| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
2. காயஸங்ஸக்³க³ஸிக்கா²பத³வண்ணனா
2. Kāyasaṃsaggasikkhāpadavaṇṇanā
269. து³தியே கேஸுசி வாதபானேஸு விவடேஸு ப³ஹிபி அந்த⁴காரத்தா ஆலோகோ ந பவிஸதி, விவடகவாடேன அஞ்ஞதோ ஆக³ச்ச²ந்தஸ்ஸ ஆலோகஸ்ஸ நிவாரணதோ கவாடஸ்ஸ பிட்டி²பஸ்ஸே க⁴னந்த⁴காரோவ ஹோதி, தாதி³ஸானி ஸந்தா⁴ய ‘‘யேஸு விவடேஸு அந்த⁴காரோ ஹோதீ’’திஆதி³ வுத்தங்.
269. Dutiye kesuci vātapānesu vivaṭesu bahipi andhakārattā āloko na pavisati, vivaṭakavāṭena aññato āgacchantassa ālokassa nivāraṇato kavāṭassa piṭṭhipasse ghanandhakārova hoti, tādisāni sandhāya ‘‘yesu vivaṭesu andhakāro hotī’’tiādi vuttaṃ.
ப்³ராஹ்மணீ அத்தனோ அங்க³மங்கா³னங் பராமஸனக்க²ணே அனாசாரானுகூலா ஹுத்வா ந கிஞ்சி வத்வா பி⁴க்கு²னோ வண்ணப⁴ணனக்க²ணே வுத்தத்தா ஆஹ ‘‘பப்³ப³ஜிதுகாமோ மஞ்ஞேதி ஸல்லக்கெ²த்வா’’தி, பப்³ப³ஜிதுகாமோ வியாதி ஸல்லக்கெ²த்வாதி அத்தோ². குலித்தீ²னங் ஏவங் பரேஹி அபி⁴ப⁴வனங் நாம அச்சந்தாவமானோதி ஆஹ ‘‘அத்தனோ விப்பகார’’ந்தி.
Brāhmaṇī attano aṅgamaṅgānaṃ parāmasanakkhaṇe anācārānukūlā hutvā na kiñci vatvā bhikkhuno vaṇṇabhaṇanakkhaṇe vuttattā āha ‘‘pabbajitukāmo maññeti sallakkhetvā’’ti, pabbajitukāmo viyāti sallakkhetvāti attho. Kulitthīnaṃ evaṃ parehi abhibhavanaṃ nāma accantāvamānoti āha ‘‘attano vippakāra’’nti.
270. ஓதிண்ணஸத்³த³ஸ்ஸ கம்மஸாத⁴னபக்க²ங் ஸந்தா⁴ய ‘‘யக்கா²தீ³ஹீ’’திஆதி³ வுத்தங், கத்துஸாத⁴னபக்க²ங் ஸந்தா⁴ய ‘‘கூபாதீ³னீ’’திஆதி³ வுத்தங். தஸ்மிங் வத்து²ஸ்மிந்தி இத்தி²ஸரீரஸங்கா²தே வத்து²ஸ்மிங்.
270. Otiṇṇasaddassa kammasādhanapakkhaṃ sandhāya ‘‘yakkhādīhī’’tiādi vuttaṃ, kattusādhanapakkhaṃ sandhāya ‘‘kūpādīnī’’tiādi vuttaṃ. Tasmiṃ vatthusminti itthisarīrasaṅkhāte vatthusmiṃ.
271. அஸ்ஸாதி ஹத்த²க்³கா³ஹாதி³கஸ்ஸ ஸப்³ப³ஸ்ஸ.
271.Assāti hatthaggāhādikassa sabbassa.
273. ஏதேஸங் பதா³னந்தி ஆமஸனாதி³பதா³னங். இத்தி²ஸஞ்ஞீதி மனுஸ்ஸித்தி²ஸஞ்ஞீ. நங்-ஸத்³த³ஸ்ஸ காயவிஸேஸனபா⁴வேன ஏதங் காயந்தி அத்த²ங் த³ஸ்ஸேதுங் ‘‘அத² வா’’திஆதி³ வுத்தங். ஓமஸந்தோ…பே॰… ஏகாவ ஆபத்தீதி அனிவத்த²ங் ஸந்தா⁴ய வுத்தங், ந நிவத்த²ங். ஸனிவத்தா²ய பன மத்த²கதோ பட்டா²ய ஹத்த²ங் ஓதாரெந்தஸ்ஸ நிவத்த²ஸாடகோபரி ஹத்தே² ஆருள்ஹே து²ல்லச்சயங். ஸாடகதோ ஹத்த²ங் ஓதாராபெத்வா ஜங்க⁴தோ பட்டா²ய ஓமஸந்தஸ்ஸ புன ஸங்கா⁴தி³ஸேஸோ.
