| Library / Tipiṭaka / ਤਿਪਿਟਕ • Tipiṭaka / ਮਿਲਿਨ੍ਦਪਞ੍ਹਪਾਲ਼ਿ • Milindapañhapāḷi |
੬. ਸਤਿવਗ੍ਗੋ
6. Sativaggo
੧. ਕਾਯਪਿਯਾਯਨਪਞ੍ਹੋ
1. Kāyapiyāyanapañho
੧. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਪਿਯੋ ਪਬ੍ਬਜਿਤਾਨਂ ਕਾਯੋ’’ਤਿ? ‘‘ਨ ਖੋ, ਮਹਾਰਾਜ, ਪਿਯੋ ਪਬ੍ਬਜਿਤਾਨਂ ਕਾਯੋ’’ਤਿ। ‘‘ਅਥ ਕਿਸ੍ਸ ਨੁ ਖੋ, ਭਨ੍ਤੇ, ਕੇਲਾਯਥ ਮਮਾਯਥਾ’’ਤਿ? ‘‘ਕਿਂ ਪਨ ਤੇ, ਮਹਾਰਾਜ, ਕਦਾਚਿ ਕਰਹਚਿ ਸਙ੍ਗਾਮਗਤਸ੍ਸ ਕਣ੍ਡਪ੍ਪਹਾਰੋ ਹੋਤੀ’’ਤਿ? ‘‘ਆਮ, ਭਨ੍ਤੇ, ਹੋਤੀ’’ਤਿ। ‘‘ਕਿਂਨੁ ਖੋ , ਮਹਾਰਾਜ, ਸੋ વਣੋ ਆਲੇਪੇਨ ਚ ਆਲਿਮ੍ਪੀਯਤਿ ਤੇਲੇਨ ਚ ਮਕ੍ਖੀਯਤਿ ਸੁਖੁਮੇਨ ਚ ਚੋਲ਼ਪਟ੍ਟੇਨ ਪਲਿવੇਠੀਯਤੀ’’ਤਿ? ‘‘ਆਮ, ਭਨ੍ਤੇ, ਆਲੇਪੇਨ ਚ ਆਲਿਮ੍ਪੀਯਤਿ ਤੇਲੇਨ ਚ ਮਕ੍ਖੀਯਤਿ ਸੁਖੁਮੇਨ ਚ ਚੋਲ਼ਪਟ੍ਟੇਨ ਪਲਿવੇਠੀਯਤੀ’’ਤਿ। ‘‘ਕਿਂਨੁ ਖੋ, ਮਹਾਰਾਜ, ਪਿਯੋ ਤੇ વਣੋ, ਤੇਨ ਆਲੇਪੇਨ ਚ ਆਲਿਮ੍ਪੀਯਤਿ ਤੇਲੇਨ ਚ ਮਕ੍ਖੀਯਤਿ ਸੁਖੁਮੇਨ ਚ ਚੋਲ਼ਪਟ੍ਟੇਨ ਪਲਿવੇਠੀਯਤੀ’’ਤਿ? ‘‘ਨ ਮੇ, ਭਨ੍ਤੇ, ਪਿਯੋ વਣੋ, ਅਪਿ ਚ ਮਂਸਸ੍ਸ ਰੁਹਨਤ੍ਥਾਯ ਆਲੇਪੇਨ ਚ ਆਲਿਮ੍ਪੀਯਤਿ ਤੇਲੇਨ ਚ ਮਕ੍ਖੀਯਤਿ ਸੁਖੁਮੇਨ ਚ ਚੋਲ਼ਪਟ੍ਟੇਨ ਪਲਿવੇਠੀਯਤੀ’’ਤਿ। ‘‘ਏવਮੇવ ਖੋ, ਮਹਾਰਾਜ, ਅਪ੍ਪਿਯੋ ਪਬ੍ਬਜਿਤਾਨਂ ਕਾਯੋ, ਅਥ ਚ ਪਬ੍ਬਜਿਤਾ ਅਨਜ੍ਝੋਸਿਤਾ ਕਾਯਂ ਪਰਿਹਰਨ੍ਤਿ ਬ੍ਰਹ੍ਮਚਰਿਯਾਨੁਗ੍ਗਹਾਯ। ਅਪਿ ਚ ਖੋ, ਮਹਾਰਾਜ, વਣੂਪਮੋ ਕਾਯੋ વੁਤ੍ਤੋ ਭਗવਤਾ, ਤੇਨ ਪਬ੍ਬਜਿਤਾ વਣਮਿવ ਕਾਯਂ ਪਰਿਹਰਨ੍ਤਿ ਅਨਜ੍ਝੋਸਿਤਾ। ਭਾਸਿਤਮ੍ਪੇਤਂ ਮਹਾਰਾਜ ਭਗવਤਾ –
1. Rājā āha ‘‘bhante nāgasena, piyo pabbajitānaṃ kāyo’’ti? ‘‘Na kho, mahārāja, piyo pabbajitānaṃ kāyo’’ti. ‘‘Atha kissa nu kho, bhante, kelāyatha mamāyathā’’ti? ‘‘Kiṃ pana te, mahārāja, kadāci karahaci saṅgāmagatassa kaṇḍappahāro hotī’’ti? ‘‘Āma, bhante, hotī’’ti. ‘‘Kiṃnu kho , mahārāja, so vaṇo ālepena ca ālimpīyati telena ca makkhīyati sukhumena ca coḷapaṭṭena paliveṭhīyatī’’ti? ‘‘Āma, bhante, ālepena ca ālimpīyati telena ca makkhīyati sukhumena ca coḷapaṭṭena paliveṭhīyatī’’ti. ‘‘Kiṃnu kho, mahārāja, piyo te vaṇo, tena ālepena ca ālimpīyati telena ca makkhīyati sukhumena ca coḷapaṭṭena paliveṭhīyatī’’ti? ‘‘Na me, bhante, piyo vaṇo, api ca maṃsassa ruhanatthāya ālepena ca ālimpīyati telena ca makkhīyati sukhumena ca coḷapaṭṭena paliveṭhīyatī’’ti. ‘‘Evameva kho, mahārāja, appiyo pabbajitānaṃ kāyo, atha ca pabbajitā anajjhositā kāyaṃ pariharanti brahmacariyānuggahāya. Api ca kho, mahārāja, vaṇūpamo kāyo vutto bhagavatā, tena pabbajitā vaṇamiva kāyaṃ pariharanti anajjhositā. Bhāsitampetaṃ mahārāja bhagavatā –
‘‘‘ਅਲ੍ਲਚਮ੍ਮਪਟਿਚ੍ਛਨ੍ਨੋ, ਨવਦ੍વਾਰੋ ਮਹਾવਣੋ।
‘‘‘Allacammapaṭicchanno, navadvāro mahāvaṇo;
ਸਮਨ੍ਤਤੋ ਪਗ੍ਘਰਤਿ, ਅਸੁਚਿਪੂਤਿਗਨ੍ਧਿਯੋ’’’ਤਿ॥
Samantato paggharati, asucipūtigandhiyo’’’ti.
‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ।
‘‘Kallosi, bhante nāgasenā’’ti.
ਕਾਯਪਿਯਾਯਨਪਞ੍ਹੋ ਪਠਮੋ।
Kāyapiyāyanapañho paṭhamo.
