| Library / Tipiṭaka / තිපිටක • Tipiṭaka / මහාවිභඞ්‌ග • Mahāvibhaṅga |
2. කායසංසග්‌ගසික්‌ඛාපදං
2. Kāyasaṃsaggasikkhāpadaṃ
269. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ආයස්‌මා උදායී අරඤ්‌ඤෙ විහරති. තස්‌සායස්‌මතො විහාරො අභිරූපො හොති දස්‌සනීයො පාසාදිකො, මජ්‌ඣෙගබ්‌භො, සමන්‌තාපරියාගාරො, සුපඤ්‌ඤත්‌තං මඤ්‌චපීඨං භිසිබිම්‌බොහනං, පානීයං පරිභොජනීයං සුපට්‌ඨිතං, පරිවෙණං සුසම්‌මට්‌ඨං. බහූ මනුස්‌සා ආයස්‌මතො උදායිස්‌ස විහාරපෙක්‌ඛකා ආගච්‌ඡන්‌ති. අඤ්‌ඤතරොපි බ්‍රාහ්‌මණො සපජාපතිකො යෙනායස්‌මා උදායී තෙනුපසඞ්‌කමි; උපසඞ්‌කමිත්‌වා ආයස්‌මන්‌තං උදායිං එතදවොච – ‘‘ඉච්‌ඡාම මයං භොතො උදායිස්‌ස විහාරං පෙක්‌ඛිතු’’න්‌ති. ‘‘තෙන හි, බ්‍රාහ්‌මණ, පෙක්‌ඛස්‌සූ’’ති, අවාපුරණං 1 ආදාය ඝටිකං උග්‌ඝාටෙත්‌වා කවාටං පණාමෙත්‌වා විහාරං පාවිසි. සොපි ඛො බ්‍රාහ්‌මණො ආයස්‌මතො උදායිස්‌ස පිට්‌ඨිතො පාවිසි. සාපි ඛො බ්‍රාහ්‌මණී තස්‌ස බ්‍රාහ්‌මණස්‌ස පිට්‌ඨිතො පාවිසි. අථ ඛො ආයස්‌මා උදායී එකච්‌චෙ වාතපානෙ විවරන්‌තො එකච්‌චෙ වාතපානෙ ථකෙන්‌තො ගබ්‌භං අනුපරිගන්‌ත්‌වා පිට්‌ඨිතො ආගන්‌ත්‌වා තස්‌සා බ්‍රාහ්‌මණියා අඞ්‌ගමඞ්‌ගානි පරාමසි. අථ ඛො සො බ්‍රාහ්‌මණො ආයස්‌මතා උදායිනා සද්‌ධිං පටිසම්‌මොදිත්‌වා අගමාසි. අථ ඛො සො බ්‍රාහ්‌මණො අත්‌තමනො අත්‌තමනවාචං නිච්‌ඡාරෙසි – ‘‘උළාරා ඉමෙ සමණා සක්‍යපුත්‌තියා යෙ ඉමෙ එවරූපෙ අරඤ්‌ඤෙ විහරන්‌ති. භවම්‌පි උදායී උළාරො යො එවරූපෙ අරඤ්‌ඤෙ විහරතී’’ති.
269. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā udāyī araññe viharati. Tassāyasmato vihāro abhirūpo hoti dassanīyo pāsādiko, majjhegabbho, samantāpariyāgāro, supaññattaṃ mañcapīṭhaṃ bhisibimbohanaṃ, pānīyaṃ paribhojanīyaṃ supaṭṭhitaṃ, pariveṇaṃ susammaṭṭhaṃ. Bahū manussā āyasmato udāyissa vihārapekkhakā āgacchanti. Aññataropi brāhmaṇo sapajāpatiko yenāyasmā udāyī tenupasaṅkami; upasaṅkamitvā āyasmantaṃ udāyiṃ etadavoca – ‘‘icchāma mayaṃ bhoto udāyissa vihāraṃ pekkhitu’’nti. ‘‘Tena hi, brāhmaṇa, pekkhassū’’ti, avāpuraṇaṃ 2 ādāya ghaṭikaṃ ugghāṭetvā kavāṭaṃ paṇāmetvā vihāraṃ pāvisi. Sopi kho brāhmaṇo āyasmato udāyissa piṭṭhito pāvisi. Sāpi kho brāhmaṇī tassa brāhmaṇassa piṭṭhito pāvisi. Atha kho āyasmā udāyī ekacce vātapāne vivaranto ekacce vātapāne thakento gabbhaṃ anuparigantvā piṭṭhito āgantvā tassā brāhmaṇiyā aṅgamaṅgāni parāmasi. Atha kho so brāhmaṇo āyasmatā udāyinā saddhiṃ paṭisammoditvā agamāsi. Atha kho so brāhmaṇo attamano attamanavācaṃ nicchāresi – ‘‘uḷārā ime samaṇā sakyaputtiyā ye ime evarūpe araññe viharanti. Bhavampi udāyī uḷāro yo evarūpe araññe viharatī’’ti.
එවං වුත්‌තෙ සා බ්‍රාහ්‌මණී තං බ්‍රාහ්‌මණං එතදවොච – ‘‘කුතො තස්‌ස උළාරත්‌තතා! යථෙව මෙ ත්‌වං අඞ්‌ගමඞ්‌ගානි පරාමසි එවමෙව මෙ සමණො උදායී අඞ්‌ගමඞ්‌ගානි පරාමසී’’ති. අථ ඛො සො බ්‍රාහ්‌මණො උජ්‌ඣායති ඛිය්‍යති විපාචෙති – ‘‘අලජ්‌ජිනො ඉමෙ සමණා සක්‍යපුත්‌තියා දුස්‌සීලා මුසාවාදිනො. ඉමෙ හි නාම ධම්‌මචාරිනො සමචාරිනො බ්‍රහ්‌මචාරිනො සච්‌චවාදිනො සීලවන්‌තො කල්‍යාණධම්‌මා පටිජානිස්‌සන්‌ති! නත්‌ථි ඉමෙසං සාමඤ්‌ඤං නත්‌ථි ඉමෙසං බ්‍රහ්‌මඤ්‌ඤං, නට්‌ඨං ඉමෙසං සාමඤ්‌ඤං නට්‌ඨං ඉමෙසං බ්‍රහ්‌මඤ්‌ඤං, කුතො ඉමෙසං සාමඤ්‌ඤං කුතො ඉමෙසං බ්‍රහ්‌මඤ්‌ඤං, අපගතා ඉමෙ සාමඤ්‌ඤා අපගතා ඉමෙ බ්‍රහ්‌මඤ්‌ඤා. කථඤ්‌හි නාම සමණො උදායී මම භරියාය අඞ්‌ගමඞ්‌ගානි පරාමසිස්‌සති! න හි සක්‌කා කුලිත්‌ථීහි කුලධීතාහි කුලකුමාරීහි කුලසුණ්‌හාහි කුලදාසීහි ආරාමං වා විහාරං වා ගන්‌තුං. සචෙ 3 කුලිත්‌ථියො කුලධීතරො 4 කුලකුමාරියො කුලසුණ්‌හායො කුලදාසියො ආරාමං වා විහාරං වා ගච්‌ඡෙය්‍යුං, තාපි සමණා සක්‍යපුත්‌තියා දූසෙය්‍යු’’න්‌ති!
Evaṃ vutte sā brāhmaṇī taṃ brāhmaṇaṃ etadavoca – ‘‘kuto tassa uḷārattatā! Yatheva me tvaṃ aṅgamaṅgāni parāmasi evameva me samaṇo udāyī aṅgamaṅgāni parāmasī’’ti. Atha kho so brāhmaṇo ujjhāyati khiyyati vipāceti – ‘‘alajjino ime samaṇā sakyaputtiyā dussīlā musāvādino. Ime hi nāma dhammacārino samacārino brahmacārino saccavādino sīlavanto kalyāṇadhammā paṭijānissanti! Natthi imesaṃ sāmaññaṃ natthi imesaṃ brahmaññaṃ, naṭṭhaṃ imesaṃ sāmaññaṃ naṭṭhaṃ imesaṃ brahmaññaṃ, kuto imesaṃ sāmaññaṃ kuto imesaṃ brahmaññaṃ, apagatā ime sāmaññā apagatā ime brahmaññā. Kathañhi nāma samaṇo udāyī mama bhariyāya aṅgamaṅgāni parāmasissati! Na hi sakkā kulitthīhi kuladhītāhi kulakumārīhi kulasuṇhāhi kuladāsīhi ārāmaṃ vā vihāraṃ vā gantuṃ. Sace 5 kulitthiyo kuladhītaro 6 kulakumāriyo kulasuṇhāyo kuladāsiyo ārāmaṃ vā vihāraṃ vā gaccheyyuṃ, tāpi samaṇā sakyaputtiyā dūseyyu’’nti!
