| Library / Tipiṭaka / ತಿಪಿಟಕ • Tipiṭaka / ಮಹಾವಿಭಙ್ಗ • Mahāvibhaṅga |
೨. ಕಾಯಸಂಸಗ್ಗಸಿಕ್ಖಾಪದಂ
2. Kāyasaṃsaggasikkhāpadaṃ
೨೬೯. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ। ತೇನ ಖೋ ಪನ ಸಮಯೇನ ಆಯಸ್ಮಾ ಉದಾಯೀ ಅರಞ್ಞೇ ವಿಹರತಿ। ತಸ್ಸಾಯಸ್ಮತೋ ವಿಹಾರೋ ಅಭಿರೂಪೋ ಹೋತಿ ದಸ್ಸನೀಯೋ ಪಾಸಾದಿಕೋ, ಮಜ್ಝೇಗಬ್ಭೋ, ಸಮನ್ತಾಪರಿಯಾಗಾರೋ, ಸುಪಞ್ಞತ್ತಂ ಮಞ್ಚಪೀಠಂ ಭಿಸಿಬಿಮ್ಬೋಹನಂ, ಪಾನೀಯಂ ಪರಿಭೋಜನೀಯಂ ಸುಪಟ್ಠಿತಂ, ಪರಿವೇಣಂ ಸುಸಮ್ಮಟ್ಠಂ। ಬಹೂ ಮನುಸ್ಸಾ ಆಯಸ್ಮತೋ ಉದಾಯಿಸ್ಸ ವಿಹಾರಪೇಕ್ಖಕಾ ಆಗಚ್ಛನ್ತಿ। ಅಞ್ಞತರೋಪಿ ಬ್ರಾಹ್ಮಣೋ ಸಪಜಾಪತಿಕೋ ಯೇನಾಯಸ್ಮಾ ಉದಾಯೀ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಆಯಸ್ಮನ್ತಂ ಉದಾಯಿಂ ಏತದವೋಚ – ‘‘ಇಚ್ಛಾಮ ಮಯಂ ಭೋತೋ ಉದಾಯಿಸ್ಸ ವಿಹಾರಂ ಪೇಕ್ಖಿತು’’ನ್ತಿ। ‘‘ತೇನ ಹಿ, ಬ್ರಾಹ್ಮಣ, ಪೇಕ್ಖಸ್ಸೂ’’ತಿ, ಅವಾಪುರಣಂ 1 ಆದಾಯ ಘಟಿಕಂ ಉಗ್ಘಾಟೇತ್ವಾ ಕವಾಟಂ ಪಣಾಮೇತ್ವಾ ವಿಹಾರಂ ಪಾವಿಸಿ। ಸೋಪಿ ಖೋ ಬ್ರಾಹ್ಮಣೋ ಆಯಸ್ಮತೋ ಉದಾಯಿಸ್ಸ ಪಿಟ್ಠಿತೋ ಪಾವಿಸಿ। ಸಾಪಿ ಖೋ ಬ್ರಾಹ್ಮಣೀ ತಸ್ಸ ಬ್ರಾಹ್ಮಣಸ್ಸ ಪಿಟ್ಠಿತೋ ಪಾವಿಸಿ। ಅಥ ಖೋ ಆಯಸ್ಮಾ ಉದಾಯೀ ಏಕಚ್ಚೇ ವಾತಪಾನೇ ವಿವರನ್ತೋ ಏಕಚ್ಚೇ ವಾತಪಾನೇ ಥಕೇನ್ತೋ ಗಬ್ಭಂ ಅನುಪರಿಗನ್ತ್ವಾ ಪಿಟ್ಠಿತೋ ಆಗನ್ತ್ವಾ ತಸ್ಸಾ ಬ್ರಾಹ್ಮಣಿಯಾ ಅಙ್ಗಮಙ್ಗಾನಿ ಪರಾಮಸಿ। ಅಥ ಖೋ ಸೋ ಬ್ರಾಹ್ಮಣೋ ಆಯಸ್ಮತಾ ಉದಾಯಿನಾ ಸದ್ಧಿಂ ಪಟಿಸಮ್ಮೋದಿತ್ವಾ ಅಗಮಾಸಿ। ಅಥ ಖೋ ಸೋ ಬ್ರಾಹ್ಮಣೋ ಅತ್ತಮನೋ ಅತ್ತಮನವಾಚಂ ನಿಚ್ಛಾರೇಸಿ – ‘‘ಉಳಾರಾ ಇಮೇ ಸಮಣಾ ಸಕ್ಯಪುತ್ತಿಯಾ ಯೇ ಇಮೇ ಏವರೂಪೇ ಅರಞ್ಞೇ ವಿಹರನ್ತಿ। ಭವಮ್ಪಿ ಉದಾಯೀ ಉಳಾರೋ ಯೋ ಏವರೂಪೇ ಅರಞ್ಞೇ ವಿಹರತೀ’’ತಿ।
269. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā udāyī araññe viharati. Tassāyasmato vihāro abhirūpo hoti dassanīyo pāsādiko, majjhegabbho, samantāpariyāgāro, supaññattaṃ mañcapīṭhaṃ bhisibimbohanaṃ, pānīyaṃ paribhojanīyaṃ supaṭṭhitaṃ, pariveṇaṃ susammaṭṭhaṃ. Bahū manussā āyasmato udāyissa vihārapekkhakā āgacchanti. Aññataropi brāhmaṇo sapajāpatiko yenāyasmā udāyī tenupasaṅkami; upasaṅkamitvā āyasmantaṃ udāyiṃ etadavoca – ‘‘icchāma mayaṃ bhoto udāyissa vihāraṃ pekkhitu’’nti. ‘‘Tena hi, brāhmaṇa, pekkhassū’’ti, avāpuraṇaṃ 2 ādāya ghaṭikaṃ ugghāṭetvā kavāṭaṃ paṇāmetvā vihāraṃ pāvisi. Sopi kho brāhmaṇo āyasmato udāyissa piṭṭhito pāvisi. Sāpi kho brāhmaṇī tassa brāhmaṇassa piṭṭhito pāvisi. Atha kho āyasmā udāyī ekacce vātapāne vivaranto ekacce vātapāne thakento gabbhaṃ anuparigantvā piṭṭhito āgantvā tassā brāhmaṇiyā aṅgamaṅgāni parāmasi. Atha kho so brāhmaṇo āyasmatā udāyinā saddhiṃ paṭisammoditvā agamāsi. Atha kho so brāhmaṇo attamano attamanavācaṃ nicchāresi – ‘‘uḷārā ime samaṇā sakyaputtiyā ye ime evarūpe araññe viharanti. Bhavampi udāyī uḷāro yo evarūpe araññe viharatī’’ti.
ಏವಂ ವುತ್ತೇ ಸಾ ಬ್ರಾಹ್ಮಣೀ ತಂ ಬ್ರಾಹ್ಮಣಂ ಏತದವೋಚ – ‘‘ಕುತೋ ತಸ್ಸ ಉಳಾರತ್ತತಾ! ಯಥೇವ ಮೇ ತ್ವಂ ಅಙ್ಗಮಙ್ಗಾನಿ ಪರಾಮಸಿ ಏವಮೇವ ಮೇ ಸಮಣೋ ಉದಾಯೀ ಅಙ್ಗಮಙ್ಗಾನಿ ಪರಾಮಸೀ’’ತಿ। ಅಥ ಖೋ ಸೋ ಬ್ರಾಹ್ಮಣೋ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಅಲಜ್ಜಿನೋ ಇಮೇ ಸಮಣಾ ಸಕ್ಯಪುತ್ತಿಯಾ ದುಸ್ಸೀಲಾ ಮುಸಾವಾದಿನೋ। ಇಮೇ ಹಿ ನಾಮ ಧಮ್ಮಚಾರಿನೋ ಸಮಚಾರಿನೋ ಬ್ರಹ್ಮಚಾರಿನೋ ಸಚ್ಚವಾದಿನೋ ಸೀಲವನ್ತೋ ಕಲ್ಯಾಣಧಮ್ಮಾ ಪಟಿಜಾನಿಸ್ಸನ್ತಿ! ನತ್ಥಿ ಇಮೇಸಂ ಸಾಮಞ್ಞಂ ನತ್ಥಿ ಇಮೇಸಂ ಬ್ರಹ್ಮಞ್ಞಂ, ನಟ್ಠಂ ಇಮೇಸಂ ಸಾಮಞ್ಞಂ ನಟ್ಠಂ ಇಮೇಸಂ ಬ್ರಹ್ಮಞ್ಞಂ, ಕುತೋ ಇಮೇಸಂ ಸಾಮಞ್ಞಂ ಕುತೋ ಇಮೇಸಂ ಬ್ರಹ್ಮಞ್ಞಂ, ಅಪಗತಾ ಇಮೇ ಸಾಮಞ್ಞಾ ಅಪಗತಾ ಇಮೇ ಬ್ರಹ್ಮಞ್ಞಾ। ಕಥಞ್ಹಿ ನಾಮ ಸಮಣೋ ಉದಾಯೀ ಮಮ ಭರಿಯಾಯ ಅಙ್ಗಮಙ್ಗಾನಿ ಪರಾಮಸಿಸ್ಸತಿ! ನ ಹಿ ಸಕ್ಕಾ ಕುಲಿತ್ಥೀಹಿ ಕುಲಧೀತಾಹಿ ಕುಲಕುಮಾರೀಹಿ ಕುಲಸುಣ್ಹಾಹಿ ಕುಲದಾಸೀಹಿ ಆರಾಮಂ ವಾ ವಿಹಾರಂ ವಾ ಗನ್ತುಂ। ಸಚೇ 3 ಕುಲಿತ್ಥಿಯೋ ಕುಲಧೀತರೋ 4 ಕುಲಕುಮಾರಿಯೋ ಕುಲಸುಣ್ಹಾಯೋ ಕುಲದಾಸಿಯೋ ಆರಾಮಂ ವಾ ವಿಹಾರಂ ವಾ ಗಚ್ಛೇಯ್ಯುಂ, ತಾಪಿ ಸಮಣಾ ಸಕ್ಯಪುತ್ತಿಯಾ ದೂಸೇಯ್ಯು’’ನ್ತಿ!