273.Etesaṃpadānanti āmasanādipadānaṃ. Itthisaññīti manussitthisaññī. Naṃ-saddassa kāyavisesanabhāvena etaṃ kāyanti atthaṃ dassetuṃ ‘‘atha vā’’tiādi vuttaṃ. Omasanto…pe… ekāva āpattīti anivatthaṃ sandhāya vuttaṃ, na nivatthaṃ. Sanivatthāya pana matthakato paṭṭhāya hatthaṃ otārentassa nivatthasāṭakopari hatthe āruḷhe thullaccayaṃ. Sāṭakato hatthaṃ otārāpetvā jaṅghato paṭṭhāya omasantassa puna saṅghādiseso.
யதா²னித்³தி³ட்ட²னித்³தே³ஸேதி யதா²வுத்தகாயஸங்ஸக்³க³னித்³தே³ஸே. தேனாதி யேன காரணேன வத்து²ஸஞ்ஞாத³யோ ஹொந்தி, தேன காரணேன. யதா²வுத்தஸிக்கா²பத³னித்³தே³ஸே வுத்தங் க³ருகங் பி⁴க்கு²னோ கரெய்ய பகாஸெய்யாதி யோஜனா.
Yathāniddiṭṭhaniddeseti yathāvuttakāyasaṃsagganiddese. Tenāti yena kāraṇena vatthusaññādayo honti, tena kāraṇena. Yathāvuttasikkhāpadaniddese vuttaṃ garukaṃ bhikkhuno kareyya pakāseyyāti yojanā.
ஸஞ்ஞாய விராகி³தம்ஹீதி ஸஞ்ஞாய விரத்³தா⁴ய. இத³ங் நாம வத்து²ந்தி இமஸ்மிங் ஸிக்கா²பதே³ ஆக³தங், அனாக³தஞ்ச யங் கிஞ்சி ஸவிஞ்ஞாணகாவிஞ்ஞாணகங் பு²ஸந்தஸ்ஸ அனாபத்திஅபா⁴வங் ஸந்தா⁴ய வுத்தங்.
Saññāya virāgitamhīti saññāya viraddhāya. Idaṃ nāma vatthunti imasmiṃ sikkhāpade āgataṃ, anāgatañca yaṃ kiñci saviññāṇakāviññāṇakaṃ phusantassa anāpattiabhāvaṃ sandhāya vuttaṃ.
ஸாரத்தந்தி காயஸங்ஸக்³க³ராகே³னேவ ஸாரத்தங். விரத்தந்தி காயஸங்ஸக்³க³ராக³ரஹிதங் மாதுஆதி³ங் ஸந்தா⁴ய வத³தி. து³க்கடந்தி மாதுபேமாதி³வஸேன க³ண்ஹந்தஸ்ஸ வஸேன வுத்தங், விரத்தம்பி இத்தி²ங் காயஸங்ஸக்³க³ராகே³ன க³ண்ஹந்தஸ்ஸ பன ஸங்கா⁴தி³ஸேஸோ ஏவ. இமாய பாளியா ஸமேதீதி ஸம்ப³ந்தோ⁴. கத²ங் ஸமேதீதி சே? யதி³ ஹி ‘‘இத்தி²யா காயப்படிப³த்³த⁴ங் க³ண்ஹிஸ்ஸாமீ’’தி சித்தே உப்பன்னே இத்தி²ஸஞ்ஞா விராகி³தா ப⁴வெய்ய. காயப்படிப³த்³த⁴க்³க³ஹணேபி து²ல்லச்சயேனாபி ந ப⁴விதப்³ப³ங் இத்தி²ஸஞ்ஞாய ஏவ பாளியங் (பாரா॰ 276) து²ல்லச்சயஸ்ஸ வுத்தத்தா, தஸ்மா ‘‘இத்தி²யா காயப்படிப³த்³த⁴ங் க³ண்ஹிஸ்ஸாமீதி காயங் க³ண்ஹந்தஸ்ஸ இத்தி²ஸஞ்ஞா விராகி³தா நாம ந ஹோதீதி காயப்படிப³த்³த⁴ங் க³ண்ஹிஸ்ஸாமீதி காயங் க³ண்ஹதோ இத்தி²ஸஞ்ஞாய சேவ காயஸங்ஸக்³க³ராக³ஸ்ஸ ச காயக்³க³ஹணஸ்ஸ ச ஸம்ப⁴வா யதா²வத்து²கங் ஸங்கா⁴தி³ஸேஸமேவ ஆபஜ்ஜதீ’’தி மஹாஸுமத்தே²ரேன வுத்தவாதோ³வ இமாய பாளியா ஸமேதி. அட்ட²கதா²யஞ்ஹி ‘‘ஸம்ப³ஹுலா இத்தி²யோ பா³ஹாஹி பரிக்கி²பித்வா க³ண்ஹாமீ’’தி ஸஞ்ஞாய பரிக்கி²பதோ மஜ்ஜ²க³தானங் வஸேன து²ல்லச்சயங் வுத்தங். ந ஹி தஸ்ஸ ‘‘மஜ்ஜ²க³தா இத்தி²யோ காயப்படிப³த்³தே⁴ன க³ண்ஹாமீ’’தி ஸஞ்ஞா அத்தி², தஸ்மா அட்ட²கதா²யபி ஸமேதீதி க³ஹேதப்³ப³ங். நீலேன து³விஞ்ஞெய்யபா⁴வதோ காளித்தீ² வுத்தா.