අස්‌සොසුං ඛො භික්‌ඛු තස්‌ස බ්‍රාහ්‌මණස්‌ස උජ්‌ඣායන්‌තස්‌ස ඛිය්‍යන්‌තස්‌ස විපාචෙන්‌තස්‌ස. යෙ තෙ භික්‌ඛූ අප්‌පිච්‌ඡා…පෙ.… තෙ උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම ආයස්‌මා උදායී මාතුගාමෙන සද්‌ධිං කායසංසග්‌ගං සමාපජ්‌ජිස්‌සතී’’ති! අථ ඛො තෙ භික්‌ඛූ ආයස්‌මන්‌තං උදායිං අනෙකපරියායෙන විගරහිත්‌වා භගවතො එතමත්‌ථං ආරොචෙසුං. අථ ඛො භගවා එතස්‌මිං නිදානෙ එතස්‌මිං පකරණෙ භික්‌ඛුසඞ්‌ඝං සන්‌නිපාතාපෙත්‌වා ආයස්‌මන්‌තං උදායිං පටිපුච්‌ඡි – ‘‘සච්‌චං කිර ත්‌වං, උදායි, මාතුගාමෙන සද්‌ධිං කායසංසග්‌ගං සමාපජ්‌ජසී’’ති? ‘‘සච්‌චං, භගවා’’ති. විගරහි බුද්‌ධො භගවා – ‘‘අනනුච්‌ඡවිකං, මොඝපුරිස, අනනුලොමිකං අප්‌පතිරූපං අස්‌සාමණකං අකප්‌පියං අකරණීයං. කථඤ්‌හි නාම ත්‌වං, මොඝපුරිස, මාතුගාමෙන සද්‌ධිං කායසංසග්‌ගං සමාපජ්‌ජිස්‌සසි! නනු මයා, මොඝපුරිස, අනෙකපරියායෙන විරාගාය ධම්‌මො දෙසිතො නො සරාගාය…පෙ.… කාමපරිළාහානං වූපසමො අක්‌ඛාතො. නෙතං, මොඝපුරිස, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, ඉමං සික්‌ඛාපදං උද්‌දිසෙය්‍යාථ –
Assosuṃ kho bhikkhu tassa brāhmaṇassa ujjhāyantassa khiyyantassa vipācentassa. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā udāyī mātugāmena saddhiṃ kāyasaṃsaggaṃ samāpajjissatī’’ti! Atha kho te bhikkhū āyasmantaṃ udāyiṃ anekapariyāyena vigarahitvā bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā āyasmantaṃ udāyiṃ paṭipucchi – ‘‘saccaṃ kira tvaṃ, udāyi, mātugāmena saddhiṃ kāyasaṃsaggaṃ samāpajjasī’’ti? ‘‘Saccaṃ, bhagavā’’ti. Vigarahi buddho bhagavā – ‘‘ananucchavikaṃ, moghapurisa, ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma tvaṃ, moghapurisa, mātugāmena saddhiṃ kāyasaṃsaggaṃ samāpajjissasi! Nanu mayā, moghapurisa, anekapariyāyena virāgāya dhammo desito no sarāgāya…pe… kāmapariḷāhānaṃ vūpasamo akkhāto. Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
270. ‘‘යො පන භික්‌ඛු ඔතිණ්‌ණො විපරිණතෙන චිත්‌තෙන මාතුගාමෙන සද්‌ධිං කායසංසග්‌ගං සමාපජ්‌ජෙය්‍ය හත්‌ථග්‌ගාහං වා වෙණිග්‌ගාහං වා අඤ්‌ඤතරස්‌ස වා අඤ්‌ඤතරස්‌ස වා අඞ්‌ගස්‌ස පරාමසනං, සඞ්‌ඝාදිසෙසො’’ති.
270.‘‘Yo pana bhikkhu otiṇṇo vipariṇatena cittena mātugāmena saddhiṃ kāyasaṃsaggaṃ samāpajjeyya hatthaggāhaṃ vā veṇiggāhaṃ vā aññatarassa vā aññatarassa vā aṅgassa parāmasanaṃ, saṅghādiseso’’ti.
271. යො පනාති යො යාදිසො…පෙ.… භික්‌ඛූති…පෙ.… අයං ඉමස්‌මිං අත්‌ථෙ අධිප්‌පෙතො භික්‌ඛූති.
271.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ඔතිණ්‌ණො නාම සාරත්‌තො අපෙක්‌ඛවා පටිබද්‌ධචිත්‌තො.
Otiṇṇo nāma sāratto apekkhavā paṭibaddhacitto.
විපරිණතන්‌ති රත්‌තම්‌පි චිත්‌තං විපරිණතං. දුට්‌ඨම්‌පි චිත්‌තං විපරිණතං. මූළ්‌හම්‌පි චිත්‌තං විපරිණතං. අපිච, රත්‌තං චිත්‌තං ඉමස්‌මිං අත්‌ථෙ අධිප්‌පෙතං විපරිණතන්‌ති.
Vipariṇatanti rattampi cittaṃ vipariṇataṃ. Duṭṭhampi cittaṃ vipariṇataṃ. Mūḷhampi cittaṃ vipariṇataṃ. Apica, rattaṃ cittaṃ imasmiṃ atthe adhippetaṃ vipariṇatanti.
මාතුගාමො නාම මනුස්‌සිත්‌ථී, න යක්‌ඛී න පෙතී, න තිරච්‌ඡානගතා. අන්‌තමසො තදහුජාතාපි දාරිකා, පගෙව මහත්‌තරී.
Mātugāmo nāma manussitthī, na yakkhī na petī, na tiracchānagatā. Antamaso tadahujātāpi dārikā, pageva mahattarī.
සද්‌ධින්‌ති එකතො.
Saddhinti ekato.
කායසංසග්‌ගං සමාපජ්‌ජෙය්‍යාති අජ්‌ඣාචාරො වුච්‌චති.
Kāyasaṃsaggaṃsamāpajjeyyāti ajjhācāro vuccati.
හත්‌ථො නාම කප්‌පරං උපාදායං යාව අග්‌ගනඛා.
Hattho nāma kapparaṃ upādāyaṃ yāva agganakhā.
වෙණී නාම සුද්‌ධකෙසා වා, සුත්‌තමිස්‌සා වා, මාලාමිස්‌සා වා, හිරඤ්‌ඤමිස්‌සා වා, සුවණ්‌ණමිස්‌සා වා, මුත්‌තාමිස්‌සා වා, මණිමිස්‌සා වා.
Veṇī nāma suddhakesā vā, suttamissā vā, mālāmissā vā, hiraññamissā vā, suvaṇṇamissā vā, muttāmissā vā, maṇimissā vā.
අඞ්‌ගං නාම හත්‌ථඤ්‌ච වෙණිඤ්‌ච ඨපෙත්‌වා අවසෙසං අඞ්‌ගං නාම.
Aṅgaṃ nāma hatthañca veṇiñca ṭhapetvā avasesaṃ aṅgaṃ nāma.
272. ආමසනා , පරාමසනා, ඔමසනා, උම්‌මසනා, ඔලඞ්‌ඝනා, උල්‌ලඞ්‌ඝනා, ආකඩ්‌ඪනා, පතිකඩ්‌ඪනා, අභිනිග්‌ගණ්‌හනා, අභිනිප්‌පීළනා, ගහණං, ඡුපනං.
272. Āmasanā , parāmasanā, omasanā, ummasanā, olaṅghanā, ullaṅghanā, ākaḍḍhanā, patikaḍḍhanā, abhiniggaṇhanā, abhinippīḷanā, gahaṇaṃ, chupanaṃ.
ආමසනා නාම ආමට්‌ඨමත්‌තා.
Āmasanā nāma āmaṭṭhamattā.
පරාමසනා නාම ඉතොචිතො ච සංචොපනා.
Parāmasanā nāma itocito ca saṃcopanā.
ඔමසනා නාම හෙට්‌ඨා ඔරොපනා.
Omasanā nāma heṭṭhā oropanā.
උම්‌මසනා නාම උද්‌ධං උච්‌චාරණා.
Ummasanā nāma uddhaṃ uccāraṇā.
ඔලඞ්‌ඝනා නාම හෙට්‌ඨා ඔනමනා.
Olaṅghanā nāma heṭṭhā onamanā.
උල්‌ලඞ්‌ඝනා නාම උද්‌ධං උච්‌චාරණා.
Ullaṅghanā nāma uddhaṃ uccāraṇā.
පතිකඩ්‌ඪනා නාම පතිප්‌පණාමනා.
Patikaḍḍhanā nāma patippaṇāmanā.
අභිනිග්‌ගණ්‌හනා නාම අඞ්‌ගං ගහෙත්‌වා නිප්‌පීළනා.
Abhiniggaṇhanā nāma aṅgaṃ gahetvā nippīḷanā.
අභිනිප්‌පීළනා නාම කෙනචි සහ නිප්‌පීළනා.
Abhinippīḷanā nāma kenaci saha nippīḷanā.
ගහණං නාම ගහිතමත්‌තං.
Gahaṇaṃ nāma gahitamattaṃ.
ඡුපනං නාම ඵුට්‌ඨමත්‌තං.
Chupanaṃ nāma phuṭṭhamattaṃ.
සඞ්‌ඝාදිසෙසොති…පෙ.… තෙනපි වුච්‌චති සඞ්‌ඝාදිසෙසොති.
Saṅghādisesoti…pe… tenapi vuccati saṅghādisesoti.
273. ඉත්‌ථී ච හොති ඉත්‌ථිසඤ්‌ඤී සාරත්‌තො ච භික්‌ඛු ච. නං ඉත්‌ථියා කායෙන කායං ආමසති පරාමසති ඔමසති උම්‌මසති ඔලඞ්‌ඝෙති උල්‌ලඞ්‌ඝෙති ආකඩ්‌ඪති පතිකඩ්‌ඪති අභිනිග්‌ගණ්‌හාති අභිනිප්‌පීළෙති ගණ්‌හාති ඡුපති, ආපත්‌ති සඞ්‌ඝාදිසෙසස්‌ස.
273. Itthī ca hoti itthisaññī sāratto ca bhikkhu ca. Naṃ itthiyā kāyena kāyaṃ āmasati parāmasati omasati ummasati olaṅgheti ullaṅgheti ākaḍḍhati patikaḍḍhati abhiniggaṇhāti abhinippīḷeti gaṇhāti chupati, āpatti saṅghādisesassa.
ඉත්‌ථී ච හොති වෙමතිකො සාරත්‌තො ච. භික්‌ඛු ච නං ඉත්‌ථියා කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ථුල්‌ලච්‌චයස්‌ස.
Itthī ca hoti vematiko sāratto ca. Bhikkhu ca naṃ itthiyā kāyena kāyaṃ āmasati parāmasati…pe… gaṇhāti chupati, āpatti thullaccayassa.
ඉත්‌ථී ච හොති පණ්‌ඩකසඤ්‌ඤී සාරත්‌තො ච. භික්‌ඛු ච නං ඉත්‌ථියා කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ථුල්‌ලච්‌චයස්‌ස.
Itthī ca hoti paṇḍakasaññī sāratto ca. Bhikkhu ca naṃ itthiyā kāyena kāyaṃ āmasati parāmasati…pe… gaṇhāti chupati, āpatti thullaccayassa.
