| Library / Tipiṭaka / ཏིཔིཊཀ • Tipiṭaka / མཧཱཝིབྷངྒ • Mahāvibhaṅga |
༢. ཀཱཡསཾསགྒསིཀྑཱཔདཾ
2. Kāyasaṃsaggasikkhāpadaṃ
༢༦༩. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཨཱཡསྨཱ ཨུདཱཡཱི ཨརཉྙེ ཝིཧརཏི། ཏསྶཱཡསྨཏོ ཝིཧཱརོ ཨབྷིརཱུཔོ ཧོཏི དསྶནཱིཡོ པཱསཱདིཀོ, མཛ྄ཛྷེགབྦྷོ, སམནྟཱཔརིཡཱགཱརོ, སུཔཉྙཏྟཾ མཉྩཔཱིཋཾ བྷིསིབིམྦོཧནཾ, པཱནཱིཡཾ པརིབྷོཛནཱིཡཾ སུཔཊྛིཏཾ, པརིཝེཎཾ སུསམྨཊྛཾ། བཧཱུ མནུསྶཱ ཨཱཡསྨཏོ ཨུདཱཡིསྶ ཝིཧཱརཔེཀྑཀཱ ཨཱགཙྪནྟི། ཨཉྙཏརོཔི བྲཱཧྨཎོ སཔཛཱཔཏིཀོ ཡེནཱཡསྨཱ ཨུདཱཡཱི ཏེནུཔསངྐམི; ཨུཔསངྐམིཏྭཱ ཨཱཡསྨནྟཾ ཨུདཱཡིཾ ཨེཏདཝོཙ – ‘‘ཨིཙྪཱམ མཡཾ བྷོཏོ ཨུདཱཡིསྶ ཝིཧཱརཾ པེཀྑིཏུ’’ནྟི། ‘‘ཏེན ཧི, བྲཱཧྨཎ, པེཀྑསྶཱུ’’ཏི, ཨཝཱཔུརཎཾ 1 ཨཱདཱཡ གྷཊིཀཾ ཨུགྒྷཱཊེཏྭཱ ཀཝཱཊཾ པཎཱམེཏྭཱ ཝིཧཱརཾ པཱཝིསི། སོཔི ཁོ བྲཱཧྨཎོ ཨཱཡསྨཏོ ཨུདཱཡིསྶ པིཊྛིཏོ པཱཝིསི། སཱཔི ཁོ བྲཱཧྨཎཱི ཏསྶ བྲཱཧྨཎསྶ པིཊྛིཏོ པཱཝིསི། ཨཐ ཁོ ཨཱཡསྨཱ ཨུདཱཡཱི ཨེཀཙྩེ ཝཱཏཔཱནེ ཝིཝརནྟོ ཨེཀཙྩེ ཝཱཏཔཱནེ ཐཀེནྟོ གབྦྷཾ ཨནུཔརིགནྟྭཱ པིཊྛིཏོ ཨཱགནྟྭཱ ཏསྶཱ བྲཱཧྨཎིཡཱ ཨངྒམངྒཱནི པརཱམསི། ཨཐ ཁོ སོ བྲཱཧྨཎོ ཨཱཡསྨཏཱ ཨུདཱཡིནཱ སདྡྷིཾ པཊིསམྨོདིཏྭཱ ཨགམཱསི། ཨཐ ཁོ སོ བྲཱཧྨཎོ ཨཏྟམནོ ཨཏྟམནཝཱཙཾ ནིཙྪཱརེསི – ‘‘ཨུལཱ༹རཱ ཨིམེ སམཎཱ སཀྱཔུཏྟིཡཱ ཡེ ཨིམེ ཨེཝརཱུཔེ ཨརཉྙེ ཝིཧརནྟི། བྷཝམྤི ཨུདཱཡཱི ཨུལཱ༹རོ ཡོ ཨེཝརཱུཔེ ཨརཉྙེ ཝིཧརཏཱི’’ཏི།
269. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā udāyī araññe viharati. Tassāyasmato vihāro abhirūpo hoti dassanīyo pāsādiko, majjhegabbho, samantāpariyāgāro, supaññattaṃ mañcapīṭhaṃ bhisibimbohanaṃ, pānīyaṃ paribhojanīyaṃ supaṭṭhitaṃ, pariveṇaṃ susammaṭṭhaṃ. Bahū manussā āyasmato udāyissa vihārapekkhakā āgacchanti. Aññataropi brāhmaṇo sapajāpatiko yenāyasmā udāyī tenupasaṅkami; upasaṅkamitvā āyasmantaṃ udāyiṃ etadavoca – ‘‘icchāma mayaṃ bhoto udāyissa vihāraṃ pekkhitu’’nti. ‘‘Tena hi, brāhmaṇa, pekkhassū’’ti, avāpuraṇaṃ 2 ādāya ghaṭikaṃ ugghāṭetvā kavāṭaṃ paṇāmetvā vihāraṃ pāvisi. Sopi kho brāhmaṇo āyasmato udāyissa piṭṭhito pāvisi. Sāpi kho brāhmaṇī tassa brāhmaṇassa piṭṭhito pāvisi. Atha kho āyasmā udāyī ekacce vātapāne vivaranto ekacce vātapāne thakento gabbhaṃ anuparigantvā piṭṭhito āgantvā tassā brāhmaṇiyā aṅgamaṅgāni parāmasi. Atha kho so brāhmaṇo āyasmatā udāyinā saddhiṃ paṭisammoditvā agamāsi. Atha kho so brāhmaṇo attamano attamanavācaṃ nicchāresi – ‘‘uḷārā ime samaṇā sakyaputtiyā ye ime evarūpe araññe viharanti. Bhavampi udāyī uḷāro yo evarūpe araññe viharatī’’ti.
ཨེཝཾ ཝུཏྟེ སཱ བྲཱཧྨཎཱི ཏཾ བྲཱཧྨཎཾ ཨེཏདཝོཙ – ‘‘ཀུཏོ ཏསྶ ཨུལཱ༹རཏྟཏཱ! ཡཐེཝ མེ ཏྭཾ ཨངྒམངྒཱནི པརཱམསི ཨེཝམེཝ མེ སམཎོ ཨུདཱཡཱི ཨངྒམངྒཱནི པརཱམསཱི’’ཏི། ཨཐ ཁོ སོ བྲཱཧྨཎོ ཨུཛ྄ཛྷཱཡཏི ཁིཡྻཏི ཝིཔཱཙེཏི – ‘‘ཨལཛྫིནོ ཨིམེ སམཎཱ སཀྱཔུཏྟིཡཱ དུསྶཱིལཱ མུསཱཝཱདིནོ། ཨིམེ ཧི ནཱམ དྷམྨཙཱརིནོ སམཙཱརིནོ བྲཧྨཙཱརིནོ སཙྩཝཱདིནོ སཱིལཝནྟོ ཀལྱཱཎདྷམྨཱ པཊིཛཱནིསྶནྟི! ནཏྠི ཨིམེསཾ སཱམཉྙཾ ནཏྠི ཨིམེསཾ བྲཧྨཉྙཾ, ནཊྛཾ ཨིམེསཾ སཱམཉྙཾ ནཊྛཾ ཨིམེསཾ བྲཧྨཉྙཾ, ཀུཏོ ཨིམེསཾ སཱམཉྙཾ ཀུཏོ ཨིམེསཾ བྲཧྨཉྙཾ, ཨཔགཏཱ ཨིམེ སཱམཉྙཱ ཨཔགཏཱ ཨིམེ བྲཧྨཉྙཱ། ཀཐཉྷི ནཱམ སམཎོ ཨུདཱཡཱི མམ བྷརིཡཱཡ ཨངྒམངྒཱནི པརཱམསིསྶཏི! ན ཧི སཀྐཱ ཀུལིཏྠཱིཧི ཀུལདྷཱིཏཱཧི ཀུལཀུམཱརཱིཧི ཀུལསུཎྷཱཧི ཀུལདཱསཱིཧི ཨཱརཱམཾ ཝཱ ཝིཧཱརཾ ཝཱ གནྟུཾ། སཙེ 3 ཀུལིཏྠིཡོ ཀུལདྷཱིཏརོ 4 ཀུལཀུམཱརིཡོ ཀུལསུཎྷཱཡོ ཀུལདཱསིཡོ ཨཱརཱམཾ ཝཱ ཝིཧཱརཾ ཝཱ གཙྪེཡྻུཾ, ཏཱཔི སམཎཱ སཀྱཔུཏྟིཡཱ དཱུསེཡྻུ’’ནྟི!
Evaṃ vutte sā brāhmaṇī taṃ brāhmaṇaṃ etadavoca – ‘‘kuto tassa uḷārattatā! Yatheva me tvaṃ aṅgamaṅgāni parāmasi evameva me samaṇo udāyī aṅgamaṅgāni parāmasī’’ti. Atha kho so brāhmaṇo ujjhāyati khiyyati vipāceti – ‘‘alajjino ime samaṇā sakyaputtiyā dussīlā musāvādino. Ime hi nāma dhammacārino samacārino brahmacārino saccavādino sīlavanto kalyāṇadhammā paṭijānissanti! Natthi imesaṃ sāmaññaṃ natthi imesaṃ brahmaññaṃ, naṭṭhaṃ imesaṃ sāmaññaṃ naṭṭhaṃ imesaṃ brahmaññaṃ, kuto imesaṃ sāmaññaṃ kuto imesaṃ brahmaññaṃ, apagatā ime sāmaññā apagatā ime brahmaññā. Kathañhi nāma samaṇo udāyī mama bhariyāya aṅgamaṅgāni parāmasissati! Na hi sakkā kulitthīhi kuladhītāhi kulakumārīhi kulasuṇhāhi kuladāsīhi ārāmaṃ vā vihāraṃ vā gantuṃ. Sace 5 kulitthiyo kuladhītaro 6 kulakumāriyo kulasuṇhāyo kuladāsiyo ārāmaṃ vā vihāraṃ vā gaccheyyuṃ, tāpi samaṇā sakyaputtiyā dūseyyu’’nti!
