| Library / Tipiṭaka / তিপিটক • Tipiṭaka / মহাৰিভঙ্গ • Mahāvibhaṅga |
২. কাযসংসগ্গসিক্খাপদং
2. Kāyasaṃsaggasikkhāpadaṃ
২৬৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন আযস্মা উদাযী অরঞ্ঞে ৰিহরতি। তস্সাযস্মতো ৰিহারো অভিরূপো হোতি দস্সনীযো পাসাদিকো, মজ্ঝেগব্ভো, সমন্তাপরিযাগারো, সুপঞ্ঞত্তং মঞ্চপীঠং ভিসিবিম্বোহনং, পানীযং পরিভোজনীযং সুপট্ঠিতং, পরিৰেণং সুসম্মট্ঠং। বহূ মনুস্সা আযস্মতো উদাযিস্স ৰিহারপেক্খকা আগচ্ছন্তি। অঞ্ঞতরোপি ব্রাহ্মণো সপজাপতিকো যেনাযস্মা উদাযী তেনুপসঙ্কমি; উপসঙ্কমিত্ৰা আযস্মন্তং উদাযিং এতদৰোচ – ‘‘ইচ্ছাম মযং ভোতো উদাযিস্স ৰিহারং পেক্খিতু’’ন্তি। ‘‘তেন হি, ব্রাহ্মণ, পেক্খস্সূ’’তি, অৰাপুরণং 1 আদায ঘটিকং উগ্ঘাটেত্ৰা কৰাটং পণামেত্ৰা ৰিহারং পাৰিসি। সোপি খো ব্রাহ্মণো আযস্মতো উদাযিস্স পিট্ঠিতো পাৰিসি। সাপি খো ব্রাহ্মণী তস্স ব্রাহ্মণস্স পিট্ঠিতো পাৰিসি। অথ খো আযস্মা উদাযী একচ্চে ৰাতপানে ৰিৰরন্তো একচ্চে ৰাতপানে থকেন্তো গব্ভং অনুপরিগন্ত্ৰা পিট্ঠিতো আগন্ত্ৰা তস্সা ব্রাহ্মণিযা অঙ্গমঙ্গানি পরামসি। অথ খো সো ব্রাহ্মণো আযস্মতা উদাযিনা সদ্ধিং পটিসম্মোদিত্ৰা অগমাসি। অথ খো সো ব্রাহ্মণো অত্তমনো অত্তমনৰাচং নিচ্ছারেসি – ‘‘উল়ারা ইমে সমণা সক্যপুত্তিযা যে ইমে এৰরূপে অরঞ্ঞে ৰিহরন্তি। ভৰম্পি উদাযী উল়ারো যো এৰরূপে অরঞ্ঞে ৰিহরতী’’তি।
269. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā udāyī araññe viharati. Tassāyasmato vihāro abhirūpo hoti dassanīyo pāsādiko, majjhegabbho, samantāpariyāgāro, supaññattaṃ mañcapīṭhaṃ bhisibimbohanaṃ, pānīyaṃ paribhojanīyaṃ supaṭṭhitaṃ, pariveṇaṃ susammaṭṭhaṃ. Bahū manussā āyasmato udāyissa vihārapekkhakā āgacchanti. Aññataropi brāhmaṇo sapajāpatiko yenāyasmā udāyī tenupasaṅkami; upasaṅkamitvā āyasmantaṃ udāyiṃ etadavoca – ‘‘icchāma mayaṃ bhoto udāyissa vihāraṃ pekkhitu’’nti. ‘‘Tena hi, brāhmaṇa, pekkhassū’’ti, avāpuraṇaṃ 2 ādāya ghaṭikaṃ ugghāṭetvā kavāṭaṃ paṇāmetvā vihāraṃ pāvisi. Sopi kho brāhmaṇo āyasmato udāyissa piṭṭhito pāvisi. Sāpi kho brāhmaṇī tassa brāhmaṇassa piṭṭhito pāvisi. Atha kho āyasmā udāyī ekacce vātapāne vivaranto ekacce vātapāne thakento gabbhaṃ anuparigantvā piṭṭhito āgantvā tassā brāhmaṇiyā aṅgamaṅgāni parāmasi. Atha kho so brāhmaṇo āyasmatā udāyinā saddhiṃ paṭisammoditvā agamāsi. Atha kho so brāhmaṇo attamano attamanavācaṃ nicchāresi – ‘‘uḷārā ime samaṇā sakyaputtiyā ye ime evarūpe araññe viharanti. Bhavampi udāyī uḷāro yo evarūpe araññe viharatī’’ti.
এৰং ৰুত্তে সা ব্রাহ্মণী তং ব্রাহ্মণং এতদৰোচ – ‘‘কুতো তস্স উল়ারত্ততা! যথেৰ মে ত্ৰং অঙ্গমঙ্গানি পরামসি এৰমেৰ মে সমণো উদাযী অঙ্গমঙ্গানি পরামসী’’তি। অথ খো সো ব্রাহ্মণো উজ্ঝাযতি খিয্যতি ৰিপাচেতি – ‘‘অলজ্জিনো ইমে সমণা সক্যপুত্তিযা দুস্সীলা মুসাৰাদিনো। ইমে হি নাম ধম্মচারিনো সমচারিনো ব্রহ্মচারিনো সচ্চৰাদিনো সীলৰন্তো কল্যাণধম্মা পটিজানিস্সন্তি! নত্থি ইমেসং সামঞ্ঞং নত্থি ইমেসং ব্রহ্মঞ্ঞং, নট্ঠং ইমেসং সামঞ্ঞং নট্ঠং ইমেসং ব্রহ্মঞ্ঞং, কুতো ইমেসং সামঞ্ঞং কুতো ইমেসং ব্রহ্মঞ্ঞং, অপগতা ইমে সামঞ্ঞা অপগতা ইমে ব্রহ্মঞ্ঞা। কথঞ্হি নাম সমণো উদাযী মম ভরিযায অঙ্গমঙ্গানি পরামসিস্সতি! ন হি সক্কা কুলিত্থীহি কুলধীতাহি কুলকুমারীহি কুলসুণ্হাহি কুলদাসীহি আরামং ৰা ৰিহারং ৰা গন্তুং। সচে 3 কুলিত্থিযো কুলধীতরো 4 কুলকুমারিযো কুলসুণ্হাযো কুলদাসিযো আরামং ৰা ৰিহারং ৰা গচ্ছেয্যুং, তাপি সমণা সক্যপুত্তিযা দূসেয্যু’’ন্তি!
Evaṃ vutte sā brāhmaṇī taṃ brāhmaṇaṃ etadavoca – ‘‘kuto tassa uḷārattatā! Yatheva me tvaṃ aṅgamaṅgāni parāmasi evameva me samaṇo udāyī aṅgamaṅgāni parāmasī’’ti. Atha kho so brāhmaṇo ujjhāyati khiyyati vipāceti – ‘‘alajjino ime samaṇā sakyaputtiyā dussīlā musāvādino. Ime hi nāma dhammacārino samacārino brahmacārino saccavādino sīlavanto kalyāṇadhammā paṭijānissanti! Natthi imesaṃ sāmaññaṃ natthi imesaṃ brahmaññaṃ, naṭṭhaṃ imesaṃ sāmaññaṃ naṭṭhaṃ imesaṃ brahmaññaṃ, kuto imesaṃ sāmaññaṃ kuto imesaṃ brahmaññaṃ, apagatā ime sāmaññā apagatā ime brahmaññā. Kathañhi nāma samaṇo udāyī mama bhariyāya aṅgamaṅgāni parāmasissati! Na hi sakkā kulitthīhi kuladhītāhi kulakumārīhi kulasuṇhāhi kuladāsīhi ārāmaṃ vā vihāraṃ vā gantuṃ. Sace 5 kulitthiyo kuladhītaro 6 kulakumāriyo kulasuṇhāyo kuladāsiyo ārāmaṃ vā vihāraṃ vā gaccheyyuṃ, tāpi samaṇā sakyaputtiyā dūseyyu’’nti!