ඉත්‌ථී ච හොති පුරිසසඤ්‌ඤී සාරත්‌තො ච. භික්‌ඛු ච නං ඉත්‌ථියා කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ථුල්‌ලච්‌චයස්‌ස.
Itthī ca hoti purisasaññī sāratto ca. Bhikkhu ca naṃ itthiyā kāyena kāyaṃ āmasati parāmasati…pe… gaṇhāti chupati, āpatti thullaccayassa.
ඉත්‌ථී ච හොති තිරච්‌ඡානගතසඤ්‌ඤී සාරත්‌තො ච. භික්‌ඛු ච නං ඉත්‌ථියා කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ථුල්‌ලච්‌චයස්‌ස.
Itthī ca hoti tiracchānagatasaññī sāratto ca. Bhikkhu ca naṃ itthiyā kāyena kāyaṃ āmasati parāmasati…pe… gaṇhāti chupati, āpatti thullaccayassa.
පණ්‌ඩකො ච හොති පණ්‌ඩකසඤ්‌ඤී සාරත්‌තො ච. භික්‌ඛු ච නං පණ්‌ඩකස්‌ස කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ථුල්‌ලච්‌චයස්‌ස.
Paṇḍako ca hoti paṇḍakasaññī sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati, āpatti thullaccayassa.
පණ්‌ඩකො ච හොති වෙමතිකො සාරත්‌තො ච. භික්‌ඛු ච නං පණ්‌ඩකස්‌ස කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති දුක්‌කටස්‌ස.
Paṇḍako ca hoti vematiko sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
පණ්‌ඩකො ච හොති පුරිසසඤ්‌ඤී සාරත්‌තො ච. භික්‌ඛු ච නං පණ්‌ඩකස්‌ස කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති දුක්‌කටස්‌ස.
Paṇḍako ca hoti purisasaññī sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
පණ්‌ඩකො ච හොති තිරච්‌ඡානගතසඤ්‌ඤී සාරත්‌තො ච. භික්‌ඛු ච නං පණ්‌ඩකස්‌ස කායෙන කායං ආමසති පරාමසති…පෙ.… ගණ්‌හාති ඡුපති , ආපත්‌ති දුක්‌කටස්‌ස.
Paṇḍako ca hoti tiracchānagatasaññī sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati , āpatti dukkaṭassa.
පණ්‌ඩකො ච හොති ඉත්‌ථිසඤ්‌ඤී සාරත්‌තො ච. භික්‌ඛු ච නං පණ්‌ඩකස්‌ස කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති දුක්‌කටස්‌ස.
Paṇḍako ca hoti itthisaññī sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
පුරිසො ච හොති පුරිසසඤ්‌ඤී සාරත්‌තො ච. භික්‌ඛු ච නං පුරිසස්‌ස කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති දුක්‌කටස්‌ස.
Puriso ca hoti purisasaññī sāratto ca. Bhikkhu ca naṃ purisassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
පුරිසො ච හොති වෙමතිකො…පෙ.… පුරිසො ච හොති තිරච්‌ඡානගතසඤ්‌ඤී… පුරිසො ච හොති ඉත්‌ථිසඤ්‌ඤී… පුරිසො ච හොති පණ්‌ඩකසඤ්‌ඤී සාරත්‌තො ච. භික්‌ඛු ච නං පුරිසස්‌ස කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති දුක්‌කටස්‌ස.
Puriso ca hoti vematiko…pe… puriso ca hoti tiracchānagatasaññī… puriso ca hoti itthisaññī… puriso ca hoti paṇḍakasaññī sāratto ca. Bhikkhu ca naṃ purisassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
තිරච්‌ඡානගතො ච හොති තිරච්‌ඡානගතසඤ්‌ඤී සාරත්‌තො ච. භික්‌ඛු ච නං තිරච්‌ඡානගතස්‌ස කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති දුක්‌කටස්‌ස.
Tiracchānagato ca hoti tiracchānagatasaññī sāratto ca. Bhikkhu ca naṃ tiracchānagatassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
තිරච්‌ඡානගතො ච හොති වෙමතිකො…පෙ.… තිරච්‌ඡානගතො ච හොති ඉත්‌ථිසඤ්‌ඤී… තිරච්‌ඡානගතො ච හොති පණ්‌ඩකසඤ්‌ඤී… තිරච්‌ඡානගතො ච හොති. පුරිසසඤ්‌ඤී සාරත්‌තො ච. භික්‌ඛු ච නං තිරච්‌ඡානගතස්‌ස කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති දුක්‌කටස්‌ස.
Tiracchānagato ca hoti vematiko…pe… tiracchānagato ca hoti itthisaññī… tiracchānagato ca hoti paṇḍakasaññī… tiracchānagato ca hoti. Purisasaññī sāratto ca. Bhikkhu ca naṃ tiracchānagatassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
එකමූලකං නිට්‌ඨිතං.
Ekamūlakaṃ niṭṭhitaṃ.
274. ද්‌වෙ ඉත්‌ථියො ද්‌වින්‌නං ඉත්‌ථීනං ඉත්‌ථිසඤ්‌ඤී සාරත්‌තො ච. භික්‌ඛු ච නං ද්‌වින්‌නං ඉත්‌ථීනං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ද්‌වින්‌නං සඞ්‌ඝාදිසෙසානං.
274. Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ saṅghādisesānaṃ.
ද්‌වෙ ඉත්‌ථියො ද්‌වින්‌නං ඉත්‌ථීනං වෙමතිකො සාරත්‌තො ච. භික්‌ඛු ච නං ද්‌වින්‌නං ඉත්‌ථීනං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ද්‌වින්‌නං ථුල්‌ලච්‌චයානං.
Dve itthiyo dvinnaṃ itthīnaṃ vematiko sāratto ca. Bhikkhu ca naṃ dvinnaṃ itthīnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ.
ද්‌වෙ ඉත්‌ථියො ද්‌වින්‌නං ඉත්‌ථීනං පණ්‌ඩකසඤ්‌ඤී…පෙ.… පුරිසසඤ්‌ඤී… තිරච්‌ඡානගතසඤ්‌ඤී සාරත්‌තො ච. භික්‌ඛු ච ද්‌වින්‌නං ඉත්‌ථීනං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ද්‌වින්‌නං ථුල්‌ලච්‌චයානං.
Dve itthiyo dvinnaṃ itthīnaṃ paṇḍakasaññī…pe… purisasaññī… tiracchānagatasaññī sāratto ca. Bhikkhu ca dvinnaṃ itthīnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ.
ද්‌වෙ පණ්‌ඩකා ද්‌වින්‌නං පණ්‌ඩකානං පණ්‌ඩකසඤ්‌ඤී සාරත්‌තො ච භික්‌ඛු ච නං ද්‌වින්‌නං පණ්‌ඩකානං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ද්‌වින්‌නං ථුල්‌ලච්‌චයානං.
Dve paṇḍakā dvinnaṃ paṇḍakānaṃ paṇḍakasaññī sāratto ca bhikkhu ca naṃ dvinnaṃ paṇḍakānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ.
ද්‌වෙ පණ්‌ඩකා ද්‌වින්‌නං පණ්‌ඩකානං වෙමතිකො…පෙ.… පුරිසසඤ්‌ඤී… තිරච්‌ඡානගතසඤ්‌ඤී… ඉත්‌ථිසඤ්‌ඤී සාරත්‌තො ච. භික්‌ඛු ච නං ද්‌වින්‌නං පණ්‌ඩකානං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ද්‌වින්‌නං දුක්‌කටානං.
Dve paṇḍakā dvinnaṃ paṇḍakānaṃ vematiko…pe… purisasaññī… tiracchānagatasaññī… itthisaññī sāratto ca. Bhikkhu ca naṃ dvinnaṃ paṇḍakānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
ද්‌වෙ පුරිසා ද්‌වින්‌නං පුරිසානං පුරිසසඤ්‌ඤී සාරත්‌තො ච භික්‌ඛු ච නං ද්‌වින්‌නං පුරිසානං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ද්‌වින්‌නං දුක්‌කටානං.
Dve purisā dvinnaṃ purisānaṃ purisasaññī sāratto ca bhikkhu ca naṃ dvinnaṃ purisānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
ද්‌වෙ පුරිසා ද්‌වින්‌නං පුරිසානං වෙමතිකො…පෙ.… තිරච්‌ඡානගතසඤ්‌ඤී… ඉත්‌ථිසඤ්‌ඤී… පණ්‌ඩකසඤ්‌ඤී සාරත්‌තො ච. භික්‌ඛු ච නං ද්‌වින්‌නං පුරිසානං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ද්‌වින්‌නං දුක්‌කටානං.
Dve purisā dvinnaṃ purisānaṃ vematiko…pe… tiracchānagatasaññī… itthisaññī… paṇḍakasaññī sāratto ca. Bhikkhu ca naṃ dvinnaṃ purisānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
ද්‌වෙ තිරච්‌ඡානගතා ද්‌වින්‌නං තිරච්‌ඡානගතානං තිරච්‌ඡානගතසඤ්‌ඤී සාරත්‌තො ච. භික්‌ඛු ච නං ද්‌වින්‌නං තිරච්‌ඡානගතානං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ද්‌වින්‌නං දුක්‌කටානං.
Dve tiracchānagatā dvinnaṃ tiracchānagatānaṃ tiracchānagatasaññī sāratto ca. Bhikkhu ca naṃ dvinnaṃ tiracchānagatānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
ද්‌වෙ තිරච්‌ඡානගතා ද්‌වින්‌නං තිරච්‌ඡානගතානං වෙමතිකො…පෙ.… ඉත්‌ථිසඤ්‌ඤී… පණ්‌ඩකසඤ්‌ඤී … පුරිසසඤ්‌ඤී සාරත්‌තො ච. භික්‌ඛු ච නං ද්‌වින්‌නං තිරච්‌ඡානගතානං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ද්‌වින්‌නං දුක්‌කටානං.