ཨསྶོསུཾ ཁོ བྷིཀྑུ ཏསྶ བྲཱཧྨཎསྶ ཨུཛ྄ཛྷཱཡནྟསྶ ཁིཡྻནྟསྶ ཝིཔཱཙེནྟསྶ། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཱཡསྨཱ ཨུདཱཡཱི མཱཏུགཱམེན སདྡྷིཾ ཀཱཡསཾསགྒཾ སམཱཔཛྫིསྶཏཱི’’ཏི! ཨཐ ཁོ ཏེ བྷིཀྑཱུ ཨཱཡསྨནྟཾ ཨུདཱཡིཾ ཨནེཀཔརིཡཱཡེན ཝིགརཧིཏྭཱ བྷགཝཏོ ཨེཏམཏྠཾ ཨཱརོཙེསུཾ། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ བྷིཀྑུསངྒྷཾ སནྣིཔཱཏཱཔེཏྭཱ ཨཱཡསྨནྟཾ ཨུདཱཡིཾ པཊིཔུཙྪི – ‘‘སཙྩཾ ཀིར ཏྭཾ, ཨུདཱཡི, མཱཏུགཱམེན སདྡྷིཾ ཀཱཡསཾསགྒཾ སམཱཔཛྫསཱི’’ཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ – ‘‘ཨནནུཙྪཝིཀཾ, མོགྷཔུརིས, ཨནནུལོམིཀཾ ཨཔྤཏིརཱུཔཾ ཨསྶཱམཎཀཾ ཨཀཔྤིཡཾ ཨཀརཎཱིཡཾ། ཀཐཉྷི ནཱམ ཏྭཾ, མོགྷཔུརིས, མཱཏུགཱམེན སདྡྷིཾ ཀཱཡསཾསགྒཾ སམཱཔཛྫིསྶསི! ནནུ མཡཱ, མོགྷཔུརིས, ཨནེཀཔརིཡཱཡེན ཝིརཱགཱཡ དྷམྨོ དེསིཏོ ནོ སརཱགཱཡ…པེ॰… ཀཱམཔརིལཱ༹ཧཱནཾ ཝཱུཔསམོ ཨཀྑཱཏོ། ནེཏཾ, མོགྷཔུརིས, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
Assosuṃ kho bhikkhu tassa brāhmaṇassa ujjhāyantassa khiyyantassa vipācentassa. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā udāyī mātugāmena saddhiṃ kāyasaṃsaggaṃ samāpajjissatī’’ti! Atha kho te bhikkhū āyasmantaṃ udāyiṃ anekapariyāyena vigarahitvā bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā āyasmantaṃ udāyiṃ paṭipucchi – ‘‘saccaṃ kira tvaṃ, udāyi, mātugāmena saddhiṃ kāyasaṃsaggaṃ samāpajjasī’’ti? ‘‘Saccaṃ, bhagavā’’ti. Vigarahi buddho bhagavā – ‘‘ananucchavikaṃ, moghapurisa, ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma tvaṃ, moghapurisa, mātugāmena saddhiṃ kāyasaṃsaggaṃ samāpajjissasi! Nanu mayā, moghapurisa, anekapariyāyena virāgāya dhammo desito no sarāgāya…pe… kāmapariḷāhānaṃ vūpasamo akkhāto. Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༢༧༠. ‘‘ཡོ པན བྷིཀྑུ ཨོཏིཎྞོ ཝིཔརིཎཏེན ཙིཏྟེན མཱཏུགཱམེན སདྡྷིཾ ཀཱཡསཾསགྒཾ སམཱཔཛྫེཡྻ ཧཏྠགྒཱཧཾ ཝཱ ཝེཎིགྒཱཧཾ ཝཱ ཨཉྙཏརསྶ ཝཱ ཨཉྙཏརསྶ ཝཱ ཨངྒསྶ པརཱམསནཾ, སངྒྷཱདིསེསོ’’ཏི།
270.‘‘Yo pana bhikkhu otiṇṇo vipariṇatena cittena mātugāmena saddhiṃ kāyasaṃsaggaṃ samāpajjeyya hatthaggāhaṃ vā veṇiggāhaṃ vā aññatarassa vā aññatarassa vā aṅgassa parāmasanaṃ, saṅghādiseso’’ti.
༢༧༡. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
271.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ཨོཏིཎྞོ ནཱམ སཱརཏྟོ ཨཔེཀྑཝཱ པཊིབདྡྷཙིཏྟོ།
Otiṇṇo nāma sāratto apekkhavā paṭibaddhacitto.
ཝིཔརིཎཏནྟི རཏྟམྤི ཙིཏྟཾ ཝིཔརིཎཏཾ། དུཊྛམྤི ཙིཏྟཾ ཝིཔརིཎཏཾ། མཱུལ༹ྷམྤི ཙིཏྟཾ ཝིཔརིཎཏཾ། ཨཔིཙ, རཏྟཾ ཙིཏྟཾ ཨིམསྨིཾ ཨཏྠེ ཨདྷིཔྤེཏཾ ཝིཔརིཎཏནྟི།
Vipariṇatanti rattampi cittaṃ vipariṇataṃ. Duṭṭhampi cittaṃ vipariṇataṃ. Mūḷhampi cittaṃ vipariṇataṃ. Apica, rattaṃ cittaṃ imasmiṃ atthe adhippetaṃ vipariṇatanti.
མཱཏུགཱམོ ནཱམ མནུསྶིཏྠཱི, ན ཡཀྑཱི ན པེཏཱི, ན ཏིརཙྪཱནགཏཱ། ཨནྟམསོ ཏདཧུཛཱཏཱཔི དཱརིཀཱ, པགེཝ མཧཏྟརཱི།
Mātugāmo nāma manussitthī, na yakkhī na petī, na tiracchānagatā. Antamaso tadahujātāpi dārikā, pageva mahattarī.
སདྡྷིནྟི ཨེཀཏོ།
Saddhinti ekato.
ཀཱཡསཾསགྒཾ སམཱཔཛྫེཡྻཱཏི ཨཛ྄ཛྷཱཙཱརོ ཝུཙྩཏི།
Kāyasaṃsaggaṃsamāpajjeyyāti ajjhācāro vuccati.
ཧཏྠོ ནཱམ ཀཔྤརཾ ཨུཔཱདཱཡཾ ཡཱཝ ཨགྒནཁཱ།
Hattho nāma kapparaṃ upādāyaṃ yāva agganakhā.
ཝེཎཱི ནཱམ སུདྡྷཀེསཱ ཝཱ, སུཏྟམིསྶཱ ཝཱ, མཱལཱམིསྶཱ ཝཱ, ཧིརཉྙམིསྶཱ ཝཱ, སུཝཎྞམིསྶཱ ཝཱ, མུཏྟཱམིསྶཱ ཝཱ, མཎིམིསྶཱ ཝཱ།
Veṇī nāma suddhakesā vā, suttamissā vā, mālāmissā vā, hiraññamissā vā, suvaṇṇamissā vā, muttāmissā vā, maṇimissā vā.
ཨངྒཾ ནཱམ ཧཏྠཉྩ ཝེཎིཉྩ ཋཔེཏྭཱ ཨཝསེསཾ ཨངྒཾ ནཱམ།
Aṅgaṃ nāma hatthañca veṇiñca ṭhapetvā avasesaṃ aṅgaṃ nāma.
༢༧༢. ཨཱམསནཱ , པརཱམསནཱ, ཨོམསནཱ, ཨུམྨསནཱ, ཨོལངྒྷནཱ, ཨུལླངྒྷནཱ, ཨཱཀཌྜྷནཱ, པཏིཀཌྜྷནཱ, ཨབྷིནིགྒཎྷནཱ, ཨབྷིནིཔྤཱིལ༹ནཱ, གཧཎཾ, ཚུཔནཾ།
272. Āmasanā , parāmasanā, omasanā, ummasanā, olaṅghanā, ullaṅghanā, ākaḍḍhanā, patikaḍḍhanā, abhiniggaṇhanā, abhinippīḷanā, gahaṇaṃ, chupanaṃ.
ཨཱམསནཱ ནཱམ ཨཱམཊྛམཏྟཱ།
Āmasanā nāma āmaṭṭhamattā.
པརཱམསནཱ ནཱམ ཨིཏོཙིཏོ ཙ སཾཙོཔནཱ།
Parāmasanā nāma itocito ca saṃcopanā.
ཨོམསནཱ ནཱམ ཧེཊྛཱ ཨོརོཔནཱ།
Omasanā nāma heṭṭhā oropanā.
ཨུམྨསནཱ ནཱམ ཨུདྡྷཾ ཨུཙྩཱརཎཱ།
Ummasanā nāma uddhaṃ uccāraṇā.
ཨོལངྒྷནཱ ནཱམ ཧེཊྛཱ ཨོནམནཱ།
Olaṅghanā nāma heṭṭhā onamanā.
ཨུལླངྒྷནཱ ནཱམ ཨུདྡྷཾ ཨུཙྩཱརཎཱ།
Ullaṅghanā nāma uddhaṃ uccāraṇā.
པཏིཀཌྜྷནཱ ནཱམ པཏིཔྤཎཱམནཱ།
Patikaḍḍhanā nāma patippaṇāmanā.
ཨབྷིནིགྒཎྷནཱ ནཱམ ཨངྒཾ གཧེཏྭཱ ནིཔྤཱིལ༹ནཱ།
Abhiniggaṇhanā nāma aṅgaṃ gahetvā nippīḷanā.
ཨབྷིནིཔྤཱིལ༹ནཱ ནཱམ ཀེནཙི སཧ ནིཔྤཱིལ༹ནཱ།
Abhinippīḷanā nāma kenaci saha nippīḷanā.
གཧཎཾ ནཱམ གཧིཏམཏྟཾ།
Gahaṇaṃ nāma gahitamattaṃ.
ཚུཔནཾ ནཱམ ཕུཊྛམཏྟཾ།
Chupanaṃ nāma phuṭṭhamattaṃ.
སངྒྷཱདིསེསོཏི…པེ॰… ཏེནཔི ཝུཙྩཏི སངྒྷཱདིསེསོཏི།
Saṅghādisesoti…pe… tenapi vuccati saṅghādisesoti.
༢༧༣. ཨིཏྠཱི ཙ ཧོཏི ཨིཏྠིསཉྙཱི སཱརཏྟོ ཙ བྷིཀྑུ ཙ། ནཾ ཨིཏྠིཡཱ ཀཱཡེན ཀཱཡཾ ཨཱམསཏི པརཱམསཏི ཨོམསཏི ཨུམྨསཏི ཨོལངྒྷེཏི ཨུལླངྒྷེཏི ཨཱཀཌྜྷཏི པཏིཀཌྜྷཏི ཨབྷིནིགྒཎྷཱཏི ཨབྷིནིཔྤཱིལེ༹ཏི གཎྷཱཏི ཚུཔཏི, ཨཱཔཏྟི སངྒྷཱདིསེསསྶ།
273. Itthī ca hoti itthisaññī sāratto ca bhikkhu ca. Naṃ itthiyā kāyena kāyaṃ āmasati parāmasati omasati ummasati olaṅgheti ullaṅgheti ākaḍḍhati patikaḍḍhati abhiniggaṇhāti abhinippīḷeti gaṇhāti chupati, āpatti saṅghādisesassa.
