| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
2. காயஸங்ஸக்³க³ஸிக்கா²பத³வண்ணனா
2. Kāyasaṃsaggasikkhāpadavaṇṇanā
269. து³தியே யேஸு விவடேஸு அந்த⁴காரோ ஹோதி, தானி விவரந்தோதி ப்³ராஹ்மணியா ஸத்³தி⁴ங் காயஸங்ஸக்³க³ங் ஸமாபஜ்ஜிதுகாமோ ஏவமகாஸி. தேன கதஸ்ஸபி விப்பகாரஸ்ஸ அத்தனி கதத்தா ‘‘அத்தனோ விப்பகார’’ந்தி வுத்தங். உளாரத்ததாதி உளாரசித்ததா, பணீதாதி⁴முத்ததாதி வுத்தங் ஹோதி.
269. Dutiye yesu vivaṭesu andhakāro hoti, tāni vivarantoti brāhmaṇiyā saddhiṃ kāyasaṃsaggaṃ samāpajjitukāmo evamakāsi. Tena katassapi vippakārassa attani katattā ‘‘attano vippakāra’’nti vuttaṃ. Uḷārattatāti uḷāracittatā, paṇītādhimuttatāti vuttaṃ hoti.
270. ஓதிண்ணோதி இத³ங் கம்மஸாத⁴னங் கத்துஸாத⁴னங் வா ஹோதீதி தது³ப⁴யவஸேன அத்த²ங் த³ஸ்ஸெந்தோ ‘‘யக்கா²தீ³ஹி விய ஸத்தா’’திஆதி³மாஹ. அஸமபெக்கி²த்வாதி யதா²ஸபா⁴வங் அனுபபரிக்கி²த்வா, யதா² தே ரதிஜனகா ரூபாத³யோ விஸயா அனிச்சது³க்கா²ஸுபா⁴னத்தாகாரேன அவத்தி²தா, ததா² அபஸ்ஸித்வாதி வுத்தங் ஹோதி.
270.Otiṇṇoti idaṃ kammasādhanaṃ kattusādhanaṃ vā hotīti tadubhayavasena atthaṃ dassento ‘‘yakkhādīhi viya sattā’’tiādimāha. Asamapekkhitvāti yathāsabhāvaṃ anupaparikkhitvā, yathā te ratijanakā rūpādayo visayā aniccadukkhāsubhānattākārena avatthitā, tathā apassitvāti vuttaṃ hoti.
271. ஸஞ்ஞமவேலந்தி ஸீலமரியாத³ங். ஆசாரோதி ஆசரணங் ஹத்த²க³ஹணாதி³கிரியா. அஸ்ஸாதி ‘‘காயஸங்ஸக்³க³ங் ஸமாபஜ்ஜெய்யா’’தி பத³ஸ்ஸ.
271.Saññamavelanti sīlamariyādaṃ. Ācāroti ācaraṇaṃ hatthagahaṇādikiriyā. Assāti ‘‘kāyasaṃsaggaṃ samāpajjeyyā’’ti padassa.
273. ஏதேஸங் பதா³னங் வஸேனாதி ஆமஸனாதி³பதா³னங் வஸேன. இதோ சிதோ ச…பே॰… ஸஞ்சோபேதீதி அத்தனோ ஹத்த²ங் வா காயங் வா திரியங் இதோ சிதோ ச ஸஞ்சாரேதி. ‘‘காயதோ அமோசெத்வாவாதி வசனதோ மத்த²கதோ பட்டா²ய ஹத்த²ங் ஓதாரெந்தஸ்ஸ காயதோ மோசெத்வா நிவத்த²ஸாடகூபரி ஓமஸந்தஸ்ஸ து²ல்லச்சயங், ஸாடகதோ ஓதாரெத்வா ஜங்க⁴தோ பட்டா²ய காயங் ஓமஸந்தஸ்ஸ புன ஸங்கா⁴தி³ஸேஸோ’’தி வத³ந்தி.
273.Etesaṃ padānaṃ vasenāti āmasanādipadānaṃ vasena. Ito cito ca…pe… sañcopetīti attano hatthaṃ vā kāyaṃ vā tiriyaṃ ito cito ca sañcāreti. ‘‘Kāyato amocetvāvāti vacanato matthakato paṭṭhāya hatthaṃ otārentassa kāyato mocetvā nivatthasāṭakūpari omasantassa thullaccayaṃ, sāṭakato otāretvā jaṅghato paṭṭhāya kāyaṃ omasantassa puna saṅghādiseso’’ti vadanti.
த்³வாத³ஸஸுபி ஆமஸனாதி³ப்பயோகே³ஸு ஏகேகஸ்மிங் பயோகே³ காயதோ அமோசிதே ஏகேகாவ ஆபத்தி ஹோதீதி ஆஹ ‘‘மூலக்³க³ஹணமேவ பமாண’’ந்தி. இத³ஞ்ச ஏகேன ஹத்தே²ன காயங் க³ஹெத்வா இதரேன ஹத்தே²ன காயபராமஸனங் ஸந்தா⁴ய வுத்தங். ஏகேன பன ஹத்தே²ன காயபடிப³த்³த⁴ங் க³ஹெத்வா இதரேன தத்த² தத்த² காயங் பராமஸதோ பயோக³க³ணனாய ஆபத்தி. அயங் பன ஸங்கா⁴தி³ஸேஸோ ந கேவலங் வத்து²வஸேனேவ, அபிச ஸஞ்ஞாவஸேனபீதி ஆஹ ‘‘இத்தி²யா இத்தி²ஸஞ்ஞிஸ்ஸ ஸங்கா⁴தி³ஸேஸோ’’தி. பாளியங் திரச்சா²னக³தோ ச ஹோதீதி எத்த² திரச்சா²னக³தித்தி²யா திரச்சா²னக³தபுரிஸஸ்ஸ ச க³ஹணங் வேதி³தப்³ப³ங்.