Dve tiracchānagatā dvinnaṃ tiracchānagatānaṃ vematiko…pe… itthisaññī… paṇḍakasaññī … purisasaññī sāratto ca. Bhikkhu ca naṃ dvinnaṃ tiracchānagatānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
275. ඉත්‌ථී ච පණ්‌ඩකො ච උභින්‌නං ඉත්‌ථිසඤ්‌ඤී සාරත්‌තො ච. භික්‌ඛු ච නං උභින්‌නං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති සඞ්‌ඝාදිසෙසෙන දුක්‌කටස්‌ස.
275. Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti saṅghādisesena dukkaṭassa.
ඉත්‌ථී ච පණ්‌ඩකො ච උභින්‌නං වෙමතිකො සාරත්‌තො ච. භික්‌ඛු ච නං උභින්‌නං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ථුල්‌ලච්‌චයෙන දුක්‌කටස්‌ස.
Itthī ca paṇḍako ca ubhinnaṃ vematiko sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ඉත්‌ථී ච පණ්‌ඩකො ච උභින්‌නං පණ්‌ඩකසඤ්‌ඤී සාරත්‌තො ච. භික්‌ඛු ච නං උභින්‌නං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ද්‌වින්‌නං ථුල්‌ලච්‌චයානං.
Itthī ca paṇḍako ca ubhinnaṃ paṇḍakasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ.
ඉත්‌ථී ච පණ්‌ඩකො ච උභින්‌නං පුරිසසඤ්‌ඤී සාරත්‌තො ච. භික්‌ඛු ච නං උභින්‌නං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ථුල්‌ලච්‌චයෙන දුක්‌කටස්‌ස.
Itthī ca paṇḍako ca ubhinnaṃ purisasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ඉත්‌ථී ච පණ්‌ඩකො ච උභින්‌නං තිරච්‌ඡානගතසඤ්‌ඤී සාරත්‌තො ච. භික්‌ඛු ච නං උභින්‌නං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ථුල්‌ලච්‌චයෙන දුක්‌කටස්‌ස.
Itthī ca paṇḍako ca ubhinnaṃ tiracchānagatasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ඉත්‌ථී ච පුරිසො ච උභින්‌නං ඉත්‌ථිසඤ්‌ඤී සාරත්‌තො ච. භික්‌ඛු ච නං උභින්‌නං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති සඞ්‌ඝාදිසෙසෙන දුක්‌කටස්‌ස.
Itthī ca puriso ca ubhinnaṃ itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti saṅghādisesena dukkaṭassa.
ඉත්‌ථී ච පුරිසො ච උභින්‌නං වෙමතිකො…පෙ.… පණ්‌ඩකසඤ්‌ඤී… පුරිසසඤ්‌ඤී… තිරච්‌ඡානගතසඤ්‌ඤී සාරත්‌තො ච. භික්‌ඛු ච නං උභින්‌නං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ථුල්‌ලච්‌චයෙන දුක්‌කටස්‌ස.
Itthī ca puriso ca ubhinnaṃ vematiko…pe… paṇḍakasaññī… purisasaññī… tiracchānagatasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ඉත්‌ථී ච තිරච්‌ඡානගතො ච උභින්‌නං ඉත්‌ථිසඤ්‌ඤී සාරත්‌තො ච. භික්‌ඛු ච නං උභින්‌නං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති සඞ්‌ඝාදිසෙසෙන දුක්‌කටස්‌ස.
Itthī ca tiracchānagato ca ubhinnaṃ itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti saṅghādisesena dukkaṭassa.
ඉත්‌ථී ච තිරච්‌ඡානගතො ච උභින්‌නං වෙමතිකො…පෙ.… පණ්‌ඩකසඤ්‌ඤී… පුරිසසඤ්‌ඤී … තිරච්‌ඡානගතසඤ්‌ඤී සාරත්‌තො ච. භික්‌ඛු ච නං උභින්‌නං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ථුල්‌ලච්‌චයෙන දුක්‌කටස්‌ස.
Itthī ca tiracchānagato ca ubhinnaṃ vematiko…pe… paṇḍakasaññī… purisasaññī … tiracchānagatasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
පණ්‌ඩකො ච පුරිසො ච උභින්‌නං පණ්‌ඩකසඤ්‌ඤී සාරත්‌තො ච. භික්‌ඛු ච නං උභින්‌නං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ථුල්‌ලච්‌චයෙන දුක්‌කටස්‌ස.
Paṇḍako ca puriso ca ubhinnaṃ paṇḍakasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
පණ්‌ඩකො ච පුරිසො ච උභින්‌නං වෙමතිකො…පෙ.… පුරිසසඤ්‌ඤී… තිරච්‌ඡානගතසඤ්‌ඤී… ඉත්‌ථිසඤ්‌ඤී සාරත්‌තො ච. භික්‌ඛු ච නං උභින්‌නං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ද්‌වින්‌නං දුක්‌කටානං.
Paṇḍako ca puriso ca ubhinnaṃ vematiko…pe… purisasaññī… tiracchānagatasaññī… itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
පණ්‌ඩකො ච තිරච්‌ඡානගතො ච උභින්‌නං පණ්‌ඩකසඤ්‌ඤී සාරත්‌තො ච. භික්‌ඛු ච නං උභින්‌නං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ථුල්‌ලච්‌චයෙන දුක්‌කටස්‌ස.
Paṇḍako ca tiracchānagato ca ubhinnaṃ paṇḍakasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
පණ්‌ඩකො ච තිරච්‌ඡානගතො ච උභින්‌නං වෙමතිකො…පෙ.… පුරිසසඤ්‌ඤී… තිරච්‌ඡානගතසඤ්‌ඤී… ඉත්‌ථිසඤ්‌ඤී සාරත්‌තො ච. භික්‌ඛු ච නං උභින්‌නං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ද්‌වින්‌නං දුක්‌කටානං.
Paṇḍako ca tiracchānagato ca ubhinnaṃ vematiko…pe… purisasaññī… tiracchānagatasaññī… itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
පුරිසො ච තිරච්‌ඡානගතො ච උභින්‌නං පුරිසසඤ්‌ඤී සාරත්‌තො ච. භික්‌ඛු ච නං උභින්‌නං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ද්‌වින්‌නං දුක්‌කටානං.
Puriso ca tiracchānagato ca ubhinnaṃ purisasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
පුරිසො ච තිරච්‌ඡානගතො ච උභින්‌නං වෙමතිකො…පෙ.… තිරච්‌ඡානගතසඤ්‌ඤී… ඉත්‌ථිසඤ්‌ඤී… පණ්‌ඩකසඤ්‌ඤී සාරත්‌තො ච. භික්‌ඛු ච නං උභින්‌නං කායෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ද්‌වින්‌නං දුක්‌කටානං.
Puriso ca tiracchānagato ca ubhinnaṃ vematiko…pe… tiracchānagatasaññī… itthisaññī… paṇḍakasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
දුමූලකං නිට්‌ඨිතං.
Dumūlakaṃ niṭṭhitaṃ.
276. ඉත්‌ථී ච හොති ඉත්‌ථිසඤ්‌ඤී සාරත්‌තො ච. භික්‌ඛු ච නං ඉත්‌ථියා කායෙන කායපටිබද්‌ධං ආමසති පරාමසති…පෙ.… ගණ්‌හාති ඡුපති, ආපත්‌ති ථුල්‌ලච්‌චයස්‌ස…පෙ.….
276. Itthī ca hoti itthisaññī sāratto ca. Bhikkhu ca naṃ itthiyā kāyena kāyapaṭibaddhaṃ āmasati parāmasati…pe… gaṇhāti chupati, āpatti thullaccayassa…pe….
ද්‌වෙ ඉත්‌ථියො ද්‌වින්‌නං ඉත්‌ථීනං ඉත්‌ථිසඤ්‌ඤී සාරත්‌තො ච. භික්‌ඛු ච නං ද්‌වින්‌නං ඉත්‌ථීනං කායෙන කායපටිබද්‌ධං ආමසති පරාමසති…පෙ.… ගණ්‌හාති ඡුපති, ආපත්‌ති ද්‌වින්‌නං ථුල්‌ලච්‌චයානං …පෙ.….
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ kāyena kāyapaṭibaddhaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ …pe….
ඉත්‌ථී ච පණ්‌ඩකො ච උභින්‌නං ඉත්‌ථිසඤ්‌ඤී සාරත්‌තො ච. භික්‌ඛු ච නං උභින්‌නං කායෙන කායපටිබද්‌ධං ආමසති පරාමසති…පෙ.… ගණ්‌හාති ඡුපති, ආපත්‌ති ථුල්‌ලච්‌චයෙන දුක්‌කටස්‌ස…පෙ.….
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ kāyena kāyapaṭibaddhaṃ āmasati parāmasati…pe… gaṇhāti chupati, āpatti thullaccayena dukkaṭassa…pe….
ඉත්‌ථී ච හොති ඉත්‌ථිසඤ්‌ඤී සාරත්‌තො ච. භික්‌ඛු ච නං ඉත්‌ථියා කායපටිබද්‌ධෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ථුල්‌ලච්‌චයස්‌ස…පෙ.….
Itthī ca hoti itthisaññī sāratto ca. Bhikkhu ca naṃ itthiyā kāyapaṭibaddhena kāyaṃ āmasati parāmasati…pe… gaṇhāti chupati, āpatti thullaccayassa…pe….
ද්‌වෙ ඉත්‌ථියො ද්‌වින්‌නං ඉත්‌ථීනං ඉත්‌ථිසඤ්‌ඤී සාරත්‌තො ච. භික්‌ඛු ච නං ද්‌වින්‌නං ඉත්‌ථීනං කායපටිබද්‌ධෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ද්‌වින්‌නං ථුල්‌ලච්‌චයානං…පෙ.….
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ kāyapaṭibaddhena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ…pe….
ඉත්‌ථී ච පණ්‌ඩකො ච උභින්‌නං ඉත්‌ථිසඤ්‌ඤී සාරත්‌තො ච. භික්‌ඛු ච නං උභින්‌නං කායපටිබද්‌ධෙන කායං ආමසති පරාමසති…පෙ.… ගණ්‌හාති ඡුපති, ආපත්‌ති ථුල්‌ලච්‌චයෙන දුක්‌කටස්‌ස…පෙ.….