অস্সোসুং খো ভিক্খু তস্স ব্রাহ্মণস্স উজ্ঝাযন্তস্স খিয্যন্তস্স ৰিপাচেন্তস্স। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উদাযী মাতুগামেন সদ্ধিং কাযসংসগ্গং সমাপজ্জিস্সতী’’তি! অথ খো তে ভিক্খূ আযস্মন্তং উদাযিং অনেকপরিযাযেন ৰিগরহিত্ৰা ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা আযস্মন্তং উদাযিং পটিপুচ্ছি – ‘‘সচ্চং কির ত্ৰং, উদাযি, মাতুগামেন সদ্ধিং কাযসংসগ্গং সমাপজ্জসী’’তি? ‘‘সচ্চং, ভগৰা’’তি। ৰিগরহি বুদ্ধো ভগৰা – ‘‘অননুচ্ছৰিকং, মোঘপুরিস, অননুলোমিকং অপ্পতিরূপং অস্সামণকং অকপ্পিযং অকরণীযং। কথঞ্হি নাম ত্ৰং, মোঘপুরিস, মাতুগামেন সদ্ধিং কাযসংসগ্গং সমাপজ্জিস্সসি! ননু মযা, মোঘপুরিস, অনেকপরিযাযেন ৰিরাগায ধম্মো দেসিতো নো সরাগায…পে॰… কামপরিল়াহানং ৰূপসমো অক্খাতো। নেতং, মোঘপুরিস, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
Assosuṃ kho bhikkhu tassa brāhmaṇassa ujjhāyantassa khiyyantassa vipācentassa. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā udāyī mātugāmena saddhiṃ kāyasaṃsaggaṃ samāpajjissatī’’ti! Atha kho te bhikkhū āyasmantaṃ udāyiṃ anekapariyāyena vigarahitvā bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā āyasmantaṃ udāyiṃ paṭipucchi – ‘‘saccaṃ kira tvaṃ, udāyi, mātugāmena saddhiṃ kāyasaṃsaggaṃ samāpajjasī’’ti? ‘‘Saccaṃ, bhagavā’’ti. Vigarahi buddho bhagavā – ‘‘ananucchavikaṃ, moghapurisa, ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma tvaṃ, moghapurisa, mātugāmena saddhiṃ kāyasaṃsaggaṃ samāpajjissasi! Nanu mayā, moghapurisa, anekapariyāyena virāgāya dhammo desito no sarāgāya…pe… kāmapariḷāhānaṃ vūpasamo akkhāto. Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
২৭০. ‘‘যো পন ভিক্খু ওতিণ্ণো ৰিপরিণতেন চিত্তেন মাতুগামেন সদ্ধিং কাযসংসগ্গং সমাপজ্জেয্য হত্থগ্গাহং ৰা ৰেণিগ্গাহং ৰা অঞ্ঞতরস্স ৰা অঞ্ঞতরস্স ৰা অঙ্গস্স পরামসনং, সঙ্ঘাদিসেসো’’তি।
270.‘‘Yo pana bhikkhu otiṇṇo vipariṇatena cittena mātugāmena saddhiṃ kāyasaṃsaggaṃ samāpajjeyya hatthaggāhaṃ vā veṇiggāhaṃ vā aññatarassa vā aññatarassa vā aṅgassa parāmasanaṃ, saṅghādiseso’’ti.
২৭১. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
271.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ওতিণ্ণো নাম সারত্তো অপেক্খৰা পটিবদ্ধচিত্তো।
Otiṇṇo nāma sāratto apekkhavā paṭibaddhacitto.
ৰিপরিণতন্তি রত্তম্পি চিত্তং ৰিপরিণতং। দুট্ঠম্পি চিত্তং ৰিপরিণতং। মূল়্হম্পি চিত্তং ৰিপরিণতং। অপিচ, রত্তং চিত্তং ইমস্মিং অত্থে অধিপ্পেতং ৰিপরিণতন্তি।
Vipariṇatanti rattampi cittaṃ vipariṇataṃ. Duṭṭhampi cittaṃ vipariṇataṃ. Mūḷhampi cittaṃ vipariṇataṃ. Apica, rattaṃ cittaṃ imasmiṃ atthe adhippetaṃ vipariṇatanti.
মাতুগামো নাম মনুস্সিত্থী, ন যক্খী ন পেতী, ন তিরচ্ছানগতা। অন্তমসো তদহুজাতাপি দারিকা, পগেৰ মহত্তরী।
Mātugāmo nāma manussitthī, na yakkhī na petī, na tiracchānagatā. Antamaso tadahujātāpi dārikā, pageva mahattarī.
সদ্ধিন্তি একতো।
Saddhinti ekato.
কাযসংসগ্গং সমাপজ্জেয্যাতি অজ্ঝাচারো ৰুচ্চতি।
Kāyasaṃsaggaṃsamāpajjeyyāti ajjhācāro vuccati.
হত্থো নাম কপ্পরং উপাদাযং যাৰ অগ্গনখা।
Hattho nāma kapparaṃ upādāyaṃ yāva agganakhā.
ৰেণী নাম সুদ্ধকেসা ৰা, সুত্তমিস্সা ৰা, মালামিস্সা ৰা, হিরঞ্ঞমিস্সা ৰা, সুৰণ্ণমিস্সা ৰা, মুত্তামিস্সা ৰা, মণিমিস্সা ৰা।
Veṇī nāma suddhakesā vā, suttamissā vā, mālāmissā vā, hiraññamissā vā, suvaṇṇamissā vā, muttāmissā vā, maṇimissā vā.
অঙ্গং নাম হত্থঞ্চ ৰেণিঞ্চ ঠপেত্ৰা অৰসেসং অঙ্গং নাম।
Aṅgaṃ nāma hatthañca veṇiñca ṭhapetvā avasesaṃ aṅgaṃ nāma.
২৭২. আমসনা , পরামসনা, ওমসনা, উম্মসনা, ওলঙ্ঘনা, উল্লঙ্ঘনা, আকড্ঢনা, পতিকড্ঢনা, অভিনিগ্গণ্হনা, অভিনিপ্পীল়না, গহণং, ছুপনং।
272. Āmasanā , parāmasanā, omasanā, ummasanā, olaṅghanā, ullaṅghanā, ākaḍḍhanā, patikaḍḍhanā, abhiniggaṇhanā, abhinippīḷanā, gahaṇaṃ, chupanaṃ.
আমসনা নাম আমট্ঠমত্তা।
Āmasanā nāma āmaṭṭhamattā.
পরামসনা নাম ইতোচিতো চ সংচোপনা।
Parāmasanā nāma itocito ca saṃcopanā.
ওমসনা নাম হেট্ঠা ওরোপনা।
Omasanā nāma heṭṭhā oropanā.
উম্মসনা নাম উদ্ধং উচ্চারণা।
Ummasanā nāma uddhaṃ uccāraṇā.
ওলঙ্ঘনা নাম হেট্ঠা ওনমনা।
Olaṅghanā nāma heṭṭhā onamanā.