Dvādasasupi āmasanādippayogesu ekekasmiṃ payoge kāyato amocite ekekāva āpatti hotīti āha ‘‘mūlaggahaṇameva pamāṇa’’nti. Idañca ekena hatthena kāyaṃ gahetvā itarena hatthena kāyaparāmasanaṃ sandhāya vuttaṃ. Ekena pana hatthena kāyapaṭibaddhaṃ gahetvā itarena tattha tattha kāyaṃ parāmasato payogagaṇanāya āpatti. Ayaṃ pana saṅghādiseso na kevalaṃ vatthuvaseneva, apica saññāvasenapīti āha ‘‘itthiyā itthisaññissa saṅghādiseso’’ti. Pāḷiyaṃ tiracchānagato ca hotīti ettha tiracchānagatitthiyā tiracchānagatapurisassa ca gahaṇaṃ veditabbaṃ.
ஸமஸாராகோ³தி காயஸங்ஸக்³க³ராகே³ன ஏகஸதி³ஸராகோ³. புரிமனயேனேவாதி ரஜ்ஜுவத்தா²தீ³ஹி பரிக்கி²பித்வா க³ஹணே வுத்தனயேன. புன புரிமனயேனேவாதி ஸமஸாராகோ³ வுத்தோ. அனந்தரனயேனேவாதி காயபடிப³த்³த⁴ஆமஸனநயேன . வேணிக்³க³ஹணேன லோமானம்பி ஸங்க³ஹிதத்தா லோமானங் பு²ஸனேபி ஸங்கா⁴தி³ஸேஸோ வுத்தோ. இதா³னி வுத்தமேவத்த²ங் பகாஸேதுகாமோ ‘‘உபாதி³ன்னகேன ஹீ’’திஆதி³மாஹ.
Samasārāgoti kāyasaṃsaggarāgena ekasadisarāgo. Purimanayenevāti rajjuvatthādīhi parikkhipitvā gahaṇe vuttanayena. Puna purimanayenevāti samasārāgo vutto. Anantaranayenevāti kāyapaṭibaddhaāmasananayena . Veṇiggahaṇena lomānampi saṅgahitattā lomānaṃ phusanepi saṅghādiseso vutto. Idāni vuttamevatthaṃ pakāsetukāmo ‘‘upādinnakena hī’’tiādimāha.
யதா²னித்³தி³ட்ட²னித்³தே³ஸேதி யதா²வுத்தகாயஸங்ஸக்³க³னித்³தே³ஸே. தேனாதி தேன யதா²வுத்தகாரணேன. ஸஞ்ஞாய விராகி³தம்ஹீதி ஸஞ்ஞாய விரத்³தா⁴ய. லிங்க³ப்³யத்தயேன ‘‘விராகி³தம்ஹீ’’தி வுத்தங். இமங் நாம வத்து²ந்தி இமஸ்மிங் ஸிக்கா²பதே³ ஆக³தங் ஸந்தா⁴ய வத³தி. அஞ்ஞம்பி யங் கிஞ்சி வத்து²ங் ஸந்தா⁴ய வத³தீதிபி கேசி. ஸாரத்தந்தி காயஸங்ஸக்³க³ராகே³ன ஸாரத்தங். விரத்தந்தி காயஸங்ஸக்³க³ராக³ரஹிதங் மாதுப⁴கி³னீஆதி³ங் ஸந்தா⁴ய வத³தி. ‘‘விரத்தங் க³ண்ஹிஸ்ஸாமீ’’தி விரத்தங் க³ண்ஹி, து³க்கடந்தி மாதுபேமாதி³வஸேன க³ஹணே து³க்கடங் வுத்தங்.
Yathāniddiṭṭhaniddeseti yathāvuttakāyasaṃsagganiddese. Tenāti tena yathāvuttakāraṇena. Saññāya virāgitamhīti saññāya viraddhāya. Liṅgabyattayena ‘‘virāgitamhī’’ti vuttaṃ. Imaṃ nāma vatthunti imasmiṃ sikkhāpade āgataṃ sandhāya vadati. Aññampi yaṃ kiñci vatthuṃ sandhāya vadatītipi keci. Sārattanti kāyasaṃsaggarāgena sārattaṃ. Virattanti kāyasaṃsaggarāgarahitaṃ mātubhaginīādiṃ sandhāya vadati. ‘‘Virattaṃ gaṇhissāmī’’ti virattaṃ gaṇhi, dukkaṭanti mātupemādivasena gahaṇe dukkaṭaṃ vuttaṃ.