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ kāyapaṭibaddhena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa…pe….
ඉත්‌ථී ච හොති ඉත්‌ථිසඤ්‌ඤී සාරත්‌තො ච. භික්‌ඛු ච නං ඉත්‌ථියා කායපටිබද්‌ධෙන කායපටිබද්‌ධං ආමසති පරාමසති…පෙ.… ගණ්‌හාති ඡුපති, ආපත්‌ති දුක්‌කටස්‌ස…පෙ.….
Itthī ca hoti itthisaññī sāratto ca. Bhikkhu ca naṃ itthiyā kāyapaṭibaddhena kāyapaṭibaddhaṃ āmasati parāmasati…pe… gaṇhāti chupati, āpatti dukkaṭassa…pe….
ද්‌වෙ ඉත්‌ථියො ද්‌වින්‌නං ඉත්‌ථීනං ඉත්‌ථිසඤ්‌ඤී සාරත්‌තො ච. භික්‌ඛු ච නං ද්‌වින්‌නං ඉත්‌ථීනං කායපටිබද්‌ධෙන කායපටිබද්‌ධං ආමසති පරාමසති…පෙ.… ගණ්‌හාති ඡුපති, ආපත්‌ති ද්‌වින්‌නං දුක්‌කටානං…පෙ.….
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ kāyapaṭibaddhena kāyapaṭibaddhaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ…pe….
ඉත්‌ථී ච පණ්‌ඩකො ච උභින්‌නං ඉත්‌ථිසඤ්‌ඤී සාරත්‌තො ච. භික්‌ඛු ච නං උභින්‌නං කායපටිබද්‌ධෙන කායපටිබද්‌ධං ආමසති පරාමසති…පෙ.… ගණ්‌හාති ඡුපති, ආපත්‌ති ද්‌වින්‌නං දුක්‌කටානං…පෙ.….
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ kāyapaṭibaddhena kāyapaṭibaddhaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ…pe….
ඉත්‌ථී ච හොති ඉත්‌ථිසඤ්‌ඤී සාරත්‌තො ච. භික්‌ඛු ච නං ඉත්‌ථියා නිස්‌සග්‌ගියෙන කායං ආමසති ආපත්‌ති දුක්‌කටස්‌ස…පෙ.….
Itthī ca hoti itthisaññī sāratto ca. Bhikkhu ca naṃ itthiyā nissaggiyena kāyaṃ āmasati āpatti dukkaṭassa…pe….
ද්‌වෙ ඉත්‌ථියො ද්‌වින්‌නං ඉත්‌ථීනං ඉත්‌ථිසඤ්‌ඤී සාරත්‌තො ච. භික්‌ඛු ච නං ද්‌වින්‌නං ඉත්‌ථීනං නිස්‌සග්‌ගියෙන කායං ආමසති, ආපත්‌ති ද්‌වින්‌නං දුක්‌කටානං…පෙ.….
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ nissaggiyena kāyaṃ āmasati, āpatti dvinnaṃ dukkaṭānaṃ…pe….
ඉත්‌ථී ච පණ්‌ඩකො ච උභින්‌නං ඉත්‌ථිසඤ්‌ඤී සාරත්‌තො ච. භික්‌ඛු ච නං උභින්‌නං නිස්‌සග්‌ගියෙන කායං ආමසති, ආපත්‌ති ද්‌වින්‌නං දුක්‌කටානං…පෙ.….
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ nissaggiyena kāyaṃ āmasati, āpatti dvinnaṃ dukkaṭānaṃ…pe….
ඉත්‌ථී ච හොති ඉත්‌ථිසඤ්‌ඤී සාරත්‌තො ච. භික්‌ඛු ච නං ඉත්‌ථියා නිස්‌සග්‌ගියෙන කායපටිබද්‌ධං ආමසති, ආපත්‌ති දුක්‌කටස්‌ස…පෙ.….
Itthī ca hoti itthisaññī sāratto ca. Bhikkhu ca naṃ itthiyā nissaggiyena kāyapaṭibaddhaṃ āmasati, āpatti dukkaṭassa…pe….
ද්‌වෙ ඉත්‌ථියො ද්‌වින්‌නං ඉත්‌ථීනං ඉත්‌ථිසඤ්‌ඤී සාරත්‌තො ච. භික්‌ඛු ච නං ද්‌වින්‌නං ඉත්‌ථීනං නිස්‌සග්‌ගියෙන කායපටිබද්‌ධං ආමසති, ආපත්‌ති ද්‌වින්‌නං දුක්‌කටානං…පෙ.….
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ nissaggiyena kāyapaṭibaddhaṃ āmasati, āpatti dvinnaṃ dukkaṭānaṃ…pe….
ඉත්‌ථී ච පණ්‌ඩකො ච උභින්‌නං ඉත්‌ථිසඤ්‌ඤී සාරත්‌තො ච. භික්‌ඛු ච නං උභින්‌නං නිස්‌සග්‌ගියෙන කායපටිබද්‌ධං ආමසති, ආපත්‌ති ද්‌වින්‌නං දුක්‌කටානං…පෙ.….
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ nissaggiyena kāyapaṭibaddhaṃ āmasati, āpatti dvinnaṃ dukkaṭānaṃ…pe….
ඉත්‌ථී ච හොති ඉත්‌ථිසඤ්‌ඤී සාරත්‌තො ච. භික්‌ඛු ච නං ඉත්‌ථියා නිස්‌සග්‌ගියෙන නිස්‌සග්‌ගියං ආමසති, ආපත්‌ති දුක්‌කටස්‌ස…පෙ.….
Itthī ca hoti itthisaññī sāratto ca. Bhikkhu ca naṃ itthiyā nissaggiyena nissaggiyaṃ āmasati, āpatti dukkaṭassa…pe….
ද්‌වෙ ඉත්‌ථියො ද්‌වින්‌නං ඉත්‌ථීනං ඉත්‌ථිසඤ්‌ඤී සාරත්‌තො ච. භික්‌ඛු ච නං ද්‌වින්‌නං ඉත්‌ථීනං නිස්‌සග්‌ගියෙන නිස්‌සග්‌ගියං ආමසති, ආපත්‌ති ද්‌වින්‌නං දුක්‌කටානං…පෙ.….
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ nissaggiyena nissaggiyaṃ āmasati, āpatti dvinnaṃ dukkaṭānaṃ…pe….
ඉත්‌ථී ච පණ්‌ඩකො ච උභින්‌නං ඉත්‌ථිසඤ්‌ඤී සාරත්‌තො ච. භික්‌ඛු ච නං උභින්‌නං නිස්‌සග්‌ගියෙන නිස්‌සග්‌ගියං ආමසති, ආපත්‌ති ද්‌වින්‌නං දුක්‌කටානං…පෙ.….
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ nissaggiyena nissaggiyaṃ āmasati, āpatti dvinnaṃ dukkaṭānaṃ…pe….
භික්‌ඛුපෙය්‍යාලො නිට්‌ඨිතො.
Bhikkhupeyyālo niṭṭhito.
277. ඉත්‌ථී ච හොති ඉත්‌ථිසඤ්‌ඤී සාරත්‌තො ච. ඉත්‌ථී ච නං භික්‌ඛුස්‌ස කායෙන කායං ආමසති පරාමසති ඔමසති උම්‌මසති ඔලඞ්‌ඝෙති උල්‌ලඞ්‌ඝෙති ආකඩ්‌ඪති පතිකඩ්‌ඪති අභිනිග්‌ගණ්‌හාති අභිනිප්‌පීළෙති ගණ්‌හාති ඡුපති, සෙවනාධිප්‌පායො කායෙන වායමති ඵස්‌සං පටිවිජානාති, ආපත්‌ති සඞ්‌ඝාදිසෙසස්‌ස…පෙ.….
277. Itthī ca hoti itthisaññī sāratto ca. Itthī ca naṃ bhikkhussa kāyena kāyaṃ āmasati parāmasati omasati ummasati olaṅgheti ullaṅgheti ākaḍḍhati patikaḍḍhati abhiniggaṇhāti abhinippīḷeti gaṇhāti chupati, sevanādhippāyo kāyena vāyamati phassaṃ paṭivijānāti, āpatti saṅghādisesassa…pe….
ද්‌වෙ ඉත්‌ථියො ද්‌වින්‌නං ඉත්‌ථීනං ඉත්‌ථිසඤ්‌ඤී සාරත්‌තො ච. ඉත්‌ථියො ච නං භික්‌ඛුස්‌ස කායෙන කායං ආමසන්‌ති පරාමසන්‌ති ඔමසන්‌ති උම්‌මසන්‌ති ඔලඞ්‌ඝෙන්‌ති උල්‌ලඞ්‌ඝෙන්‌ති ආකඩ්‌ඪන්‌ති පතිකඩ්‌ඪන්‌ති අභිනිග්‌ගණ්‌හන්‌ති අභිනිප්‌පීළෙන්‌ති ගණ්‌හන්‌ති ඡුපන්‌ති, සෙවනාධිප්‌පායො කායෙන වායමති ඵස්‌සං පටිවිජානාති, ආපත්‌ති ද්‌වින්‌නං සඞ්‌ඝාදිසෙසානං…පෙ.….
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa kāyena kāyaṃ āmasanti parāmasanti omasanti ummasanti olaṅghenti ullaṅghenti ākaḍḍhanti patikaḍḍhanti abhiniggaṇhanti abhinippīḷenti gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ saṅghādisesānaṃ…pe….
ඉත්‌ථී ච පණ්‌ඩකො ච උභින්‌නං ඉත්‌ථිසඤ්‌ඤී සාරත්‌තො ච. උභො ච නං භික්‌ඛුස්‌ස කායෙන කායං ආමසන්‌ති පරාමසන්‌ති…පෙ.… ගණ්‌හන්‌ති ඡුපන්‌ති, සෙවනාධිප්‌පායො කායෙන වායමති ඵස්‌සං පටිවිජානාති, ආපත්‌ති සඞ්‌ඝාදිසෙසෙන දුක්‌කටස්‌ස…පෙ.….
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa kāyena kāyaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti saṅghādisesena dukkaṭassa…pe….
