| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
2. காயஸங்ஸக்³க³ஸிக்கா²பத³வண்ணனா
2. Kāyasaṃsaggasikkhāpadavaṇṇanā
‘‘ஓதிண்ணோ’’தி (ஸாரத்த²॰ டீ॰ 2.270) இத³ங் கம்மஸாத⁴னங், கத்துஸாத⁴னங் வா ஹோதீதி தது³ப⁴யவஸேன அத்த²ங் த³ஸ்ஸெந்தோ ‘‘யக்கா²தீ³ஹி விய ஸத்தா’’திஆதி³மாஹ. அஸமபெக்கி²த்வாதி யதா²ஸபா⁴வங் அனுபபரிக்கி²த்வா, யதா² தே ரதிஜனகா ரூபாத³யோ விஸயா அனிச்சது³க்கா²ஸுபா⁴னத்தாகாரேன அவட்டி²தா, ததா² அபஸ்ஸித்வாதி வுத்தங் ஹோதி. பரிணதேனாதி பரிவத்தேன. தேனாஹ ‘‘யதா² பரிவத்தமான’’ந்திஆதி³. வுத்தராக³வஸேனாதி காயஸங்ஸக்³க³ராக³வஸேன. தத³ஹுஜாதாயபீதி தஸ்மிங் அஹனி ஜாதங் ஜனநங் ஏதிஸ்ஸாதி தத³ஹுஜாதா, தஸ்மிங் அஹனி ஜாதாதி வா தத³ஹுஜாதா, தாய, தங் தி³வஸங் ஜாதாயபீதி அத்தோ², ஜாதமத்தாய அல்லமங்ஸபேஸிவண்ணாயபீதி வுத்தங் ஹோதி.
‘‘Otiṇṇo’’ti (sārattha. ṭī. 2.270) idaṃ kammasādhanaṃ, kattusādhanaṃ vā hotīti tadubhayavasena atthaṃ dassento ‘‘yakkhādīhi viya sattā’’tiādimāha. Asamapekkhitvāti yathāsabhāvaṃ anupaparikkhitvā, yathā te ratijanakā rūpādayo visayā aniccadukkhāsubhānattākārena avaṭṭhitā, tathā apassitvāti vuttaṃ hoti. Pariṇatenāti parivattena. Tenāha ‘‘yathā parivattamāna’’ntiādi. Vuttarāgavasenāti kāyasaṃsaggarāgavasena. Tadahujātāyapīti tasmiṃ ahani jātaṃ jananaṃ etissāti tadahujātā, tasmiṃ ahani jātāti vā tadahujātā, tāya, taṃ divasaṃ jātāyapīti attho, jātamattāya allamaṃsapesivaṇṇāyapīti vuttaṃ hoti.
அஸ்ஸாதி ‘‘காயஸங்ஸக்³க³ங் ஸமாபஜ்ஜெய்யா’’தி பத³ஸ்ஸ. இதா³னி ஹத்தா²தீ³னங் விபா⁴க³த³ஸ்ஸனத்த²ங் ‘‘தத்த² ஹத்தோ² நாம கப்பரதோ பட்டா²யா’’திஆதி³மாஹ. கப்பரதோ பட்டா²யாதி து³தியமஹாஸந்தி⁴ங் உபாதா³ய. அஞ்ஞத்த² பன மணிப³ந்த⁴தோ பட்டா²ய யாவ அக்³க³னகா² ஹத்தோ². வினந்தி⁴த்வா வா அவினந்தி⁴த்வா வா கதகேஸகலாபஸ்ஸேதங் அதி⁴வசனந்தி ஸம்ப³ந்தோ⁴. தத்த² வினந்தி⁴த்வாதி தீஹி கேஸவட்டீஹி க³ந்தி²த்வா. ஸுவண்ணசீரகந்தி ஸுவண்ணபாளிங். ஹத்த²ஞ்ச வேணிஞ்ச ட²பெத்வா அவஸேஸஸரீரங் அங்க³ந்தி ஆஹ ‘‘அவஸேஸஸ்ஸ ஸரீரஸ்ஸா’’திஆதி³.