উল্লঙ্ঘনা নাম উদ্ধং উচ্চারণা।
Ullaṅghanā nāma uddhaṃ uccāraṇā.
পতিকড্ঢনা নাম পতিপ্পণামনা।
Patikaḍḍhanā nāma patippaṇāmanā.
অভিনিগ্গণ্হনা নাম অঙ্গং গহেত্ৰা নিপ্পীল়না।
Abhiniggaṇhanā nāma aṅgaṃ gahetvā nippīḷanā.
অভিনিপ্পীল়না নাম কেনচি সহ নিপ্পীল়না।
Abhinippīḷanā nāma kenaci saha nippīḷanā.
গহণং নাম গহিতমত্তং।
Gahaṇaṃ nāma gahitamattaṃ.
ছুপনং নাম ফুট্ঠমত্তং।
Chupanaṃ nāma phuṭṭhamattaṃ.
সঙ্ঘাদিসেসোতি…পে॰… তেনপি ৰুচ্চতি সঙ্ঘাদিসেসোতি।
Saṅghādisesoti…pe… tenapi vuccati saṅghādisesoti.
২৭৩. ইত্থী চ হোতি ইত্থিসঞ্ঞী সারত্তো চ ভিক্খু চ। নং ইত্থিযা কাযেন কাযং আমসতি পরামসতি ওমসতি উম্মসতি ওলঙ্ঘেতি উল্লঙ্ঘেতি আকড্ঢতি পতিকড্ঢতি অভিনিগ্গণ্হাতি অভিনিপ্পীল়েতি গণ্হাতি ছুপতি, আপত্তি সঙ্ঘাদিসেসস্স।
273. Itthī ca hoti itthisaññī sāratto ca bhikkhu ca. Naṃ itthiyā kāyena kāyaṃ āmasati parāmasati omasati ummasati olaṅgheti ullaṅgheti ākaḍḍhati patikaḍḍhati abhiniggaṇhāti abhinippīḷeti gaṇhāti chupati, āpatti saṅghādisesassa.
ইত্থী চ হোতি ৰেমতিকো সারত্তো চ। ভিক্খু চ নং ইত্থিযা কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযস্স।
Itthī ca hoti vematiko sāratto ca. Bhikkhu ca naṃ itthiyā kāyena kāyaṃ āmasati parāmasati…pe… gaṇhāti chupati, āpatti thullaccayassa.
ইত্থী চ হোতি পণ্ডকসঞ্ঞী সারত্তো চ। ভিক্খু চ নং ইত্থিযা কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযস্স।
Itthī ca hoti paṇḍakasaññī sāratto ca. Bhikkhu ca naṃ itthiyā kāyena kāyaṃ āmasati parāmasati…pe… gaṇhāti chupati, āpatti thullaccayassa.
ইত্থী চ হোতি পুরিসসঞ্ঞী সারত্তো চ। ভিক্খু চ নং ইত্থিযা কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযস্স।
Itthī ca hoti purisasaññī sāratto ca. Bhikkhu ca naṃ itthiyā kāyena kāyaṃ āmasati parāmasati…pe… gaṇhāti chupati, āpatti thullaccayassa.
ইত্থী চ হোতি তিরচ্ছানগতসঞ্ঞী সারত্তো চ। ভিক্খু চ নং ইত্থিযা কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযস্স।
Itthī ca hoti tiracchānagatasaññī sāratto ca. Bhikkhu ca naṃ itthiyā kāyena kāyaṃ āmasati parāmasati…pe… gaṇhāti chupati, āpatti thullaccayassa.
পণ্ডকো চ হোতি পণ্ডকসঞ্ঞী সারত্তো চ। ভিক্খু চ নং পণ্ডকস্স কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযস্স।
Paṇḍako ca hoti paṇḍakasaññī sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati, āpatti thullaccayassa.
পণ্ডকো চ হোতি ৰেমতিকো সারত্তো চ। ভিক্খু চ নং পণ্ডকস্স কাযেন কাযং আমসতি পরামসতি…পে॰… গণ্হাতি ছুপতি, আপত্তি দুক্কটস্স।
Paṇḍako ca hoti vematiko sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
পণ্ডকো চ হোতি পুরিসসঞ্ঞী সারত্তো চ। ভিক্খু চ নং পণ্ডকস্স কাযেন কাযং আমসতি পরামসতি…পে॰… গণ্হাতি ছুপতি, আপত্তি দুক্কটস্স।
Paṇḍako ca hoti purisasaññī sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
পণ্ডকো চ হোতি তিরচ্ছানগতসঞ্ঞী সারত্তো চ। ভিক্খু চ নং পণ্ডকস্স কাযেন কাযং আমসতি পরামসতি…পে॰… গণ্হাতি ছুপতি , আপত্তি দুক্কটস্স।
Paṇḍako ca hoti tiracchānagatasaññī sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati , āpatti dukkaṭassa.
পণ্ডকো চ হোতি ইত্থিসঞ্ঞী সারত্তো চ। ভিক্খু চ নং পণ্ডকস্স কাযেন কাযং আমসতি পরামসতি…পে॰… গণ্হাতি ছুপতি, আপত্তি দুক্কটস্স।
Paṇḍako ca hoti itthisaññī sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
পুরিসো চ হোতি পুরিসসঞ্ঞী সারত্তো চ। ভিক্খু চ নং পুরিসস্স কাযেন কাযং আমসতি পরামসতি…পে॰… গণ্হাতি ছুপতি, আপত্তি দুক্কটস্স।
Puriso ca hoti purisasaññī sāratto ca. Bhikkhu ca naṃ purisassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
পুরিসো চ হোতি ৰেমতিকো…পে॰… পুরিসো চ হোতি তিরচ্ছানগতসঞ্ঞী… পুরিসো চ হোতি ইত্থিসঞ্ঞী… পুরিসো চ হোতি পণ্ডকসঞ্ঞী সারত্তো চ। ভিক্খু চ নং পুরিসস্স কাযেন কাযং আমসতি পরামসতি…পে॰… গণ্হাতি ছুপতি, আপত্তি দুক্কটস্স।
Puriso ca hoti vematiko…pe… puriso ca hoti tiracchānagatasaññī… puriso ca hoti itthisaññī… puriso ca hoti paṇḍakasaññī sāratto ca. Bhikkhu ca naṃ purisassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
তিরচ্ছানগতো চ হোতি তিরচ্ছানগতসঞ্ঞী সারত্তো চ। ভিক্খু চ নং তিরচ্ছানগতস্স কাযেন কাযং আমসতি পরামসতি…পে॰… গণ্হাতি ছুপতি, আপত্তি দুক্কটস্স।
Tiracchānagato ca hoti tiracchānagatasaññī sāratto ca. Bhikkhu ca naṃ tiracchānagatassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
তিরচ্ছানগতো চ হোতি ৰেমতিকো…পে॰… তিরচ্ছানগতো চ হোতি ইত্থিসঞ্ঞী… তিরচ্ছানগতো চ হোতি পণ্ডকসঞ্ঞী… তিরচ্ছানগতো চ হোতি। পুরিসসঞ্ঞী সারত্তো চ। ভিক্খু চ নং তিরচ্ছানগতস্স কাযেন কাযং আমসতি পরামসতি…পে॰… গণ্হাতি ছুপতি, আপত্তি দুক্কটস্স।
Tiracchānagato ca hoti vematiko…pe… tiracchānagato ca hoti itthisaññī… tiracchānagato ca hoti paṇḍakasaññī… tiracchānagato ca hoti. Purisasaññī sāratto ca. Bhikkhu ca naṃ tiracchānagatassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
একমূলকং নিট্ঠিতং।
Ekamūlakaṃ niṭṭhitaṃ.