ཨིཏྠཱི ཙ ཧོཏི ཝེམཏིཀོ སཱརཏྟོ ཙ། བྷིཀྑུ ཙ ནཾ ཨིཏྠིཡཱ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི ཐུལླཙྩཡསྶ།
Itthī ca hoti vematiko sāratto ca. Bhikkhu ca naṃ itthiyā kāyena kāyaṃ āmasati parāmasati…pe… gaṇhāti chupati, āpatti thullaccayassa.
ཨིཏྠཱི ཙ ཧོཏི པཎྜཀསཉྙཱི སཱརཏྟོ ཙ། བྷིཀྑུ ཙ ནཾ ཨིཏྠིཡཱ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི ཐུལླཙྩཡསྶ།
Itthī ca hoti paṇḍakasaññī sāratto ca. Bhikkhu ca naṃ itthiyā kāyena kāyaṃ āmasati parāmasati…pe… gaṇhāti chupati, āpatti thullaccayassa.
ཨིཏྠཱི ཙ ཧོཏི པུརིསསཉྙཱི སཱརཏྟོ ཙ། བྷིཀྑུ ཙ ནཾ ཨིཏྠིཡཱ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི ཐུལླཙྩཡསྶ།
Itthī ca hoti purisasaññī sāratto ca. Bhikkhu ca naṃ itthiyā kāyena kāyaṃ āmasati parāmasati…pe… gaṇhāti chupati, āpatti thullaccayassa.
ཨིཏྠཱི ཙ ཧོཏི ཏིརཙྪཱནགཏསཉྙཱི སཱརཏྟོ ཙ། བྷིཀྑུ ཙ ནཾ ཨིཏྠིཡཱ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི ཐུལླཙྩཡསྶ།
Itthī ca hoti tiracchānagatasaññī sāratto ca. Bhikkhu ca naṃ itthiyā kāyena kāyaṃ āmasati parāmasati…pe… gaṇhāti chupati, āpatti thullaccayassa.
པཎྜཀོ ཙ ཧོཏི པཎྜཀསཉྙཱི སཱརཏྟོ ཙ། བྷིཀྑུ ཙ ནཾ པཎྜཀསྶ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི ཐུལླཙྩཡསྶ།
Paṇḍako ca hoti paṇḍakasaññī sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati, āpatti thullaccayassa.
པཎྜཀོ ཙ ཧོཏི ཝེམཏིཀོ སཱརཏྟོ ཙ། བྷིཀྑུ ཙ ནཾ པཎྜཀསྶ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དུཀྐཊསྶ།
Paṇḍako ca hoti vematiko sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
པཎྜཀོ ཙ ཧོཏི པུརིསསཉྙཱི སཱརཏྟོ ཙ། བྷིཀྑུ ཙ ནཾ པཎྜཀསྶ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དུཀྐཊསྶ།
Paṇḍako ca hoti purisasaññī sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
པཎྜཀོ ཙ ཧོཏི ཏིརཙྪཱནགཏསཉྙཱི སཱརཏྟོ ཙ། བྷིཀྑུ ཙ ནཾ པཎྜཀསྶ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི , ཨཱཔཏྟི དུཀྐཊསྶ།
Paṇḍako ca hoti tiracchānagatasaññī sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati , āpatti dukkaṭassa.
པཎྜཀོ ཙ ཧོཏི ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ པཎྜཀསྶ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དུཀྐཊསྶ།
Paṇḍako ca hoti itthisaññī sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
པུརིསོ ཙ ཧོཏི པུརིསསཉྙཱི སཱརཏྟོ ཙ། བྷིཀྑུ ཙ ནཾ པུརིསསྶ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དུཀྐཊསྶ།
Puriso ca hoti purisasaññī sāratto ca. Bhikkhu ca naṃ purisassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
པུརིསོ ཙ ཧོཏི ཝེམཏིཀོ…པེ॰… པུརིསོ ཙ ཧོཏི ཏིརཙྪཱནགཏསཉྙཱི… པུརིསོ ཙ ཧོཏི ཨིཏྠིསཉྙཱི… པུརིསོ ཙ ཧོཏི པཎྜཀསཉྙཱི སཱརཏྟོ ཙ། བྷིཀྑུ ཙ ནཾ པུརིསསྶ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དུཀྐཊསྶ།
Puriso ca hoti vematiko…pe… puriso ca hoti tiracchānagatasaññī… puriso ca hoti itthisaññī… puriso ca hoti paṇḍakasaññī sāratto ca. Bhikkhu ca naṃ purisassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
ཏིརཙྪཱནགཏོ ཙ ཧོཏི ཏིརཙྪཱནགཏསཉྙཱི སཱརཏྟོ ཙ། བྷིཀྑུ ཙ ནཾ ཏིརཙྪཱནགཏསྶ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དུཀྐཊསྶ།
Tiracchānagato ca hoti tiracchānagatasaññī sāratto ca. Bhikkhu ca naṃ tiracchānagatassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
ཏིརཙྪཱནགཏོ ཙ ཧོཏི ཝེམཏིཀོ…པེ॰… ཏིརཙྪཱནགཏོ ཙ ཧོཏི ཨིཏྠིསཉྙཱི… ཏིརཙྪཱནགཏོ ཙ ཧོཏི པཎྜཀསཉྙཱི… ཏིརཙྪཱནགཏོ ཙ ཧོཏི། པུརིསསཉྙཱི སཱརཏྟོ ཙ། བྷིཀྑུ ཙ ནཾ ཏིརཙྪཱནགཏསྶ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དུཀྐཊསྶ།
Tiracchānagato ca hoti vematiko…pe… tiracchānagato ca hoti itthisaññī… tiracchānagato ca hoti paṇḍakasaññī… tiracchānagato ca hoti. Purisasaññī sāratto ca. Bhikkhu ca naṃ tiracchānagatassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
ཨེཀམཱུལཀཾ ནིཊྛིཏཾ།
Ekamūlakaṃ niṭṭhitaṃ.
༢༧༤. དྭེ ཨིཏྠིཡོ དྭིནྣཾ ཨིཏྠཱིནཾ ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ དྭིནྣཾ ཨིཏྠཱིནཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དྭིནྣཾ སངྒྷཱདིསེསཱནཾ།
274. Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ saṅghādisesānaṃ.
དྭེ ཨིཏྠིཡོ དྭིནྣཾ ཨིཏྠཱིནཾ ཝེམཏིཀོ སཱརཏྟོ ཙ། བྷིཀྑུ ཙ ནཾ དྭིནྣཾ ཨིཏྠཱིནཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དྭིནྣཾ ཐུལླཙྩཡཱནཾ།
Dve itthiyo dvinnaṃ itthīnaṃ vematiko sāratto ca. Bhikkhu ca naṃ dvinnaṃ itthīnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ.
དྭེ ཨིཏྠིཡོ དྭིནྣཾ ཨིཏྠཱིནཾ པཎྜཀསཉྙཱི…པེ॰… པུརིསསཉྙཱི… ཏིརཙྪཱནགཏསཉྙཱི སཱརཏྟོ ཙ། བྷིཀྑུ ཙ དྭིནྣཾ ཨིཏྠཱིནཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དྭིནྣཾ ཐུལླཙྩཡཱནཾ།
Dve itthiyo dvinnaṃ itthīnaṃ paṇḍakasaññī…pe… purisasaññī… tiracchānagatasaññī sāratto ca. Bhikkhu ca dvinnaṃ itthīnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ.
དྭེ པཎྜཀཱ དྭིནྣཾ པཎྜཀཱནཾ པཎྜཀསཉྙཱི སཱརཏྟོ ཙ བྷིཀྑུ ཙ ནཾ དྭིནྣཾ པཎྜཀཱནཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དྭིནྣཾ ཐུལླཙྩཡཱནཾ།
Dve paṇḍakā dvinnaṃ paṇḍakānaṃ paṇḍakasaññī sāratto ca bhikkhu ca naṃ dvinnaṃ paṇḍakānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ.
དྭེ པཎྜཀཱ དྭིནྣཾ པཎྜཀཱནཾ ཝེམཏིཀོ…པེ॰… པུརིསསཉྙཱི… ཏིརཙྪཱནགཏསཉྙཱི… ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ དྭིནྣཾ པཎྜཀཱནཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དྭིནྣཾ དུཀྐཊཱནཾ།
Dve paṇḍakā dvinnaṃ paṇḍakānaṃ vematiko…pe… purisasaññī… tiracchānagatasaññī… itthisaññī sāratto ca. Bhikkhu ca naṃ dvinnaṃ paṇḍakānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
དྭེ པུརིསཱ དྭིནྣཾ པུརིསཱནཾ པུརིསསཉྙཱི སཱརཏྟོ ཙ བྷིཀྑུ ཙ ནཾ དྭིནྣཾ པུརིསཱནཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དྭིནྣཾ དུཀྐཊཱནཾ།
Dve purisā dvinnaṃ purisānaṃ purisasaññī sāratto ca bhikkhu ca naṃ dvinnaṃ purisānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
དྭེ པུརིསཱ དྭིནྣཾ པུརིསཱནཾ ཝེམཏིཀོ…པེ॰… ཏིརཙྪཱནགཏསཉྙཱི… ཨིཏྠིསཉྙཱི… པཎྜཀསཉྙཱི སཱརཏྟོ ཙ། བྷིཀྑུ ཙ ནཾ དྭིནྣཾ པུརིསཱནཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དྭིནྣཾ དུཀྐཊཱནཾ།
Dve purisā dvinnaṃ purisānaṃ vematiko…pe… tiracchānagatasaññī… itthisaññī… paṇḍakasaññī sāratto ca. Bhikkhu ca naṃ dvinnaṃ purisānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
དྭེ ཏིརཙྪཱནགཏཱ དྭིནྣཾ ཏིརཙྪཱནགཏཱནཾ ཏིརཙྪཱནགཏསཉྙཱི སཱརཏྟོ ཙ། བྷིཀྑུ ཙ ནཾ དྭིནྣཾ ཏིརཙྪཱནགཏཱནཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དྭིནྣཾ དུཀྐཊཱནཾ།
Dve tiracchānagatā dvinnaṃ tiracchānagatānaṃ tiracchānagatasaññī sāratto ca. Bhikkhu ca naṃ dvinnaṃ tiracchānagatānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
དྭེ ཏིརཙྪཱནགཏཱ དྭིནྣཾ ཏིརཙྪཱནགཏཱནཾ ཝེམཏིཀོ…པེ॰… ཨིཏྠིསཉྙཱི… པཎྜཀསཉྙཱི … པུརིསསཉྙཱི སཱརཏྟོ ཙ། བྷིཀྑུ ཙ ནཾ དྭིནྣཾ ཏིརཙྪཱནགཏཱནཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དྭིནྣཾ དུཀྐཊཱནཾ།
Dve tiracchānagatā dvinnaṃ tiracchānagatānaṃ vematiko…pe… itthisaññī… paṇḍakasaññī … purisasaññī sāratto ca. Bhikkhu ca naṃ dvinnaṃ tiracchānagatānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
༢༧༥. ཨིཏྠཱི ཙ པཎྜཀོ ཙ ཨུབྷིནྣཾ ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ ཨུབྷིནྣཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི སངྒྷཱདིསེསེན དུཀྐཊསྶ།
275. Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti saṅghādisesena dukkaṭassa.