Evaṃ vutte sā brāhmaṇī taṃ brāhmaṇaṃ etadavoca – ‘‘kuto tassa uḷārattatā! Yatheva me tvaṃ aṅgamaṅgāni parāmasi evameva me samaṇo udāyī aṅgamaṅgāni parāmasī’’ti. Atha kho so brāhmaṇo ujjhāyati khiyyati vipāceti – ‘‘alajjino ime samaṇā sakyaputtiyā dussīlā musāvādino. Ime hi nāma dhammacārino samacārino brahmacārino saccavādino sīlavanto kalyāṇadhammā paṭijānissanti! Natthi imesaṃ sāmaññaṃ natthi imesaṃ brahmaññaṃ, naṭṭhaṃ imesaṃ sāmaññaṃ naṭṭhaṃ imesaṃ brahmaññaṃ, kuto imesaṃ sāmaññaṃ kuto imesaṃ brahmaññaṃ, apagatā ime sāmaññā apagatā ime brahmaññā. Kathañhi nāma samaṇo udāyī mama bhariyāya aṅgamaṅgāni parāmasissati! Na hi sakkā kulitthīhi kuladhītāhi kulakumārīhi kulasuṇhāhi kuladāsīhi ārāmaṃ vā vihāraṃ vā gantuṃ. Sace 5 kulitthiyo kuladhītaro 6 kulakumāriyo kulasuṇhāyo kuladāsiyo ārāmaṃ vā vihāraṃ vā gaccheyyuṃ, tāpi samaṇā sakyaputtiyā dūseyyu’’nti!
ಅಸ್ಸೋಸುಂ ಖೋ ಭಿಕ್ಖು ತಸ್ಸ ಬ್ರಾಹ್ಮಣಸ್ಸ ಉಜ್ಝಾಯನ್ತಸ್ಸ ಖಿಯ್ಯನ್ತಸ್ಸ ವಿಪಾಚೇನ್ತಸ್ಸ। ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ॰… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಆಯಸ್ಮಾ ಉದಾಯೀ ಮಾತುಗಾಮೇನ ಸದ್ಧಿಂ ಕಾಯಸಂಸಗ್ಗಂ ಸಮಾಪಜ್ಜಿಸ್ಸತೀ’’ತಿ! ಅಥ ಖೋ ತೇ ಭಿಕ್ಖೂ ಆಯಸ್ಮನ್ತಂ ಉದಾಯಿಂ ಅನೇಕಪರಿಯಾಯೇನ ವಿಗರಹಿತ್ವಾ ಭಗವತೋ ಏತಮತ್ಥಂ ಆರೋಚೇಸುಂ। ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಆಯಸ್ಮನ್ತಂ ಉದಾಯಿಂ ಪಟಿಪುಚ್ಛಿ – ‘‘ಸಚ್ಚಂ ಕಿರ ತ್ವಂ, ಉದಾಯಿ, ಮಾತುಗಾಮೇನ ಸದ್ಧಿಂ ಕಾಯಸಂಸಗ್ಗಂ ಸಮಾಪಜ್ಜಸೀ’’ತಿ? ‘‘ಸಚ್ಚಂ, ಭಗವಾ’’ತಿ। ವಿಗರಹಿ ಬುದ್ಧೋ ಭಗವಾ – ‘‘ಅನನುಚ್ಛವಿಕಂ, ಮೋಘಪುರಿಸ, ಅನನುಲೋಮಿಕಂ ಅಪ್ಪತಿರೂಪಂ ಅಸ್ಸಾಮಣಕಂ ಅಕಪ್ಪಿಯಂ ಅಕರಣೀಯಂ। ಕಥಞ್ಹಿ ನಾಮ ತ್ವಂ, ಮೋಘಪುರಿಸ, ಮಾತುಗಾಮೇನ ಸದ್ಧಿಂ ಕಾಯಸಂಸಗ್ಗಂ ಸಮಾಪಜ್ಜಿಸ್ಸಸಿ! ನನು ಮಯಾ, ಮೋಘಪುರಿಸ, ಅನೇಕಪರಿಯಾಯೇನ ವಿರಾಗಾಯ ಧಮ್ಮೋ ದೇಸಿತೋ ನೋ ಸರಾಗಾಯ…ಪೇ॰… ಕಾಮಪರಿಳಾಹಾನಂ ವೂಪಸಮೋ ಅಕ್ಖಾತೋ। ನೇತಂ, ಮೋಘಪುರಿಸ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ॰… ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –
Assosuṃ kho bhikkhu tassa brāhmaṇassa ujjhāyantassa khiyyantassa vipācentassa. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā udāyī mātugāmena saddhiṃ kāyasaṃsaggaṃ samāpajjissatī’’ti! Atha kho te bhikkhū āyasmantaṃ udāyiṃ anekapariyāyena vigarahitvā bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā āyasmantaṃ udāyiṃ paṭipucchi – ‘‘saccaṃ kira tvaṃ, udāyi, mātugāmena saddhiṃ kāyasaṃsaggaṃ samāpajjasī’’ti? ‘‘Saccaṃ, bhagavā’’ti. Vigarahi buddho bhagavā – ‘‘ananucchavikaṃ, moghapurisa, ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma tvaṃ, moghapurisa, mātugāmena saddhiṃ kāyasaṃsaggaṃ samāpajjissasi! Nanu mayā, moghapurisa, anekapariyāyena virāgāya dhammo desito no sarāgāya…pe… kāmapariḷāhānaṃ vūpasamo akkhāto. Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
೨೭೦. ‘‘ಯೋ ಪನ ಭಿಕ್ಖು ಓತಿಣ್ಣೋ ವಿಪರಿಣತೇನ ಚಿತ್ತೇನ ಮಾತುಗಾಮೇನ ಸದ್ಧಿಂ ಕಾಯಸಂಸಗ್ಗಂ ಸಮಾಪಜ್ಜೇಯ್ಯ ಹತ್ಥಗ್ಗಾಹಂ ವಾ ವೇಣಿಗ್ಗಾಹಂ ವಾ ಅಞ್ಞತರಸ್ಸ ವಾ ಅಞ್ಞತರಸ್ಸ ವಾ ಅಙ್ಗಸ್ಸ ಪರಾಮಸನಂ, ಸಙ್ಘಾದಿಸೇಸೋ’’ತಿ।
270.‘‘Yo pana bhikkhu otiṇṇo vipariṇatena cittena mātugāmena saddhiṃ kāyasaṃsaggaṃ samāpajjeyya hatthaggāhaṃ vā veṇiggāhaṃ vā aññatarassa vā aññatarassa vā aṅgassa parāmasanaṃ, saṅghādiseso’’ti.
೨೭೧. ಯೋ ಪನಾತಿ ಯೋ ಯಾದಿಸೋ…ಪೇ॰… ಭಿಕ್ಖೂತಿ…ಪೇ॰… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತೋ ಭಿಕ್ಖೂತಿ।
271.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ಓತಿಣ್ಣೋ ನಾಮ ಸಾರತ್ತೋ ಅಪೇಕ್ಖವಾ ಪಟಿಬದ್ಧಚಿತ್ತೋ।
Otiṇṇo nāma sāratto apekkhavā paṭibaddhacitto.
ವಿಪರಿಣತನ್ತಿ ರತ್ತಮ್ಪಿ ಚಿತ್ತಂ ವಿಪರಿಣತಂ। ದುಟ್ಠಮ್ಪಿ ಚಿತ್ತಂ ವಿಪರಿಣತಂ। ಮೂಳ್ಹಮ್ಪಿ ಚಿತ್ತಂ ವಿಪರಿಣತಂ। ಅಪಿಚ, ರತ್ತಂ ಚಿತ್ತಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಂ ವಿಪರಿಣತನ್ತಿ।
Vipariṇatanti rattampi cittaṃ vipariṇataṃ. Duṭṭhampi cittaṃ vipariṇataṃ. Mūḷhampi cittaṃ vipariṇataṃ. Apica, rattaṃ cittaṃ imasmiṃ atthe adhippetaṃ vipariṇatanti.