இமாய பாளியா ஸமேதீதி ஸம்ப³ந்தோ⁴. கத²ங் ஸமேதீதி சே? யதி³ ஹி ‘‘இத்தி²யா காயபடிப³த்³த⁴ங் க³ண்ஹிஸ்ஸாமீ’’தி சித்தே உப்பன்னே இத்தி²ஸஞ்ஞா விராகி³தா ப⁴வெய்ய, காயபடிப³த்³த⁴க்³க³ஹணே து²ல்லச்சயங் வத³ந்தேன ப⁴க³வதா ‘‘இத்தீ² ச ஹோதி இத்தி²ஸஞ்ஞீ சா’’தி ந வத்தப்³ப³ங் ஸியா, வுத்தஞ்ச, தஸ்மா ‘‘இத்தி²யா காயபடிப³த்³த⁴ங் க³ண்ஹிஸ்ஸாமீ’’தி காயங் க³ண்ஹந்தஸ்ஸ இத்தி²ஸஞ்ஞா விராகி³தா நாம ந ஹோதீதி ‘‘காயபடிப³த்³த⁴ங் க³ண்ஹிஸ்ஸாமீதி காயங் க³ண்ஹந்தோ யதா²வத்து²கமேவ ஆபஜ்ஜதீ’’தி மஹாஸுமத்தே²ரேன வுத்தவாதோ³ இமாய பாளியா ஸமேதி. யோ பனெத்த² ‘‘ஸதிபி இத்தி²ஸஞ்ஞாய காயபடிப³த்³த⁴ங் க³ண்ஹந்தஸ்ஸ க³ஹணஸமயே ‘காயபடிப³த்³த⁴ங் க³ண்ஹிஸ்ஸாமீ’தி ஸஞ்ஞங் ட²பெத்வா ‘இத்தி²ங் க³ண்ஹாமீ’தி ஸஞ்ஞாய அபா⁴வதோ வத்து²ஸஞ்ஞானங் பி⁴ன்னத்தா அயுத்த’’ந்தி வதெ³ய்ய, ஸோ புச்சி²தப்³போ³ ‘‘கிங் காயபடிப³த்³த⁴ங் வத்தா²தி³ங் க³ண்ஹந்தோ இத்தி²யா ராகே³ன க³ண்ஹாதி, உதா³ஹு வத்தா²தீ³ஸு ராகே³னா’’தி. யதி³ ‘‘வத்தா²தீ³ஸு ராகே³ன க³ண்ஹாதீ’’தி வதெ³ய்ய, இத்தி²யா காயபடிப³த்³த⁴ங் அஹுத்வா அஞ்ஞத்த² டி²தங் வத்தா²தி³ங் க³ண்ஹந்தஸ்ஸபி து²ல்லச்சயங் ஸியா, தஸ்மா இத்தீ² இத்தி²ஸஞ்ஞா ஸாரத்தபா⁴வோ க³ஹணஞ்சாதி அங்க³பாரிபூரிஸப்³பா⁴வதோ மஹாஸுமத்தே²ரவாதோ³வ யுத்தவாதோ³. அட்ட²கதா²வினிச்ச²யேஹி ச ஸமேதீதி எத்தா²பி அயமதி⁴ப்பாயோ – யதி³ ஸஞ்ஞாவிராகே³ன விராகி³தங் நாம ஸியா, ‘‘ஸம்ப³ஹுலா இத்தி²யோ பா³ஹாஹி பரிக்கி²பித்வா க³ண்ஹாமீ’’தி ஏவங்ஸஞ்ஞிஸ்ஸ ‘‘மஜ்ஜ²க³தித்தி²யோ காயபடிப³த்³தே⁴ன க³ண்ஹாமீ’’தி ஏவரூபாய ஸஞ்ஞாய அபா⁴வதோ மஜ்ஜ²க³தானங் வஸேன து²ல்லச்சயங் ந ஸியா, ஏவங் ஸந்தேபி அட்ட²கதா²ய து²ல்லச்சயஸ்ஸ வுத்தத்தா ஸஞ்ஞாவிராகே³ன விராகி³தங் நாம ந ஹோதீதி அயமத்தோ² ஸித்³தோ⁴யேவாதி. நீலேன து³விஞ்ஞெய்யஸபா⁴வதோ காளித்தீ² வுத்தா.
Imāya pāḷiyā sametīti sambandho. Kathaṃ sametīti ce? Yadi hi ‘‘itthiyā kāyapaṭibaddhaṃ gaṇhissāmī’’ti citte uppanne itthisaññā virāgitā bhaveyya, kāyapaṭibaddhaggahaṇe thullaccayaṃ vadantena bhagavatā ‘‘itthī ca hoti itthisaññī cā’’ti na vattabbaṃ siyā, vuttañca, tasmā ‘‘itthiyā kāyapaṭibaddhaṃ gaṇhissāmī’’ti kāyaṃ gaṇhantassa itthisaññā virāgitā nāma na hotīti ‘‘kāyapaṭibaddhaṃ gaṇhissāmīti kāyaṃ gaṇhanto yathāvatthukameva āpajjatī’’ti mahāsumattherena vuttavādo imāya pāḷiyā sameti. Yo panettha ‘‘satipi itthisaññāya kāyapaṭibaddhaṃ gaṇhantassa gahaṇasamaye ‘kāyapaṭibaddhaṃ gaṇhissāmī’ti saññaṃ ṭhapetvā ‘itthiṃ gaṇhāmī’ti saññāya abhāvato vatthusaññānaṃ bhinnattā ayutta’’nti vadeyya, so pucchitabbo ‘‘kiṃ kāyapaṭibaddhaṃ vatthādiṃ gaṇhanto itthiyā rāgena gaṇhāti, udāhu vatthādīsu rāgenā’’ti. Yadi ‘‘vatthādīsu rāgena gaṇhātī’’ti vadeyya, itthiyā kāyapaṭibaddhaṃ ahutvā aññattha ṭhitaṃ vatthādiṃ gaṇhantassapi thullaccayaṃ siyā, tasmā itthī itthisaññā sārattabhāvo gahaṇañcāti aṅgapāripūrisabbhāvato mahāsumattheravādova yuttavādo. Aṭṭhakathāvinicchayehi ca sametīti etthāpi ayamadhippāyo – yadi saññāvirāgena virāgitaṃ nāma siyā, ‘‘sambahulā itthiyo bāhāhi parikkhipitvā gaṇhāmī’’ti evaṃsaññissa ‘‘majjhagatitthiyo kāyapaṭibaddhena gaṇhāmī’’ti evarūpāya saññāya abhāvato majjhagatānaṃ vasena thullaccayaṃ na siyā, evaṃ santepi aṭṭhakathāya thullaccayassa vuttattā saññāvirāgena virāgitaṃ nāma na hotīti ayamattho siddhoyevāti. Nīlena duviññeyyasabhāvato kāḷitthī vuttā.