২৭৪. দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ভিক্খু চ নং দ্ৰিন্নং ইত্থীনং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং সঙ্ঘাদিসেসানং।
274. Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ saṅghādisesānaṃ.
দ্ৰে ইত্থিযো দ্ৰিন্নং ইত্থীনং ৰেমতিকো সারত্তো চ। ভিক্খু চ নং দ্ৰিন্নং ইত্থীনং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং থুল্লচ্চযানং।
Dve itthiyo dvinnaṃ itthīnaṃ vematiko sāratto ca. Bhikkhu ca naṃ dvinnaṃ itthīnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ.
দ্ৰে ইত্থিযো দ্ৰিন্নং ইত্থীনং পণ্ডকসঞ্ঞী…পে॰… পুরিসসঞ্ঞী… তিরচ্ছানগতসঞ্ঞী সারত্তো চ। ভিক্খু চ দ্ৰিন্নং ইত্থীনং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং থুল্লচ্চযানং।
Dve itthiyo dvinnaṃ itthīnaṃ paṇḍakasaññī…pe… purisasaññī… tiracchānagatasaññī sāratto ca. Bhikkhu ca dvinnaṃ itthīnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ.
দ্ৰে পণ্ডকা দ্ৰিন্নং পণ্ডকানং পণ্ডকসঞ্ঞী সারত্তো চ ভিক্খু চ নং দ্ৰিন্নং পণ্ডকানং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং থুল্লচ্চযানং।
Dve paṇḍakā dvinnaṃ paṇḍakānaṃ paṇḍakasaññī sāratto ca bhikkhu ca naṃ dvinnaṃ paṇḍakānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ.
দ্ৰে পণ্ডকা দ্ৰিন্নং পণ্ডকানং ৰেমতিকো…পে॰… পুরিসসঞ্ঞী… তিরচ্ছানগতসঞ্ঞী… ইত্থিসঞ্ঞী সারত্তো চ। ভিক্খু চ নং দ্ৰিন্নং পণ্ডকানং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং।
Dve paṇḍakā dvinnaṃ paṇḍakānaṃ vematiko…pe… purisasaññī… tiracchānagatasaññī… itthisaññī sāratto ca. Bhikkhu ca naṃ dvinnaṃ paṇḍakānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
দ্ৰে পুরিসা দ্ৰিন্নং পুরিসানং পুরিসসঞ্ঞী সারত্তো চ ভিক্খু চ নং দ্ৰিন্নং পুরিসানং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং।
Dve purisā dvinnaṃ purisānaṃ purisasaññī sāratto ca bhikkhu ca naṃ dvinnaṃ purisānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
দ্ৰে পুরিসা দ্ৰিন্নং পুরিসানং ৰেমতিকো…পে॰… তিরচ্ছানগতসঞ্ঞী… ইত্থিসঞ্ঞী… পণ্ডকসঞ্ঞী সারত্তো চ। ভিক্খু চ নং দ্ৰিন্নং পুরিসানং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং।
Dve purisā dvinnaṃ purisānaṃ vematiko…pe… tiracchānagatasaññī… itthisaññī… paṇḍakasaññī sāratto ca. Bhikkhu ca naṃ dvinnaṃ purisānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
দ্ৰে তিরচ্ছানগতা দ্ৰিন্নং তিরচ্ছানগতানং তিরচ্ছানগতসঞ্ঞী সারত্তো চ। ভিক্খু চ নং দ্ৰিন্নং তিরচ্ছানগতানং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং।
Dve tiracchānagatā dvinnaṃ tiracchānagatānaṃ tiracchānagatasaññī sāratto ca. Bhikkhu ca naṃ dvinnaṃ tiracchānagatānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
দ্ৰে তিরচ্ছানগতা দ্ৰিন্নং তিরচ্ছানগতানং ৰেমতিকো…পে॰… ইত্থিসঞ্ঞী… পণ্ডকসঞ্ঞী … পুরিসসঞ্ঞী সারত্তো চ। ভিক্খু চ নং দ্ৰিন্নং তিরচ্ছানগতানং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং।
Dve tiracchānagatā dvinnaṃ tiracchānagatānaṃ vematiko…pe… itthisaññī… paṇḍakasaññī … purisasaññī sāratto ca. Bhikkhu ca naṃ dvinnaṃ tiracchānagatānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
২৭৫. ইত্থী চ পণ্ডকো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি সঙ্ঘাদিসেসেন দুক্কটস্স।
275. Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti saṅghādisesena dukkaṭassa.
ইত্থী চ পণ্ডকো চ উভিন্নং ৰেমতিকো সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযেন দুক্কটস্স।
Itthī ca paṇḍako ca ubhinnaṃ vematiko sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ইত্থী চ পণ্ডকো চ উভিন্নং পণ্ডকসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং থুল্লচ্চযানং।
Itthī ca paṇḍako ca ubhinnaṃ paṇḍakasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ.
ইত্থী চ পণ্ডকো চ উভিন্নং পুরিসসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযেন দুক্কটস্স।
Itthī ca paṇḍako ca ubhinnaṃ purisasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ইত্থী চ পণ্ডকো চ উভিন্নং তিরচ্ছানগতসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযেন দুক্কটস্স।
Itthī ca paṇḍako ca ubhinnaṃ tiracchānagatasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ইত্থী চ পুরিসো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি সঙ্ঘাদিসেসেন দুক্কটস্স।
Itthī ca puriso ca ubhinnaṃ itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti saṅghādisesena dukkaṭassa.
ইত্থী চ পুরিসো চ উভিন্নং ৰেমতিকো…পে॰… পণ্ডকসঞ্ঞী… পুরিসসঞ্ঞী… তিরচ্ছানগতসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযেন দুক্কটস্স।
Itthī ca puriso ca ubhinnaṃ vematiko…pe… paṇḍakasaññī… purisasaññī… tiracchānagatasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ইত্থী চ তিরচ্ছানগতো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি সঙ্ঘাদিসেসেন দুক্কটস্স।
Itthī ca tiracchānagato ca ubhinnaṃ itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti saṅghādisesena dukkaṭassa.
ইত্থী চ তিরচ্ছানগতো চ উভিন্নং ৰেমতিকো…পে॰… পণ্ডকসঞ্ঞী… পুরিসসঞ্ঞী … তিরচ্ছানগতসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযেন দুক্কটস্স।
Itthī ca tiracchānagato ca ubhinnaṃ vematiko…pe… paṇḍakasaññī… purisasaññī … tiracchānagatasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
পণ্ডকো চ পুরিসো চ উভিন্নং পণ্ডকসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযেন দুক্কটস্স।
Paṇḍako ca puriso ca ubhinnaṃ paṇḍakasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
পণ্ডকো চ পুরিসো চ উভিন্নং ৰেমতিকো…পে॰… পুরিসসঞ্ঞী… তিরচ্ছানগতসঞ্ঞী… ইত্থিসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং।
Paṇḍako ca puriso ca ubhinnaṃ vematiko…pe… purisasaññī… tiracchānagatasaññī… itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
পণ্ডকো চ তিরচ্ছানগতো চ উভিন্নং পণ্ডকসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযেন দুক্কটস্স।
Paṇḍako ca tiracchānagato ca ubhinnaṃ paṇḍakasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
পণ্ডকো চ তিরচ্ছানগতো চ উভিন্নং ৰেমতিকো…পে॰… পুরিসসঞ্ঞী… তিরচ্ছানগতসঞ্ঞী… ইত্থিসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং।
Paṇḍako ca tiracchānagato ca ubhinnaṃ vematiko…pe… purisasaññī… tiracchānagatasaññī… itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
পুরিসো চ তিরচ্ছানগতো চ উভিন্নং পুরিসসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং।
Puriso ca tiracchānagato ca ubhinnaṃ purisasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
পুরিসো চ তিরচ্ছানগতো চ উভিন্নং ৰেমতিকো…পে॰… তিরচ্ছানগতসঞ্ঞী… ইত্থিসঞ্ঞী… পণ্ডকসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং।
Puriso ca tiracchānagato ca ubhinnaṃ vematiko…pe… tiracchānagatasaññī… itthisaññī… paṇḍakasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
দুমূলকং নিট্ঠিতং।
Dumūlakaṃ niṭṭhitaṃ.