ཨིཏྠཱི ཙ པཎྜཀོ ཙ ཨུབྷིནྣཾ ཝེམཏིཀོ སཱརཏྟོ ཙ། བྷིཀྑུ ཙ ནཾ ཨུབྷིནྣཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི ཐུལླཙྩཡེན དུཀྐཊསྶ།
Itthī ca paṇḍako ca ubhinnaṃ vematiko sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ཨིཏྠཱི ཙ པཎྜཀོ ཙ ཨུབྷིནྣཾ པཎྜཀསཉྙཱི སཱརཏྟོ ཙ། བྷིཀྑུ ཙ ནཾ ཨུབྷིནྣཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དྭིནྣཾ ཐུལླཙྩཡཱནཾ།
Itthī ca paṇḍako ca ubhinnaṃ paṇḍakasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ.
ཨིཏྠཱི ཙ པཎྜཀོ ཙ ཨུབྷིནྣཾ པུརིསསཉྙཱི སཱརཏྟོ ཙ། བྷིཀྑུ ཙ ནཾ ཨུབྷིནྣཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི ཐུལླཙྩཡེན དུཀྐཊསྶ།
Itthī ca paṇḍako ca ubhinnaṃ purisasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ཨིཏྠཱི ཙ པཎྜཀོ ཙ ཨུབྷིནྣཾ ཏིརཙྪཱནགཏསཉྙཱི སཱརཏྟོ ཙ། བྷིཀྑུ ཙ ནཾ ཨུབྷིནྣཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི ཐུལླཙྩཡེན དུཀྐཊསྶ།
Itthī ca paṇḍako ca ubhinnaṃ tiracchānagatasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ཨིཏྠཱི ཙ པུརིསོ ཙ ཨུབྷིནྣཾ ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ ཨུབྷིནྣཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི སངྒྷཱདིསེསེན དུཀྐཊསྶ།
Itthī ca puriso ca ubhinnaṃ itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti saṅghādisesena dukkaṭassa.
ཨིཏྠཱི ཙ པུརིསོ ཙ ཨུབྷིནྣཾ ཝེམཏིཀོ…པེ॰… པཎྜཀསཉྙཱི… པུརིསསཉྙཱི… ཏིརཙྪཱནགཏསཉྙཱི སཱརཏྟོ ཙ། བྷིཀྑུ ཙ ནཾ ཨུབྷིནྣཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི ཐུལླཙྩཡེན དུཀྐཊསྶ།
Itthī ca puriso ca ubhinnaṃ vematiko…pe… paṇḍakasaññī… purisasaññī… tiracchānagatasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ཨིཏྠཱི ཙ ཏིརཙྪཱནགཏོ ཙ ཨུབྷིནྣཾ ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ ཨུབྷིནྣཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི སངྒྷཱདིསེསེན དུཀྐཊསྶ།
Itthī ca tiracchānagato ca ubhinnaṃ itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti saṅghādisesena dukkaṭassa.
ཨིཏྠཱི ཙ ཏིརཙྪཱནགཏོ ཙ ཨུབྷིནྣཾ ཝེམཏིཀོ…པེ॰… པཎྜཀསཉྙཱི… པུརིསསཉྙཱི … ཏིརཙྪཱནགཏསཉྙཱི སཱརཏྟོ ཙ། བྷིཀྑུ ཙ ནཾ ཨུབྷིནྣཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི ཐུལླཙྩཡེན དུཀྐཊསྶ།
Itthī ca tiracchānagato ca ubhinnaṃ vematiko…pe… paṇḍakasaññī… purisasaññī … tiracchānagatasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
པཎྜཀོ ཙ པུརིསོ ཙ ཨུབྷིནྣཾ པཎྜཀསཉྙཱི སཱརཏྟོ ཙ། བྷིཀྑུ ཙ ནཾ ཨུབྷིནྣཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི ཐུལླཙྩཡེན དུཀྐཊསྶ།
Paṇḍako ca puriso ca ubhinnaṃ paṇḍakasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
པཎྜཀོ ཙ པུརིསོ ཙ ཨུབྷིནྣཾ ཝེམཏིཀོ…པེ॰… པུརིསསཉྙཱི… ཏིརཙྪཱནགཏསཉྙཱི… ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ ཨུབྷིནྣཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དྭིནྣཾ དུཀྐཊཱནཾ།
Paṇḍako ca puriso ca ubhinnaṃ vematiko…pe… purisasaññī… tiracchānagatasaññī… itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
པཎྜཀོ ཙ ཏིརཙྪཱནགཏོ ཙ ཨུབྷིནྣཾ པཎྜཀསཉྙཱི སཱརཏྟོ ཙ། བྷིཀྑུ ཙ ནཾ ཨུབྷིནྣཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི ཐུལླཙྩཡེན དུཀྐཊསྶ།
Paṇḍako ca tiracchānagato ca ubhinnaṃ paṇḍakasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
པཎྜཀོ ཙ ཏིརཙྪཱནགཏོ ཙ ཨུབྷིནྣཾ ཝེམཏིཀོ…པེ॰… པུརིསསཉྙཱི… ཏིརཙྪཱནགཏསཉྙཱི… ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ ཨུབྷིནྣཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དྭིནྣཾ དུཀྐཊཱནཾ།
Paṇḍako ca tiracchānagato ca ubhinnaṃ vematiko…pe… purisasaññī… tiracchānagatasaññī… itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
པུརིསོ ཙ ཏིརཙྪཱནགཏོ ཙ ཨུབྷིནྣཾ པུརིསསཉྙཱི སཱརཏྟོ ཙ། བྷིཀྑུ ཙ ནཾ ཨུབྷིནྣཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དྭིནྣཾ དུཀྐཊཱནཾ།
Puriso ca tiracchānagato ca ubhinnaṃ purisasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
པུརིསོ ཙ ཏིརཙྪཱནགཏོ ཙ ཨུབྷིནྣཾ ཝེམཏིཀོ…པེ॰… ཏིརཙྪཱནགཏསཉྙཱི… ཨིཏྠིསཉྙཱི… པཎྜཀསཉྙཱི སཱརཏྟོ ཙ། བྷིཀྑུ ཙ ནཾ ཨུབྷིནྣཾ ཀཱཡེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དྭིནྣཾ དུཀྐཊཱནཾ།
Puriso ca tiracchānagato ca ubhinnaṃ vematiko…pe… tiracchānagatasaññī… itthisaññī… paṇḍakasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
དུམཱུལཀཾ ནིཊྛིཏཾ།
Dumūlakaṃ niṭṭhitaṃ.
༢༧༦. ཨིཏྠཱི ཙ ཧོཏི ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ ཨིཏྠིཡཱ ཀཱཡེན ཀཱཡཔཊིབདྡྷཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི ཐུལླཙྩཡསྶ…པེ॰…།
276. Itthī ca hoti itthisaññī sāratto ca. Bhikkhu ca naṃ itthiyā kāyena kāyapaṭibaddhaṃ āmasati parāmasati…pe… gaṇhāti chupati, āpatti thullaccayassa…pe….
དྭེ ཨིཏྠིཡོ དྭིནྣཾ ཨིཏྠཱིནཾ ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ དྭིནྣཾ ཨིཏྠཱིནཾ ཀཱཡེན ཀཱཡཔཊིབདྡྷཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དྭིནྣཾ ཐུལླཙྩཡཱནཾ …པེ॰…།
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ kāyena kāyapaṭibaddhaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ …pe….
ཨིཏྠཱི ཙ པཎྜཀོ ཙ ཨུབྷིནྣཾ ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ ཨུབྷིནྣཾ ཀཱཡེན ཀཱཡཔཊིབདྡྷཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི ཐུལླཙྩཡེན དུཀྐཊསྶ…པེ॰…།
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ kāyena kāyapaṭibaddhaṃ āmasati parāmasati…pe… gaṇhāti chupati, āpatti thullaccayena dukkaṭassa…pe….
ཨིཏྠཱི ཙ ཧོཏི ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ ཨིཏྠིཡཱ ཀཱཡཔཊིབདྡྷེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི ཐུལླཙྩཡསྶ…པེ॰…།
Itthī ca hoti itthisaññī sāratto ca. Bhikkhu ca naṃ itthiyā kāyapaṭibaddhena kāyaṃ āmasati parāmasati…pe… gaṇhāti chupati, āpatti thullaccayassa…pe….
དྭེ ཨིཏྠིཡོ དྭིནྣཾ ཨིཏྠཱིནཾ ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ དྭིནྣཾ ཨིཏྠཱིནཾ ཀཱཡཔཊིབདྡྷེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དྭིནྣཾ ཐུལླཙྩཡཱནཾ…པེ॰…།
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ kāyapaṭibaddhena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ…pe….
ཨིཏྠཱི ཙ པཎྜཀོ ཙ ཨུབྷིནྣཾ ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ ཨུབྷིནྣཾ ཀཱཡཔཊིབདྡྷེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི ཐུལླཙྩཡེན དུཀྐཊསྶ…པེ॰…།
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ kāyapaṭibaddhena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa…pe….
ཨིཏྠཱི ཙ ཧོཏི ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ ཨིཏྠིཡཱ ཀཱཡཔཊིབདྡྷེན ཀཱཡཔཊིབདྡྷཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དུཀྐཊསྶ…པེ॰…།
Itthī ca hoti itthisaññī sāratto ca. Bhikkhu ca naṃ itthiyā kāyapaṭibaddhena kāyapaṭibaddhaṃ āmasati parāmasati…pe… gaṇhāti chupati, āpatti dukkaṭassa…pe….
དྭེ ཨིཏྠིཡོ དྭིནྣཾ ཨིཏྠཱིནཾ ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ དྭིནྣཾ ཨིཏྠཱིནཾ ཀཱཡཔཊིབདྡྷེན ཀཱཡཔཊིབདྡྷཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དྭིནྣཾ དུཀྐཊཱནཾ…པེ॰…།
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ kāyapaṭibaddhena kāyapaṭibaddhaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ…pe….