279. ஸேவனாதி⁴ப்பாயோதி ப²ஸ்ஸஸுக²ஸேவனாதி⁴ப்பாயோ. இத்தி²யா காயேன பி⁴க்கு²ஸ்ஸ காயபடிப³த்³தா⁴மஸனவாரேபி ப²ஸ்ஸங் படிவிஜானாதீதி இத³ங் அத்தனோ காயபடிப³த்³தா⁴மஸனேபி காயஸம்ப³ந்த⁴ஸபா⁴வதோ வுத்தங். எத்தா²தி நிஸ்ஸக்³கி³யேன நிஸ்ஸக்³கி³யவாரே. மொக்கா²தி⁴ப்பாயோதி எத்த² பட²மங் காயஸங்ஸக்³க³ராகே³ ஸதிபி பச்சா² மொக்கா²தி⁴ப்பாயஸ்ஸ அனாபத்தி.
279.Sevanādhippāyoti phassasukhasevanādhippāyo. Itthiyā kāyena bhikkhussa kāyapaṭibaddhāmasanavārepi phassaṃ paṭivijānātīti idaṃ attano kāyapaṭibaddhāmasanepi kāyasambandhasabhāvato vuttaṃ. Etthāti nissaggiyena nissaggiyavāre. Mokkhādhippāyoti ettha paṭhamaṃ kāyasaṃsaggarāge satipi pacchā mokkhādhippāyassa anāpatti.
281. பாரிபந்தி²காதி விலும்பனிகா, அந்தராயிகாதி வுத்தங் ஹோதி. நதீ³ஸோதேன வுய்ஹமானங் மாதரந்தி உக்கட்ட²பரிச்சே²த³த³ஸ்ஸனத்த²ங் வுத்தங், அஞ்ஞாஸுபி பன இத்தீ²ஸு காருஞ்ஞாதி⁴ப்பாயேன மாதரி வுத்தனயேன படிபஜ்ஜந்தஸ்ஸ நேவத்தி² தோ³ஸோதி வத³ந்தி. ‘‘மாதர’’ந்தி வுத்தத்தா அஞ்ஞாஸங் ந வட்டதீதி வத³ந்தாபி அத்தி². திணண்டு³பகந்தி ஹிரீவேராதி³மூலேஹி கதசும்ப³டகங். தாலபண்ணமுத்³தி³கந்தி தாலபண்ணேஹி கதஅங்கு³லிமுத்³தி³கங். பரிவத்தெத்வாதி அத்தனோ நிவாஸனபாருபனபா⁴வதோ அபனெத்வா, சீவரத்தா²ய அபனாமெத்வாதி வுத்தங் ஹோதி. சீவரத்தா²ய பாத³மூலே ட²பேதி, வட்டதீதி இத³ங் நித³ஸ்ஸனமத்தங், பச்சத்த²ரணவிதானாதி³அத்த²ம்பி வட்டதியேவ, பூஜாதி³அத்த²ங் தாவகாலிகம்பி க³ஹேதுங் வட்டதி.
281.Pāripanthikāti vilumpanikā, antarāyikāti vuttaṃ hoti. Nadīsotena vuyhamānaṃ mātaranti ukkaṭṭhaparicchedadassanatthaṃ vuttaṃ, aññāsupi pana itthīsu kāruññādhippāyena mātari vuttanayena paṭipajjantassa nevatthi dosoti vadanti. ‘‘Mātara’’nti vuttattā aññāsaṃ na vaṭṭatīti vadantāpi atthi. Tiṇaṇḍupakanti hirīverādimūlehi katacumbaṭakaṃ. Tālapaṇṇamuddikanti tālapaṇṇehi kataaṅgulimuddikaṃ. Parivattetvāti attano nivāsanapārupanabhāvato apanetvā, cīvaratthāya apanāmetvāti vuttaṃ hoti. Cīvaratthāya pādamūle ṭhapeti, vaṭṭatīti idaṃ nidassanamattaṃ, paccattharaṇavitānādiatthampi vaṭṭatiyeva, pūjādiatthaṃ tāvakālikampi gahetuṃ vaṭṭati.
இத்தி²ஸண்டா²னேன கதந்தி எத்த² ஹெட்டி²மபரிச்சே²த³தோ பாராஜிகவத்து²பூ⁴ததிரச்சா²னக³தித்தீ²னம்பி அனாமாஸபா⁴வதோ தாதி³ஸங் இத்தி²ஸண்டா²னேன கதங் திரச்சா²னக³தரூபம்பி அனாமாஸந்தி த³ட்ட²ப்³ப³ங். ‘‘பி⁴க்கு²னீஹி படிமாரூபங் ஆமஸிதுங் வட்டதீ’’தி வத³ந்தி ஆசரியா. இத்தி²ரூபானி த³ஸ்ஸெத்வா கதங் வத்த²ஞ்ச பச்சத்த²ரணஞ்ச பி⁴த்திஞ்ச இத்தி²ரூபங் அனாமஸித்வா க³ண்ஹிதுங் வட்டதி. பி⁴ந்தி³த்வாதி எத்த² ஹத்தே²ன அக்³க³ஹெத்வாவ கேனசிதே³வ த³ண்டா³தி³னா பி⁴ந்தி³தப்³ப³ங். எத்த² ச ‘‘அனாமாஸம்பி ஹத்தே²ன அபராமஸித்வா த³ண்டா³தி³னா கேனசி பி⁴ந்தி³துங் வட்டதீ’’தி இத⁴ வுத்தத்தா ‘‘பங்ஸுகூலங் க³ண்ஹந்தேன மாதுகா³மஸரீரேபி ஸத்தா²தீ³ஹி வணங் கத்வா க³ஹேதப்³ப³’’ந்தி வுத்தத்தா ச க³ஹிதமண்டூ³கஸப்பினிங் த³ண்டா³தீ³ஹி நிப்பீளெத்வா மண்டூ³கங் விஸ்ஸஜ்ஜாபேதுங் வட்டதி.