ඉත්‌ථී ච හොති ඉත්‌ථිසඤ්‌ඤී සාරත්‌තො ච. ඉත්‌ථී ච නං භික්‌ඛුස්‌ස කායෙන කායපටිබද්‌ධං ආමසති පරාමසති…පෙ.… ගණ්‌හාති ඡුපති, සෙවනාධිප්‌පායො කායෙන වායමති ඵස්‌සං පටිවිජානාති, ආපත්‌ති ථුල්‌ලච්‌චයස්‌ස…පෙ.….
Itthī ca hoti itthisaññī sāratto ca. Itthī ca naṃ bhikkhussa kāyena kāyapaṭibaddhaṃ āmasati parāmasati…pe… gaṇhāti chupati, sevanādhippāyo kāyena vāyamati phassaṃ paṭivijānāti, āpatti thullaccayassa…pe….
ද්‌වෙ ඉත්‌ථියො ද්‌වින්‌නං ඉත්‌ථීනං ඉත්‌ථිසඤ්‌ඤී සාරත්‌තො ච. ඉත්‌ථියො ච නං භික්‌ඛුස්‌ස කායෙන කායපටිබද්‌ධං ආමසන්‌ති පරාමසන්‌ති…පෙ.… ගණ්‌හන්‌ති ඡුපන්‌ති, සෙවනාධිප්‌පායො කායෙන වායමති ඵස්‌සං පටිවිජානාති, ආපත්‌ති ද්‌වින්‌නං ථුල්‌ලච්‌චයානං…පෙ.….
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa kāyena kāyapaṭibaddhaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ thullaccayānaṃ…pe….
ඉත්‌ථී ච පණ්‌ඩකො ච උභින්‌නං ඉත්‌ථිසඤ්‌ඤී සාරත්‌තො ච. උභො ච නං භික්‌ඛුස්‌ස කායෙන කායපටිබද්‌ධං ආමසන්‌ති පරාමසන්‌ති…පෙ.… ගණ්‌හන්‌ති ඡුපන්‌ති, සෙවනාධිප්‌පායො කායෙන වායමති ඵස්‌සං පටිවිජානාති, ආපත්‌ති ථුල්‌ලච්‌චයෙන දුක්‌කටස්‌ස…පෙ.….
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa kāyena kāyapaṭibaddhaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti thullaccayena dukkaṭassa…pe….
ඉත්‌ථී ච හොති ඉත්‌ථිසඤ්‌ඤී සාරත්‌තො ච. ඉත්‌ථී ච නං භික්‌ඛුස්‌ස කායපටිබද්‌ධෙන කායං ආමසති පරාමසති…පෙ.… ගණ්‌හාති ඡුපති සෙවනාධිප්‌පායො කායෙන වායමති ඵස්‌සං පටිවිජානාති, ආපත්‌ති ථුල්‌ලච්‌චයස්‌ස…පෙ.….
Itthī ca hoti itthisaññī sāratto ca. Itthī ca naṃ bhikkhussa kāyapaṭibaddhena kāyaṃ āmasati parāmasati…pe… gaṇhāti chupati sevanādhippāyo kāyena vāyamati phassaṃ paṭivijānāti, āpatti thullaccayassa…pe….
ද්‌වෙ ඉත්‌ථියො ද්‌වින්‌නං ඉත්‌ථීනං ඉත්‌ථිසඤ්‌ඤී සාරත්‌තො ච. ඉත්‌ථියො ච නං භික්‌ඛුස්‌ස කායපටිබද්‌ධෙන කායං ආමසන්‌ති පරාමසන්‌ති…පෙ.… ගණ්‌හන්‌ති ඡුපන්‌ති, සෙවනාධිප්‌පායො කායෙන වායමති ඵස්‌සං පටිවිජානාති, ආපත්‌ති ද්‌වින්‌නං ථුල්‌ලච්‌චයානං…පෙ.….
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa kāyapaṭibaddhena kāyaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ thullaccayānaṃ…pe….
ඉත්‌ථී ච පණ්‌ඩකො ච උභින්‌නං ඉත්‌ථිසඤ්‌ඤී සාරත්‌තො ච. උභො ච නං භික්‌ඛුස්‌ස කායපටිබද්‌ධෙන කායං ආමසන්‌ති පරාමසන්‌ති…පෙ.… ගණ්‌හන්‌ති ඡුපන්‌ති, සෙවනාධිප්‌පායො කායෙන වායමති ඵස්‌සං පටිවිජානාති, ආපත්‌ති ථුල්‌ලච්‌චයෙන දුක්‌කටස්‌ස…පෙ.….
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa kāyapaṭibaddhena kāyaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti thullaccayena dukkaṭassa…pe….
278. ඉත්‌ථී ච හොති ඉත්‌ථිසඤ්‌ඤී සාරත්‌තො ච. ඉත්‌ථී ච නං භික්‌ඛුස්‌ස කායපටිබද්‌ධෙන කායපටිබද්‌ධං ආමසති පරාමසති…පෙ.… ගණ්‌හාති ඡුපති, සෙවනාධිප්‌පායො කායෙන වායමති ඵස්‌සං පටිවිජානාති, ආපත්‌ති දුක්‌කටස්‌ස…පෙ.….
278. Itthī ca hoti itthisaññī sāratto ca. Itthī ca naṃ bhikkhussa kāyapaṭibaddhena kāyapaṭibaddhaṃ āmasati parāmasati…pe… gaṇhāti chupati, sevanādhippāyo kāyena vāyamati phassaṃ paṭivijānāti, āpatti dukkaṭassa…pe….
ද්‌වෙ ඉත්‌ථියො ද්‌වින්‌නං ඉත්‌ථීනං ඉත්‌ථිසඤ්‌ඤී සාරත්‌තො ච. ඉත්‌ථියො ච නං භික්‌ඛුස්‌ස කායපටිබද්‌ධෙන කායපටිබද්‌ධං ආමසන්‌ති පරාමසන්‌ති…පෙ.… ගණ්‌හන්‌ති ඡුපන්‌ති, සෙවනාධිප්‌පායො කායෙන වායමති ඵස්‌සං පටිවිජානාති, ආපත්‌ති ද්‌වින්‌නං දුක්‌කටානං…පෙ.….
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa kāyapaṭibaddhena kāyapaṭibaddhaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ඉත්‌ථී ච පණ්‌ඩකො ච උභින්‌නං ඉත්‌ථිසඤ්‌ඤී සාරත්‌තො ච. උභො ච නං භික්‌ඛුස්‌ස කායපටිබද්‌ධෙන කායපටිබද්‌ධං ආමසන්‌ති පරාමසන්‌ති…පෙ.… ගණ්‌හන්‌ති ඡුපන්‌ති, සෙවනාධිප්‌පායො කායෙන වායමති ඵස්‌සං පටිවිජානාති, ආපත්‌ති ද්‌වින්‌නං දුක්‌කටානං…පෙ.….
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa kāyapaṭibaddhena kāyapaṭibaddhaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ඉත්‌ථී ච හොති ඉත්‌ථිසඤ්‌ඤී සාරත්‌තො ච. ඉත්‌ථී ච නං භික්‌ඛුස්‌ස නිස්‌සග්‌ගියෙන කායං ආමසති. සෙවනාධිප්‌පායො කායෙන වායමති ඵස්‌සං පටිවිජානාති, ආපත්‌ති දුක්‌කටස්‌ස…පෙ.….
Itthī ca hoti itthisaññī sāratto ca. Itthī ca naṃ bhikkhussa nissaggiyena kāyaṃ āmasati. Sevanādhippāyo kāyena vāyamati phassaṃ paṭivijānāti, āpatti dukkaṭassa…pe….
ද්‌වෙ ඉත්‌ථියො ද්‌වින්‌නං ඉත්‌ථීනං ඉත්‌ථිසඤ්‌ඤී සාරත්‌තො ච. ඉත්‌ථියො ච නං භික්‌ඛුස්‌ස නිස්‌සග්‌ගියෙන කායං ආමසන්‌ති. සෙවනාධිප්‌පායො කායෙන වායමති ඵස්‌සං පටිවිජානාති, ආපත්‌ති ද්‌වින්‌නං දුක්‌කටානං…පෙ.….
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa nissaggiyena kāyaṃ āmasanti. Sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ඉත්‌ථී ච පණ්‌ඩකො ච උභින්‌නං ඉත්‌ථිසඤ්‌ඤී සාරත්‌තො ච. උභො ච නං භික්‌ඛුස්‌ස නිස්‌සග්‌ගියෙන කායං ආමසන්‌ති. සෙවනාධිප්‌පායො කායෙන වායමති ඵස්‌සං පටිවිජානාති, ආපත්‌ති ද්‌වින්‌නං දුක්‌කටානං…පෙ.….
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa nissaggiyena kāyaṃ āmasanti. Sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ඉත්‌ථී ච හොති ඉත්‌ථිසඤ්‌ඤී සාරත්‌තො ච. ඉත්‌ථී ච නං භික්‌ඛුස්‌ස නිස්‌සග්‌ගියෙන කායපටිබද්‌ධං ආමසති. සෙවනාධිප්‌පායො කායෙන වායමති ඵස්‌සං පටිවිජානාති, ආපත්‌ති දුක්‌කටස්‌ස…පෙ.….
Itthī ca hoti itthisaññī sāratto ca. Itthī ca naṃ bhikkhussa nissaggiyena kāyapaṭibaddhaṃ āmasati. Sevanādhippāyo kāyena vāyamati phassaṃ paṭivijānāti, āpatti dukkaṭassa…pe….
ද්‌වෙ ඉත්‌ථියො ද්‌වින්‌නං ඉත්‌ථීනං ඉත්‌ථිසඤ්‌ඤී සාරත්‌තො ච. ඉත්‌ථියො ච නං භික්‌ඛුස්‌ස නිස්‌සග්‌ගියෙන කායපටිබද්‌ධං ආමසන්‌ති. සෙවනාධිප්‌පායො කායෙන වායමති ඵස්‌සං පටිවිජානාති, ආපත්‌ති ද්‌වින්‌නං දුක්‌කටානං…පෙ.….