ಮಾತುಗಾಮೋ ನಾಮ ಮನುಸ್ಸಿತ್ಥೀ, ನ ಯಕ್ಖೀ ನ ಪೇತೀ, ನ ತಿರಚ್ಛಾನಗತಾ। ಅನ್ತಮಸೋ ತದಹುಜಾತಾಪಿ ದಾರಿಕಾ, ಪಗೇವ ಮಹತ್ತರೀ।
Mātugāmo nāma manussitthī, na yakkhī na petī, na tiracchānagatā. Antamaso tadahujātāpi dārikā, pageva mahattarī.
ಸದ್ಧಿನ್ತಿ ಏಕತೋ।
Saddhinti ekato.
ಕಾಯಸಂಸಗ್ಗಂ ಸಮಾಪಜ್ಜೇಯ್ಯಾತಿ ಅಜ್ಝಾಚಾರೋ ವುಚ್ಚತಿ।
Kāyasaṃsaggaṃsamāpajjeyyāti ajjhācāro vuccati.
ಹತ್ಥೋ ನಾಮ ಕಪ್ಪರಂ ಉಪಾದಾಯಂ ಯಾವ ಅಗ್ಗನಖಾ।
Hattho nāma kapparaṃ upādāyaṃ yāva agganakhā.
ವೇಣೀ ನಾಮ ಸುದ್ಧಕೇಸಾ ವಾ, ಸುತ್ತಮಿಸ್ಸಾ ವಾ, ಮಾಲಾಮಿಸ್ಸಾ ವಾ, ಹಿರಞ್ಞಮಿಸ್ಸಾ ವಾ, ಸುವಣ್ಣಮಿಸ್ಸಾ ವಾ, ಮುತ್ತಾಮಿಸ್ಸಾ ವಾ, ಮಣಿಮಿಸ್ಸಾ ವಾ।
Veṇī nāma suddhakesā vā, suttamissā vā, mālāmissā vā, hiraññamissā vā, suvaṇṇamissā vā, muttāmissā vā, maṇimissā vā.
ಅಙ್ಗಂ ನಾಮ ಹತ್ಥಞ್ಚ ವೇಣಿಞ್ಚ ಠಪೇತ್ವಾ ಅವಸೇಸಂ ಅಙ್ಗಂ ನಾಮ।
Aṅgaṃ nāma hatthañca veṇiñca ṭhapetvā avasesaṃ aṅgaṃ nāma.
೨೭೨. ಆಮಸನಾ , ಪರಾಮಸನಾ, ಓಮಸನಾ, ಉಮ್ಮಸನಾ, ಓಲಙ್ಘನಾ, ಉಲ್ಲಙ್ಘನಾ, ಆಕಡ್ಢನಾ, ಪತಿಕಡ್ಢನಾ, ಅಭಿನಿಗ್ಗಣ್ಹನಾ, ಅಭಿನಿಪ್ಪೀಳನಾ, ಗಹಣಂ, ಛುಪನಂ।
272. Āmasanā , parāmasanā, omasanā, ummasanā, olaṅghanā, ullaṅghanā, ākaḍḍhanā, patikaḍḍhanā, abhiniggaṇhanā, abhinippīḷanā, gahaṇaṃ, chupanaṃ.
ಆಮಸನಾ ನಾಮ ಆಮಟ್ಠಮತ್ತಾ।
Āmasanā nāma āmaṭṭhamattā.
ಪರಾಮಸನಾ ನಾಮ ಇತೋಚಿತೋ ಚ ಸಂಚೋಪನಾ।
Parāmasanā nāma itocito ca saṃcopanā.
ಓಮಸನಾ ನಾಮ ಹೇಟ್ಠಾ ಓರೋಪನಾ।
Omasanā nāma heṭṭhā oropanā.
ಉಮ್ಮಸನಾ ನಾಮ ಉದ್ಧಂ ಉಚ್ಚಾರಣಾ।
Ummasanā nāma uddhaṃ uccāraṇā.
ಓಲಙ್ಘನಾ ನಾಮ ಹೇಟ್ಠಾ ಓನಮನಾ।
Olaṅghanā nāma heṭṭhā onamanā.
ಉಲ್ಲಙ್ಘನಾ ನಾಮ ಉದ್ಧಂ ಉಚ್ಚಾರಣಾ।
Ullaṅghanā nāma uddhaṃ uccāraṇā.
ಪತಿಕಡ್ಢನಾ ನಾಮ ಪತಿಪ್ಪಣಾಮನಾ।
Patikaḍḍhanā nāma patippaṇāmanā.
ಅಭಿನಿಗ್ಗಣ್ಹನಾ ನಾಮ ಅಙ್ಗಂ ಗಹೇತ್ವಾ ನಿಪ್ಪೀಳನಾ।
Abhiniggaṇhanā nāma aṅgaṃ gahetvā nippīḷanā.
ಅಭಿನಿಪ್ಪೀಳನಾ ನಾಮ ಕೇನಚಿ ಸಹ ನಿಪ್ಪೀಳನಾ।
Abhinippīḷanā nāma kenaci saha nippīḷanā.
ಗಹಣಂ ನಾಮ ಗಹಿತಮತ್ತಂ।
Gahaṇaṃ nāma gahitamattaṃ.
ಛುಪನಂ ನಾಮ ಫುಟ್ಠಮತ್ತಂ।
Chupanaṃ nāma phuṭṭhamattaṃ.
ಸಙ್ಘಾದಿಸೇಸೋತಿ…ಪೇ॰… ತೇನಪಿ ವುಚ್ಚತಿ ಸಙ್ಘಾದಿಸೇಸೋತಿ।
Saṅghādisesoti…pe… tenapi vuccati saṅghādisesoti.
೨೭೩. ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ ಭಿಕ್ಖು ಚ। ನಂ ಇತ್ಥಿಯಾ ಕಾಯೇನ ಕಾಯಂ ಆಮಸತಿ ಪರಾಮಸತಿ ಓಮಸತಿ ಉಮ್ಮಸತಿ ಓಲಙ್ಘೇತಿ ಉಲ್ಲಙ್ಘೇತಿ ಆಕಡ್ಢತಿ ಪತಿಕಡ್ಢತಿ ಅಭಿನಿಗ್ಗಣ್ಹಾತಿ ಅಭಿನಿಪ್ಪೀಳೇತಿ ಗಣ್ಹಾತಿ ಛುಪತಿ, ಆಪತ್ತಿ ಸಙ್ಘಾದಿಸೇಸಸ್ಸ।
273. Itthī ca hoti itthisaññī sāratto ca bhikkhu ca. Naṃ itthiyā kāyena kāyaṃ āmasati parāmasati omasati ummasati olaṅgheti ullaṅgheti ākaḍḍhati patikaḍḍhati abhiniggaṇhāti abhinippīḷeti gaṇhāti chupati, āpatti saṅghādisesassa.
ಇತ್ಥೀ ಚ ಹೋತಿ ವೇಮತಿಕೋ ಸಾರತ್ತೋ ಚ। ಭಿಕ್ಖು ಚ ನಂ ಇತ್ಥಿಯಾ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯಸ್ಸ।
Itthī ca hoti vematiko sāratto ca. Bhikkhu ca naṃ itthiyā kāyena kāyaṃ āmasati parāmasati…pe… gaṇhāti chupati, āpatti thullaccayassa.
ಇತ್ಥೀ ಚ ಹೋತಿ ಪಣ್ಡಕಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಇತ್ಥಿಯಾ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯಸ್ಸ।
Itthī ca hoti paṇḍakasaññī sāratto ca. Bhikkhu ca naṃ itthiyā kāyena kāyaṃ āmasati parāmasati…pe… gaṇhāti chupati, āpatti thullaccayassa.
ಇತ್ಥೀ ಚ ಹೋತಿ ಪುರಿಸಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಇತ್ಥಿಯಾ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯಸ್ಸ।
Itthī ca hoti purisasaññī sāratto ca. Bhikkhu ca naṃ itthiyā kāyena kāyaṃ āmasati parāmasati…pe… gaṇhāti chupati, āpatti thullaccayassa.
ಇತ್ಥೀ ಚ ಹೋತಿ ತಿರಚ್ಛಾನಗತಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಇತ್ಥಿಯಾ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯಸ್ಸ।
Itthī ca hoti tiracchānagatasaññī sāratto ca. Bhikkhu ca naṃ itthiyā kāyena kāyaṃ āmasati parāmasati…pe… gaṇhāti chupati, āpatti thullaccayassa.
ಪಣ್ಡಕೋ ಚ ಹೋತಿ ಪಣ್ಡಕಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಪಣ್ಡಕಸ್ಸ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯಸ್ಸ।
Paṇḍako ca hoti paṇḍakasaññī sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati, āpatti thullaccayassa.
