| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၆. သတိဝဂ္ဂော
6. Sativaggo
၁. ကာယပိယာယနပဉ္ဟော
1. Kāyapiyāyanapañho
၁. ရာဇာ အာဟ ‘‘ဘန္တေ နာဂသေန, ပိယော ပဗ္ဗဇိတာနံ ကာယော’’တိ? ‘‘န ခော, မဟာရာဇ, ပိယော ပဗ္ဗဇိတာနံ ကာယော’’တိ။ ‘‘အထ ကိသ္သ နု ခော, ဘန္တေ, ကေလာယထ မမာယထာ’’တိ? ‘‘ကိံ ပန တေ, မဟာရာဇ, ကဒာစိ ကရဟစိ သင္ဂာမဂတသ္သ ကဏ္ဍပ္ပဟာရော ဟောတီ’’တိ? ‘‘အာမ, ဘန္တေ, ဟောတီ’’တိ။ ‘‘ကိံနု ခော , မဟာရာဇ, သော ဝဏော အာလေပေန စ အာလိမ္ပီယတိ တေလေန စ မက္ခီယတိ သုခုမေန စ စောဠပဋ္ဋေန ပလိဝေဌီယတီ’’တိ? ‘‘အာမ, ဘန္တေ, အာလေပေန စ အာလိမ္ပီယတိ တေလေန စ မက္ခီယတိ သုခုမေန စ စောဠပဋ္ဋေန ပလိဝေဌီယတီ’’တိ။ ‘‘ကိံနု ခော, မဟာရာဇ, ပိယော တေ ဝဏော, တေန အာလေပေန စ အာလိမ္ပီယတိ တေလေန စ မက္ခီယတိ သုခုမေန စ စောဠပဋ္ဋေန ပလိဝေဌီယတီ’’တိ? ‘‘န မေ, ဘန္တေ, ပိယော ဝဏော, အပိ စ မံသသ္သ ရုဟနတ္ထာယ အာလေပေန စ အာလိမ္ပီယတိ တေလေန စ မက္ခီယတိ သုခုမေန စ စောဠပဋ္ဋေန ပလိဝေဌီယတီ’’တိ။ ‘‘ဧဝမေဝ ခော, မဟာရာဇ, အပ္ပိယော ပဗ္ဗဇိတာနံ ကာယော, အထ စ ပဗ္ဗဇိတာ အနဇ္ဈောသိတာ ကာယံ ပရိဟရန္တိ ဗ္ရဟ္မစရိယာနုဂ္ဂဟာယ။ အပိ စ ခော, မဟာရာဇ, ဝဏူပမော ကာယော ဝုတ္တော ဘဂဝတာ, တေန ပဗ္ဗဇိတာ ဝဏမိဝ ကာယံ ပရိဟရန္တိ အနဇ္ဈောသိတာ။ ဘာသိတမ္ပေတံ မဟာရာဇ ဘဂဝတာ –
1. Rājā āha ‘‘bhante nāgasena, piyo pabbajitānaṃ kāyo’’ti? ‘‘Na kho, mahārāja, piyo pabbajitānaṃ kāyo’’ti. ‘‘Atha kissa nu kho, bhante, kelāyatha mamāyathā’’ti? ‘‘Kiṃ pana te, mahārāja, kadāci karahaci saṅgāmagatassa kaṇḍappahāro hotī’’ti? ‘‘Āma, bhante, hotī’’ti. ‘‘Kiṃnu kho , mahārāja, so vaṇo ālepena ca ālimpīyati telena ca makkhīyati sukhumena ca coḷapaṭṭena paliveṭhīyatī’’ti? ‘‘Āma, bhante, ālepena ca ālimpīyati telena ca makkhīyati sukhumena ca coḷapaṭṭena paliveṭhīyatī’’ti. ‘‘Kiṃnu kho, mahārāja, piyo te vaṇo, tena ālepena ca ālimpīyati telena ca makkhīyati sukhumena ca coḷapaṭṭena paliveṭhīyatī’’ti? ‘‘Na me, bhante, piyo vaṇo, api ca maṃsassa ruhanatthāya ālepena ca ālimpīyati telena ca makkhīyati sukhumena ca coḷapaṭṭena paliveṭhīyatī’’ti. ‘‘Evameva kho, mahārāja, appiyo pabbajitānaṃ kāyo, atha ca pabbajitā anajjhositā kāyaṃ pariharanti brahmacariyānuggahāya. Api ca kho, mahārāja, vaṇūpamo kāyo vutto bhagavatā, tena pabbajitā vaṇamiva kāyaṃ pariharanti anajjhositā. Bhāsitampetaṃ mahārāja bhagavatā –
‘‘‘အလ္လစမ္မပဋိစ္ဆန္နော၊ နဝဒ္ဝာရော မဟာဝဏော။
‘‘‘Allacammapaṭicchanno, navadvāro mahāvaṇo;
သမန္တတော ပဂ္ဃရတိ၊ အသုစိပူတိဂန္ဓိယော’’’တိ။
Samantato paggharati, asucipūtigandhiyo’’’ti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
ကာယပိယာယနပဉ္ဟော ပဌမော။
Kāyapiyāyanapañho paṭhamo.