ཨིཏྠཱི ཙ པཎྜཀོ ཙ ཨུབྷིནྣཾ ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ ཨུབྷིནྣཾ ཀཱཡཔཊིབདྡྷེན ཀཱཡཔཊིབདྡྷཾ ཨཱམསཏི པརཱམསཏི…པེ॰… གཎྷཱཏི ཚུཔཏི, ཨཱཔཏྟི དྭིནྣཾ དུཀྐཊཱནཾ…པེ॰…།
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ kāyapaṭibaddhena kāyapaṭibaddhaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ…pe….
ཨིཏྠཱི ཙ ཧོཏི ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ ཨིཏྠིཡཱ ནིསྶགྒིཡེན ཀཱཡཾ ཨཱམསཏི ཨཱཔཏྟི དུཀྐཊསྶ…པེ॰…།
Itthī ca hoti itthisaññī sāratto ca. Bhikkhu ca naṃ itthiyā nissaggiyena kāyaṃ āmasati āpatti dukkaṭassa…pe….
དྭེ ཨིཏྠིཡོ དྭིནྣཾ ཨིཏྠཱིནཾ ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ དྭིནྣཾ ཨིཏྠཱིནཾ ནིསྶགྒིཡེན ཀཱཡཾ ཨཱམསཏི, ཨཱཔཏྟི དྭིནྣཾ དུཀྐཊཱནཾ…པེ॰…།
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ nissaggiyena kāyaṃ āmasati, āpatti dvinnaṃ dukkaṭānaṃ…pe….
ཨིཏྠཱི ཙ པཎྜཀོ ཙ ཨུབྷིནྣཾ ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ ཨུབྷིནྣཾ ནིསྶགྒིཡེན ཀཱཡཾ ཨཱམསཏི, ཨཱཔཏྟི དྭིནྣཾ དུཀྐཊཱནཾ…པེ॰…།
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ nissaggiyena kāyaṃ āmasati, āpatti dvinnaṃ dukkaṭānaṃ…pe….
ཨིཏྠཱི ཙ ཧོཏི ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ ཨིཏྠིཡཱ ནིསྶགྒིཡེན ཀཱཡཔཊིབདྡྷཾ ཨཱམསཏི, ཨཱཔཏྟི དུཀྐཊསྶ…པེ॰…།
Itthī ca hoti itthisaññī sāratto ca. Bhikkhu ca naṃ itthiyā nissaggiyena kāyapaṭibaddhaṃ āmasati, āpatti dukkaṭassa…pe….
དྭེ ཨིཏྠིཡོ དྭིནྣཾ ཨིཏྠཱིནཾ ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ དྭིནྣཾ ཨིཏྠཱིནཾ ནིསྶགྒིཡེན ཀཱཡཔཊིབདྡྷཾ ཨཱམསཏི, ཨཱཔཏྟི དྭིནྣཾ དུཀྐཊཱནཾ…པེ॰…།
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ nissaggiyena kāyapaṭibaddhaṃ āmasati, āpatti dvinnaṃ dukkaṭānaṃ…pe….
ཨིཏྠཱི ཙ པཎྜཀོ ཙ ཨུབྷིནྣཾ ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ ཨུབྷིནྣཾ ནིསྶགྒིཡེན ཀཱཡཔཊིབདྡྷཾ ཨཱམསཏི, ཨཱཔཏྟི དྭིནྣཾ དུཀྐཊཱནཾ…པེ॰…།
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ nissaggiyena kāyapaṭibaddhaṃ āmasati, āpatti dvinnaṃ dukkaṭānaṃ…pe….
ཨིཏྠཱི ཙ ཧོཏི ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ ཨིཏྠིཡཱ ནིསྶགྒིཡེན ནིསྶགྒིཡཾ ཨཱམསཏི, ཨཱཔཏྟི དུཀྐཊསྶ…པེ॰…།
Itthī ca hoti itthisaññī sāratto ca. Bhikkhu ca naṃ itthiyā nissaggiyena nissaggiyaṃ āmasati, āpatti dukkaṭassa…pe….
དྭེ ཨིཏྠིཡོ དྭིནྣཾ ཨིཏྠཱིནཾ ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ དྭིནྣཾ ཨིཏྠཱིནཾ ནིསྶགྒིཡེན ནིསྶགྒིཡཾ ཨཱམསཏི, ཨཱཔཏྟི དྭིནྣཾ དུཀྐཊཱནཾ…པེ॰…།
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ nissaggiyena nissaggiyaṃ āmasati, āpatti dvinnaṃ dukkaṭānaṃ…pe….
ཨིཏྠཱི ཙ པཎྜཀོ ཙ ཨུབྷིནྣཾ ཨིཏྠིསཉྙཱི སཱརཏྟོ ཙ། བྷིཀྑུ ཙ ནཾ ཨུབྷིནྣཾ ནིསྶགྒིཡེན ནིསྶགྒིཡཾ ཨཱམསཏི, ཨཱཔཏྟི དྭིནྣཾ དུཀྐཊཱནཾ…པེ॰…།
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ nissaggiyena nissaggiyaṃ āmasati, āpatti dvinnaṃ dukkaṭānaṃ…pe….
བྷིཀྑུཔེཡྻཱལོ ནིཊྛིཏོ།
Bhikkhupeyyālo niṭṭhito.
༢༧༧. ཨིཏྠཱི ཙ ཧོཏི ཨིཏྠིསཉྙཱི སཱརཏྟོ ཙ། ཨིཏྠཱི ཙ ནཾ བྷིཀྑུསྶ ཀཱཡེན ཀཱཡཾ ཨཱམསཏི པརཱམསཏི ཨོམསཏི ཨུམྨསཏི ཨོལངྒྷེཏི ཨུལླངྒྷེཏི ཨཱཀཌྜྷཏི པཏིཀཌྜྷཏི ཨབྷིནིགྒཎྷཱཏི ཨབྷིནིཔྤཱིལེ༹ཏི གཎྷཱཏི ཚུཔཏི, སེཝནཱདྷིཔྤཱཡོ ཀཱཡེན ཝཱཡམཏི ཕསྶཾ པཊིཝིཛཱནཱཏི, ཨཱཔཏྟི སངྒྷཱདིསེསསྶ…པེ॰…།
277. Itthī ca hoti itthisaññī sāratto ca. Itthī ca naṃ bhikkhussa kāyena kāyaṃ āmasati parāmasati omasati ummasati olaṅgheti ullaṅgheti ākaḍḍhati patikaḍḍhati abhiniggaṇhāti abhinippīḷeti gaṇhāti chupati, sevanādhippāyo kāyena vāyamati phassaṃ paṭivijānāti, āpatti saṅghādisesassa…pe….
དྭེ ཨིཏྠིཡོ དྭིནྣཾ ཨིཏྠཱིནཾ ཨིཏྠིསཉྙཱི སཱརཏྟོ ཙ། ཨིཏྠིཡོ ཙ ནཾ བྷིཀྑུསྶ ཀཱཡེན ཀཱཡཾ ཨཱམསནྟི པརཱམསནྟི ཨོམསནྟི ཨུམྨསནྟི ཨོལངྒྷེནྟི ཨུལླངྒྷེནྟི ཨཱཀཌྜྷནྟི པཏིཀཌྜྷནྟི ཨབྷིནིགྒཎྷནྟི ཨབྷིནིཔྤཱིལེ༹ནྟི གཎྷནྟི ཚུཔནྟི, སེཝནཱདྷིཔྤཱཡོ ཀཱཡེན ཝཱཡམཏི ཕསྶཾ པཊིཝིཛཱནཱཏི, ཨཱཔཏྟི དྭིནྣཾ སངྒྷཱདིསེསཱནཾ…པེ॰…།
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa kāyena kāyaṃ āmasanti parāmasanti omasanti ummasanti olaṅghenti ullaṅghenti ākaḍḍhanti patikaḍḍhanti abhiniggaṇhanti abhinippīḷenti gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ saṅghādisesānaṃ…pe….
ཨིཏྠཱི ཙ པཎྜཀོ ཙ ཨུབྷིནྣཾ ཨིཏྠིསཉྙཱི སཱརཏྟོ ཙ། ཨུབྷོ ཙ ནཾ བྷིཀྑུསྶ ཀཱཡེན ཀཱཡཾ ཨཱམསནྟི པརཱམསནྟི…པེ॰… གཎྷནྟི ཚུཔནྟི, སེཝནཱདྷིཔྤཱཡོ ཀཱཡེན ཝཱཡམཏི ཕསྶཾ པཊིཝིཛཱནཱཏི, ཨཱཔཏྟི སངྒྷཱདིསེསེན དུཀྐཊསྶ…པེ॰…།
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa kāyena kāyaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti saṅghādisesena dukkaṭassa…pe….
ཨིཏྠཱི ཙ ཧོཏི ཨིཏྠིསཉྙཱི སཱརཏྟོ ཙ། ཨིཏྠཱི ཙ ནཾ བྷིཀྑུསྶ ཀཱཡེན ཀཱཡཔཊིབདྡྷཾ ཨཱམསཏི པརཱམསཏི…པེ॰… གཎྷཱཏི ཚུཔཏི, སེཝནཱདྷིཔྤཱཡོ ཀཱཡེན ཝཱཡམཏི ཕསྶཾ པཊིཝིཛཱནཱཏི, ཨཱཔཏྟི ཐུལླཙྩཡསྶ…པེ॰…།
Itthī ca hoti itthisaññī sāratto ca. Itthī ca naṃ bhikkhussa kāyena kāyapaṭibaddhaṃ āmasati parāmasati…pe… gaṇhāti chupati, sevanādhippāyo kāyena vāyamati phassaṃ paṭivijānāti, āpatti thullaccayassa…pe….
དྭེ ཨིཏྠིཡོ དྭིནྣཾ ཨིཏྠཱིནཾ ཨིཏྠིསཉྙཱི སཱརཏྟོ ཙ། ཨིཏྠིཡོ ཙ ནཾ བྷིཀྑུསྶ ཀཱཡེན ཀཱཡཔཊིབདྡྷཾ ཨཱམསནྟི པརཱམསནྟི…པེ॰… གཎྷནྟི ཚུཔནྟི, སེཝནཱདྷིཔྤཱཡོ ཀཱཡེན ཝཱཡམཏི ཕསྶཾ པཊིཝིཛཱནཱཏི, ཨཱཔཏྟི དྭིནྣཾ ཐུལླཙྩཡཱནཾ…པེ॰…།
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa kāyena kāyapaṭibaddhaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ thullaccayānaṃ…pe….
