| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༢. ཀཱཡསཀྑཱིསུཏྟཾ
2. Kāyasakkhīsuttaṃ
༤༣. ‘‘‘ཀཱཡསཀྑཱི ཀཱཡསཀྑཱི’ཏི, ཨཱཝུསོ, ཝུཙྩཏི། ཀིཏྟཱཝཏཱ ནུ ཁོ, ཨཱཝུསོ, ཀཱཡསཀྑཱི ཝུཏྟོ བྷགཝཏཱ’’ཏི? ‘‘ཨིདྷཱཝུསོ, བྷིཀྑུ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི། ཡཐཱ ཡཐཱ ཙ ཏདཱཡཏནཾ ཏཐཱ ཏཐཱ ནཾ ཀཱཡེན ཕུསིཏྭཱ ཝིཧརཏི། ཨེཏྟཱཝཏཱཔི ཁོ, ཨཱཝུསོ, ཀཱཡསཀྑཱི ཝུཏྟོ བྷགཝཏཱ པརིཡཱཡེན།
43. ‘‘‘Kāyasakkhī kāyasakkhī’ti, āvuso, vuccati. Kittāvatā nu kho, āvuso, kāyasakkhī vutto bhagavatā’’ti? ‘‘Idhāvuso, bhikkhu vivicceva kāmehi…pe… paṭhamaṃ jhānaṃ upasampajja viharati. Yathā yathā ca tadāyatanaṃ tathā tathā naṃ kāyena phusitvā viharati. Ettāvatāpi kho, āvuso, kāyasakkhī vutto bhagavatā pariyāyena.
‘‘པུན ཙཔརཾ, ཨཱཝུསོ, བྷིཀྑུ ཝིཏཀྐཝིཙཱརཱནཾ ཝཱུཔསམཱ…པེ॰… དུཏིཡཾ ཛྷཱནཾ… ཏཏིཡཾ ཛྷཱནཾ… ཙཏུཏྠཾ ཛྷཱནཾ ཨུཔསམྤཛྫ ཝིཧརཏི། ཡཐཱ ཡཐཱ ཙ ཏདཱཡཏནཾ ཏཐཱ ཏཐཱ ནཾ ཀཱཡེན ཕུསིཏྭཱ ཝིཧརཏི། ཨེཏྟཱཝཏཱཔི ཁོ, ཨཱཝུསོ, ཀཱཡསཀྑཱི ཝུཏྟོ བྷགཝཏཱ པརིཡཱཡེན།
‘‘Puna caparaṃ, āvuso, bhikkhu vitakkavicārānaṃ vūpasamā…pe… dutiyaṃ jhānaṃ… tatiyaṃ jhānaṃ… catutthaṃ jhānaṃ upasampajja viharati. Yathā yathā ca tadāyatanaṃ tathā tathā naṃ kāyena phusitvā viharati. Ettāvatāpi kho, āvuso, kāyasakkhī vutto bhagavatā pariyāyena.
‘‘པུན ཙཔརཾ, ཨཱཝུསོ, བྷིཀྑུ སབྦསོ རཱུཔསཉྙཱནཾ སམཏིཀྐམཱ པཊིགྷསཉྙཱནཾ ཨཏྠངྒམཱ ནཱནཏྟསཉྙཱནཾ ཨམནསིཀཱརཱ ‘ཨནནྟོ ཨཱཀཱསོ’ཏི ཨཱཀཱསཱནཉྩཱཡཏནཾ ཨུཔསམྤཛྫ ཝིཧརཏི། ཡཐཱ ཡཐཱ ཙ ཏདཱཡཏནཾ ཏཐཱ ཏཐཱ ནཾ ཀཱཡེན ཕུསིཏྭཱ ཝིཧརཏི། ཨེཏྟཱཝཏཱཔི ཁོ, ཨཱཝུསོ, ཀཱཡསཀྑཱི ཝུཏྟོ བྷགཝཏཱ པརིཡཱཡེན…པེ॰…།
‘‘Puna caparaṃ, āvuso, bhikkhu sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃ amanasikārā ‘ananto ākāso’ti ākāsānañcāyatanaṃ upasampajja viharati. Yathā yathā ca tadāyatanaṃ tathā tathā naṃ kāyena phusitvā viharati. Ettāvatāpi kho, āvuso, kāyasakkhī vutto bhagavatā pariyāyena…pe….
‘‘པུན ཙཔརཾ, ཨཱཝུསོ, བྷིཀྑུ སབྦསོ ནེཝསཉྙཱནཱསཉྙཱཡཏནཾ སམཏིཀྐམྨ སཉྙཱཝེདཡིཏནིརོདྷཾ ཨུཔསམྤཛྫ ཝིཧརཏི, པཉྙཱཡ ཙསྶ དིསྭཱ ཨཱསཝཱ པརིཀྑཱིཎཱ ཧོནྟི། ཡཐཱ ཡཐཱ ཙ ཏདཱཡཏནཾ ཏཐཱ ཏཐཱ ནཾ ཀཱཡེན ཕུསིཏྭཱ ཝིཧརཏི། ཨེཏྟཱཝཏཱཔི ཁོ, ཨཱཝུསོ, ཀཱཡསཀྑཱི ཝུཏྟོ བྷགཝཏཱ ནིཔྤརིཡཱཡེནཱ’’ཏི། དུཏིཡཾ།
‘‘Puna caparaṃ, āvuso, bhikkhu sabbaso nevasaññānāsaññāyatanaṃ samatikkamma saññāvedayitanirodhaṃ upasampajja viharati, paññāya cassa disvā āsavā parikkhīṇā honti. Yathā yathā ca tadāyatanaṃ tathā tathā naṃ kāyena phusitvā viharati. Ettāvatāpi kho, āvuso, kāyasakkhī vutto bhagavatā nippariyāyenā’’ti. Dutiyaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༢. ཀཱཡསཀྑིསུཏྟཝཎྞནཱ • 2. Kāyasakkhisuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༡༠. སམྦཱདྷསུཏྟཱདིཝཎྞནཱ • 1-10. Sambādhasuttādivaṇṇanā