Sārattanti kāyasaṃsaggarāgeneva sārattaṃ. Virattanti kāyasaṃsaggarāgarahitaṃ mātuādiṃ sandhāya vadati. Dukkaṭanti mātupemādivasena gaṇhantassa vasena vuttaṃ, virattampi itthiṃ kāyasaṃsaggarāgena gaṇhantassa pana saṅghādiseso eva. Imāya pāḷiyā sametīti sambandho. Kathaṃ sametīti ce? Yadi hi ‘‘itthiyā kāyappaṭibaddhaṃ gaṇhissāmī’’ti citte uppanne itthisaññā virāgitā bhaveyya. Kāyappaṭibaddhaggahaṇepi thullaccayenāpi na bhavitabbaṃ itthisaññāya eva pāḷiyaṃ (pārā. 276) thullaccayassa vuttattā, tasmā ‘‘itthiyā kāyappaṭibaddhaṃ gaṇhissāmīti kāyaṃ gaṇhantassa itthisaññā virāgitā nāma na hotīti kāyappaṭibaddhaṃ gaṇhissāmīti kāyaṃ gaṇhato itthisaññāya ceva kāyasaṃsaggarāgassa ca kāyaggahaṇassa ca sambhavā yathāvatthukaṃ saṅghādisesameva āpajjatī’’ti mahāsumattherena vuttavādova imāya pāḷiyā sameti. Aṭṭhakathāyañhi ‘‘sambahulā itthiyo bāhāhi parikkhipitvā gaṇhāmī’’ti saññāya parikkhipato majjhagatānaṃ vasena thullaccayaṃ vuttaṃ. Na hi tassa ‘‘majjhagatā itthiyo kāyappaṭibaddhena gaṇhāmī’’ti saññā atthi, tasmā aṭṭhakathāyapi sametīti gahetabbaṃ. Nīlena duviññeyyabhāvato kāḷitthī vuttā.
279. ஸேவனாதி⁴ப்பாயோதி ப²ஸ்ஸஸுக²ஸேவனாதி⁴ப்பாயோ. காயப்படிப³த்³தா⁴மஸனவாரே காயப்படிப³த்³த⁴வஸேன ப²ஸ்ஸபடிவிஜானநங் வேதி³தப்³ப³ங். சித்துப்பாத³மத்தே ஆபத்தியாபா⁴வதோ அனாபத்தீதி இத³ங் காயஸங்ஸக்³க³ராக³மத்தேன காயசலனஸ்ஸ அனுப்பத்திதோ இத்தி²யா கரியமானகாயசலனங் ஸாதி³யதோபி பயோகா³பா⁴வங் ஸந்தா⁴ய வுத்தங். பட²மபாராஜிகே பன பரேஹி உபக்கமியமானஸ்ஸ அபா⁴வதோ ஸேவனாதி⁴ப்பாயே உப்பன்னே தேன அதி⁴ப்பாயேன அங்க³ஜாதக்கோ²போ⁴ ஸயமேவ அவஸ்ஸங் ஸஞ்ஜாயதி, ஸோ ச தேன கதோ நாம ஹோதீதி பாராஜிகங் வுத்தங், தேனேவ நயேன பட²மஸங்கா⁴தி³ஸேஸேபி பரேன கரியமானபயோக³ஸாதி³யமானேபி அங்க³ஜாதக்கோ²ப⁴ஸம்ப⁴வேன ஆபத்தி ஹோதீதி வேதி³தப்³ப³ங். சதுத்தே²தி ‘‘ந ச காயேன வாயமதி, ந ச ப²ஸ்ஸங் படிவிஜானாதீ’’தி இமஸ்மிங் வாரே. ப²ஸ்ஸபடிவிஜானநம்பீதி அபி-ஸத்³தே³ன ததியவாரே விய வாயாமோபி நத்தீ²தி த³ஸ்ஸேதி. நிஸ்ஸக்³கி³யேன நிஸ்ஸக்³கி³யாமஸனே வியாதி இத³ங் பன ப²ஸ்ஸபடிவிஜானநாபா⁴வமத்தஸ்ஸேவ நித³ஸ்ஸனங், ந பயோகா³பா⁴வஸ்ஸாதி த³ட்ட²ப்³ப³ங். மொக்கா²தி⁴ப்பாயோதி எத்த² சித்தஸ்ஸ லஹுபரிவத்திதாய அந்தரந்தரா காயஸங்ஸக்³க³ராகே³ ஸமுப்பன்னேபி மொக்கா²தி⁴ப்பாயஸ்ஸ அவிச்சி²ன்னதாய அனாபத்தியேவ, விச்சி²ன்னே பன தஸ்மிங் ஆபத்தி ஏவ.