ཨིཏྠཱི ཙ པཎྜཀོ ཙ ཨུབྷིནྣཾ ཨིཏྠིསཉྙཱི སཱརཏྟོ ཙ། ཨུབྷོ ཙ ནཾ བྷིཀྑུསྶ ཀཱཡེན ཀཱཡཔཊིབདྡྷཾ ཨཱམསནྟི པརཱམསནྟི…པེ॰… གཎྷནྟི ཚུཔནྟི, སེཝནཱདྷིཔྤཱཡོ ཀཱཡེན ཝཱཡམཏི ཕསྶཾ པཊིཝིཛཱནཱཏི, ཨཱཔཏྟི ཐུལླཙྩཡེན དུཀྐཊསྶ…པེ॰…།
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa kāyena kāyapaṭibaddhaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti thullaccayena dukkaṭassa…pe….
ཨིཏྠཱི ཙ ཧོཏི ཨིཏྠིསཉྙཱི སཱརཏྟོ ཙ། ཨིཏྠཱི ཙ ནཾ བྷིཀྑུསྶ ཀཱཡཔཊིབདྡྷེན ཀཱཡཾ ཨཱམསཏི པརཱམསཏི…པེ॰… གཎྷཱཏི ཚུཔཏི སེཝནཱདྷིཔྤཱཡོ ཀཱཡེན ཝཱཡམཏི ཕསྶཾ པཊིཝིཛཱནཱཏི, ཨཱཔཏྟི ཐུལླཙྩཡསྶ…པེ॰…།
Itthī ca hoti itthisaññī sāratto ca. Itthī ca naṃ bhikkhussa kāyapaṭibaddhena kāyaṃ āmasati parāmasati…pe… gaṇhāti chupati sevanādhippāyo kāyena vāyamati phassaṃ paṭivijānāti, āpatti thullaccayassa…pe….
དྭེ ཨིཏྠིཡོ དྭིནྣཾ ཨིཏྠཱིནཾ ཨིཏྠིསཉྙཱི སཱརཏྟོ ཙ། ཨིཏྠིཡོ ཙ ནཾ བྷིཀྑུསྶ ཀཱཡཔཊིབདྡྷེན ཀཱཡཾ ཨཱམསནྟི པརཱམསནྟི…པེ॰… གཎྷནྟི ཚུཔནྟི, སེཝནཱདྷིཔྤཱཡོ ཀཱཡེན ཝཱཡམཏི ཕསྶཾ པཊིཝིཛཱནཱཏི, ཨཱཔཏྟི དྭིནྣཾ ཐུལླཙྩཡཱནཾ…པེ॰…།
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa kāyapaṭibaddhena kāyaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ thullaccayānaṃ…pe….
ཨིཏྠཱི ཙ པཎྜཀོ ཙ ཨུབྷིནྣཾ ཨིཏྠིསཉྙཱི སཱརཏྟོ ཙ། ཨུབྷོ ཙ ནཾ བྷིཀྑུསྶ ཀཱཡཔཊིབདྡྷེན ཀཱཡཾ ཨཱམསནྟི པརཱམསནྟི…པེ॰… གཎྷནྟི ཚུཔནྟི, སེཝནཱདྷིཔྤཱཡོ ཀཱཡེན ཝཱཡམཏི ཕསྶཾ པཊིཝིཛཱནཱཏི, ཨཱཔཏྟི ཐུལླཙྩཡེན དུཀྐཊསྶ…པེ॰…།
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa kāyapaṭibaddhena kāyaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti thullaccayena dukkaṭassa…pe….
༢༧༨. ཨིཏྠཱི ཙ ཧོཏི ཨིཏྠིསཉྙཱི སཱརཏྟོ ཙ། ཨིཏྠཱི ཙ ནཾ བྷིཀྑུསྶ ཀཱཡཔཊིབདྡྷེན ཀཱཡཔཊིབདྡྷཾ ཨཱམསཏི པརཱམསཏི…པེ॰… གཎྷཱཏི ཚུཔཏི, སེཝནཱདྷིཔྤཱཡོ ཀཱཡེན ཝཱཡམཏི ཕསྶཾ པཊིཝིཛཱནཱཏི, ཨཱཔཏྟི དུཀྐཊསྶ…པེ॰…།
278. Itthī ca hoti itthisaññī sāratto ca. Itthī ca naṃ bhikkhussa kāyapaṭibaddhena kāyapaṭibaddhaṃ āmasati parāmasati…pe… gaṇhāti chupati, sevanādhippāyo kāyena vāyamati phassaṃ paṭivijānāti, āpatti dukkaṭassa…pe….
དྭེ ཨིཏྠིཡོ དྭིནྣཾ ཨིཏྠཱིནཾ ཨིཏྠིསཉྙཱི སཱརཏྟོ ཙ། ཨིཏྠིཡོ ཙ ནཾ བྷིཀྑུསྶ ཀཱཡཔཊིབདྡྷེན ཀཱཡཔཊིབདྡྷཾ ཨཱམསནྟི པརཱམསནྟི…པེ॰… གཎྷནྟི ཚུཔནྟི, སེཝནཱདྷིཔྤཱཡོ ཀཱཡེན ཝཱཡམཏི ཕསྶཾ པཊིཝིཛཱནཱཏི, ཨཱཔཏྟི དྭིནྣཾ དུཀྐཊཱནཾ…པེ॰…།
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa kāyapaṭibaddhena kāyapaṭibaddhaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ཨིཏྠཱི ཙ པཎྜཀོ ཙ ཨུབྷིནྣཾ ཨིཏྠིསཉྙཱི སཱརཏྟོ ཙ། ཨུབྷོ ཙ ནཾ བྷིཀྑུསྶ ཀཱཡཔཊིབདྡྷེན ཀཱཡཔཊིབདྡྷཾ ཨཱམསནྟི པརཱམསནྟི…པེ॰… གཎྷནྟི ཚུཔནྟི, སེཝནཱདྷིཔྤཱཡོ ཀཱཡེན ཝཱཡམཏི ཕསྶཾ པཊིཝིཛཱནཱཏི, ཨཱཔཏྟི དྭིནྣཾ དུཀྐཊཱནཾ…པེ॰…།
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa kāyapaṭibaddhena kāyapaṭibaddhaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ཨིཏྠཱི ཙ ཧོཏི ཨིཏྠིསཉྙཱི སཱརཏྟོ ཙ། ཨིཏྠཱི ཙ ནཾ བྷིཀྑུསྶ ནིསྶགྒིཡེན ཀཱཡཾ ཨཱམསཏི། སེཝནཱདྷིཔྤཱཡོ ཀཱཡེན ཝཱཡམཏི ཕསྶཾ པཊིཝིཛཱནཱཏི, ཨཱཔཏྟི དུཀྐཊསྶ…པེ॰…།
Itthī ca hoti itthisaññī sāratto ca. Itthī ca naṃ bhikkhussa nissaggiyena kāyaṃ āmasati. Sevanādhippāyo kāyena vāyamati phassaṃ paṭivijānāti, āpatti dukkaṭassa…pe….
དྭེ ཨིཏྠིཡོ དྭིནྣཾ ཨིཏྠཱིནཾ ཨིཏྠིསཉྙཱི སཱརཏྟོ ཙ། ཨིཏྠིཡོ ཙ ནཾ བྷིཀྑུསྶ ནིསྶགྒིཡེན ཀཱཡཾ ཨཱམསནྟི། སེཝནཱདྷིཔྤཱཡོ ཀཱཡེན ཝཱཡམཏི ཕསྶཾ པཊིཝིཛཱནཱཏི, ཨཱཔཏྟི དྭིནྣཾ དུཀྐཊཱནཾ…པེ॰…།
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa nissaggiyena kāyaṃ āmasanti. Sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ཨིཏྠཱི ཙ པཎྜཀོ ཙ ཨུབྷིནྣཾ ཨིཏྠིསཉྙཱི སཱརཏྟོ ཙ། ཨུབྷོ ཙ ནཾ བྷིཀྑུསྶ ནིསྶགྒིཡེན ཀཱཡཾ ཨཱམསནྟི། སེཝནཱདྷིཔྤཱཡོ ཀཱཡེན ཝཱཡམཏི ཕསྶཾ པཊིཝིཛཱནཱཏི, ཨཱཔཏྟི དྭིནྣཾ དུཀྐཊཱནཾ…པེ॰…།
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa nissaggiyena kāyaṃ āmasanti. Sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ཨིཏྠཱི ཙ ཧོཏི ཨིཏྠིསཉྙཱི སཱརཏྟོ ཙ། ཨིཏྠཱི ཙ ནཾ བྷིཀྑུསྶ ནིསྶགྒིཡེན ཀཱཡཔཊིབདྡྷཾ ཨཱམསཏི། སེཝནཱདྷིཔྤཱཡོ ཀཱཡེན ཝཱཡམཏི ཕསྶཾ པཊིཝིཛཱནཱཏི, ཨཱཔཏྟི དུཀྐཊསྶ…པེ॰…།
Itthī ca hoti itthisaññī sāratto ca. Itthī ca naṃ bhikkhussa nissaggiyena kāyapaṭibaddhaṃ āmasati. Sevanādhippāyo kāyena vāyamati phassaṃ paṭivijānāti, āpatti dukkaṭassa…pe….
དྭེ ཨིཏྠིཡོ དྭིནྣཾ ཨིཏྠཱིནཾ ཨིཏྠིསཉྙཱི སཱརཏྟོ ཙ། ཨིཏྠིཡོ ཙ ནཾ བྷིཀྑུསྶ ནིསྶགྒིཡེན ཀཱཡཔཊིབདྡྷཾ ཨཱམསནྟི། སེཝནཱདྷིཔྤཱཡོ ཀཱཡེན ཝཱཡམཏི ཕསྶཾ པཊིཝིཛཱནཱཏི, ཨཱཔཏྟི དྭིནྣཾ དུཀྐཊཱནཾ…པེ॰…།
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa nissaggiyena kāyapaṭibaddhaṃ āmasanti. Sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ཨིཏྠཱི ཙ པཎྜཀོ ཙ ཨུབྷིནྣཾ ཨིཏྠིསཉྙཱི སཱརཏྟོ ཙ། ཨུབྷོ ཙ ནཾ བྷིཀྑུསྶ ནིསྶགྒིཡེན ཀཱཡཔཊིབདྡྷཾ ཨཱམསནྟི། སེཝནཱདྷིཔྤཱཡོ ཀཱཡེན ཝཱཡམཏི ཕསྶཾ པཊིཝིཛཱནཱཏི, ཨཱཔཏྟི དྭིནྣཾ དུཀྐཊཱནཾ…པེ॰…།
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa nissaggiyena kāyapaṭibaddhaṃ āmasanti. Sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ཨིཏྠཱི ཙ ཧོཏི ཨིཏྠིསཉྙཱི སཱརཏྟོ ཙ། ཨིཏྠཱི ཙ ནཾ བྷིཀྑུསྶ ནིསྶགྒིཡེན ནིསྶགྒིཡཾ ཨཱམསཏི། སེཝནཱདྷིཔྤཱཡོ ཀཱཡེན ཝཱཡམཏི, ན ཙ ཕསྶཾ པཊིཝིཛཱནཱཏི, ཨཱཔཏྟི དུཀྐཊསྶ…པེ॰…།
Itthī ca hoti itthisaññī sāratto ca. Itthī ca naṃ bhikkhussa nissaggiyena nissaggiyaṃ āmasati. Sevanādhippāyo kāyena vāyamati, na ca phassaṃ paṭivijānāti, āpatti dukkaṭassa…pe….