Assāti ‘‘kāyasaṃsaggaṃ samāpajjeyyā’’ti padassa. Idāni hatthādīnaṃ vibhāgadassanatthaṃ ‘‘tattha hattho nāma kapparato paṭṭhāyā’’tiādimāha. Kapparato paṭṭhāyāti dutiyamahāsandhiṃ upādāya. Aññattha pana maṇibandhato paṭṭhāya yāva agganakhā hattho. Vinandhitvā vā avinandhitvā vā katakesakalāpassetaṃ adhivacananti sambandho. Tattha vinandhitvāti tīhi kesavaṭṭīhi ganthitvā. Suvaṇṇacīrakanti suvaṇṇapāḷiṃ. Hatthañca veṇiñca ṭhapetvā avasesasarīraṃ aṅganti āha ‘‘avasesassa sarīrassā’’tiādi.
யோ ஹி ஸேவனாதி⁴ப்பாயோபி நிச்சலேன காயேன கேவலங் ப²ஸ்ஸங் படிவிஜானாதி ஸாதி³யதி அனுபோ⁴தி, தஸ்ஸ சித்துப்பாத³மத்தே ஆபத்தியா அபா⁴வதோ அனாபத்தீதி ஆஹ ‘‘காயேன அவாயமித்வா’’திஆதி³. மொக்கா²தி⁴ப்பாயேனாதி இத்தி²தோ முச்சிதுகாமதாதி⁴ப்பாயேன. அஸஞ்சிச்சாதி ‘‘இமினா உபாயேன இமங் பு²ஸிஸ்ஸாமீ’’தி அசேதெத்வா. ஏவஞ்ஹி அசேதெத்வா பத்தப்படிக்³க³ஹணாதீ³ஸு மாதுகா³மஸ்ஸ அங்கே³ பு²ட்டே²பி அனாபத்தி. அஸதியாதி அஞ்ஞவிஹிதோ ஹோதி, ‘‘மாதுகா³மங் பு²ஸிஸ்ஸாமீ’’தி ஸதி நத்தி², ஏவங் அஸதியா ஹத்த²பாத³பஸாரணாதி³காலே பு²ஸந்தஸ்ஸ அனாபத்தி. அஜானந்தஸ்ஸாதி தா³ரகவேஸேன டி²தங் தா³ரிகங் ‘‘இத்தீ²’’தி அஜானந்தோ கேனசிதே³வ கரணீயேன பு²ஸதி, ஏவங் ‘‘இத்தீ²’’தி அஜானந்தஸ்ஸ பு²ஸதோ அனாபத்தி. அஸாதி³யந்தஸ்ஸாதி காயஸங்ஸக்³க³ங் அஸாதி³யந்தஸ்ஸ பா³ஹாபரம்பராய நீதபி⁴க்கு²ஸ்ஸ விய அனாபத்தி. இத⁴ பன உதா³யித்தே²ரோ ஆதி³கம்மிகோ. தஸ்ஸ அனாபத்தி ஆதி³கம்மிகஸ்ஸாதி.
Yo hi sevanādhippāyopi niccalena kāyena kevalaṃ phassaṃ paṭivijānāti sādiyati anubhoti, tassa cittuppādamatte āpattiyā abhāvato anāpattīti āha ‘‘kāyena avāyamitvā’’tiādi. Mokkhādhippāyenāti itthito muccitukāmatādhippāyena. Asañciccāti ‘‘iminā upāyena imaṃ phusissāmī’’ti acetetvā. Evañhi acetetvā pattappaṭiggahaṇādīsu mātugāmassa aṅge phuṭṭhepi anāpatti. Asatiyāti aññavihito hoti, ‘‘mātugāmaṃ phusissāmī’’ti sati natthi, evaṃ asatiyā hatthapādapasāraṇādikāle phusantassa anāpatti. Ajānantassāti dārakavesena ṭhitaṃ dārikaṃ ‘‘itthī’’ti ajānanto kenacideva karaṇīyena phusati, evaṃ ‘‘itthī’’ti ajānantassa phusato anāpatti. Asādiyantassāti kāyasaṃsaggaṃ asādiyantassa bāhāparamparāya nītabhikkhussa viya anāpatti. Idha pana udāyitthero ādikammiko. Tassa anāpatti ādikammikassāti.
காயஸங்ஸக்³க³ஸிக்கா²பத³வண்ணனா நிட்டி²தா.
Kāyasaṃsaggasikkhāpadavaṇṇanā niṭṭhitā.