২৭৬. ইত্থী চ হোতি ইত্থিসঞ্ঞী সারত্তো চ। ভিক্খু চ নং ইত্থিযা কাযেন কাযপটিবদ্ধং আমসতি পরামসতি…পে॰… গণ্হাতি ছুপতি, আপত্তি থুল্লচ্চযস্স…পে॰…।
276. Itthī ca hoti itthisaññī sāratto ca. Bhikkhu ca naṃ itthiyā kāyena kāyapaṭibaddhaṃ āmasati parāmasati…pe… gaṇhāti chupati, āpatti thullaccayassa…pe….
দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ভিক্খু চ নং দ্ৰিন্নং ইত্থীনং কাযেন কাযপটিবদ্ধং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং থুল্লচ্চযানং …পে॰…।
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ kāyena kāyapaṭibaddhaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ …pe….
ইত্থী চ পণ্ডকো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং কাযেন কাযপটিবদ্ধং আমসতি পরামসতি…পে॰… গণ্হাতি ছুপতি, আপত্তি থুল্লচ্চযেন দুক্কটস্স…পে॰…।
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ kāyena kāyapaṭibaddhaṃ āmasati parāmasati…pe… gaṇhāti chupati, āpatti thullaccayena dukkaṭassa…pe….
ইত্থী চ হোতি ইত্থিসঞ্ঞী সারত্তো চ। ভিক্খু চ নং ইত্থিযা কাযপটিবদ্ধেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযস্স…পে॰…।
Itthī ca hoti itthisaññī sāratto ca. Bhikkhu ca naṃ itthiyā kāyapaṭibaddhena kāyaṃ āmasati parāmasati…pe… gaṇhāti chupati, āpatti thullaccayassa…pe….
দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ভিক্খু চ নং দ্ৰিন্নং ইত্থীনং কাযপটিবদ্ধেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং থুল্লচ্চযানং…পে॰…।
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ kāyapaṭibaddhena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ…pe….
ইত্থী চ পণ্ডকো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং কাযপটিবদ্ধেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযেন দুক্কটস্স…পে॰…।
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ kāyapaṭibaddhena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa…pe….
ইত্থী চ হোতি ইত্থিসঞ্ঞী সারত্তো চ। ভিক্খু চ নং ইত্থিযা কাযপটিবদ্ধেন কাযপটিবদ্ধং আমসতি পরামসতি…পে॰… গণ্হাতি ছুপতি, আপত্তি দুক্কটস্স…পে॰…।
Itthī ca hoti itthisaññī sāratto ca. Bhikkhu ca naṃ itthiyā kāyapaṭibaddhena kāyapaṭibaddhaṃ āmasati parāmasati…pe… gaṇhāti chupati, āpatti dukkaṭassa…pe….
দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ভিক্খু চ নং দ্ৰিন্নং ইত্থীনং কাযপটিবদ্ধেন কাযপটিবদ্ধং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং…পে॰…।
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ kāyapaṭibaddhena kāyapaṭibaddhaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ…pe….
ইত্থী চ পণ্ডকো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং কাযপটিবদ্ধেন কাযপটিবদ্ধং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং…পে॰…।
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ kāyapaṭibaddhena kāyapaṭibaddhaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ…pe….
ইত্থী চ হোতি ইত্থিসঞ্ঞী সারত্তো চ। ভিক্খু চ নং ইত্থিযা নিস্সগ্গিযেন কাযং আমসতি আপত্তি দুক্কটস্স…পে॰…।
Itthī ca hoti itthisaññī sāratto ca. Bhikkhu ca naṃ itthiyā nissaggiyena kāyaṃ āmasati āpatti dukkaṭassa…pe….
দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ভিক্খু চ নং দ্ৰিন্নং ইত্থীনং নিস্সগ্গিযেন কাযং আমসতি, আপত্তি দ্ৰিন্নং দুক্কটানং…পে॰…।
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ nissaggiyena kāyaṃ āmasati, āpatti dvinnaṃ dukkaṭānaṃ…pe….
ইত্থী চ পণ্ডকো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং নিস্সগ্গিযেন কাযং আমসতি, আপত্তি দ্ৰিন্নং দুক্কটানং…পে॰…।
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ nissaggiyena kāyaṃ āmasati, āpatti dvinnaṃ dukkaṭānaṃ…pe….
ইত্থী চ হোতি ইত্থিসঞ্ঞী সারত্তো চ। ভিক্খু চ নং ইত্থিযা নিস্সগ্গিযেন কাযপটিবদ্ধং আমসতি, আপত্তি দুক্কটস্স…পে॰…।
Itthī ca hoti itthisaññī sāratto ca. Bhikkhu ca naṃ itthiyā nissaggiyena kāyapaṭibaddhaṃ āmasati, āpatti dukkaṭassa…pe….
দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ভিক্খু চ নং দ্ৰিন্নং ইত্থীনং নিস্সগ্গিযেন কাযপটিবদ্ধং আমসতি, আপত্তি দ্ৰিন্নং দুক্কটানং…পে॰…।
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ nissaggiyena kāyapaṭibaddhaṃ āmasati, āpatti dvinnaṃ dukkaṭānaṃ…pe….
ইত্থী চ পণ্ডকো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং নিস্সগ্গিযেন কাযপটিবদ্ধং আমসতি, আপত্তি দ্ৰিন্নং দুক্কটানং…পে॰…।
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ nissaggiyena kāyapaṭibaddhaṃ āmasati, āpatti dvinnaṃ dukkaṭānaṃ…pe….
ইত্থী চ হোতি ইত্থিসঞ্ঞী সারত্তো চ। ভিক্খু চ নং ইত্থিযা নিস্সগ্গিযেন নিস্সগ্গিযং আমসতি, আপত্তি দুক্কটস্স…পে॰…।
Itthī ca hoti itthisaññī sāratto ca. Bhikkhu ca naṃ itthiyā nissaggiyena nissaggiyaṃ āmasati, āpatti dukkaṭassa…pe….
দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ভিক্খু চ নং দ্ৰিন্নং ইত্থীনং নিস্সগ্গিযেন নিস্সগ্গিযং আমসতি, আপত্তি দ্ৰিন্নং দুক্কটানং…পে॰…।
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ nissaggiyena nissaggiyaṃ āmasati, āpatti dvinnaṃ dukkaṭānaṃ…pe….
ইত্থী চ পণ্ডকো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং নিস্সগ্গিযেন নিস্সগ্গিযং আমসতি, আপত্তি দ্ৰিন্নং দুক্কটানং…পে॰…।
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ nissaggiyena nissaggiyaṃ āmasati, āpatti dvinnaṃ dukkaṭānaṃ…pe….