279.Sevanādhippāyoti phassasukhasevanādhippāyo. Kāyappaṭibaddhāmasanavāre kāyappaṭibaddhavasena phassapaṭivijānanaṃ veditabbaṃ. Cittuppādamatte āpattiyābhāvato anāpattīti idaṃ kāyasaṃsaggarāgamattena kāyacalanassa anuppattito itthiyā kariyamānakāyacalanaṃ sādiyatopi payogābhāvaṃ sandhāya vuttaṃ. Paṭhamapārājike pana parehi upakkamiyamānassa abhāvato sevanādhippāye uppanne tena adhippāyena aṅgajātakkhobho sayameva avassaṃ sañjāyati, so ca tena kato nāma hotīti pārājikaṃ vuttaṃ, teneva nayena paṭhamasaṅghādisesepi parena kariyamānapayogasādiyamānepi aṅgajātakkhobhasambhavena āpatti hotīti veditabbaṃ. Catuttheti ‘‘na ca kāyena vāyamati, na ca phassaṃ paṭivijānātī’’ti imasmiṃ vāre. Phassapaṭivijānanampīti api-saddena tatiyavāre viya vāyāmopi natthīti dasseti. Nissaggiyena nissaggiyāmasane viyāti idaṃ pana phassapaṭivijānanābhāvamattasseva nidassanaṃ, na payogābhāvassāti daṭṭhabbaṃ. Mokkhādhippāyoti ettha cittassa lahuparivattitāya antarantarā kāyasaṃsaggarāge samuppannepi mokkhādhippāyassa avicchinnatāya anāpattiyeva, vicchinne pana tasmiṃ āpatti eva.
பத³பா⁴ஜனீயவண்ணனானயோ.
Padabhājanīyavaṇṇanānayo.
281. எத்த² க³ண்ஹாஹீதி ந வத்தப்³பா³தி கே³ஹஸிதபேமேன காயப்படிப³த்³தே⁴ன பு²ஸனே து³க்கடங் ஸந்தா⁴ய வுத்தங், காருஞ்ஞேன பன வத்தா²தி³ங் க³ஹேதுங் அஸக்கொந்திங் ‘‘க³ண்ஹா’’தி வத³ந்தஸ்ஸாபி அவஸஸபா⁴வப்பத்தங் உத³கே நிமுஜ்ஜந்திங் காருஞ்ஞேன ஸஹஸா அனாமாஸந்தி அசிந்தெத்வா கேஸாதீ³ஸு க³ஹெத்வா மொக்கா²தி⁴ப்பாயேன ஆகட்³ட⁴தோபி அனாபத்தியேவ. ந ஹி மீயமானங் மாதரங் உக்கி²பிதுங் ந வட்டதி. அஞ்ஞாதிகாய இத்தி²யாபி ஏஸேவ நயோ. உக்கட்டா²ய மாதுயாபி ஆமாஸோ ந வட்டதீதி த³ஸ்ஸனத்த²ங் ‘‘மாதர’’ந்தி வுத்தங். தஸ்ஸா காதப்³ப³ங் பன அஞ்ஞாஸம்பி இத்தீ²னங் கரொந்தஸ்ஸாபி அனாபத்தியேவ அனாமாஸத்தே விஸேஸாபா⁴வா.
281.Ettha gaṇhāhīti na vattabbāti gehasitapemena kāyappaṭibaddhena phusane dukkaṭaṃ sandhāya vuttaṃ, kāruññena pana vatthādiṃ gahetuṃ asakkontiṃ ‘‘gaṇhā’’ti vadantassāpi avasasabhāvappattaṃ udake nimujjantiṃ kāruññena sahasā anāmāsanti acintetvā kesādīsu gahetvā mokkhādhippāyena ākaḍḍhatopi anāpattiyeva. Na hi mīyamānaṃ mātaraṃ ukkhipituṃ na vaṭṭati. Aññātikāya itthiyāpi eseva nayo. Ukkaṭṭhāya mātuyāpi āmāso na vaṭṭatīti dassanatthaṃ ‘‘mātara’’nti vuttaṃ. Tassā kātabbaṃ pana aññāsampi itthīnaṃ karontassāpi anāpattiyeva anāmāsatte visesābhāvā.