དྭེ ཨིཏྠིཡོ དྭིནྣཾ ཨིཏྠཱིནཾ ཨིཏྠིསཉྙཱི སཱརཏྟོ ཙ། ཨིཏྠིཡོ ཙ ནཾ བྷིཀྑུསྶ ནིསྶགྒིཡེན ནིསྶགྒིཡཾ ཨཱམསནྟི། སེཝནཱདྷིཔྤཱཡོ ཀཱཡེན ཝཱཡམཏི, ན ཙ ཕསྶཾ པཊིཝིཛཱནཱཏི, ཨཱཔཏྟི དྭིནྣཾ དུཀྐཊཱནཾ…པེ॰…།
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa nissaggiyena nissaggiyaṃ āmasanti. Sevanādhippāyo kāyena vāyamati, na ca phassaṃ paṭivijānāti, āpatti dvinnaṃ dukkaṭānaṃ…pe….
ཨིཏྠཱི ཙ པཎྜཀོ ཙ ཨུབྷིནྣཾ ཨིཏྠིསཉྙཱི སཱརཏྟོ ཙ། ཨུབྷོ ཙ ནཾ བྷིཀྑུསྶ ནིསྶགྒིཡེན ནིསྶགྒིཡཾ ཨཱམསནྟི། སེཝནཱདྷིཔྤཱཡོ ཀཱཡེན ཝཱཡམཏི, ན ཙ ཕསྶཾ པཊིཝིཛཱནཱཏི, ཨཱཔཏྟི དྭིནྣཾ དུཀྐཊཱནཾ…པེ॰…།
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa nissaggiyena nissaggiyaṃ āmasanti. Sevanādhippāyo kāyena vāyamati, na ca phassaṃ paṭivijānāti, āpatti dvinnaṃ dukkaṭānaṃ…pe….
༢༧༩. སེཝནཱདྷིཔྤཱཡོ ཀཱཡེན ཝཱཡམཏི ཕསྶཾ པཊིཝིཛཱནཱཏི, ཨཱཔཏྟི སངྒྷཱདིསེསསྶ།
279. Sevanādhippāyo kāyena vāyamati phassaṃ paṭivijānāti, āpatti saṅghādisesassa.
སེཝནཱདྷིཔྤཱཡོ ཀཱཡེན ཝཱཡམཏི, ན ཙ ཕསྶཾ པཊིཝིཛཱནཱཏི, ཨཱཔཏྟི དུཀྐཊསྶ།
Sevanādhippāyo kāyena vāyamati, na ca phassaṃ paṭivijānāti, āpatti dukkaṭassa.
སེཝནཱདྷིཔྤཱཡོ ན ཙ ཀཱཡེན ཝཱཡམཏི, ཕསྶཾ པཊིཝིཛཱནཱཏི, ཨནཱཔཏྟི།
Sevanādhippāyo na ca kāyena vāyamati, phassaṃ paṭivijānāti, anāpatti.
སེཝནཱདྷིཔྤཱཡོ ན ཙ ཀཱཡེན ཝཱཡམཏི, ན ཙ ཕསྶཾ པཊིཝིཛཱནཱཏི, ཨནཱཔཏྟི།
Sevanādhippāyo na ca kāyena vāyamati, na ca phassaṃ paṭivijānāti, anāpatti.
མོཀྑཱདྷིཔྤཱཡོ ཀཱཡེན ཝཱཡམཏི, ཕསྶཾ པཊིཝིཛཱནཱཏི, ཨནཱཔཏྟི།
Mokkhādhippāyo kāyena vāyamati, phassaṃ paṭivijānāti, anāpatti.
མོཀྑཱདྷིཔྤཱཡོ ཀཱཡེན ཝཱཡམཏི, ན ཙ ཕསྶཾ པཊིཝིཛཱནཱཏི , ཨནཱཔཏྟི།
Mokkhādhippāyo kāyena vāyamati, na ca phassaṃ paṭivijānāti , anāpatti.
མོཀྑཱདྷིཔྤཱཡོ ན ཙ ཀཱཡེན ཝཱཡམཏི, ཕསྶཾ པཊིཝིཛཱནཱཏི, ཨནཱཔཏྟི།
Mokkhādhippāyo na ca kāyena vāyamati, phassaṃ paṭivijānāti, anāpatti.
མོཀྑཱདྷིཔྤཱཡོ ན ཙ ཀཱཡེན ཝཱཡམཏི, ན ཙ ཕསྶཾ པཊིཝིཛཱནཱཏི, ཨནཱཔཏྟི།
Mokkhādhippāyo na ca kāyena vāyamati, na ca phassaṃ paṭivijānāti, anāpatti.
༢༨༠. ཨནཱཔཏྟི ཨསཉྩིཙྩ, ཨསཏིཡཱ, ཨཛཱནནྟསྶ, ཨསཱདིཡནྟསྶ, ཨུམྨཏྟཀསྶ, ཁིཏྟཙིཏྟསྶ, ཝེདནཱཊྚསྶ, ཨཱདིཀམྨིཀསྶཱཏི།
280. Anāpatti asañcicca, asatiyā, ajānantassa, asādiyantassa, ummattakassa, khittacittassa, vedanāṭṭassa, ādikammikassāti.
ཝིནཱིཏཝཏྠུཨུདྡཱནགཱཐཱ
Vinītavatthuuddānagāthā
མཱཏཱ དྷཱིཏཱ བྷགིནཱི ཙ, ཛཱཡཱ ཡཀྑཱི ཙ པཎྜཀོ།
Mātā dhītā bhaginī ca, jāyā yakkhī ca paṇḍako;
སུཏྟཱ མཏཱ ཏིརཙྪཱནཱ, དཱརུདྷིཏལིཀཱཡ ཙ༎
Suttā matā tiracchānā, dārudhitalikāya ca.
སམྤཱིལེ༹ སངྐམོ མགྒོ, རུཀྑོ ནཱཝཱ ཙ རཛྫུ ཙ།
Sampīḷe saṅkamo maggo, rukkho nāvā ca rajju ca;
དཎྜོ པཏྟཾ པཎཱམེསི, ཝནྡེ ཝཱཡམི ནཙྪུཔེཏི༎
Daṇḍo pattaṃ paṇāmesi, vande vāyami nacchupeti.
ཝིནཱིཏཝཏྠུ
Vinītavatthu
༢༨༡. ཏེན ཁོ པན སམཡེན ཨཉྙཏརོ བྷིཀྑུ མཱཏུཡཱ མཱཏུཔེམེན ཨཱམསི། ཏསྶ ཀུཀྐུཙྩཾ ཨཧོསི – ‘‘བྷགཝཏཱ སིཀྑཱཔདཾ པཉྙཏྟཾ, ཀཙྩི ནུ ཁོ ཨཧཾ སངྒྷཱདིསེསཾ ཨཱཔཏྟིཾ ཨཱཔནྣོ’’ཏི? བྷགཝཏོ ཨེཏམཏྠཾ ཨཱརོཙེསི། ‘‘ཨནཱཔཏྟི, བྷིཀྑུ, སངྒྷཱདིསེསསྶ; ཨཱཔཏྟི དུཀྐཊསྶཱ’’ཏི།
281. Tena kho pana samayena aññataro bhikkhu mātuyā mātupemena āmasi. Tassa kukkuccaṃ ahosi – ‘‘bhagavatā sikkhāpadaṃ paññattaṃ, kacci nu kho ahaṃ saṅghādisesaṃ āpattiṃ āpanno’’ti? Bhagavato etamatthaṃ ārocesi. ‘‘Anāpatti, bhikkhu, saṅghādisesassa; āpatti dukkaṭassā’’ti.
ཏེན ཁོ པན སམཡེན ཨཉྙཏརོ བྷིཀྑུ དྷཱིཏུཡཱ དྷཱིཏུཔེམེན ཨཱམསི…པེ॰… བྷགིནིཡཱ བྷགིནིཔེམེན ཨཱམསི། ཏསྶ ཀུཀྐུཙྩཾ ཨཧོསི…པེ॰… ‘‘ཨནཱཔཏྟི, བྷིཀྑུ, སངྒྷཱདིསེསསྶ; ཨཱཔཏྟི དུཀྐཊསྶཱ’’ཏི།
Tena kho pana samayena aññataro bhikkhu dhītuyā dhītupemena āmasi…pe… bhaginiyā bhaginipemena āmasi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
ཏེན ཁོ པན སམཡེན ཨཉྙཏརོ བྷིཀྑུ པུརཱཎདུཏིཡིཀཱཡ ཀཱཡསཾསགྒཾ སམཱཔཛྫི། ཏསྶ ཀུཀྐུཙྩཾ ཨཧོསི…པེ॰… ‘‘ཨཱཔཏྟིཾ ཏྭཾ, བྷིཀྑུ, ཨཱཔནྣོ སངྒྷཱདིསེས’’ནྟི།
Tena kho pana samayena aññataro bhikkhu purāṇadutiyikāya kāyasaṃsaggaṃ samāpajji. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
ཏེན ཁོ པན སམཡེན ཨཉྙཏརོ བྷིཀྑུ ཡཀྑིནིཡཱ ཀཱཡསཾསགྒཾ སམཱཔཛྫི། ཏསྶ ཀུཀྐུཙྩཾ ཨཧོསི…པེ॰… ‘‘ཨནཱཔཏྟི, བྷིཀྑུ, སངྒྷཱདིསེསསྶ; ཨཱཔཏྟི ཐུལླཙྩཡསྶཱ’’ཏི།
Tena kho pana samayena aññataro bhikkhu yakkhiniyā kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
ཏེན ཁོ པན སམཡེན ཨཉྙཏརོ བྷིཀྑུ པཎྜཀསྶ ཀཱཡསཾསགྒཾ སམཱཔཛྫི། ཏསྶ ཀུཀྐུཙྩཾ ཨཧོསི…པེ॰… ‘‘ཨནཱཔཏྟི , བྷིཀྑུ, སངྒྷཱདིསེསསྶ; ཨཱཔཏྟི ཐུལླཙྩཡསྶཱ’’ཏི།
Tena kho pana samayena aññataro bhikkhu paṇḍakassa kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti , bhikkhu, saṅghādisesassa; āpatti thullaccayassā’’ti.