Itthisaṇṭhānena katanti ettha heṭṭhimaparicchedato pārājikavatthubhūtatiracchānagatitthīnampi anāmāsabhāvato tādisaṃ itthisaṇṭhānena kataṃ tiracchānagatarūpampi anāmāsanti daṭṭhabbaṃ. ‘‘Bhikkhunīhi paṭimārūpaṃ āmasituṃ vaṭṭatī’’ti vadanti ācariyā. Itthirūpāni dassetvā kataṃ vatthañca paccattharaṇañca bhittiñca itthirūpaṃ anāmasitvā gaṇhituṃ vaṭṭati. Bhinditvāti ettha hatthena aggahetvāva kenacideva daṇḍādinā bhinditabbaṃ. Ettha ca ‘‘anāmāsampi hatthena aparāmasitvā daṇḍādinā kenaci bhindituṃ vaṭṭatī’’ti idha vuttattā ‘‘paṃsukūlaṃ gaṇhantena mātugāmasarīrepi satthādīhi vaṇaṃ katvā gahetabba’’nti vuttattā ca gahitamaṇḍūkasappiniṃ daṇḍādīhi nippīḷetvā maṇḍūkaṃ vissajjāpetuṃ vaṭṭati.
மக்³க³ங் அதி⁴ட்டா²யாதி மக்³கே³ க³ச்சா²மீதி ஏவங் மக்³க³ஸஞ்ஞீ ஹுத்வாதி அத்தோ². கீளந்தேனாதி இத³ங் கி³ஹிஸந்தகங் ஸந்தா⁴ய வுத்தங், பி⁴க்கு²ஸந்தகங் பன யேன கேனசி அதி⁴ப்பாயேன அனாமஸிதப்³ப³மேவ து³ருபசிண்ணபா⁴வதோ. தாலபனஸாதீ³னீதி செத்த² ஆதி³-ஸத்³தே³ன நாளிகேரலபு³ஜதிபுஸஅலாபு³கும்ப⁴ண்ட³புஸ்ஸப²லஏளாலுகப²லானங் ஸங்க³ஹோ த³ட்ட²ப்³போ³. ‘‘யதா²வுத்தப²லானங்யேவ செத்த² கீளாதி⁴ப்பாயேன ஆமஸனங் ந வட்டதீ’’தி வுத்தத்தா பாஸாணஸக்க²ராதீ³னி கீளாதி⁴ப்பாயேனபி ஆமஸிதுங் வட்டதி.
Maggaṃ adhiṭṭhāyāti magge gacchāmīti evaṃ maggasaññī hutvāti attho. Kīḷantenāti idaṃ gihisantakaṃ sandhāya vuttaṃ, bhikkhusantakaṃ pana yena kenaci adhippāyena anāmasitabbameva durupaciṇṇabhāvato. Tālapanasādīnīti cettha ādi-saddena nāḷikeralabujatipusaalābukumbhaṇḍapussaphalaeḷālukaphalānaṃ saṅgaho daṭṭhabbo. ‘‘Yathāvuttaphalānaṃyeva cettha kīḷādhippāyena āmasanaṃ na vaṭṭatī’’ti vuttattā pāsāṇasakkharādīni kīḷādhippāyenapi āmasituṃ vaṭṭati.
முத்தாதி ஹத்தி²கும்ப⁴ஜாதி³கா அட்ட²விதா⁴ முத்தா. ததா² ஹி ஹத்தி²கும்ப⁴ங், வராஹதா³ட²ங், பு⁴ஜங்க³ஸீஸங், வலாஹகங், வேளு, மச்ச²ஸிரோ, ஸங்கோ², ஸிப்பீதி அட்ட² முத்தாயோனியோ. தத்த² ஹத்தி²கும்ப⁴ஜா பீதவண்ணா பபா⁴விஹீனா. வராஹதா³ட²ஜா வராஹதா³ட²வண்ணாவ. பு⁴ஜங்க³ஸீஸஜா நீலாதி³வண்ணா ஸுவிஸுத்³தா⁴ வட்டலா. வலாஹகஜா ஆபா⁴ஸூரா து³ப்³பி³பா⁴க³ரூபா ரத்திபா⁴கே³ அந்த⁴காரங் வித்³த⁴மந்தியோ திட்ட²ந்தி, தே³வூபபோ⁴கா³ ஏவ ச ஹொந்தி. வேளுஜா கரகப²லஸமானவண்ணா ந ஆபா⁴ஸூரா, தே ச வேளூ அமனுஸ்ஸகோ³சரே ஏவ பதே³ஸே ஜாயந்தி. மச்ச²ஸிரஜா பாடீ²னபிட்டி²ஸமஆனவண்ணா வட்டலா லக⁴வோ ச ஹொந்தி பபா⁴விஹீனா ச, தே ச மச்சா² ஸமுத்³த³மஜ்ஜே²யேவ ஜாயந்தி. ஸங்க²ஜா ஸங்க²உத³ரச்ச²விவண்ணா கோலப²லப்பமாணாபி ஹொந்தி பபா⁴விஹீனாவ. ஸிப்பிஜா பபா⁴விஸேஸயுத்தா ஹொந்தி நானாஸண்டா²னா. ஏவங் ஜாதிதோ அட்ட²விதா⁴ஸு முத்தாஸு யா மச்ச²ஸங்க²ஸிப்பிஜா, தா ஸாமுத்³தி³கா. பு⁴ஜங்க³ஜாபி காசி ஸாமுத்³தி³கா ஹொந்தி, இதரா அஸாமுத்³தி³கா. யஸ்மா ப³ஹுலங் ஸாமுத்³தி³காவ முத்தா லோகே தி³ஸ்ஸந்தி, தத்தா²பி ஸப்பிஜாவ, இதரா கதா³சி காசி, தஸ்மா ஸம்மோஹவினோத³னியங் ‘‘முத்தாதி ஸாமுத்³தி³கா முத்தா’’தி வுத்தங்.