திணண்டு³பகந்தி ஹிரிவேராதி³மூலேஹி கேஸாலங்காரத்தா²ய கதசும்ப³டகங். பரிவத்தெத்வாதி அத்தனோ நிவாஸனாதி³பா⁴வதோ அபனெத்வா. பூஜாதி³அத்த²ங் பன தாவகாலிகம்பி ஆமஸிதுங் வட்டதி. ஸீஸபஸாத⁴னகத³ந்தஸூசிஆதீ³தி இத³ங் ஸீஸாலங்காரத்தா²ய படபிலோதிகாதீ³ஹி கதங் ஸீஸபஸாத⁴னகஞ்சேவ த³ந்தஸூசிஆதி³ சாதி த்³விதா⁴ யோஜெத்வா ஸீஸபஸாத⁴னங் ஸிபாடிகோபகரணத்தா²ய சேவ த³ந்தஸூசிஉபகரணத்தா²ய ச க³ஹேதப்³ப³ந்தி யதா²க்கமங் அத்த²ங் த³ஸ்ஸேதி. கேஸகலாபங் ப³ந்தி⁴த்வா தத்த² திரியங் பவேஸனத்தா²ய கதா த³ந்தஸூசி ஏவ ஸீஸபஸாத⁴னகத³ந்தஸூசீதி ஏகமேவ கத்வா ஸிபாடிகாய பக்கி²பித்வா பரிஹரிதப்³ப³ஸூசியேவ தஸ்ஸ தஸ்ஸ கிச்சஸ்ஸ உபகரணந்தி ஸிபாடிகாஸூசிஉபகரணந்தி ஏவங் வா யோஜனா காதப்³பா³ . பொத்த²கரூபந்தி ஸுதா⁴தீ³ஹி கதங், பாராஜிகவத்து²பூ⁴தானங் திரச்சா²னக³தித்தீ²னங் ஸண்டா²னேன கதம்பி அனாமாஸமேவ. இத்தி²ரூபாதீ³னி த³ஸ்ஸெத்வா கதங், வத்த²பி⁴த்திஆதி³ஞ்ச இத்தி²ரூபங் அனாமஸித்வா வளஞ்ஜேதுங் வட்டதி. ஏவரூபேஹி அனாமாஸே காயஸங்ஸக்³க³ராகே³ அஸதி காயப்படிப³த்³தே⁴ன ஆமஸதோ தோ³ஸோ நத்தி². பி⁴ந்தி³த்வாதி எத்த² அனாமாஸம்பி த³ண்ட³பாஸாணாதீ³ஹி பே⁴த³னஸ்ஸ அட்ட²கதா²யங் வுத்தத்தா, பாளியம்பி ஆபதா³ஸு மொக்கா²தி⁴ப்பாயஸ்ஸ ஆமஸனேபி அனாபத்தியா வுத்தத்தா ச. ஸப்பினீஆதீ³ஹி வாளமிகீ³ஹி ச க³ஹிதபாணகானங் மோசனத்தா²ய தங் ஸப்பினீஆதி³ங் வத்த²த³ண்டா³தீ³ஹி பரிக்கி²பித்வா க³ஹேதுங், மாதுஆதி³ங் உத³கே மீயமானங் வத்தா²தீ³ஹி க³ஹேதுங், அஸக்கொந்திங் கேஸாதீ³ஸு க³ஹெத்வா காருஞ்ஞேன உக்கி²பிதுங் வட்டதீதி அயமத்தோ² க³ஹேதப்³போ³வ. அட்ட²கதா²யங் ‘‘ந த்வேவ ஆமஸிதப்³பா³’’தி இத³ங் பன வசனங் அமீயமானவத்து²ங் ஸந்தா⁴ய வுத்தந்தி அயங் அம்ஹாகங் க²ந்தி.