ভিক্খুপেয্যালো নিট্ঠিতো।
Bhikkhupeyyālo niṭṭhito.
২৭৭. ইত্থী চ হোতি ইত্থিসঞ্ঞী সারত্তো চ। ইত্থী চ নং ভিক্খুস্স কাযেন কাযং আমসতি পরামসতি ওমসতি উম্মসতি ওলঙ্ঘেতি উল্লঙ্ঘেতি আকড্ঢতি পতিকড্ঢতি অভিনিগ্গণ্হাতি অভিনিপ্পীল়েতি গণ্হাতি ছুপতি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি সঙ্ঘাদিসেসস্স…পে॰…।
277. Itthī ca hoti itthisaññī sāratto ca. Itthī ca naṃ bhikkhussa kāyena kāyaṃ āmasati parāmasati omasati ummasati olaṅgheti ullaṅgheti ākaḍḍhati patikaḍḍhati abhiniggaṇhāti abhinippīḷeti gaṇhāti chupati, sevanādhippāyo kāyena vāyamati phassaṃ paṭivijānāti, āpatti saṅghādisesassa…pe….
দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ইত্থিযো চ নং ভিক্খুস্স কাযেন কাযং আমসন্তি পরামসন্তি ওমসন্তি উম্মসন্তি ওলঙ্ঘেন্তি উল্লঙ্ঘেন্তি আকড্ঢন্তি পতিকড্ঢন্তি অভিনিগ্গণ্হন্তি অভিনিপ্পীল়েন্তি গণ্হন্তি ছুপন্তি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দ্ৰিন্নং সঙ্ঘাদিসেসানং…পে॰…।
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa kāyena kāyaṃ āmasanti parāmasanti omasanti ummasanti olaṅghenti ullaṅghenti ākaḍḍhanti patikaḍḍhanti abhiniggaṇhanti abhinippīḷenti gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ saṅghādisesānaṃ…pe….
ইত্থী চ পণ্ডকো চ উভিন্নং ইত্থিসঞ্ঞী সারত্তো চ। উভো চ নং ভিক্খুস্স কাযেন কাযং আমসন্তি পরামসন্তি…পে॰… গণ্হন্তি ছুপন্তি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি সঙ্ঘাদিসেসেন দুক্কটস্স…পে॰…।
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa kāyena kāyaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti saṅghādisesena dukkaṭassa…pe….
ইত্থী চ হোতি ইত্থিসঞ্ঞী সারত্তো চ। ইত্থী চ নং ভিক্খুস্স কাযেন কাযপটিবদ্ধং আমসতি পরামসতি…পে॰… গণ্হাতি ছুপতি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি থুল্লচ্চযস্স…পে॰…।
Itthī ca hoti itthisaññī sāratto ca. Itthī ca naṃ bhikkhussa kāyena kāyapaṭibaddhaṃ āmasati parāmasati…pe… gaṇhāti chupati, sevanādhippāyo kāyena vāyamati phassaṃ paṭivijānāti, āpatti thullaccayassa…pe….
দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ইত্থিযো চ নং ভিক্খুস্স কাযেন কাযপটিবদ্ধং আমসন্তি পরামসন্তি…পে॰… গণ্হন্তি ছুপন্তি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দ্ৰিন্নং থুল্লচ্চযানং…পে॰…।
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa kāyena kāyapaṭibaddhaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ thullaccayānaṃ…pe….
ইত্থী চ পণ্ডকো চ উভিন্নং ইত্থিসঞ্ঞী সারত্তো চ। উভো চ নং ভিক্খুস্স কাযেন কাযপটিবদ্ধং আমসন্তি পরামসন্তি…পে॰… গণ্হন্তি ছুপন্তি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি থুল্লচ্চযেন দুক্কটস্স…পে॰…।
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa kāyena kāyapaṭibaddhaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti thullaccayena dukkaṭassa…pe….
ইত্থী চ হোতি ইত্থিসঞ্ঞী সারত্তো চ। ইত্থী চ নং ভিক্খুস্স কাযপটিবদ্ধেন কাযং আমসতি পরামসতি…পে॰… গণ্হাতি ছুপতি সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি থুল্লচ্চযস্স…পে॰…।
Itthī ca hoti itthisaññī sāratto ca. Itthī ca naṃ bhikkhussa kāyapaṭibaddhena kāyaṃ āmasati parāmasati…pe… gaṇhāti chupati sevanādhippāyo kāyena vāyamati phassaṃ paṭivijānāti, āpatti thullaccayassa…pe….
দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ইত্থিযো চ নং ভিক্খুস্স কাযপটিবদ্ধেন কাযং আমসন্তি পরামসন্তি…পে॰… গণ্হন্তি ছুপন্তি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দ্ৰিন্নং থুল্লচ্চযানং…পে॰…।
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa kāyapaṭibaddhena kāyaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ thullaccayānaṃ…pe….
ইত্থী চ পণ্ডকো চ উভিন্নং ইত্থিসঞ্ঞী সারত্তো চ। উভো চ নং ভিক্খুস্স কাযপটিবদ্ধেন কাযং আমসন্তি পরামসন্তি…পে॰… গণ্হন্তি ছুপন্তি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি থুল্লচ্চযেন দুক্কটস্স…পে॰…।
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa kāyapaṭibaddhena kāyaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti thullaccayena dukkaṭassa…pe….
২৭৮. ইত্থী চ হোতি ইত্থিসঞ্ঞী সারত্তো চ। ইত্থী চ নং ভিক্খুস্স কাযপটিবদ্ধেন কাযপটিবদ্ধং আমসতি পরামসতি…পে॰… গণ্হাতি ছুপতি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দুক্কটস্স…পে॰…।
278. Itthī ca hoti itthisaññī sāratto ca. Itthī ca naṃ bhikkhussa kāyapaṭibaddhena kāyapaṭibaddhaṃ āmasati parāmasati…pe… gaṇhāti chupati, sevanādhippāyo kāyena vāyamati phassaṃ paṭivijānāti, āpatti dukkaṭassa…pe….
দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ইত্থিযো চ নং ভিক্খুস্স কাযপটিবদ্ধেন কাযপটিবদ্ধং আমসন্তি পরামসন্তি…পে॰… গণ্হন্তি ছুপন্তি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দ্ৰিন্নং দুক্কটানং…পে॰…।
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa kāyapaṭibaddhena kāyapaṭibaddhaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ইত্থী চ পণ্ডকো চ উভিন্নং ইত্থিসঞ্ঞী সারত্তো চ। উভো চ নং ভিক্খুস্স কাযপটিবদ্ধেন কাযপটিবদ্ধং আমসন্তি পরামসন্তি…পে॰… গণ্হন্তি ছুপন্তি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দ্ৰিন্নং দুক্কটানং…পে॰…।
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa kāyapaṭibaddhena kāyapaṭibaddhaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ইত্থী চ হোতি ইত্থিসঞ্ঞী সারত্তো চ। ইত্থী চ নং ভিক্খুস্স নিস্সগ্গিযেন কাযং আমসতি। সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দুক্কটস্স…পে॰…।
Itthī ca hoti itthisaññī sāratto ca. Itthī ca naṃ bhikkhussa nissaggiyena kāyaṃ āmasati. Sevanādhippāyo kāyena vāyamati phassaṃ paṭivijānāti, āpatti dukkaṭassa…pe….
দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ইত্থিযো চ নং ভিক্খুস্স নিস্সগ্গিযেন কাযং আমসন্তি। সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দ্ৰিন্নং দুক্কটানং…পে॰…।
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa nissaggiyena kāyaṃ āmasanti. Sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ইত্থী চ পণ্ডকো চ উভিন্নং ইত্থিসঞ্ঞী সারত্তো চ। উভো চ নং ভিক্খুস্স নিস্সগ্গিযেন কাযং আমসন্তি। সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দ্ৰিন্নং দুক্কটানং…পে॰…।
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa nissaggiyena kāyaṃ āmasanti. Sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ইত্থী চ হোতি ইত্থিসঞ্ঞী সারত্তো চ। ইত্থী চ নং ভিক্খুস্স নিস্সগ্গিযেন কাযপটিবদ্ধং আমসতি। সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দুক্কটস্স…পে॰…।
Itthī ca hoti itthisaññī sāratto ca. Itthī ca naṃ bhikkhussa nissaggiyena kāyapaṭibaddhaṃ āmasati. Sevanādhippāyo kāyena vāyamati phassaṃ paṭivijānāti, āpatti dukkaṭassa…pe….
দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ইত্থিযো চ নং ভিক্খুস্স নিস্সগ্গিযেন কাযপটিবদ্ধং আমসন্তি। সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দ্ৰিন্নং দুক্কটানং…পে॰…।
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa nissaggiyena kāyapaṭibaddhaṃ āmasanti. Sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ইত্থী চ পণ্ডকো চ উভিন্নং ইত্থিসঞ্ঞী সারত্তো চ। উভো চ নং ভিক্খুস্স নিস্সগ্গিযেন কাযপটিবদ্ধং আমসন্তি। সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দ্ৰিন্নং দুক্কটানং…পে॰…।
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa nissaggiyena kāyapaṭibaddhaṃ āmasanti. Sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ইত্থী চ হোতি ইত্থিসঞ্ঞী সারত্তো চ। ইত্থী চ নং ভিক্খুস্স নিস্সগ্গিযেন নিস্সগ্গিযং আমসতি। সেৰনাধিপ্পাযো কাযেন ৰাযমতি, ন চ ফস্সং পটিৰিজানাতি, আপত্তি দুক্কটস্স…পে॰…।
Itthī ca hoti itthisaññī sāratto ca. Itthī ca naṃ bhikkhussa nissaggiyena nissaggiyaṃ āmasati. Sevanādhippāyo kāyena vāyamati, na ca phassaṃ paṭivijānāti, āpatti dukkaṭassa…pe….
দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ইত্থিযো চ নং ভিক্খুস্স নিস্সগ্গিযেন নিস্সগ্গিযং আমসন্তি। সেৰনাধিপ্পাযো কাযেন ৰাযমতি, ন চ ফস্সং পটিৰিজানাতি, আপত্তি দ্ৰিন্নং দুক্কটানং…পে॰…।
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa nissaggiyena nissaggiyaṃ āmasanti. Sevanādhippāyo kāyena vāyamati, na ca phassaṃ paṭivijānāti, āpatti dvinnaṃ dukkaṭānaṃ…pe….
ইত্থী চ পণ্ডকো চ উভিন্নং ইত্থিসঞ্ঞী সারত্তো চ। উভো চ নং ভিক্খুস্স নিস্সগ্গিযেন নিস্সগ্গিযং আমসন্তি। সেৰনাধিপ্পাযো কাযেন ৰাযমতি, ন চ ফস্সং পটিৰিজানাতি, আপত্তি দ্ৰিন্নং দুক্কটানং…পে॰…।
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa nissaggiyena nissaggiyaṃ āmasanti. Sevanādhippāyo kāyena vāyamati, na ca phassaṃ paṭivijānāti, āpatti dvinnaṃ dukkaṭānaṃ…pe….
২৭৯. সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি সঙ্ঘাদিসেসস্স।
279. Sevanādhippāyo kāyena vāyamati phassaṃ paṭivijānāti, āpatti saṅghādisesassa.
সেৰনাধিপ্পাযো কাযেন ৰাযমতি, ন চ ফস্সং পটিৰিজানাতি, আপত্তি দুক্কটস্স।
Sevanādhippāyo kāyena vāyamati, na ca phassaṃ paṭivijānāti, āpatti dukkaṭassa.
সেৰনাধিপ্পাযো ন চ কাযেন ৰাযমতি, ফস্সং পটিৰিজানাতি, অনাপত্তি।
Sevanādhippāyo na ca kāyena vāyamati, phassaṃ paṭivijānāti, anāpatti.
সেৰনাধিপ্পাযো ন চ কাযেন ৰাযমতি, ন চ ফস্সং পটিৰিজানাতি, অনাপত্তি।
Sevanādhippāyo na ca kāyena vāyamati, na ca phassaṃ paṭivijānāti, anāpatti.
মোক্খাধিপ্পাযো কাযেন ৰাযমতি, ফস্সং পটিৰিজানাতি, অনাপত্তি।
Mokkhādhippāyo kāyena vāyamati, phassaṃ paṭivijānāti, anāpatti.
মোক্খাধিপ্পাযো কাযেন ৰাযমতি, ন চ ফস্সং পটিৰিজানাতি , অনাপত্তি।
Mokkhādhippāyo kāyena vāyamati, na ca phassaṃ paṭivijānāti , anāpatti.
মোক্খাধিপ্পাযো ন চ কাযেন ৰাযমতি, ফস্সং পটিৰিজানাতি, অনাপত্তি।
Mokkhādhippāyo na ca kāyena vāyamati, phassaṃ paṭivijānāti, anāpatti.
মোক্খাধিপ্পাযো ন চ কাযেন ৰাযমতি, ন চ ফস্সং পটিৰিজানাতি, অনাপত্তি।
Mokkhādhippāyo na ca kāyena vāyamati, na ca phassaṃ paṭivijānāti, anāpatti.
২৮০. অনাপত্তি অসঞ্চিচ্চ, অসতিযা, অজানন্তস্স, অসাদিযন্তস্স, উম্মত্তকস্স, খিত্তচিত্তস্স, ৰেদনাট্টস্স, আদিকম্মিকস্সাতি।
280. Anāpatti asañcicca, asatiyā, ajānantassa, asādiyantassa, ummattakassa, khittacittassa, vedanāṭṭassa, ādikammikassāti.
ৰিনীতৰত্থুউদ্দানগাথা
Vinītavatthuuddānagāthā
মাতা ধীতা ভগিনী চ, জাযা যক্খী চ পণ্ডকো।
Mātā dhītā bhaginī ca, jāyā yakkhī ca paṇḍako;
সুত্তা মতা তিরচ্ছানা, দারুধিতলিকায চ॥
Suttā matā tiracchānā, dārudhitalikāya ca.
সম্পীল়ে সঙ্কমো মগ্গো, রুক্খো নাৰা চ রজ্জু চ।
Sampīḷe saṅkamo maggo, rukkho nāvā ca rajju ca;
দণ্ডো পত্তং পণামেসি, ৰন্দে ৰাযমি নচ্ছুপেতি॥
Daṇḍo pattaṃ paṇāmesi, vande vāyami nacchupeti.
ৰিনীতৰত্থু
Vinītavatthu
২৮১. তেন খো পন সমযেন অঞ্ঞতরো ভিক্খু মাতুযা মাতুপেমেন আমসি। তস্স কুক্কুচ্চং অহোসি – ‘‘ভগৰতা সিক্খাপদং পঞ্ঞত্তং, কচ্চি নু খো অহং সঙ্ঘাদিসেসং আপত্তিং আপন্নো’’তি? ভগৰতো এতমত্থং আরোচেসি। ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি।
281. Tena kho pana samayena aññataro bhikkhu mātuyā mātupemena āmasi. Tassa kukkuccaṃ ahosi – ‘‘bhagavatā sikkhāpadaṃ paññattaṃ, kacci nu kho ahaṃ saṅghādisesaṃ āpattiṃ āpanno’’ti? Bhagavato etamatthaṃ ārocesi. ‘‘Anāpatti, bhikkhu, saṅghādisesassa; āpatti dukkaṭassā’’ti.