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa nissaggiyena kāyapaṭibaddhaṃ āmasanti. Sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ඉත්‌ථී ච පණ්‌ඩකො ච උභින්‌නං ඉත්‌ථිසඤ්‌ඤී සාරත්‌තො ච. උභො ච නං භික්‌ඛුස්‌ස නිස්‌සග්‌ගියෙන කායපටිබද්‌ධං ආමසන්‌ති. සෙවනාධිප්‌පායො කායෙන වායමති ඵස්‌සං පටිවිජානාති, ආපත්‌ති ද්‌වින්‌නං දුක්‌කටානං…පෙ.….
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa nissaggiyena kāyapaṭibaddhaṃ āmasanti. Sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ඉත්‌ථී ච හොති ඉත්‌ථිසඤ්‌ඤී සාරත්‌තො ච. ඉත්‌ථී ච නං භික්‌ඛුස්‌ස නිස්‌සග්‌ගියෙන නිස්‌සග්‌ගියං ආමසති. සෙවනාධිප්‌පායො කායෙන වායමති, න ච ඵස්‌සං පටිවිජානාති, ආපත්‌ති දුක්‌කටස්‌ස…පෙ.….
Itthī ca hoti itthisaññī sāratto ca. Itthī ca naṃ bhikkhussa nissaggiyena nissaggiyaṃ āmasati. Sevanādhippāyo kāyena vāyamati, na ca phassaṃ paṭivijānāti, āpatti dukkaṭassa…pe….
ද්‌වෙ ඉත්‌ථියො ද්‌වින්‌නං ඉත්‌ථීනං ඉත්‌ථිසඤ්‌ඤී සාරත්‌තො ච. ඉත්‌ථියො ච නං භික්‌ඛුස්‌ස නිස්‌සග්‌ගියෙන නිස්‌සග්‌ගියං ආමසන්‌ති. සෙවනාධිප්‌පායො කායෙන වායමති, න ච ඵස්‌සං පටිවිජානාති, ආපත්‌ති ද්‌වින්‌නං දුක්‌කටානං…පෙ.….
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa nissaggiyena nissaggiyaṃ āmasanti. Sevanādhippāyo kāyena vāyamati, na ca phassaṃ paṭivijānāti, āpatti dvinnaṃ dukkaṭānaṃ…pe….
ඉත්‌ථී ච පණ්‌ඩකො ච උභින්‌නං ඉත්‌ථිසඤ්‌ඤී සාරත්‌තො ච. උභො ච නං භික්‌ඛුස්‌ස නිස්‌සග්‌ගියෙන නිස්‌සග්‌ගියං ආමසන්‌ති. සෙවනාධිප්‌පායො කායෙන වායමති, න ච ඵස්‌සං පටිවිජානාති, ආපත්‌ති ද්‌වින්‌නං දුක්‌කටානං…පෙ.….
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa nissaggiyena nissaggiyaṃ āmasanti. Sevanādhippāyo kāyena vāyamati, na ca phassaṃ paṭivijānāti, āpatti dvinnaṃ dukkaṭānaṃ…pe….
279. සෙවනාධිප්‌පායො කායෙන වායමති ඵස්‌සං පටිවිජානාති, ආපත්‌ති සඞ්‌ඝාදිසෙසස්‌ස.
279. Sevanādhippāyo kāyena vāyamati phassaṃ paṭivijānāti, āpatti saṅghādisesassa.
සෙවනාධිප්‌පායො කායෙන වායමති, න ච ඵස්‌සං පටිවිජානාති, ආපත්‌ති දුක්‌කටස්‌ස.
Sevanādhippāyo kāyena vāyamati, na ca phassaṃ paṭivijānāti, āpatti dukkaṭassa.
සෙවනාධිප්‌පායො න ච කායෙන වායමති, ඵස්‌සං පටිවිජානාති, අනාපත්‌ති.
Sevanādhippāyo na ca kāyena vāyamati, phassaṃ paṭivijānāti, anāpatti.
සෙවනාධිප්‌පායො න ච කායෙන වායමති, න ච ඵස්‌සං පටිවිජානාති, අනාපත්‌ති.
Sevanādhippāyo na ca kāyena vāyamati, na ca phassaṃ paṭivijānāti, anāpatti.
මොක්‌ඛාධිප්‌පායො කායෙන වායමති, ඵස්‌සං පටිවිජානාති, අනාපත්‌ති.
Mokkhādhippāyo kāyena vāyamati, phassaṃ paṭivijānāti, anāpatti.
මොක්‌ඛාධිප්‌පායො කායෙන වායමති, න ච ඵස්‌සං පටිවිජානාති , අනාපත්‌ති.
Mokkhādhippāyo kāyena vāyamati, na ca phassaṃ paṭivijānāti , anāpatti.
මොක්‌ඛාධිප්‌පායො න ච කායෙන වායමති, ඵස්‌සං පටිවිජානාති, අනාපත්‌ති.
Mokkhādhippāyo na ca kāyena vāyamati, phassaṃ paṭivijānāti, anāpatti.
මොක්‌ඛාධිප්‌පායො න ච කායෙන වායමති, න ච ඵස්‌සං පටිවිජානාති, අනාපත්‌ති.
Mokkhādhippāyo na ca kāyena vāyamati, na ca phassaṃ paṭivijānāti, anāpatti.
280. අනාපත්‌ති අසඤ්‌චිච්‌ච, අසතියා, අජානන්‌තස්‌ස, අසාදියන්‌තස්‌ස, උම්‌මත්‌තකස්‌ස, ඛිත්‌තචිත්‌තස්‌ස, වෙදනාට්‌ටස්‌ස, ආදිකම්‌මිකස්‌සාති.
280. Anāpatti asañcicca, asatiyā, ajānantassa, asādiyantassa, ummattakassa, khittacittassa, vedanāṭṭassa, ādikammikassāti.
විනීතවත්‌ථුඋද්‌දානගාථා
Vinītavatthuuddānagāthā
මාතා ධීතා භගිනී ච, ජායා යක්‌ඛී ච පණ්‌ඩකො;
Mātā dhītā bhaginī ca, jāyā yakkhī ca paṇḍako;
සුත්‌තා මතා තිරච්‌ඡානා, දාරුධිතලිකාය ච.
Suttā matā tiracchānā, dārudhitalikāya ca.
සම්‌පීළෙ සඞ්‌කමො මග්‌ගො, රුක්‌ඛො නාවා ච රජ්‌ජු ච;
Sampīḷe saṅkamo maggo, rukkho nāvā ca rajju ca;
දණ්‌ඩො පත්‌තං පණාමෙසි, වන්‌දෙ වායමි නච්‌ඡුපෙති.
Daṇḍo pattaṃ paṇāmesi, vande vāyami nacchupeti.
විනීතවත්‌ථු
Vinītavatthu
281. තෙන ඛො පන සමයෙන අඤ්‌ඤතරො භික්‌ඛු මාතුයා මාතුපෙමෙන ආමසි. තස්‌ස කුක්‌කුච්‌චං අහොසි – ‘‘භගවතා සික්‌ඛාපදං පඤ්‌ඤත්‌තං, කච්‌චි නු ඛො අහං සඞ්‌ඝාදිසෙසං ආපත්‌තිං ආපන්‌නො’’ති? භගවතො එතමත්‌ථං ආරොචෙසි. ‘‘අනාපත්‌ති, භික්‌ඛු, සඞ්‌ඝාදිසෙසස්‌ස; ආපත්‌ති දුක්‌කටස්‌සා’’ති.
281. Tena kho pana samayena aññataro bhikkhu mātuyā mātupemena āmasi. Tassa kukkuccaṃ ahosi – ‘‘bhagavatā sikkhāpadaṃ paññattaṃ, kacci nu kho ahaṃ saṅghādisesaṃ āpattiṃ āpanno’’ti? Bhagavato etamatthaṃ ārocesi. ‘‘Anāpatti, bhikkhu, saṅghādisesassa; āpatti dukkaṭassā’’ti.
තෙන ඛො පන සමයෙන අඤ්‌ඤතරො භික්‌ඛු ධීතුයා ධීතුපෙමෙන ආමසි…පෙ.… භගිනියා භගිනිපෙමෙන ආමසි. තස්‌ස කුක්‌කුච්‌චං අහොසි…පෙ.… ‘‘අනාපත්‌ති, භික්‌ඛු, සඞ්‌ඝාදිසෙසස්‌ස; ආපත්‌ති දුක්‌කටස්‌සා’’ති.
Tena kho pana samayena aññataro bhikkhu dhītuyā dhītupemena āmasi…pe… bhaginiyā bhaginipemena āmasi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
තෙන ඛො පන සමයෙන අඤ්‌ඤතරො භික්‌ඛු පුරාණදුතියිකාය කායසංසග්‌ගං සමාපජ්‌ජි. තස්‌ස කුක්‌කුච්‌චං අහොසි…පෙ.… ‘‘ආපත්‌තිං ත්‌වං, භික්‌ඛු, ආපන්‌නො සඞ්‌ඝාදිසෙස’’න්‌ති.
Tena kho pana samayena aññataro bhikkhu purāṇadutiyikāya kāyasaṃsaggaṃ samāpajji. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
තෙන ඛො පන සමයෙන අඤ්‌ඤතරො භික්‌ඛු යක්‌ඛිනියා කායසංසග්‌ගං සමාපජ්‌ජි. තස්‌ස කුක්‌කුච්‌චං අහොසි…පෙ.… ‘‘අනාපත්‌ති, භික්‌ඛු, සඞ්‌ඝාදිසෙසස්‌ස; ආපත්‌ති ථුල්‌ලච්‌චයස්‌සා’’ති.
Tena kho pana samayena aññataro bhikkhu yakkhiniyā kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
තෙන ඛො පන සමයෙන අඤ්‌ඤතරො භික්‌ඛු පණ්‌ඩකස්‌ස කායසංසග්‌ගං සමාපජ්‌ජි. තස්‌ස කුක්‌කුච්‌චං අහොසි…පෙ.… ‘‘අනාපත්‌ති , භික්‌ඛු, සඞ්‌ඝාදිසෙසස්‌ස; ආපත්‌ති ථුල්‌ලච්‌චයස්‌සා’’ති.