Tiṇaṇḍupakanti hiriverādimūlehi kesālaṅkāratthāya katacumbaṭakaṃ. Parivattetvāti attano nivāsanādibhāvato apanetvā. Pūjādiatthaṃ pana tāvakālikampi āmasituṃ vaṭṭati. Sīsapasādhanakadantasūciādīti idaṃ sīsālaṅkāratthāya paṭapilotikādīhi kataṃ sīsapasādhanakañceva dantasūciādi cāti dvidhā yojetvā sīsapasādhanaṃ sipāṭikopakaraṇatthāya ceva dantasūciupakaraṇatthāya ca gahetabbanti yathākkamaṃ atthaṃ dasseti. Kesakalāpaṃ bandhitvā tattha tiriyaṃ pavesanatthāya katā dantasūci eva sīsapasādhanakadantasūcīti ekameva katvā sipāṭikāya pakkhipitvā pariharitabbasūciyeva tassa tassa kiccassa upakaraṇanti sipāṭikāsūciupakaraṇanti evaṃ vā yojanā kātabbā . Potthakarūpanti sudhādīhi kataṃ, pārājikavatthubhūtānaṃ tiracchānagatitthīnaṃ saṇṭhānena katampi anāmāsameva. Itthirūpādīni dassetvā kataṃ, vatthabhittiādiñca itthirūpaṃ anāmasitvā vaḷañjetuṃ vaṭṭati. Evarūpehi anāmāse kāyasaṃsaggarāge asati kāyappaṭibaddhena āmasato doso natthi. Bhinditvāti ettha anāmāsampi daṇḍapāsāṇādīhi bhedanassa aṭṭhakathāyaṃ vuttattā, pāḷiyampi āpadāsu mokkhādhippāyassa āmasanepi anāpattiyā vuttattā ca. Sappinīādīhi vāḷamigīhi ca gahitapāṇakānaṃ mocanatthāya taṃ sappinīādiṃ vatthadaṇḍādīhi parikkhipitvā gahetuṃ, mātuādiṃ udake mīyamānaṃ vatthādīhi gahetuṃ, asakkontiṃ kesādīsu gahetvā kāruññena ukkhipituṃ vaṭṭatīti ayamattho gahetabbova. Aṭṭhakathāyaṃ ‘‘na tveva āmasitabbā’’ti idaṃ pana vacanaṃ amīyamānavatthuṃ sandhāya vuttanti ayaṃ amhākaṃ khanti.
மக்³க³ங் அதி⁴ட்டா²யாதி ‘‘மக்³கோ³ அய’’ந்தி மக்³க³ஸஞ்ஞங் உப்பாதெ³த்வாதி அத்தோ². பஞ்ஞபெத்வா தெ³ந்தீதி இத³ங் ஸாமீசிவஸேன வுத்தங், தேஹி பன ஆஸனங் அபஞ்ஞபெத்வாவ நிஸீத³தா²தி வுத்தே ஸயமேவ பஞ்ஞபெத்வா நிஸீதி³தும்பி வட்டதி. தத்த²ஜாதகானீதி அச்சி²ந்தி³த்வா பூ⁴தகா³மபா⁴வேனேவ டி²தானி. கீளந்தேனாதி வுத்தத்தா ஸதி பச்சயே ஆமஸந்தஸ்ஸ அனாபத்தி. பி⁴க்கு²ஸந்தகங் பன பரிபோ⁴கா³ரஹங் ஸப்³ப³தா² ஆமஸிதுங் ந வட்டதி து³ருபசிண்ணத்தா. அனுபஸம்பன்னானங் த³ஸ்ஸாமீதி இத³ங் அப்படிக்³க³ஹெத்வா க³ஹணங் ஸந்தா⁴ய வுத்தங். அத்தனோபி அத்தா²ய படிக்³க³ஹெத்வா க³ஹணே தோ³ஸோ நத்தி² அனாமாஸத்தாபா⁴வா.
Maggaṃ adhiṭṭhāyāti ‘‘maggo aya’’nti maggasaññaṃ uppādetvāti attho. Paññapetvā dentīti idaṃ sāmīcivasena vuttaṃ, tehi pana āsanaṃ apaññapetvāva nisīdathāti vutte sayameva paññapetvā nisīditumpi vaṭṭati. Tatthajātakānīti acchinditvā bhūtagāmabhāveneva ṭhitāni. Kīḷantenāti vuttattā sati paccaye āmasantassa anāpatti. Bhikkhusantakaṃ pana paribhogārahaṃ sabbathā āmasituṃ na vaṭṭati durupaciṇṇattā. Anupasampannānaṃ dassāmīti idaṃ appaṭiggahetvā gahaṇaṃ sandhāya vuttaṃ. Attanopi atthāya paṭiggahetvā gahaṇe doso natthi anāmāsattābhāvā.