ཏེན ཁོ པན སམཡེན ཨཉྙཏརོ བྷིཀྑུ སུཏྟིཏྠིཡཱ ཀཱཡསཾསགྒཾ སམཱཔཛྫི། ཏསྶ ཀུཀྐུཙྩཾ ཨཧོསི…པེ॰… ‘‘ཨཱཔཏྟིཾ ཏྭཾ, བྷིཀྑུ, ཨཱཔནྣོ སངྒྷཱདིསེས’’ནྟི།
Tena kho pana samayena aññataro bhikkhu suttitthiyā kāyasaṃsaggaṃ samāpajji. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
ཏེན ཁོ པན སམཡེན ཨཉྙཏརོ བྷིཀྑུ མཏིཏྠིཡཱ ཀཱཡསཾསགྒཾ སམཱཔཛྫི། ཏསྶ ཀུཀྐུཙྩཾ ཨཧོསི…པེ॰… ‘‘ཨནཱཔཏྟི, བྷིཀྑུ, སངྒྷཱདིསེསསྶ; ཨཱཔཏྟི ཐུལླཙྩཡསྶཱ’’ཏི།
Tena kho pana samayena aññataro bhikkhu matitthiyā kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
ཏེན ཁོ པན སམཡེན ཨཉྙཏརོ བྷིཀྑུ ཏིརཙྪཱནགཏིཏྠིཡཱ ཀཱཡསཾསགྒཾ སམཱཔཛྫི། ཏསྶ ཀུཀྐུཙྩཾ ཨཧོསི…པེ॰… ‘‘ཨནཱཔཏྟི, བྷིཀྑུ, སངྒྷཱདིསེསསྶ; ཨཱཔཏྟི དུཀྐཊསྶཱ’’ཏི།
Tena kho pana samayena aññataro bhikkhu tiracchānagatitthiyā kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
ཏེན ཁོ པན སམཡེན ཨཉྙཏརོ བྷིཀྑུ དཱརུདྷཱིཏལིཀཱཡ ཀཱཡསཾསགྒཾ སམཱཔཛྫི། ཏསྶ ཀུཀྐུཙྩཾ ཨཧོསི…པེ॰… ‘‘ཨནཱཔཏྟི, བྷིཀྑུ, སངྒྷཱདིསེསསྶ; ཨཱཔཏྟི དུཀྐཊསྶཱ’’ཏི།
Tena kho pana samayena aññataro bhikkhu dārudhītalikāya kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
༢༨༢. ཏེན ཁོ པན སམཡེན སམྦཧུལཱ ཨིཏྠིཡོ ཨཉྙཏརཾ བྷིཀྑུཾ སམྤཱིལེ༹ཏྭཱ བཱཧཱཔརམྤརཱཡ ཨཱནེསུཾ། ཏསྶ ཀུཀྐུཙྩཾ ཨཧོསི…པེ॰… ‘‘སཱདིཡི ཏྭཾ, བྷིཀྑཱུ’’ཏི? ‘‘ནཱཧཾ, བྷགཝཱ, སཱདིཡི’’ནྟི། ‘‘ཨནཱཔཏྟི, བྷིཀྑཱུ, ཨསཱདིཡནྟསྶཱ’’ཏི།
282. Tena kho pana samayena sambahulā itthiyo aññataraṃ bhikkhuṃ sampīḷetvā bāhāparamparāya ānesuṃ. Tassa kukkuccaṃ ahosi…pe… ‘‘sādiyi tvaṃ, bhikkhū’’ti? ‘‘Nāhaṃ, bhagavā, sādiyi’’nti. ‘‘Anāpatti, bhikkhū, asādiyantassā’’ti.
ཏེན ཁོ པན སམཡེན ཨཉྙཏརོ བྷིཀྑུ ཨིཏྠིཡཱ ཨབྷིརཱུལ༹ྷཾ སངྐམཾ སཱརཏྟོ སཉྩཱལེསི། ཏསྶ ཀུཀྐུཙྩཾ ཨཧོསི…པེ॰… ‘‘ཨནཱཔཏྟི, བྷིཀྑུ, སངྒྷཱདིསེསསྶ; ཨཱཔཏྟི དུཀྐཊསྶཱ’’ཏི།
Tena kho pana samayena aññataro bhikkhu itthiyā abhirūḷhaṃ saṅkamaṃ sāratto sañcālesi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
ཏེན ཁོ པན སམཡེན ཨཉྙཏརོ བྷིཀྑུ ཨིཏྠིཾ པཊིཔཐེ པསྶིཏྭཱ སཱརཏྟོ ཨཾསཀཱུཊེན པཧཱརཾ ཨདཱསི། ཏསྶ ཀུཀྐུཙྩཾ ཨཧོསི…པེ॰… ‘‘ཨཱཔཏྟིཾ ཏྭཾ, བྷིཀྑུ, ཨཱཔནྣོ སངྒྷཱདིསེས’’ནྟི།
Tena kho pana samayena aññataro bhikkhu itthiṃ paṭipathe passitvā sāratto aṃsakūṭena pahāraṃ adāsi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
ཏེན ཁོ པན སམཡེན ཨཉྙཏརོ བྷིཀྑུ ཨིཏྠིཡཱ ཨབྷིརཱུལ༹ྷཾ རུཀྑཾ སཱརཏྟོ སཉྩཱལེསི། ཏསྶ ཀུཀྐུཙྩཾ ཨཧོསི…པེ॰… ‘‘ཨནཱཔཏྟི, བྷིཀྑུ, སངྒྷཱདིསེསསྶ; ཨཱཔཏྟི དུཀྐཊསྶཱ’’ཏི།
Tena kho pana samayena aññataro bhikkhu itthiyā abhirūḷhaṃ rukkhaṃ sāratto sañcālesi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
ཏེན ཁོ པན སམཡེན ཨཉྙཏརོ བྷིཀྑུ ཨིཏྠིཡཱ ཨབྷིརཱུལ༹ྷཾ ནཱཝཾ སཱརཏྟོ སཉྩཱལེསི། ཏསྶ ཀུཀྐུཙྩཾ ཨཧོསི…པེ॰… ‘‘ཨནཱཔཏྟི, བྷིཀྑུ, སངྒྷཱདིསེསསྶ; ཨཱཔཏྟི དུཀྐཊསྶཱ’’ཏི།
Tena kho pana samayena aññataro bhikkhu itthiyā abhirūḷhaṃ nāvaṃ sāratto sañcālesi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
ཏེན ཁོ པན སམཡེན ཨཉྙཏརོ བྷིཀྑུ ཨིཏྠིཡཱ གཧིཏཾ རཛྫུཾ སཱརཏྟོ ཨཱཝིཉྪི 9། ཏསྶ ཀུཀྐུཙྩཾ ཨཧོསི…པེ॰… ‘‘ཨནཱཔཏྟི, བྷིཀྑུ, སངྒྷཱདིསེསསྶ; ཨཱཔཏྟི ཐུལླཙྩཡསྶཱ’’ཏི།
Tena kho pana samayena aññataro bhikkhu itthiyā gahitaṃ rajjuṃ sāratto āviñchi 10. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
ཏེན ཁོ པན སམཡེན ཨཉྙཏརོ བྷིཀྑུ ཨིཏྠིཡཱ གཧིཏཾ དཎྜཾ སཱརཏྟོ ཨཱཝིཉྪི། ཏསྶ ཀུཀྐུཙྩཾ ཨཧོསི…པེ॰… ‘‘ཨནཱཔཏྟི, བྷིཀྑུ, སངྒྷཱདིསེསསྶ; ཨཱཔཏྟི ཐུལླཙྩཡསྶཱ’’ཏི།
Tena kho pana samayena aññataro bhikkhu itthiyā gahitaṃ daṇḍaṃ sāratto āviñchi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
ཏེན ཁོ པན སམཡེན ཨཉྙཏརོ བྷིཀྑུ སཱརཏྟོ ཨིཏྠིཾ པཏྟེན པཎཱམེསི། ཏསྶ ཀུཀྐུཙྩཾ ཨཧོསི…པེ॰… ‘‘ཨནཱཔཏྟི, བྷིཀྑུ, སངྒྷཱདིསེསསྶ; ཨཱཔཏྟི ཐུལླཙྩཡསྶཱ’’ཏི།
Tena kho pana samayena aññataro bhikkhu sāratto itthiṃ pattena paṇāmesi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
ཏེན ཁོ པན སམཡེན ཨཉྙཏརོ བྷིཀྑུ ཨིཏྠིཡཱ ཝནྡནྟིཡཱ སཱརཏྟོ པཱདཾ ཨུཙྩཱརེསི། ཏསྶ ཀུཀྐུཙྩཾ ཨཧོསི…པེ॰… ‘‘ཨཱཔཏྟིཾ ཏྭཾ, བྷིཀྑུ, ཨཱཔནྣོ སངྒྷཱདིསེས’’ནྟི།
Tena kho pana samayena aññataro bhikkhu itthiyā vandantiyā sāratto pādaṃ uccāresi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
ཏེན ཁོ པན སམཡེན ཨཉྙཏརོ བྷིཀྑུ ཨིཏྠིཾ གཧེསྶཱམཱིཏི ཝཱཡམིཏྭཱ ན ཚུཔི།
Tena kho pana samayena aññataro bhikkhu itthiṃ gahessāmīti vāyamitvā na chupi.
ཏསྶ ཀུཀྐུཙྩཾ ཨཧོསི…པེ॰… ‘‘ཨནཱཔཏྟི, བྷིཀྑུ, སངྒྷཱདིསེསསྶ; ཨཱཔཏྟི དུཀྐཊསྶཱ’’ཏི།
Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
ཀཱཡསཾསགྒསིཀྑཱཔདཾ ནིཊྛིཏཾ དུཏིཡཾ།
Kāyasaṃsaggasikkhāpadaṃ niṭṭhitaṃ dutiyaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༢. ཀཱཡསཾསགྒསིཀྑཱཔདཝཎྞནཱ • 2. Kāyasaṃsaggasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༢. ཀཱཡསཾསགྒསིཀྑཱཔདཝཎྞནཱ • 2. Kāyasaṃsaggasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā
༢. ཀཱཡསཾསགྒསིཀྑཱཔདཝཎྞནཱ • 2. Kāyasaṃsaggasikkhāpadavaṇṇanā
པདབྷཱཛནཱིཡཝཎྞནཱ • Padabhājanīyavaṇṇanā
ཝིནཱིཏཝཏྠུཝཎྞནཱ • Vinītavatthuvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༢. ཀཱཡསཾསགྒསིཀྑཱཔདཝཎྞནཱ • 2. Kāyasaṃsaggasikkhāpadavaṇṇanā