Muttāti hatthikumbhajādikā aṭṭhavidhā muttā. Tathā hi hatthikumbhaṃ, varāhadāṭhaṃ, bhujaṅgasīsaṃ, valāhakaṃ, veḷu, macchasiro, saṅkho, sippīti aṭṭha muttāyoniyo. Tattha hatthikumbhajā pītavaṇṇā pabhāvihīnā. Varāhadāṭhajā varāhadāṭhavaṇṇāva. Bhujaṅgasīsajā nīlādivaṇṇā suvisuddhā vaṭṭalā. Valāhakajā ābhāsūrā dubbibhāgarūpā rattibhāge andhakāraṃ viddhamantiyo tiṭṭhanti, devūpabhogā eva ca honti. Veḷujā karakaphalasamānavaṇṇā na ābhāsūrā, te ca veḷū amanussagocare eva padese jāyanti. Macchasirajā pāṭhīnapiṭṭhisamaānavaṇṇā vaṭṭalā laghavo ca honti pabhāvihīnā ca, te ca macchā samuddamajjheyeva jāyanti. Saṅkhajā saṅkhaudaracchavivaṇṇā kolaphalappamāṇāpi honti pabhāvihīnāva. Sippijā pabhāvisesayuttā honti nānāsaṇṭhānā. Evaṃ jātito aṭṭhavidhāsu muttāsu yā macchasaṅkhasippijā, tā sāmuddikā. Bhujaṅgajāpi kāci sāmuddikā honti, itarā asāmuddikā. Yasmā bahulaṃ sāmuddikāva muttā loke dissanti, tatthāpi sappijāva, itarā kadāci kāci, tasmā sammohavinodaniyaṃ ‘‘muttāti sāmuddikā muttā’’ti vuttaṃ.
மணீதி ட²பெத்வா வேளுரியாதி³கே ஸேஸோ ஜோதிரஸாதி³பே⁴தோ³ ஸப்³போ³பி மணி. வேளுரியோதி வங்ஸவண்ணமணி. ஸங்கோ²தி ஸாமுத்³தி³கஸங்கோ². ஸிலாதி காளஸிலாபண்டு³ஸிலாஸேதஸிலாதி³பே⁴தா³ ஸப்³பா³பி ஸிலா. ரஜதந்தி கஹாபணாதி³கங் வுத்தாவஸேஸங் ரதனஸம்மதங். ஜாதரூபந்தி ஸுவண்ணங். லோஹிதங்கோதி ரத்தமணி. மஸாரக³ல்லந்தி கப³ரமணி. ப⁴ண்ட³மூலத்தா²யாதி பத்தசீவராதி³ப⁴ண்ட³மூலத்தா²ய. குட்ட²ரோக³ஸ்ஸாதி நித³ஸ்ஸனமத்தங், தாய வூபஸமேதப்³ப³ஸ்ஸ யஸ்ஸ கஸ்ஸசி ரோக³ஸ்ஸத்தா²யபி வட்டதியேவ. ‘‘பே⁴ஸஜ்ஜத்த²ஞ்ச அதி⁴ட்டா²யேவ முத்தா வட்டதீ’’தி தீஸுபி க³ண்டி²பதே³ஸு வுத்தங். ஆகரமுத்தோதி ஆகரதோ முத்தமத்தோ. ‘‘ப⁴ண்ட³மூலத்தா²ய ஸம்படிச்சி²துங் வட்டதீ’’தி இமினா ச ஆமஸிதும்பி வட்டதீதி த³ஸ்ஸேதி. பசித்வா கதோதி காசகாரேஹி பசித்வா கதோ.
Maṇīti ṭhapetvā veḷuriyādike seso jotirasādibhedo sabbopi maṇi. Veḷuriyoti vaṃsavaṇṇamaṇi. Saṅkhoti sāmuddikasaṅkho. Silāti kāḷasilāpaṇḍusilāsetasilādibhedā sabbāpi silā. Rajatanti kahāpaṇādikaṃ vuttāvasesaṃ ratanasammataṃ. Jātarūpanti suvaṇṇaṃ. Lohitaṅkoti rattamaṇi. Masāragallanti kabaramaṇi. Bhaṇḍamūlatthāyāti pattacīvarādibhaṇḍamūlatthāya. Kuṭṭharogassāti nidassanamattaṃ, tāya vūpasametabbassa yassa kassaci rogassatthāyapi vaṭṭatiyeva. ‘‘Bhesajjatthañca adhiṭṭhāyeva muttā vaṭṭatī’’ti tīsupi gaṇṭhipadesu vuttaṃ. Ākaramuttoti ākarato muttamatto. ‘‘Bhaṇḍamūlatthāya sampaṭicchituṃ vaṭṭatī’’ti iminā ca āmasitumpi vaṭṭatīti dasseti. Pacitvā katoti kācakārehi pacitvā kato.