மணீதி வேளுரியாதி³தோ அஞ்ஞோ ஜோதிரஸாதி³பே⁴தோ³ ஸப்³போ³பி மணி. வேளுரியோதி அல்லவேளுவண்ணோமணி, ‘‘மஜ்ஜாரக்கி² மண்ட³லவண்ணோ’’திபி வத³ந்தி. ஸிலாதி முக்³க³மாஸவண்ணா அதிஸினித்³தா⁴ காளஸிலா, மணிவோஹாரங் ஆக³தா ரத்தஸேதாதி³வண்ணா ஸுமட்டா²பி ஸிலா அனாமாஸா ஏவாதி வத³ந்தி. ரஜதந்தி கஹாபணமாஸாதி³பே⁴த³ங் ஜதுமாஸாதி³ங் உபாதா³ய ஸப்³ப³ங் வுத்தாவஸேஸங் ரூபியங் க³ஹிதங். லோஹிதங்கோதி ரத்தமணி. மஸாரக³ல்லந்தி கப³ரவண்ணோ மணி, ‘‘மரகத’’ந்திபி வத³ந்தி. பே⁴ஸஜ்ஜத்தா²ய பிஸித்வா யோஜிதானங் முத்தானங் ரதனபா⁴வவிரஹதோ க³ஹணக்க²ணேபி ரதனாகாரேன அபெக்கி²தாபா⁴வா ‘‘பே⁴ஸஜ்ஜத்தா²ய பன வட்டதீ’’தி வுத்தங். யாவ பன தா முத்தா ரதனரூபேன திட்ட²ந்தி, தாவ ஆமஸிதுங் ந வட்டதி ஏவ. ஏவங் அஞ்ஞம்பி ரதனபாஸாணங் பிஸித்வா பே⁴ஸஜ்ஜே யோஜனத்தா²ய க³ஹேதுங் வட்டதி ஏவ, ஜாதரூபரஜதங் பன பிஸித்வா யோஜனபே⁴ஸஜ்ஜத்தா²யபி ஸம்படிச்சி²துங் ந வட்டதி, க³ஹட்டே²ஹி யோஜெத்வா தி³ன்னம்பி யதி³ பே⁴ஸஜ்ஜே ஸுவண்ணாதி³ரூபேன திட்ட²தி, வியோஜேதுஞ்ச ஸக்கா, தாதி³ஸங் பே⁴ஸஜ்ஜம்பி ந வட்டதி. தங் அப்³போ³ஹாரிகத்தங் க³தங் சே, வட்டதி. ‘‘ஜாதிப²லிகங் உபாதா³யா’’தி வுத்தத்தா, ஸூரியகந்தசந்த³கந்தாதி³கங் ஜாதிபாஸாணங் மணிம்ஹி ஏவ ஸங்க³ஹிதந்தி த³ட்ட²ப்³ப³ங். த⁴மனஸங்கோ² ச தோ⁴தவித்³தோ⁴ ச ரதனமிஸ்ஸோ சாதி யோஜேதப்³ப³ங். வித்³தோ⁴தி மணிஆதி³பா⁴வேன கதசி²த்³தோ³.
Maṇīti veḷuriyādito añño jotirasādibhedo sabbopi maṇi. Veḷuriyoti allaveḷuvaṇṇomaṇi, ‘‘majjārakkhi maṇḍalavaṇṇo’’tipi vadanti. Silāti muggamāsavaṇṇā atisiniddhā kāḷasilā, maṇivohāraṃ āgatā rattasetādivaṇṇā sumaṭṭhāpi silā anāmāsā evāti vadanti. Rajatanti kahāpaṇamāsādibhedaṃ jatumāsādiṃ upādāya sabbaṃ vuttāvasesaṃ rūpiyaṃ gahitaṃ. Lohitaṅkoti rattamaṇi. Masāragallanti kabaravaṇṇo maṇi, ‘‘marakata’’ntipi vadanti. Bhesajjatthāya pisitvā yojitānaṃ muttānaṃ ratanabhāvavirahato gahaṇakkhaṇepi ratanākārena apekkhitābhāvā ‘‘bhesajjatthāya pana vaṭṭatī’’ti vuttaṃ. Yāva pana tā muttā ratanarūpena tiṭṭhanti, tāva āmasituṃ na vaṭṭati eva. Evaṃ aññampi ratanapāsāṇaṃ pisitvā bhesajje yojanatthāya gahetuṃ vaṭṭati eva, jātarūparajataṃ pana pisitvā yojanabhesajjatthāyapi sampaṭicchituṃ na vaṭṭati, gahaṭṭhehi yojetvā dinnampi yadi bhesajje suvaṇṇādirūpena tiṭṭhati, viyojetuñca sakkā, tādisaṃ bhesajjampi na vaṭṭati. Taṃ abbohārikattaṃ gataṃ ce, vaṭṭati. ‘‘Jātiphalikaṃupādāyā’’ti vuttattā, sūriyakantacandakantādikaṃ jātipāsāṇaṃ maṇimhi eva saṅgahitanti daṭṭhabbaṃ. Dhamanasaṅkho ca dhotaviddho ca ratanamisso cāti yojetabbaṃ. Viddhoti maṇiādibhāvena katachiddo.
