| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༦. སཏིཝགྒོ
6. Sativaggo
༡. ཀཱཡཔིཡཱཡནཔཉྷོ
1. Kāyapiyāyanapañho
༡. རཱཛཱ ཨཱཧ ‘‘བྷནྟེ ནཱགསེན, པིཡོ པབྦཛིཏཱནཾ ཀཱཡོ’’ཏི? ‘‘ན ཁོ, མཧཱརཱཛ, པིཡོ པབྦཛིཏཱནཾ ཀཱཡོ’’ཏི། ‘‘ཨཐ ཀིསྶ ནུ ཁོ, བྷནྟེ, ཀེལཱཡཐ མམཱཡཐཱ’’ཏི? ‘‘ཀིཾ པན ཏེ, མཧཱརཱཛ, ཀདཱཙི ཀརཧཙི སངྒཱམགཏསྶ ཀཎྜཔྤཧཱརོ ཧོཏཱི’’ཏི? ‘‘ཨཱམ, བྷནྟེ, ཧོཏཱི’’ཏི། ‘‘ཀིཾནུ ཁོ , མཧཱརཱཛ, སོ ཝཎོ ཨཱལེཔེན ཙ ཨཱལིམྤཱིཡཏི ཏེལེན ཙ མཀྑཱིཡཏི སུཁུམེན ཙ ཙོལ༹པཊྚེན པལིཝེཋཱིཡཏཱི’’ཏི? ‘‘ཨཱམ, བྷནྟེ, ཨཱལེཔེན ཙ ཨཱལིམྤཱིཡཏི ཏེལེན ཙ མཀྑཱིཡཏི སུཁུམེན ཙ ཙོལ༹པཊྚེན པལིཝེཋཱིཡཏཱི’’ཏི། ‘‘ཀིཾནུ ཁོ, མཧཱརཱཛ, པིཡོ ཏེ ཝཎོ, ཏེན ཨཱལེཔེན ཙ ཨཱལིམྤཱིཡཏི ཏེལེན ཙ མཀྑཱིཡཏི སུཁུམེན ཙ ཙོལ༹པཊྚེན པལིཝེཋཱིཡཏཱི’’ཏི? ‘‘ན མེ, བྷནྟེ, པིཡོ ཝཎོ, ཨཔི ཙ མཾསསྶ རུཧནཏྠཱཡ ཨཱལེཔེན ཙ ཨཱལིམྤཱིཡཏི ཏེལེན ཙ མཀྑཱིཡཏི སུཁུམེན ཙ ཙོལ༹པཊྚེན པལིཝེཋཱིཡཏཱི’’ཏི། ‘‘ཨེཝམེཝ ཁོ, མཧཱརཱཛ, ཨཔྤིཡོ པབྦཛིཏཱནཾ ཀཱཡོ, ཨཐ ཙ པབྦཛིཏཱ ཨནཛ྄ཛྷོསིཏཱ ཀཱཡཾ པརིཧརནྟི བྲཧྨཙརིཡཱནུགྒཧཱཡ། ཨཔི ཙ ཁོ, མཧཱརཱཛ, ཝཎཱུཔམོ ཀཱཡོ ཝུཏྟོ བྷགཝཏཱ, ཏེན པབྦཛིཏཱ ཝཎམིཝ ཀཱཡཾ པརིཧརནྟི ཨནཛ྄ཛྷོསིཏཱ། བྷཱསིཏམྤེཏཾ མཧཱརཱཛ བྷགཝཏཱ –
1. Rājā āha ‘‘bhante nāgasena, piyo pabbajitānaṃ kāyo’’ti? ‘‘Na kho, mahārāja, piyo pabbajitānaṃ kāyo’’ti. ‘‘Atha kissa nu kho, bhante, kelāyatha mamāyathā’’ti? ‘‘Kiṃ pana te, mahārāja, kadāci karahaci saṅgāmagatassa kaṇḍappahāro hotī’’ti? ‘‘Āma, bhante, hotī’’ti. ‘‘Kiṃnu kho , mahārāja, so vaṇo ālepena ca ālimpīyati telena ca makkhīyati sukhumena ca coḷapaṭṭena paliveṭhīyatī’’ti? ‘‘Āma, bhante, ālepena ca ālimpīyati telena ca makkhīyati sukhumena ca coḷapaṭṭena paliveṭhīyatī’’ti. ‘‘Kiṃnu kho, mahārāja, piyo te vaṇo, tena ālepena ca ālimpīyati telena ca makkhīyati sukhumena ca coḷapaṭṭena paliveṭhīyatī’’ti? ‘‘Na me, bhante, piyo vaṇo, api ca maṃsassa ruhanatthāya ālepena ca ālimpīyati telena ca makkhīyati sukhumena ca coḷapaṭṭena paliveṭhīyatī’’ti. ‘‘Evameva kho, mahārāja, appiyo pabbajitānaṃ kāyo, atha ca pabbajitā anajjhositā kāyaṃ pariharanti brahmacariyānuggahāya. Api ca kho, mahārāja, vaṇūpamo kāyo vutto bhagavatā, tena pabbajitā vaṇamiva kāyaṃ pariharanti anajjhositā. Bhāsitampetaṃ mahārāja bhagavatā –
‘‘‘ཨལླཙམྨཔཊིཙྪནྣོ, ནཝདྭཱརོ མཧཱཝཎོ།
‘‘‘Allacammapaṭicchanno, navadvāro mahāvaṇo;
སམནྟཏོ པགྒྷརཏི, ཨསུཙིཔཱུཏིགནྡྷིཡོ’’’ཏི༎
Samantato paggharati, asucipūtigandhiyo’’’ti.
‘‘ཀལློསི, བྷནྟེ ནཱགསེནཱ’’ཏི།
‘‘Kallosi, bhante nāgasenā’’ti.
ཀཱཡཔིཡཱཡནཔཉྷོ པཋམོ།
Kāyapiyāyanapañho paṭhamo.