ಪಣ್ಡಕೋ ಚ ಹೋತಿ ವೇಮತಿಕೋ ಸಾರತ್ತೋ ಚ। ಭಿಕ್ಖು ಚ ನಂ ಪಣ್ಡಕಸ್ಸ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದುಕ್ಕಟಸ್ಸ।
Paṇḍako ca hoti vematiko sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
ಪಣ್ಡಕೋ ಚ ಹೋತಿ ಪುರಿಸಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಪಣ್ಡಕಸ್ಸ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದುಕ್ಕಟಸ್ಸ।
Paṇḍako ca hoti purisasaññī sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
ಪಣ್ಡಕೋ ಚ ಹೋತಿ ತಿರಚ್ಛಾನಗತಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಪಣ್ಡಕಸ್ಸ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ , ಆಪತ್ತಿ ದುಕ್ಕಟಸ್ಸ।
Paṇḍako ca hoti tiracchānagatasaññī sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati , āpatti dukkaṭassa.
ಪಣ್ಡಕೋ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಪಣ್ಡಕಸ್ಸ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದುಕ್ಕಟಸ್ಸ।
Paṇḍako ca hoti itthisaññī sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
ಪುರಿಸೋ ಚ ಹೋತಿ ಪುರಿಸಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಪುರಿಸಸ್ಸ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದುಕ್ಕಟಸ್ಸ।
Puriso ca hoti purisasaññī sāratto ca. Bhikkhu ca naṃ purisassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
ಪುರಿಸೋ ಚ ಹೋತಿ ವೇಮತಿಕೋ…ಪೇ॰… ಪುರಿಸೋ ಚ ಹೋತಿ ತಿರಚ್ಛಾನಗತಸಞ್ಞೀ… ಪುರಿಸೋ ಚ ಹೋತಿ ಇತ್ಥಿಸಞ್ಞೀ… ಪುರಿಸೋ ಚ ಹೋತಿ ಪಣ್ಡಕಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಪುರಿಸಸ್ಸ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದುಕ್ಕಟಸ್ಸ।
Puriso ca hoti vematiko…pe… puriso ca hoti tiracchānagatasaññī… puriso ca hoti itthisaññī… puriso ca hoti paṇḍakasaññī sāratto ca. Bhikkhu ca naṃ purisassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
ತಿರಚ್ಛಾನಗತೋ ಚ ಹೋತಿ ತಿರಚ್ಛಾನಗತಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ತಿರಚ್ಛಾನಗತಸ್ಸ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದುಕ್ಕಟಸ್ಸ।
Tiracchānagato ca hoti tiracchānagatasaññī sāratto ca. Bhikkhu ca naṃ tiracchānagatassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
ತಿರಚ್ಛಾನಗತೋ ಚ ಹೋತಿ ವೇಮತಿಕೋ…ಪೇ॰… ತಿರಚ್ಛಾನಗತೋ ಚ ಹೋತಿ ಇತ್ಥಿಸಞ್ಞೀ… ತಿರಚ್ಛಾನಗತೋ ಚ ಹೋತಿ ಪಣ್ಡಕಸಞ್ಞೀ… ತಿರಚ್ಛಾನಗತೋ ಚ ಹೋತಿ। ಪುರಿಸಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ತಿರಚ್ಛಾನಗತಸ್ಸ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದುಕ್ಕಟಸ್ಸ।
Tiracchānagato ca hoti vematiko…pe… tiracchānagato ca hoti itthisaññī… tiracchānagato ca hoti paṇḍakasaññī… tiracchānagato ca hoti. Purisasaññī sāratto ca. Bhikkhu ca naṃ tiracchānagatassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
ಏಕಮೂಲಕಂ ನಿಟ್ಠಿತಂ।
Ekamūlakaṃ niṭṭhitaṃ.
೨೭೪. ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ದ್ವಿನ್ನಂ ಇತ್ಥೀನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸಾನಂ।
274. Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ saṅghādisesānaṃ.
ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ವೇಮತಿಕೋ ಸಾರತ್ತೋ ಚ। ಭಿಕ್ಖು ಚ ನಂ ದ್ವಿನ್ನಂ ಇತ್ಥೀನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ಥುಲ್ಲಚ್ಚಯಾನಂ।
Dve itthiyo dvinnaṃ itthīnaṃ vematiko sāratto ca. Bhikkhu ca naṃ dvinnaṃ itthīnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ.
ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಪಣ್ಡಕಸಞ್ಞೀ…ಪೇ॰… ಪುರಿಸಸಞ್ಞೀ… ತಿರಚ್ಛಾನಗತಸಞ್ಞೀ ಸಾರತ್ತೋ ಚ। ಭಿಕ್ಖು ಚ ದ್ವಿನ್ನಂ ಇತ್ಥೀನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ಥುಲ್ಲಚ್ಚಯಾನಂ।
Dve itthiyo dvinnaṃ itthīnaṃ paṇḍakasaññī…pe… purisasaññī… tiracchānagatasaññī sāratto ca. Bhikkhu ca dvinnaṃ itthīnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ.
ದ್ವೇ ಪಣ್ಡಕಾ ದ್ವಿನ್ನಂ ಪಣ್ಡಕಾನಂ ಪಣ್ಡಕಸಞ್ಞೀ ಸಾರತ್ತೋ ಚ ಭಿಕ್ಖು ಚ ನಂ ದ್ವಿನ್ನಂ ಪಣ್ಡಕಾನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ಥುಲ್ಲಚ್ಚಯಾನಂ।
Dve paṇḍakā dvinnaṃ paṇḍakānaṃ paṇḍakasaññī sāratto ca bhikkhu ca naṃ dvinnaṃ paṇḍakānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ.
ದ್ವೇ ಪಣ್ಡಕಾ ದ್ವಿನ್ನಂ ಪಣ್ಡಕಾನಂ ವೇಮತಿಕೋ…ಪೇ॰… ಪುರಿಸಸಞ್ಞೀ… ತಿರಚ್ಛಾನಗತಸಞ್ಞೀ… ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ದ್ವಿನ್ನಂ ಪಣ್ಡಕಾನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ।
Dve paṇḍakā dvinnaṃ paṇḍakānaṃ vematiko…pe… purisasaññī… tiracchānagatasaññī… itthisaññī sāratto ca. Bhikkhu ca naṃ dvinnaṃ paṇḍakānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
ದ್ವೇ ಪುರಿಸಾ ದ್ವಿನ್ನಂ ಪುರಿಸಾನಂ ಪುರಿಸಸಞ್ಞೀ ಸಾರತ್ತೋ ಚ ಭಿಕ್ಖು ಚ ನಂ ದ್ವಿನ್ನಂ ಪುರಿಸಾನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ।
Dve purisā dvinnaṃ purisānaṃ purisasaññī sāratto ca bhikkhu ca naṃ dvinnaṃ purisānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
ದ್ವೇ ಪುರಿಸಾ ದ್ವಿನ್ನಂ ಪುರಿಸಾನಂ ವೇಮತಿಕೋ…ಪೇ॰… ತಿರಚ್ಛಾನಗತಸಞ್ಞೀ… ಇತ್ಥಿಸಞ್ಞೀ… ಪಣ್ಡಕಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ದ್ವಿನ್ನಂ ಪುರಿಸಾನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ।
Dve purisā dvinnaṃ purisānaṃ vematiko…pe… tiracchānagatasaññī… itthisaññī… paṇḍakasaññī sāratto ca. Bhikkhu ca naṃ dvinnaṃ purisānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
ದ್ವೇ ತಿರಚ್ಛಾನಗತಾ ದ್ವಿನ್ನಂ ತಿರಚ್ಛಾನಗತಾನಂ ತಿರಚ್ಛಾನಗತಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ದ್ವಿನ್ನಂ ತಿರಚ್ಛಾನಗತಾನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ।
Dve tiracchānagatā dvinnaṃ tiracchānagatānaṃ tiracchānagatasaññī sāratto ca. Bhikkhu ca naṃ dvinnaṃ tiracchānagatānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
ದ್ವೇ ತಿರಚ್ಛಾನಗತಾ ದ್ವಿನ್ನಂ ತಿರಚ್ಛಾನಗತಾನಂ ವೇಮತಿಕೋ…ಪೇ॰… ಇತ್ಥಿಸಞ್ಞೀ… ಪಣ್ಡಕಸಞ್ಞೀ … ಪುರಿಸಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ದ್ವಿನ್ನಂ ತಿರಚ್ಛಾನಗತಾನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ।
Dve tiracchānagatā dvinnaṃ tiracchānagatānaṃ vematiko…pe… itthisaññī… paṇḍakasaññī … purisasaññī sāratto ca. Bhikkhu ca naṃ dvinnaṃ tiracchānagatānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
೨೭೫. ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ।
275. Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti saṅghādisesena dukkaṭassa.
ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ವೇಮತಿಕೋ ಸಾರತ್ತೋ ಚ। ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ।
Itthī ca paṇḍako ca ubhinnaṃ vematiko sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಪಣ್ಡಕಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ಥುಲ್ಲಚ್ಚಯಾನಂ।
Itthī ca paṇḍako ca ubhinnaṃ paṇḍakasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ.
ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಪುರಿಸಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ।
Itthī ca paṇḍako ca ubhinnaṃ purisasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ತಿರಚ್ಛಾನಗತಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ।
Itthī ca paṇḍako ca ubhinnaṃ tiracchānagatasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ಇತ್ಥೀ ಚ ಪುರಿಸೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ।
Itthī ca puriso ca ubhinnaṃ itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti saṅghādisesena dukkaṭassa.