তেন খো পন সমযেন অঞ্ঞতরো ভিক্খু ধীতুযা ধীতুপেমেন আমসি…পে॰… ভগিনিযা ভগিনিপেমেন আমসি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি।
Tena kho pana samayena aññataro bhikkhu dhītuyā dhītupemena āmasi…pe… bhaginiyā bhaginipemena āmasi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
তেন খো পন সমযেন অঞ্ঞতরো ভিক্খু পুরাণদুতিযিকায কাযসংসগ্গং সমাপজ্জি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি।
Tena kho pana samayena aññataro bhikkhu purāṇadutiyikāya kāyasaṃsaggaṃ samāpajji. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
তেন খো পন সমযেন অঞ্ঞতরো ভিক্খু যক্খিনিযা কাযসংসগ্গং সমাপজ্জি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি।
Tena kho pana samayena aññataro bhikkhu yakkhiniyā kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
তেন খো পন সমযেন অঞ্ঞতরো ভিক্খু পণ্ডকস্স কাযসংসগ্গং সমাপজ্জি। তস্স কুক্কুচ্চং অহোসি…পে॰… ‘‘অনাপত্তি , ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি।
Tena kho pana samayena aññataro bhikkhu paṇḍakassa kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti , bhikkhu, saṅghādisesassa; āpatti thullaccayassā’’ti.
তেন খো পন সমযেন অঞ্ঞতরো ভিক্খু সুত্তিত্থিযা কাযসংসগ্গং সমাপজ্জি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি।
Tena kho pana samayena aññataro bhikkhu suttitthiyā kāyasaṃsaggaṃ samāpajji. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
তেন খো পন সমযেন অঞ্ঞতরো ভিক্খু মতিত্থিযা কাযসংসগ্গং সমাপজ্জি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি।
Tena kho pana samayena aññataro bhikkhu matitthiyā kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
তেন খো পন সমযেন অঞ্ঞতরো ভিক্খু তিরচ্ছানগতিত্থিযা কাযসংসগ্গং সমাপজ্জি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি।
Tena kho pana samayena aññataro bhikkhu tiracchānagatitthiyā kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
তেন খো পন সমযেন অঞ্ঞতরো ভিক্খু দারুধীতলিকায কাযসংসগ্গং সমাপজ্জি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি।
Tena kho pana samayena aññataro bhikkhu dārudhītalikāya kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
২৮২. তেন খো পন সমযেন সম্বহুলা ইত্থিযো অঞ্ঞতরং ভিক্খুং সম্পীল়েত্ৰা বাহাপরম্পরায আনেসুং। তস্স কুক্কুচ্চং অহোসি…পে॰… ‘‘সাদিযি ত্ৰং, ভিক্খূ’’তি? ‘‘নাহং, ভগৰা, সাদিযি’’ন্তি। ‘‘অনাপত্তি, ভিক্খূ, অসাদিযন্তস্সা’’তি।
282. Tena kho pana samayena sambahulā itthiyo aññataraṃ bhikkhuṃ sampīḷetvā bāhāparamparāya ānesuṃ. Tassa kukkuccaṃ ahosi…pe… ‘‘sādiyi tvaṃ, bhikkhū’’ti? ‘‘Nāhaṃ, bhagavā, sādiyi’’nti. ‘‘Anāpatti, bhikkhū, asādiyantassā’’ti.
তেন খো পন সমযেন অঞ্ঞতরো ভিক্খু ইত্থিযা অভিরূল়্হং সঙ্কমং সারত্তো সঞ্চালেসি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি।
Tena kho pana samayena aññataro bhikkhu itthiyā abhirūḷhaṃ saṅkamaṃ sāratto sañcālesi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
তেন খো পন সমযেন অঞ্ঞতরো ভিক্খু ইত্থিং পটিপথে পস্সিত্ৰা সারত্তো অংসকূটেন পহারং অদাসি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি।
Tena kho pana samayena aññataro bhikkhu itthiṃ paṭipathe passitvā sāratto aṃsakūṭena pahāraṃ adāsi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
তেন খো পন সমযেন অঞ্ঞতরো ভিক্খু ইত্থিযা অভিরূল়্হং রুক্খং সারত্তো সঞ্চালেসি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি।
Tena kho pana samayena aññataro bhikkhu itthiyā abhirūḷhaṃ rukkhaṃ sāratto sañcālesi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
তেন খো পন সমযেন অঞ্ঞতরো ভিক্খু ইত্থিযা অভিরূল়্হং নাৰং সারত্তো সঞ্চালেসি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি।
Tena kho pana samayena aññataro bhikkhu itthiyā abhirūḷhaṃ nāvaṃ sāratto sañcālesi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
তেন খো পন সমযেন অঞ্ঞতরো ভিক্খু ইত্থিযা গহিতং রজ্জুং সারত্তো আৰিঞ্ছি 9। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি।
Tena kho pana samayena aññataro bhikkhu itthiyā gahitaṃ rajjuṃ sāratto āviñchi 10. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
তেন খো পন সমযেন অঞ্ঞতরো ভিক্খু ইত্থিযা গহিতং দণ্ডং সারত্তো আৰিঞ্ছি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি।
Tena kho pana samayena aññataro bhikkhu itthiyā gahitaṃ daṇḍaṃ sāratto āviñchi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
তেন খো পন সমযেন অঞ্ঞতরো ভিক্খু সারত্তো ইত্থিং পত্তেন পণামেসি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি।
Tena kho pana samayena aññataro bhikkhu sāratto itthiṃ pattena paṇāmesi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
তেন খো পন সমযেন অঞ্ঞতরো ভিক্খু ইত্থিযা ৰন্দন্তিযা সারত্তো পাদং উচ্চারেসি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি।
Tena kho pana samayena aññataro bhikkhu itthiyā vandantiyā sāratto pādaṃ uccāresi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
তেন খো পন সমযেন অঞ্ঞতরো ভিক্খু ইত্থিং গহেস্সামীতি ৰাযমিত্ৰা ন ছুপি।
Tena kho pana samayena aññataro bhikkhu itthiṃ gahessāmīti vāyamitvā na chupi.
তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি।
Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
কাযসংসগ্গসিক্খাপদং নিট্ঠিতং দুতিযং।
Kāyasaṃsaggasikkhāpadaṃ niṭṭhitaṃ dutiyaṃ.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ২. কাযসংসগ্গসিক্খাপদৰণ্ণনা • 2. Kāyasaṃsaggasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ২. কাযসংসগ্গসিক্খাপদৰণ্ণনা • 2. Kāyasaṃsaggasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā
২. কাযসংসগ্গসিক্খাপদৰণ্ণনা • 2. Kāyasaṃsaggasikkhāpadavaṇṇanā
পদভাজনীযৰণ্ণনা • Padabhājanīyavaṇṇanā
ৰিনীতৰত্থুৰণ্ণনা • Vinītavatthuvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ২. কাযসংসগ্গসিক্খাপদৰণ্ণনা • 2. Kāyasaṃsaggasikkhāpadavaṇṇanā