Tena kho pana samayena aññataro bhikkhu paṇḍakassa kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti , bhikkhu, saṅghādisesassa; āpatti thullaccayassā’’ti.
තෙන ඛො පන සමයෙන අඤ්‌ඤතරො භික්‌ඛු සුත්‌තිත්‌ථියා කායසංසග්‌ගං සමාපජ්‌ජි. තස්‌ස කුක්‌කුච්‌චං අහොසි…පෙ.… ‘‘ආපත්‌තිං ත්‌වං, භික්‌ඛු, ආපන්‌නො සඞ්‌ඝාදිසෙස’’න්‌ති.
Tena kho pana samayena aññataro bhikkhu suttitthiyā kāyasaṃsaggaṃ samāpajji. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
තෙන ඛො පන සමයෙන අඤ්‌ඤතරො භික්‌ඛු මතිත්‌ථියා කායසංසග්‌ගං සමාපජ්‌ජි. තස්‌ස කුක්‌කුච්‌චං අහොසි…පෙ.… ‘‘අනාපත්‌ති, භික්‌ඛු, සඞ්‌ඝාදිසෙසස්‌ස; ආපත්‌ති ථුල්‌ලච්‌චයස්‌සා’’ති.
Tena kho pana samayena aññataro bhikkhu matitthiyā kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
තෙන ඛො පන සමයෙන අඤ්‌ඤතරො භික්‌ඛු තිරච්‌ඡානගතිත්‌ථියා කායසංසග්‌ගං සමාපජ්‌ජි. තස්‌ස කුක්‌කුච්‌චං අහොසි…පෙ.… ‘‘අනාපත්‌ති, භික්‌ඛු, සඞ්‌ඝාදිසෙසස්‌ස; ආපත්‌ති දුක්‌කටස්‌සා’’ති.
Tena kho pana samayena aññataro bhikkhu tiracchānagatitthiyā kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
තෙන ඛො පන සමයෙන අඤ්‌ඤතරො භික්‌ඛු දාරුධීතලිකාය කායසංසග්‌ගං සමාපජ්‌ජි. තස්‌ස කුක්‌කුච්‌චං අහොසි…පෙ.… ‘‘අනාපත්‌ති, භික්‌ඛු, සඞ්‌ඝාදිසෙසස්‌ස; ආපත්‌ති දුක්‌කටස්‌සා’’ති.
Tena kho pana samayena aññataro bhikkhu dārudhītalikāya kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
282. තෙන ඛො පන සමයෙන සම්‌බහුලා ඉත්‌ථියො අඤ්‌ඤතරං භික්‌ඛුං සම්‌පීළෙත්‌වා බාහාපරම්‌පරාය ආනෙසුං. තස්‌ස කුක්‌කුච්‌චං අහොසි…පෙ.… ‘‘සාදියි ත්‌වං, භික්‌ඛූ’’ති? ‘‘නාහං, භගවා, සාදියි’’න්‌ති. ‘‘අනාපත්‌ති, භික්‌ඛූ, අසාදියන්‌තස්‌සා’’ති.
282. Tena kho pana samayena sambahulā itthiyo aññataraṃ bhikkhuṃ sampīḷetvā bāhāparamparāya ānesuṃ. Tassa kukkuccaṃ ahosi…pe… ‘‘sādiyi tvaṃ, bhikkhū’’ti? ‘‘Nāhaṃ, bhagavā, sādiyi’’nti. ‘‘Anāpatti, bhikkhū, asādiyantassā’’ti.
තෙන ඛො පන සමයෙන අඤ්‌ඤතරො භික්‌ඛු ඉත්‌ථියා අභිරූළ්‌හං සඞ්‌කමං සාරත්‌තො සඤ්‌චාලෙසි. තස්‌ස කුක්‌කුච්‌චං අහොසි…පෙ.… ‘‘අනාපත්‌ති, භික්‌ඛු, සඞ්‌ඝාදිසෙසස්‌ස; ආපත්‌ති දුක්‌කටස්‌සා’’ති.
Tena kho pana samayena aññataro bhikkhu itthiyā abhirūḷhaṃ saṅkamaṃ sāratto sañcālesi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
තෙන ඛො පන සමයෙන අඤ්‌ඤතරො භික්‌ඛු ඉත්‌ථිං පටිපථෙ පස්‌සිත්‌වා සාරත්‌තො අංසකූටෙන පහාරං අදාසි. තස්‌ස කුක්‌කුච්‌චං අහොසි…පෙ.… ‘‘ආපත්‌තිං ත්‌වං, භික්‌ඛු, ආපන්‌නො සඞ්‌ඝාදිසෙස’’න්‌ති.
Tena kho pana samayena aññataro bhikkhu itthiṃ paṭipathe passitvā sāratto aṃsakūṭena pahāraṃ adāsi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
තෙන ඛො පන සමයෙන අඤ්‌ඤතරො භික්‌ඛු ඉත්‌ථියා අභිරූළ්‌හං රුක්‌ඛං සාරත්‌තො සඤ්‌චාලෙසි. තස්‌ස කුක්‌කුච්‌චං අහොසි…පෙ.… ‘‘අනාපත්‌ති, භික්‌ඛු, සඞ්‌ඝාදිසෙසස්‌ස; ආපත්‌ති දුක්‌කටස්‌සා’’ති.
Tena kho pana samayena aññataro bhikkhu itthiyā abhirūḷhaṃ rukkhaṃ sāratto sañcālesi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
තෙන ඛො පන සමයෙන අඤ්‌ඤතරො භික්‌ඛු ඉත්‌ථියා අභිරූළ්‌හං නාවං සාරත්‌තො සඤ්‌චාලෙසි. තස්‌ස කුක්‌කුච්‌චං අහොසි…පෙ.… ‘‘අනාපත්‌ති, භික්‌ඛු, සඞ්‌ඝාදිසෙසස්‌ස; ආපත්‌ති දුක්‌කටස්‌සා’’ති.
Tena kho pana samayena aññataro bhikkhu itthiyā abhirūḷhaṃ nāvaṃ sāratto sañcālesi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
තෙන ඛො පන සමයෙන අඤ්‌ඤතරො භික්‌ඛු ඉත්‌ථියා ගහිතං රජ්‌ජුං සාරත්‌තො ආවිඤ්‌ඡි 9. තස්‌ස කුක්‌කුච්‌චං අහොසි…පෙ.… ‘‘අනාපත්‌ති, භික්‌ඛු, සඞ්‌ඝාදිසෙසස්‌ස; ආපත්‌ති ථුල්‌ලච්‌චයස්‌සා’’ති.
Tena kho pana samayena aññataro bhikkhu itthiyā gahitaṃ rajjuṃ sāratto āviñchi 10. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
තෙන ඛො පන සමයෙන අඤ්‌ඤතරො භික්‌ඛු ඉත්‌ථියා ගහිතං දණ්‌ඩං සාරත්‌තො ආවිඤ්‌ඡි. තස්‌ස කුක්‌කුච්‌චං අහොසි…පෙ.… ‘‘අනාපත්‌ති, භික්‌ඛු, සඞ්‌ඝාදිසෙසස්‌ස; ආපත්‌ති ථුල්‌ලච්‌චයස්‌සා’’ති.
Tena kho pana samayena aññataro bhikkhu itthiyā gahitaṃ daṇḍaṃ sāratto āviñchi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
තෙන ඛො පන සමයෙන අඤ්‌ඤතරො භික්‌ඛු සාරත්‌තො ඉත්‌ථිං පත්‌තෙන පණාමෙසි. තස්‌ස කුක්‌කුච්‌චං අහොසි…පෙ.… ‘‘අනාපත්‌ති, භික්‌ඛු, සඞ්‌ඝාදිසෙසස්‌ස; ආපත්‌ති ථුල්‌ලච්‌චයස්‌සා’’ති.
Tena kho pana samayena aññataro bhikkhu sāratto itthiṃ pattena paṇāmesi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
තෙන ඛො පන සමයෙන අඤ්‌ඤතරො භික්‌ඛු ඉත්‌ථියා වන්‌දන්‌තියා සාරත්‌තො පාදං උච්‌චාරෙසි. තස්‌ස කුක්‌කුච්‌චං අහොසි…පෙ.… ‘‘ආපත්‌තිං ත්‌වං, භික්‌ඛු, ආපන්‌නො සඞ්‌ඝාදිසෙස’’න්‌ති.
Tena kho pana samayena aññataro bhikkhu itthiyā vandantiyā sāratto pādaṃ uccāresi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
තෙන ඛො පන සමයෙන අඤ්‌ඤතරො භික්‌ඛු ඉත්‌ථිං ගහෙස්‌සාමීති වායමිත්‌වා න ඡුපි.
Tena kho pana samayena aññataro bhikkhu itthiṃ gahessāmīti vāyamitvā na chupi.
තස්‌ස කුක්‌කුච්‌චං අහොසි…පෙ.… ‘‘අනාපත්‌ති, භික්‌ඛු, සඞ්‌ඝාදිසෙසස්‌ස; ආපත්‌ති දුක්‌කටස්‌සා’’ති.
Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
කායසංසග්‌ගසික්‌ඛාපදං නිට්‌ඨිතං දුතියං.
Kāyasaṃsaggasikkhāpadaṃ niṭṭhitaṃ dutiyaṃ.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 2. කායසංසග්‌ගසික්‌ඛාපදවණ්‌ණනා • 2. Kāyasaṃsaggasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 2. කායසංසග්‌ගසික්‌ඛාපදවණ්‌ණනා • 2. Kāyasaṃsaggasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā
2. කායසංසග්‌ගසික්‌ඛාපදවණ්‌ණනා • 2. Kāyasaṃsaggasikkhāpadavaṇṇanā
පදභාජනීයවණ්‌ණනා • Padabhājanīyavaṇṇanā
විනීතවත්‌ථුවණ්‌ණනා • Vinītavatthuvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 2. කායසංසග්‌ගසික්‌ඛාපදවණ්‌ණනා • 2. Kāyasaṃsaggasikkhāpadavaṇṇanā