தோ⁴தவித்³தோ⁴ ச ரதனமிஸ்ஸோதி அலங்காரத்த²ங் கஞ்சனலதாதி³ங் த³ஸ்ஸெத்வா கதோ ரதனக²சிதோ தோ⁴தவித்³தோ⁴ அனாமாஸோ. தோ⁴தவித்³தோ⁴ ச ரதனமிஸ்ஸோ சாதி விஸுங் வா பத³ங் ஸம்ப³ந்தி⁴தப்³ப³ங். பானீயஸங்கோ²தி இமினா ச ஸங்கே²ன கதபானீயபா⁴ஜனபிதா⁴னாதி³ஸமணபரிக்கா²ரோபி ஆமஸிதுங் வட்டதீதி ஸித்³த⁴ங். ஸேஸந்தி ரதனமிஸ்ஸங் ட²பெத்வா அவஸேஸங். முக்³க³வண்ணங்யேவ ரதனஸம்மிஸ்ஸங் கரொந்தி, ந அஞ்ஞந்தி ஆஹ ‘‘முக்³க³வண்ணாவா’’தி, முக்³க³வண்ணா ரதனமிஸ்ஸாவ ந வட்டதீதி வுத்தங் ஹோதி. ஸேஸாதி ரதனஸம்மிஸ்ஸங் ட²பெத்வா அவஸேஸா முக்³க³வண்ணா நீலஸிலா.
Dhotaviddho ca ratanamissoti alaṅkāratthaṃ kañcanalatādiṃ dassetvā kato ratanakhacito dhotaviddho anāmāso. Dhotaviddho ca ratanamisso cāti visuṃ vā padaṃ sambandhitabbaṃ. Pānīyasaṅkhoti iminā ca saṅkhena katapānīyabhājanapidhānādisamaṇaparikkhāropi āmasituṃ vaṭṭatīti siddhaṃ. Sesanti ratanamissaṃ ṭhapetvā avasesaṃ. Muggavaṇṇaṃyeva ratanasammissaṃ karonti, na aññanti āha ‘‘muggavaṇṇāvā’’ti, muggavaṇṇā ratanamissāva na vaṭṭatīti vuttaṃ hoti. Sesāti ratanasammissaṃ ṭhapetvā avasesā muggavaṇṇā nīlasilā.
பீ³ஜதோ பட்டா²யாதி தா⁴துபாஸாணதோ பட்டா²ய. ஸுவண்ணசேதியந்தி தா⁴துகரண்ட³கங். படிக்கி²பீதி ‘‘தா⁴துட்ட²பனத்தா²ய க³ண்ஹதா²’’தி அவத்வா ‘‘தும்ஹாகங் க³ண்ஹதா²’’தி பேஸிதத்தா படிக்கி²பி. ஸுவண்ணபு³ப்³பு³ளகந்தி ஸுவண்ணதாரகங். ‘‘கேளாபயிதுந்தி இதோ சிதோ ச ஸஞ்சாரந்தேஹி ஆமஸிதுங் வட்டதீ’’தி மஹாஅட்ட²கதா²யங் வுத்தங். கசவரமேவ ஹரிதுங் வட்டதீதி சேதியகோ³பகா வா பி⁴க்கூ² ஹொந்து அஞ்ஞே வா, ஹத்தே²னபி புஞ்சி²த்வா கசவரங் அபனேதுங் வட்டதி, மலம்பி பமஜ்ஜிதுங் வட்டதியேவ.
Bījato paṭṭhāyāti dhātupāsāṇato paṭṭhāya. Suvaṇṇacetiyanti dhātukaraṇḍakaṃ. Paṭikkhipīti ‘‘dhātuṭṭhapanatthāya gaṇhathā’’ti avatvā ‘‘tumhākaṃ gaṇhathā’’ti pesitattā paṭikkhipi. Suvaṇṇabubbuḷakanti suvaṇṇatārakaṃ. ‘‘Keḷāpayitunti ito cito ca sañcārantehi āmasituṃ vaṭṭatī’’ti mahāaṭṭhakathāyaṃ vuttaṃ. Kacavarameva harituṃ vaṭṭatīti cetiyagopakā vā bhikkhū hontu aññe vā, hatthenapi puñchitvā kacavaraṃ apanetuṃ vaṭṭati, malampi pamajjituṃ vaṭṭatiyeva.
ஆரகூடலோஹந்தி கித்திமலோஹங். தீணி ஹி கித்திமலோஹானி கங்ஸலோஹங், வட்டலோஹங், ஆரகூடந்தி. தத்த² திபுதம்பே³ மிஸ்ஸெத்வா கதங் கங்ஸலோஹங், ஸீஸதம்பே³ மிஸ்ஸெத்வா கதங் வட்டலோஹங், பகதிரஸதம்பே³ மிஸ்ஸெத்வா கதங் ஆரகூடங். தேனேவ தங்கரணேன நிப்³ப³த்தத்தா ‘‘கித்திமலோஹ’’ந்தி வுச்சதி. ‘‘ஜாதரூபக³திகமேவாதி வுத்தத்தா ஆரகூடங் ஸுவண்ணஸதி³ஸமேவ ஆமஸிதுங் ந வட்டதி, அஞ்ஞங் பன வட்டதீ’’தி தீஸுபி க³ண்டி²பதே³ஸு வுத்தங். கேசி பன ‘‘ஆரகூடங் அனாமஸிதப்³ப³தோ ஜாதரூபக³திகமேவாதி வுத்தங், தஸ்மா உப⁴யம்பி ஜாதரூபங் விய ஆமஸிதுங் ந வட்டதீ’’தி வத³ந்தி. பட²மங் வுத்தோயேவ ச அத்தோ² க³ண்டி²பத³காரேஹி அதி⁴ப்பேதோ. படிஜக்³கி³துங் வட்டதீதி ஸேனாஸனபடிப³த்³த⁴த்தா வுத்தங்.
