาวโณ;
‘‘‘Allacammapaṭicchanno, navadvāro mahāvaṇo;
สมนฺตโต ปคฺฆรติ, อสุจิปูติคนฺธิโย’’’ติฯ
Samantato paggharati, asucipūtigandhiyo’’’ti.
‘‘กโลฺลสิ, ภเนฺต นาคเสนา’’ติฯ
‘‘Kallosi, bhante nāgasenā’’ti.
กายปิยายนปโญฺห ปฐโมฯ
Kāyapiyāyanapañho paṭhamo.