ಇತ್ಥೀ ಚ ಪುರಿಸೋ ಚ ಉಭಿನ್ನಂ ವೇಮತಿಕೋ…ಪೇ॰… ಪಣ್ಡಕಸಞ್ಞೀ… ಪುರಿಸಸಞ್ಞೀ… ತಿರಚ್ಛಾನಗತಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ।
Itthī ca puriso ca ubhinnaṃ vematiko…pe… paṇḍakasaññī… purisasaññī… tiracchānagatasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ಇತ್ಥೀ ಚ ತಿರಚ್ಛಾನಗತೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ।
Itthī ca tiracchānagato ca ubhinnaṃ itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti saṅghādisesena dukkaṭassa.
ಇತ್ಥೀ ಚ ತಿರಚ್ಛಾನಗತೋ ಚ ಉಭಿನ್ನಂ ವೇಮತಿಕೋ…ಪೇ॰… ಪಣ್ಡಕಸಞ್ಞೀ… ಪುರಿಸಸಞ್ಞೀ … ತಿರಚ್ಛಾನಗತಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ।
Itthī ca tiracchānagato ca ubhinnaṃ vematiko…pe… paṇḍakasaññī… purisasaññī … tiracchānagatasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ಪಣ್ಡಕೋ ಚ ಪುರಿಸೋ ಚ ಉಭಿನ್ನಂ ಪಣ್ಡಕಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ।
Paṇḍako ca puriso ca ubhinnaṃ paṇḍakasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ಪಣ್ಡಕೋ ಚ ಪುರಿಸೋ ಚ ಉಭಿನ್ನಂ ವೇಮತಿಕೋ…ಪೇ॰… ಪುರಿಸಸಞ್ಞೀ… ತಿರಚ್ಛಾನಗತಸಞ್ಞೀ… ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ।
Paṇḍako ca puriso ca ubhinnaṃ vematiko…pe… purisasaññī… tiracchānagatasaññī… itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
ಪಣ್ಡಕೋ ಚ ತಿರಚ್ಛಾನಗತೋ ಚ ಉಭಿನ್ನಂ ಪಣ್ಡಕಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ।
Paṇḍako ca tiracchānagato ca ubhinnaṃ paṇḍakasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ಪಣ್ಡಕೋ ಚ ತಿರಚ್ಛಾನಗತೋ ಚ ಉಭಿನ್ನಂ ವೇಮತಿಕೋ…ಪೇ॰… ಪುರಿಸಸಞ್ಞೀ… ತಿರಚ್ಛಾನಗತಸಞ್ಞೀ… ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ।
Paṇḍako ca tiracchānagato ca ubhinnaṃ vematiko…pe… purisasaññī… tiracchānagatasaññī… itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
ಪುರಿಸೋ ಚ ತಿರಚ್ಛಾನಗತೋ ಚ ಉಭಿನ್ನಂ ಪುರಿಸಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ।
Puriso ca tiracchānagato ca ubhinnaṃ purisasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
ಪುರಿಸೋ ಚ ತಿರಚ್ಛಾನಗತೋ ಚ ಉಭಿನ್ನಂ ವೇಮತಿಕೋ…ಪೇ॰… ತಿರಚ್ಛಾನಗತಸಞ್ಞೀ… ಇತ್ಥಿಸಞ್ಞೀ… ಪಣ್ಡಕಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ।
Puriso ca tiracchānagato ca ubhinnaṃ vematiko…pe… tiracchānagatasaññī… itthisaññī… paṇḍakasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
ದುಮೂಲಕಂ ನಿಟ್ಠಿತಂ।
Dumūlakaṃ niṭṭhitaṃ.
೨೭೬. ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಇತ್ಥಿಯಾ ಕಾಯೇನ ಕಾಯಪಟಿಬದ್ಧಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯಸ್ಸ…ಪೇ॰…।
276. Itthī ca hoti itthisaññī sāratto ca. Bhikkhu ca naṃ itthiyā kāyena kāyapaṭibaddhaṃ āmasati parāmasati…pe… gaṇhāti chupati, āpatti thullaccayassa…pe….
ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ದ್ವಿನ್ನಂ ಇತ್ಥೀನಂ ಕಾಯೇನ ಕಾಯಪಟಿಬದ್ಧಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ಥುಲ್ಲಚ್ಚಯಾನಂ …ಪೇ॰…।
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ kāyena kāyapaṭibaddhaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ …pe….
ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಪಟಿಬದ್ಧಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ…ಪೇ॰…।
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ kāyena kāyapaṭibaddhaṃ āmasati parāmasati…pe… gaṇhāti chupati, āpatti thullaccayena dukkaṭassa…pe….
ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಇತ್ಥಿಯಾ ಕಾಯಪಟಿಬದ್ಧೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯಸ್ಸ…ಪೇ॰…।
Itthī ca hoti itthisaññī sāratto ca. Bhikkhu ca naṃ itthiyā kāyapaṭibaddhena kāyaṃ āmasati parāmasati…pe… gaṇhāti chupati, āpatti thullaccayassa…pe….
ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ದ್ವಿನ್ನಂ ಇತ್ಥೀನಂ ಕಾಯಪಟಿಬದ್ಧೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ಥುಲ್ಲಚ್ಚಯಾನಂ…ಪೇ॰…।
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ kāyapaṭibaddhena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ…pe….
ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಉಭಿನ್ನಂ ಕಾಯಪಟಿಬದ್ಧೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ…ಪೇ॰…।
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ kāyapaṭibaddhena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa…pe….
ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಇತ್ಥಿಯಾ ಕಾಯಪಟಿಬದ್ಧೇನ ಕಾಯಪಟಿಬದ್ಧಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದುಕ್ಕಟಸ್ಸ…ಪೇ॰…।
Itthī ca hoti itthisaññī sāratto ca. Bhikkhu ca naṃ itthiyā kāyapaṭibaddhena kāyapaṭibaddhaṃ āmasati parāmasati…pe… gaṇhāti chupati, āpatti dukkaṭassa…pe….
ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ದ್ವಿನ್ನಂ ಇತ್ಥೀನಂ ಕಾಯಪಟಿಬದ್ಧೇನ ಕಾಯಪಟಿಬದ್ಧಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ॰…।
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ kāyapaṭibaddhena kāyapaṭibaddhaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ…pe….
ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಉಭಿನ್ನಂ ಕಾಯಪಟಿಬದ್ಧೇನ ಕಾಯಪಟಿಬದ್ಧಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ॰…।
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ kāyapaṭibaddhena kāyapaṭibaddhaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ…pe….
ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಇತ್ಥಿಯಾ ನಿಸ್ಸಗ್ಗಿಯೇನ ಕಾಯಂ ಆಮಸತಿ ಆಪತ್ತಿ ದುಕ್ಕಟಸ್ಸ…ಪೇ॰…।
Itthī ca hoti itthisaññī sāratto ca. Bhikkhu ca naṃ itthiyā nissaggiyena kāyaṃ āmasati āpatti dukkaṭassa…pe….
ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ದ್ವಿನ್ನಂ ಇತ್ಥೀನಂ ನಿಸ್ಸಗ್ಗಿಯೇನ ಕಾಯಂ ಆಮಸತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ॰…।
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ nissaggiyena kāyaṃ āmasati, āpatti dvinnaṃ dukkaṭānaṃ…pe….
ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಉಭಿನ್ನಂ ನಿಸ್ಸಗ್ಗಿಯೇನ ಕಾಯಂ ಆಮಸತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ॰…।
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ nissaggiyena kāyaṃ āmasati, āpatti dvinnaṃ dukkaṭānaṃ…pe….
ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಇತ್ಥಿಯಾ ನಿಸ್ಸಗ್ಗಿಯೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ದುಕ್ಕಟಸ್ಸ…ಪೇ॰…।
Itthī ca hoti itthisaññī sāratto ca. Bhikkhu ca naṃ itthiyā nissaggiyena kāyapaṭibaddhaṃ āmasati, āpatti dukkaṭassa…pe….
ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ದ್ವಿನ್ನಂ ಇತ್ಥೀನಂ ನಿಸ್ಸಗ್ಗಿಯೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ॰…।
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ nissaggiyena kāyapaṭibaddhaṃ āmasati, āpatti dvinnaṃ dukkaṭānaṃ…pe….
ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಉಭಿನ್ನಂ ನಿಸ್ಸಗ್ಗಿಯೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ॰…।
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ nissaggiyena kāyapaṭibaddhaṃ āmasati, āpatti dvinnaṃ dukkaṭānaṃ…pe….
ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಇತ್ಥಿಯಾ ನಿಸ್ಸಗ್ಗಿಯೇನ ನಿಸ್ಸಗ್ಗಿಯಂ ಆಮಸತಿ, ಆಪತ್ತಿ ದುಕ್ಕಟಸ್ಸ…ಪೇ॰…।
Itthī ca hoti itthisaññī sāratto ca. Bhikkhu ca naṃ itthiyā nissaggiyena nissaggiyaṃ āmasati, āpatti dukkaṭassa…pe….
ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ದ್ವಿನ್ನಂ ಇತ್ಥೀನಂ ನಿಸ್ಸಗ್ಗಿಯೇನ ನಿಸ್ಸಗ್ಗಿಯಂ ಆಮಸತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ॰…।
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ nissaggiyena nissaggiyaṃ āmasati, āpatti dvinnaṃ dukkaṭānaṃ…pe….
ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ। ಭಿಕ್ಖು ಚ ನಂ ಉಭಿನ್ನಂ ನಿಸ್ಸಗ್ಗಿಯೇನ ನಿಸ್ಸಗ್ಗಿಯಂ ಆಮಸತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ॰…।
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ nissaggiyena nissaggiyaṃ āmasati, āpatti dvinnaṃ dukkaṭānaṃ…pe….
ಭಿಕ್ಖುಪೇಯ್ಯಾಲೋ ನಿಟ್ಠಿತೋ।
Bhikkhupeyyālo niṭṭhito.
೨೭೭. ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ। ಇತ್ಥೀ ಚ ನಂ ಭಿಕ್ಖುಸ್ಸ ಕಾಯೇನ ಕಾಯಂ ಆಮಸತಿ ಪರಾಮಸತಿ ಓಮಸತಿ ಉಮ್ಮಸತಿ ಓಲಙ್ಘೇತಿ ಉಲ್ಲಙ್ಘೇತಿ ಆಕಡ್ಢತಿ ಪತಿಕಡ್ಢತಿ ಅಭಿನಿಗ್ಗಣ್ಹಾತಿ ಅಭಿನಿಪ್ಪೀಳೇತಿ ಗಣ್ಹಾತಿ ಛುಪತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ಸಙ್ಘಾದಿಸೇಸಸ್ಸ…ಪೇ॰…।
277. Itthī ca hoti itthisaññī sāratto ca. Itthī ca naṃ bhikkhussa kāyena kāyaṃ āmasati parāmasati omasati ummasati olaṅgheti ullaṅgheti ākaḍḍhati patikaḍḍhati abhiniggaṇhāti abhinippīḷeti gaṇhāti chupati, sevanādhippāyo kāyena vāyamati phassaṃ paṭivijānāti, āpatti saṅghādisesassa…pe….
ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ। ಇತ್ಥಿಯೋ ಚ ನಂ ಭಿಕ್ಖುಸ್ಸ ಕಾಯೇನ ಕಾಯಂ ಆಮಸನ್ತಿ ಪರಾಮಸನ್ತಿ ಓಮಸನ್ತಿ ಉಮ್ಮಸನ್ತಿ ಓಲಙ್ಘೇನ್ತಿ ಉಲ್ಲಙ್ಘೇನ್ತಿ ಆಕಡ್ಢನ್ತಿ ಪತಿಕಡ್ಢನ್ತಿ ಅಭಿನಿಗ್ಗಣ್ಹನ್ತಿ ಅಭಿನಿಪ್ಪೀಳೇನ್ತಿ ಗಣ್ಹನ್ತಿ ಛುಪನ್ತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸಾನಂ…ಪೇ॰…।
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa kāyena kāyaṃ āmasanti parāmasanti omasanti ummasanti olaṅghenti ullaṅghenti ākaḍḍhanti patikaḍḍhanti abhiniggaṇhanti abhinippīḷenti gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ saṅghādisesānaṃ…pe….
ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ। ಉಭೋ ಚ ನಂ ಭಿಕ್ಖುಸ್ಸ ಕಾಯೇನ ಕಾಯಂ ಆಮಸನ್ತಿ ಪರಾಮಸನ್ತಿ…ಪೇ॰… ಗಣ್ಹನ್ತಿ ಛುಪನ್ತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ॰…।
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa kāyena kāyaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti saṅghādisesena dukkaṭassa…pe….
ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ। ಇತ್ಥೀ ಚ ನಂ ಭಿಕ್ಖುಸ್ಸ ಕಾಯೇನ ಕಾಯಪಟಿಬದ್ಧಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ಥುಲ್ಲಚ್ಚಯಸ್ಸ…ಪೇ॰…।
Itthī ca hoti itthisaññī sāratto ca. Itthī ca naṃ bhikkhussa kāyena kāyapaṭibaddhaṃ āmasati parāmasati…pe… gaṇhāti chupati, sevanādhippāyo kāyena vāyamati phassaṃ paṭivijānāti, āpatti thullaccayassa…pe….
ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ। ಇತ್ಥಿಯೋ ಚ ನಂ ಭಿಕ್ಖುಸ್ಸ ಕಾಯೇನ ಕಾಯಪಟಿಬದ್ಧಂ ಆಮಸನ್ತಿ ಪರಾಮಸನ್ತಿ…ಪೇ॰… ಗಣ್ಹನ್ತಿ ಛುಪನ್ತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ಥುಲ್ಲಚ್ಚಯಾನಂ…ಪೇ॰…।
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa kāyena kāyapaṭibaddhaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ thullaccayānaṃ…pe….
ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ। ಉಭೋ ಚ ನಂ ಭಿಕ್ಖುಸ್ಸ ಕಾಯೇನ ಕಾಯಪಟಿಬದ್ಧಂ ಆಮಸನ್ತಿ ಪರಾಮಸನ್ತಿ…ಪೇ॰… ಗಣ್ಹನ್ತಿ ಛುಪನ್ತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ…ಪೇ॰…।
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa kāyena kāyapaṭibaddhaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti thullaccayena dukkaṭassa…pe….
ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ। ಇತ್ಥೀ ಚ ನಂ ಭಿಕ್ಖುಸ್ಸ ಕಾಯಪಟಿಬದ್ಧೇನ ಕಾಯಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ಥುಲ್ಲಚ್ಚಯಸ್ಸ…ಪೇ॰…।
Itthī ca hoti itthisaññī sāratto ca. Itthī ca naṃ bhikkhussa kāyapaṭibaddhena kāyaṃ āmasati parāmasati…pe… gaṇhāti chupati sevanādhippāyo kāyena vāyamati phassaṃ paṭivijānāti, āpatti thullaccayassa…pe….
ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ। ಇತ್ಥಿಯೋ ಚ ನಂ ಭಿಕ್ಖುಸ್ಸ ಕಾಯಪಟಿಬದ್ಧೇನ ಕಾಯಂ ಆಮಸನ್ತಿ ಪರಾಮಸನ್ತಿ…ಪೇ॰… ಗಣ್ಹನ್ತಿ ಛುಪನ್ತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ಥುಲ್ಲಚ್ಚಯಾನಂ…ಪೇ॰…।
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa kāyapaṭibaddhena kāyaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ thullaccayānaṃ…pe….
ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ। ಉಭೋ ಚ ನಂ ಭಿಕ್ಖುಸ್ಸ ಕಾಯಪಟಿಬದ್ಧೇನ ಕಾಯಂ ಆಮಸನ್ತಿ ಪರಾಮಸನ್ತಿ…ಪೇ॰… ಗಣ್ಹನ್ತಿ ಛುಪನ್ತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ…ಪೇ॰…।
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa kāyapaṭibaddhena kāyaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti thullaccayena dukkaṭassa…pe….
೨೭೮. ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ। ಇತ್ಥೀ ಚ ನಂ ಭಿಕ್ಖುಸ್ಸ ಕಾಯಪಟಿಬದ್ಧೇನ ಕಾಯಪಟಿಬದ್ಧಂ ಆಮಸತಿ ಪರಾಮಸತಿ…ಪೇ॰… ಗಣ್ಹಾತಿ ಛುಪತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದುಕ್ಕಟಸ್ಸ…ಪೇ॰…।
278. Itthī ca hoti itthisaññī sāratto ca. Itthī ca naṃ bhikkhussa kāyapaṭibaddhena kāyapaṭibaddhaṃ āmasati parāmasati…pe… gaṇhāti chupati, sevanādhippāyo kāyena vāyamati phassaṃ paṭivijānāti, āpatti dukkaṭassa…pe….
ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ। ಇತ್ಥಿಯೋ ಚ ನಂ ಭಿಕ್ಖುಸ್ಸ ಕಾಯಪಟಿಬದ್ಧೇನ ಕಾಯಪಟಿಬದ್ಧಂ ಆಮಸನ್ತಿ ಪರಾಮಸನ್ತಿ…ಪೇ॰… ಗಣ್ಹನ್ತಿ ಛುಪನ್ತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ॰…।
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa kāyapaṭibaddhena kāyapaṭibaddhaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ। ಉಭೋ ಚ ನಂ ಭಿಕ್ಖುಸ್ಸ ಕಾಯಪಟಿಬದ್ಧೇನ ಕಾಯಪಟಿಬದ್ಧಂ ಆಮಸನ್ತಿ ಪರಾಮಸನ್ತಿ…ಪೇ॰… ಗಣ್ಹನ್ತಿ ಛುಪನ್ತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ॰…।
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa kāyapaṭibaddhena kāyapaṭibaddhaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ। ಇತ್ಥೀ ಚ ನಂ ಭಿಕ್ಖುಸ್ಸ ನಿಸ್ಸಗ್ಗಿಯೇನ ಕಾಯಂ ಆಮಸತಿ। ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದುಕ್ಕಟಸ್ಸ…ಪೇ॰…।
Itthī ca hoti itthisaññī sāratto ca. Itthī ca naṃ bhikkhussa nissaggiyena kāyaṃ āmasati. Sevanādhippāyo kāyena vāyamati phassaṃ paṭivijānāti, āpatti dukkaṭassa…pe….
ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ। ಇತ್ಥಿಯೋ ಚ ನಂ ಭಿಕ್ಖುಸ್ಸ ನಿಸ್ಸಗ್ಗಿಯೇನ ಕಾಯಂ ಆಮಸನ್ತಿ। ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ॰…।
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa nissaggiyena kāyaṃ āmasanti. Sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ। ಉಭೋ ಚ ನಂ ಭಿಕ್ಖುಸ್ಸ ನಿಸ್ಸಗ್ಗಿಯೇನ ಕಾಯಂ ಆಮಸನ್ತಿ। ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ॰…।
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa nissaggiyena kāyaṃ āmasanti. Sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ। ಇತ್ಥೀ ಚ ನಂ ಭಿಕ್ಖುಸ್ಸ ನಿಸ್ಸಗ್ಗಿಯೇನ ಕಾಯಪಟಿಬದ್ಧಂ ಆಮಸತಿ। ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದುಕ್ಕಟಸ್ಸ…ಪೇ॰…।
Itthī ca hoti itthisaññī sāratto ca. Itthī ca naṃ bhikkhussa nissaggiyena kāyapaṭibaddhaṃ āmasati. Sevanādhippāyo kāyena vāyamati phassaṃ paṭivijānāti, āpatti dukkaṭassa…pe….
ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ। ಇತ್ಥಿಯೋ ಚ ನಂ ಭಿಕ್ಖುಸ್ಸ ನಿಸ್ಸಗ್ಗಿಯೇನ ಕಾಯಪಟಿಬದ್ಧಂ ಆಮಸನ್ತಿ। ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ॰…।
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa nissaggiyena kāyapaṭibaddhaṃ āmasanti. Sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ। ಉಭೋ ಚ ನಂ ಭಿಕ್ಖುಸ್ಸ ನಿಸ್ಸಗ್ಗಿಯೇನ ಕಾಯಪಟಿಬದ್ಧಂ ಆಮಸನ್ತಿ। ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ॰…।
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa nissaggiyena kāyapaṭibaddhaṃ āmasanti. Sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ। ಇತ್ಥೀ ಚ ನಂ ಭಿಕ್ಖುಸ್ಸ ನಿಸ್ಸಗ್ಗಿಯೇನ ನಿಸ್ಸಗ್ಗಿಯಂ ಆಮಸತಿ। ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ, ನ ಚ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದುಕ್ಕಟಸ್ಸ…ಪೇ॰…।
Itthī ca hoti itthisaññī sāratto ca. Itthī ca naṃ bhikkhussa nissaggiyena nissaggiyaṃ āmasati. Sevanādhippāyo kāyena vāyamati, na ca phassaṃ paṭivijānāti, āpatti dukkaṭassa…pe….
ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ। ಇತ್ಥಿಯೋ ಚ ನಂ ಭಿಕ್ಖುಸ್ಸ ನಿಸ್ಸಗ್ಗಿಯೇನ ನಿಸ್ಸಗ್ಗಿಯಂ ಆಮಸನ್ತಿ। ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ, ನ ಚ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ॰…।
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa nissaggiyena nissaggiyaṃ āmasanti. Sevanādhippāyo kāyena vāyamati, na ca phassaṃ paṭivijānāti, āpatti dvinnaṃ dukkaṭānaṃ…pe….
ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ। ಉಭೋ ಚ ನಂ ಭಿಕ್ಖುಸ್ಸ ನಿಸ್ಸಗ್ಗಿಯೇನ ನಿಸ್ಸಗ್ಗಿಯಂ ಆಮಸನ್ತಿ। ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ, ನ ಚ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ॰…।
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa nissaggiyena nissaggiyaṃ āmasanti. Sevanādhippāyo kāyena vāyamati, na ca phassaṃ paṭivijānāti, āpatti dvinnaṃ dukkaṭānaṃ…pe….
೨೭೯. ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ಸಙ್ಘಾದಿಸೇಸಸ್ಸ।
279. Sevanādhippāyo kāyena vāyamati phassaṃ paṭivijānāti, āpatti saṅghādisesassa.
ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ, ನ ಚ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದುಕ್ಕಟಸ್ಸ।
Sevanādhippāyo kāyena vāyamati, na ca phassaṃ paṭivijānāti, āpatti dukkaṭassa.
ಸೇವನಾಧಿಪ್ಪಾಯೋ ನ ಚ ಕಾಯೇನ ವಾಯಮತಿ, ಫಸ್ಸಂ ಪಟಿವಿಜಾನಾತಿ, ಅನಾಪತ್ತಿ।
Sevanādhippāyo na ca kāyena vāyamati, phassaṃ paṭivijānāti, anāpatti.
ಸೇವನಾಧಿಪ್ಪಾಯೋ ನ ಚ ಕಾಯೇನ ವಾಯಮತಿ, ನ ಚ ಫಸ್ಸಂ ಪಟಿವಿಜಾನಾತಿ, ಅನಾಪತ್ತಿ।
Sevanādhippāyo na ca kāyena vāyamati, na ca phassaṃ paṭivijānāti, anāpatti.
ಮೋಕ್ಖಾಧಿಪ್ಪಾಯೋ ಕಾಯೇನ ವಾಯಮತಿ, ಫಸ್ಸಂ ಪಟಿವಿಜಾನಾತಿ, ಅನಾಪತ್ತಿ।
Mokkhādhippāyo kāyena vāyamati, phassaṃ paṭivijānāti, anāpatti.
ಮೋಕ್ಖಾಧಿಪ್ಪಾಯೋ ಕಾಯೇನ ವಾಯಮತಿ, ನ ಚ ಫಸ್ಸಂ ಪಟಿವಿಜಾನಾತಿ , ಅನಾಪತ್ತಿ।
Mokkhādhippāyo kāyena vāyamati, na ca phassaṃ paṭivijānāti , anāpatti.
ಮೋಕ್ಖಾಧಿಪ್ಪಾಯೋ ನ ಚ ಕಾಯೇನ ವಾಯಮತಿ, ಫಸ್ಸಂ ಪಟಿವಿಜಾನಾತಿ, ಅನಾಪತ್ತಿ।
Mokkhādhippāyo na ca kāyena vāyamati, phassaṃ paṭivijānāti, anāpatti.
ಮೋಕ್ಖಾಧಿಪ್ಪಾಯೋ ನ ಚ ಕಾಯೇನ ವಾಯಮತಿ, ನ ಚ ಫಸ್ಸಂ ಪಟಿವಿಜಾನಾತಿ, ಅನಾಪತ್ತಿ।
Mokkhādhippāyo na ca kāyena vāyamati, na ca phassaṃ paṭivijānāti, anāpatti.
೨೮೦. ಅನಾಪತ್ತಿ ಅಸಞ್ಚಿಚ್ಚ, ಅಸತಿಯಾ, ಅಜಾನನ್ತಸ್ಸ, ಅಸಾದಿಯನ್ತಸ್ಸ, ಉಮ್ಮತ್ತಕಸ್ಸ, ಖಿತ್ತಚಿತ್ತಸ್ಸ, ವೇದನಾಟ್ಟಸ್ಸ, ಆದಿಕಮ್ಮಿಕಸ್ಸಾತಿ।
280. Anāpatti asañcicca, asatiyā, ajānantassa, asādiyantassa, ummattakassa, khittacittassa, vedanāṭṭassa, ādikammikassāti.
ವಿನೀತವತ್ಥುಉದ್ದಾನಗಾಥಾ
Vinītavatthuuddānagāthā
ಮಾತಾ ಧೀತಾ ಭಗಿನೀ ಚ, ಜಾಯಾ ಯಕ್ಖೀ ಚ ಪಣ್ಡಕೋ।
Mātā dhītā bhaginī ca, jāyā yakkhī ca paṇḍako;
ಸುತ್ತಾ ಮತಾ ತಿರಚ್ಛಾನಾ, ದಾರುಧಿತಲಿಕಾಯ ಚ॥
Suttā matā tiracchānā, dārudhitalikāya ca.
ಸಮ್ಪೀಳೇ ಸಙ್ಕಮೋ ಮಗ್ಗೋ, ರುಕ್ಖೋ ನಾವಾ ಚ ರಜ್ಜು ಚ।
Sampīḷe saṅkamo maggo, rukkho nāvā ca rajju ca;
ದಣ್ಡೋ ಪತ್ತಂ ಪಣಾಮೇಸಿ, ವನ್ದೇ ವಾಯಮಿ ನಚ್ಛುಪೇತಿ॥
Daṇḍo pattaṃ paṇāmesi, vande vāyami nacchupeti.