Ārakūṭalohanti kittimalohaṃ. Tīṇi hi kittimalohāni kaṃsalohaṃ, vaṭṭalohaṃ, ārakūṭanti. Tattha tiputambe missetvā kataṃ kaṃsalohaṃ, sīsatambe missetvā kataṃ vaṭṭalohaṃ, pakatirasatambe missetvā kataṃ ārakūṭaṃ. Teneva taṃkaraṇena nibbattattā ‘‘kittimaloha’’nti vuccati. ‘‘Jātarūpagatikamevāti vuttattā ārakūṭaṃ suvaṇṇasadisameva āmasituṃ na vaṭṭati, aññaṃ pana vaṭṭatī’’ti tīsupi gaṇṭhipadesu vuttaṃ. Keci pana ‘‘ārakūṭaṃ anāmasitabbato jātarūpagatikamevāti vuttaṃ, tasmā ubhayampi jātarūpaṃ viya āmasituṃ na vaṭṭatī’’ti vadanti. Paṭhamaṃ vuttoyeva ca attho gaṇṭhipadakārehi adhippeto. Paṭijaggituṃ vaṭṭatīti senāsanapaṭibaddhattā vuttaṃ.
ஸாமிகானங் பேஸேதப்³ப³ந்தி ஸாமிகானங் ஸாஸனங் பேஸேதப்³ப³ங். பி⁴ந்தி³த்வாதி ஹத்தே²ன அக்³க³ஹெத்வா அஞ்ஞேன யேன கேனசி பி⁴ந்தி³த்வா. பே⁴ரிஸங்கா⁴டோதி ஸங்க⁴டிதசம்மபே⁴ரீ. வீணாஸங்கா⁴டோதி ஸங்க⁴டிதசம்மவீணா. சம்மவினத்³தா⁴னங் பே⁴ரிவீணானமேதங் அதி⁴வசனங். துச்ச²பொக்க²ரந்தி அவினத்³த⁴சம்மங் பே⁴ரிபொக்க²ரங் வீணாபொக்க²ரஞ்ச. ஆரோபிதசம்மந்தி பே⁴ரிஆதீ³னங் வினத்³த⁴னத்தா²ய முக²வட்டியங் ஆரோபிதசம்மங் ததோ உத்³த⁴ரித்வா விஸுங் ட²பிதசம்மஞ்ச. ஓனஹிதுங் வாதி பே⁴ரிபொக்க²ராதீ³னி சம்மங் ஆரோபெத்வா வினந்தி⁴துங். ஓனஹாபேதுங் வாதி ததே²வ அஞ்ஞேஹி வினந்தா⁴பேதுங். பாராஜிகப்பஹோனககாலேதி அகுதி²தகாலே.
Sāmikānaṃ pesetabbanti sāmikānaṃ sāsanaṃ pesetabbaṃ. Bhinditvāti hatthena aggahetvā aññena yena kenaci bhinditvā. Bherisaṅghāṭoti saṅghaṭitacammabherī. Vīṇāsaṅghāṭoti saṅghaṭitacammavīṇā. Cammavinaddhānaṃ bherivīṇānametaṃ adhivacanaṃ. Tucchapokkharanti avinaddhacammaṃ bheripokkharaṃ vīṇāpokkharañca. Āropitacammanti bheriādīnaṃ vinaddhanatthāya mukhavaṭṭiyaṃ āropitacammaṃ tato uddharitvā visuṃ ṭhapitacammañca. Onahituṃ vāti bheripokkharādīni cammaṃ āropetvā vinandhituṃ. Onahāpetuṃ vāti tatheva aññehi vinandhāpetuṃ. Pārājikappahonakakāleti akuthitakāle.
282. ஸங்கமாதி³ பூ⁴மிக³திகத்தா ந காயபடிப³த்³த⁴ட்டா²னியந்தி து³க்கடங் வுத்தங். ஏகபதி³கஸங்கமோதி கு²த்³த³கஸேது. ஸகடமக்³க³ஸங்கமோதி ஸகடமக்³க³பூ⁴தோ மஹாஸேது. டா²னா சாலேதுந்தி ரஜ்ஜுங் டா²னா சாலேதுங். படிச்சா²தே³தப்³பா³தி அபனேதப்³பா³. மனுஸ்ஸித்தீ², இத்தி²ஸஞ்ஞிதா, காயஸங்ஸக்³க³ராகோ³, தேன ராகே³ன வாயாமோ, ஹத்த²க்³கா³ஹாதி³ஸமாபஜ்ஜனந்தி இமானெத்த² பஞ்ச அங்கா³னி.
282. Saṅkamādi bhūmigatikattā na kāyapaṭibaddhaṭṭhāniyanti dukkaṭaṃ vuttaṃ. Ekapadikasaṅkamoti khuddakasetu. Sakaṭamaggasaṅkamoti sakaṭamaggabhūto mahāsetu. Ṭhānā cāletunti rajjuṃ ṭhānā cāletuṃ. Paṭicchādetabbāti apanetabbā. Manussitthī, itthisaññitā, kāyasaṃsaggarāgo, tena rāgena vāyāmo, hatthaggāhādisamāpajjananti imānettha pañca aṅgāni.
காயஸங்ஸக்³க³ஸிக்கா²பத³வண்ணனா நிட்டி²தா.
Kāyasaṃsaggasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. காயஸங்ஸக்³க³ஸிக்கா²பத³ங் • 2. Kāyasaṃsaggasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. காயஸங்ஸக்³க³ஸிக்கா²பத³வண்ணனா • 2. Kāyasaṃsaggasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā
2. காயஸங்ஸக்³க³ஸிக்கா²பத³வண்ணனா • 2. Kāyasaṃsaggasikkhāpadavaṇṇanā
பத³பா⁴ஜனீயவண்ணனா • Padabhājanīyavaṇṇanā
வினீதவத்து²வண்ணனா • Vinītavatthuvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. காயஸங்ஸக்³க³ஸிக்கா²பத³வண்ணனா • 2. Kāyasaṃsaggasikkhāpadavaṇṇanā