ವಿನೀತವತ್ಥು
Vinītavatthu
೨೮೧. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಮಾತುಯಾ ಮಾತುಪೇಮೇನ ಆಮಸಿ। ತಸ್ಸ ಕುಕ್ಕುಚ್ಚಂ ಅಹೋಸಿ – ‘‘ಭಗವತಾ ಸಿಕ್ಖಾಪದಂ ಪಞ್ಞತ್ತಂ, ಕಚ್ಚಿ ನು ಖೋ ಅಹಂ ಸಙ್ಘಾದಿಸೇಸಂ ಆಪತ್ತಿಂ ಆಪನ್ನೋ’’ತಿ? ಭಗವತೋ ಏತಮತ್ಥಂ ಆರೋಚೇಸಿ। ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ।
281. Tena kho pana samayena aññataro bhikkhu mātuyā mātupemena āmasi. Tassa kukkuccaṃ ahosi – ‘‘bhagavatā sikkhāpadaṃ paññattaṃ, kacci nu kho ahaṃ saṅghādisesaṃ āpattiṃ āpanno’’ti? Bhagavato etamatthaṃ ārocesi. ‘‘Anāpatti, bhikkhu, saṅghādisesassa; āpatti dukkaṭassā’’ti.
ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಧೀತುಯಾ ಧೀತುಪೇಮೇನ ಆಮಸಿ…ಪೇ॰… ಭಗಿನಿಯಾ ಭಗಿನಿಪೇಮೇನ ಆಮಸಿ। ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ॰… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ।
Tena kho pana samayena aññataro bhikkhu dhītuyā dhītupemena āmasi…pe… bhaginiyā bhaginipemena āmasi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಪುರಾಣದುತಿಯಿಕಾಯ ಕಾಯಸಂಸಗ್ಗಂ ಸಮಾಪಜ್ಜಿ। ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ॰… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಸಙ್ಘಾದಿಸೇಸ’’ನ್ತಿ।
Tena kho pana samayena aññataro bhikkhu purāṇadutiyikāya kāyasaṃsaggaṃ samāpajji. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಯಕ್ಖಿನಿಯಾ ಕಾಯಸಂಸಗ್ಗಂ ಸಮಾಪಜ್ಜಿ। ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ॰… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ।
Tena kho pana samayena aññataro bhikkhu yakkhiniyā kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಪಣ್ಡಕಸ್ಸ ಕಾಯಸಂಸಗ್ಗಂ ಸಮಾಪಜ್ಜಿ। ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ॰… ‘‘ಅನಾಪತ್ತಿ , ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ।
Tena kho pana samayena aññataro bhikkhu paṇḍakassa kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti , bhikkhu, saṅghādisesassa; āpatti thullaccayassā’’ti.
ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಸುತ್ತಿತ್ಥಿಯಾ ಕಾಯಸಂಸಗ್ಗಂ ಸಮಾಪಜ್ಜಿ। ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ॰… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಸಙ್ಘಾದಿಸೇಸ’’ನ್ತಿ।
Tena kho pana samayena aññataro bhikkhu suttitthiyā kāyasaṃsaggaṃ samāpajji. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಮತಿತ್ಥಿಯಾ ಕಾಯಸಂಸಗ್ಗಂ ಸಮಾಪಜ್ಜಿ। ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ॰… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ।
Tena kho pana samayena aññataro bhikkhu matitthiyā kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ತಿರಚ್ಛಾನಗತಿತ್ಥಿಯಾ ಕಾಯಸಂಸಗ್ಗಂ ಸಮಾಪಜ್ಜಿ। ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ॰… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ।
Tena kho pana samayena aññataro bhikkhu tiracchānagatitthiyā kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ದಾರುಧೀತಲಿಕಾಯ ಕಾಯಸಂಸಗ್ಗಂ ಸಮಾಪಜ್ಜಿ। ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ॰… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ।
Tena kho pana samayena aññataro bhikkhu dārudhītalikāya kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
೨೮೨. ತೇನ ಖೋ ಪನ ಸಮಯೇನ ಸಮ್ಬಹುಲಾ ಇತ್ಥಿಯೋ ಅಞ್ಞತರಂ ಭಿಕ್ಖುಂ ಸಮ್ಪೀಳೇತ್ವಾ ಬಾಹಾಪರಮ್ಪರಾಯ ಆನೇಸುಂ। ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ॰… ‘‘ಸಾದಿಯಿ ತ್ವಂ, ಭಿಕ್ಖೂ’’ತಿ? ‘‘ನಾಹಂ, ಭಗವಾ, ಸಾದಿಯಿ’’ನ್ತಿ। ‘‘ಅನಾಪತ್ತಿ, ಭಿಕ್ಖೂ, ಅಸಾದಿಯನ್ತಸ್ಸಾ’’ತಿ।
282. Tena kho pana samayena sambahulā itthiyo aññataraṃ bhikkhuṃ sampīḷetvā bāhāparamparāya ānesuṃ. Tassa kukkuccaṃ ahosi…pe… ‘‘sādiyi tvaṃ, bhikkhū’’ti? ‘‘Nāhaṃ, bhagavā, sādiyi’’nti. ‘‘Anāpatti, bhikkhū, asādiyantassā’’ti.
ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಇತ್ಥಿಯಾ ಅಭಿರೂಳ್ಹಂ ಸಙ್ಕಮಂ ಸಾರತ್ತೋ ಸಞ್ಚಾಲೇಸಿ। ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ॰… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ।
Tena kho pana samayena aññataro bhikkhu itthiyā abhirūḷhaṃ saṅkamaṃ sāratto sañcālesi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಇತ್ಥಿಂ ಪಟಿಪಥೇ ಪಸ್ಸಿತ್ವಾ ಸಾರತ್ತೋ ಅಂಸಕೂಟೇನ ಪಹಾರಂ ಅದಾಸಿ। ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ॰… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಸಙ್ಘಾದಿಸೇಸ’’ನ್ತಿ।
Tena kho pana samayena aññataro bhikkhu itthiṃ paṭipathe passitvā sāratto aṃsakūṭena pahāraṃ adāsi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಇತ್ಥಿಯಾ ಅಭಿರೂಳ್ಹಂ ರುಕ್ಖಂ ಸಾರತ್ತೋ ಸಞ್ಚಾಲೇಸಿ। ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ॰… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ।
Tena kho pana samayena aññataro bhikkhu itthiyā abhirūḷhaṃ rukkhaṃ sāratto sañcālesi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಇತ್ಥಿಯಾ ಅಭಿರೂಳ್ಹಂ ನಾವಂ ಸಾರತ್ತೋ ಸಞ್ಚಾಲೇಸಿ। ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ॰… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ।
Tena kho pana samayena aññataro bhikkhu itthiyā abhirūḷhaṃ nāvaṃ sāratto sañcālesi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಇತ್ಥಿಯಾ ಗಹಿತಂ ರಜ್ಜುಂ ಸಾರತ್ತೋ ಆವಿಞ್ಛಿ 9। ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ॰… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ।
Tena kho pana samayena aññataro bhikkhu itthiyā gahitaṃ rajjuṃ sāratto āviñchi 10. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಇತ್ಥಿಯಾ ಗಹಿತಂ ದಣ್ಡಂ ಸಾರತ್ತೋ ಆವಿಞ್ಛಿ। ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ॰… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ।
Tena kho pana samayena aññataro bhikkhu itthiyā gahitaṃ daṇḍaṃ sāratto āviñchi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಸಾರತ್ತೋ ಇತ್ಥಿಂ ಪತ್ತೇನ ಪಣಾಮೇಸಿ। ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ॰… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ।
Tena kho pana samayena aññataro bhikkhu sāratto itthiṃ pattena paṇāmesi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಇತ್ಥಿಯಾ ವನ್ದನ್ತಿಯಾ ಸಾರತ್ತೋ ಪಾದಂ ಉಚ್ಚಾರೇಸಿ। ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ॰… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಸಙ್ಘಾದಿಸೇಸ’’ನ್ತಿ।
Tena kho pana samayena aññataro bhikkhu itthiyā vandantiyā sāratto pādaṃ uccāresi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಇತ್ಥಿಂ ಗಹೇಸ್ಸಾಮೀತಿ ವಾಯಮಿತ್ವಾ ನ ಛುಪಿ।
Tena kho pana samayena aññataro bhikkhu itthiṃ gahessāmīti vāyamitvā na chupi.
ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ॰… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ।
Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
ಕಾಯಸಂಸಗ್ಗಸಿಕ್ಖಾಪದಂ ನಿಟ್ಠಿತಂ ದುತಿಯಂ।
Kāyasaṃsaggasikkhāpadaṃ niṭṭhitaṃ dutiyaṃ.
Footnotes:
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಿಭಙ್ಗ-ಅಟ್ಠಕಥಾ • Mahāvibhaṅga-aṭṭhakathā / ೨. ಕಾಯಸಂಸಗ್ಗಸಿಕ್ಖಾಪದವಣ್ಣನಾ • 2. Kāyasaṃsaggasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ೨. ಕಾಯಸಂಸಗ್ಗಸಿಕ್ಖಾಪದವಣ್ಣನಾ • 2. Kāyasaṃsaggasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā
೨. ಕಾಯಸಂಸಗ್ಗಸಿಕ್ಖಾಪದವಣ್ಣನಾ • 2. Kāyasaṃsaggasikkhāpadavaṇṇanā
ಪದಭಾಜನೀಯವಣ್ಣನಾ • Padabhājanīyavaṇṇanā
ವಿನೀತವತ್ಥುವಣ್ಣನಾ • Vinītavatthuvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ೨. ಕಾಯಸಂಸಗ್ಗಸಿಕ್ಖಾಪದವಣ್ಣನಾ • 2. Kāyasaṃsaggasikkhāpadavaṇṇanā