ரதனமிஸ்ஸோதி கஞ்சனலதாதி³விசித்தோ, முத்தாதி³ரதனக²சிதோ ச, ஏதேன த⁴மனஸங்க²தோ அஞ்ஞோ ரதனமிஸ்ஸோவ அனாமாஸோதி த³ஸ்ஸேதி. ஸிலாயம்பி ஏஸேவ நயோ. பானீயஸங்கோ²தி இமினாவ தா²லகாதி³ஆகாரேன கதஸங்க²மயபா⁴ஜனானி பி⁴க்கூ²னங் ஸம்படிச்சி²துங் வட்டதீதி ஸித்³த⁴ங். ஸேஸாதி ரதனஸங்யுத்தங் ட²பெத்வா அவஸேஸா.
Ratanamissoti kañcanalatādivicitto, muttādiratanakhacito ca, etena dhamanasaṅkhato añño ratanamissova anāmāsoti dasseti. Silāyampi eseva nayo. Pānīyasaṅkhoti imināva thālakādiākārena katasaṅkhamayabhājanāni bhikkhūnaṃ sampaṭicchituṃ vaṭṭatīti siddhaṃ. Sesāti ratanasaṃyuttaṃ ṭhapetvā avasesā.
பீ³ஜதோ பட்டா²யாதி தா⁴துபாஸாணதோ பட்டா²ய. படிக்கி²பீதி ஸுவண்ணமயதா⁴துகரண்ட³கஸ்ஸ, பு³த்³த⁴ரூபாதி³ஸ்ஸ ச அத்தனோ ஸந்தககரணே நிஸ்ஸக்³கி³யத்தா வுத்தங். ‘‘ரூபியச²ட்³ட³கட்டா²னே’’தி வுத்தத்தா ரூபியச²ட்³ட³கஸ்ஸ ஜாதரூபரஜதங் ஆமஸித்வா ச²ட்³டே³துங் வட்டதீதி ஸித்³த⁴ங். கேளாபயிதுந்தி ஆமஸித்வா இதோ சிதோ ச ஸஞ்சாரேதுங். வுத்தந்தி மஹாஅட்ட²கதா²யங் வுத்தங். கசவரமேவ ஹரிதுங் வட்டதீதி கோ³பகா வா ஹொந்து அஞ்ஞே வா, ஹத்தே²ன புஞ்சி²த்வா கசவரங் அபனேதுங் வட்டதி, மலம்பி பமஜ்ஜிதுங் வட்டதி ஏவாதி வத³ந்தி, தங் அட்ட²கதா²ய ந ஸமேதி கேளாயனஸதி³ஸத்தா. ஆரகூடலோஹந்தி ஸுவண்ணவண்ணோ கித்திமலோஹவிஸேஸோ. திவித⁴ஞ்ஹி கித்திமலோஹங் கங்ஸலோஹங் வட்டலோஹங் ஹாரகூடலோஹந்தி. தத்த² திபுதம்பே³ மிஸ்ஸெத்வா கதங் கங்ஸலோஹங் நாம. ஸீஸதம்பே³ மிஸ்ஸெத்வா கதங் வட்டலோஹங். ரஸதம்பே³ மிஸ்ஸெத்வா கதங் ஹாரகூடலோஹங் நாம. தங் பன ‘‘ஜாதரூபக³திக’’ந்தி வுத்தத்தா உக்³க³ண்ஹதோ நிஸ்ஸக்³கி³யம்பி ஹோதீதி கேசி வத³ந்தி. ரூபியேஸு பன அக³ணிதத்தா நிஸ்ஸக்³கி³யங் ந ஹோதி, ஆமஸனே, ஸம்படிச்ச²னே ச து³க்கடமேவாதி வேதி³தப்³ப³ங். ஸப்³ப³கப்பியோதி யதா²வுத்தஸுவண்ணாதி³மயானங் ஸேனாஸனபரிக்கா²ரானங் ஆமஸனகோ³பனாதி³வஸேன பரிபோ⁴கோ³ ஸப்³ப³தா² கப்பியோதி அதி⁴ப்பாயோ. தேனாஹ ‘‘தஸ்மா’’திஆதி³. ‘‘பி⁴க்கூ²னங் த⁴ம்மவினயவண்ணனட்டா²னே’’தி வுத்தத்தா ஸங்கி⁴கமேவ ஸுவண்ணாதி³மயங் ஸேனாஸனங், ஸேனாஸனபரிக்கா²ரா ச வட்டந்தி, ந புக்³க³லிகானீதி க³ஹேதப்³ப³ங்.
Bījato paṭṭhāyāti dhātupāsāṇato paṭṭhāya. Paṭikkhipīti suvaṇṇamayadhātukaraṇḍakassa, buddharūpādissa ca attano santakakaraṇe nissaggiyattā vuttaṃ. ‘‘Rūpiyachaḍḍakaṭṭhāne’’ti vuttattā rūpiyachaḍḍakassa jātarūparajataṃ āmasitvā chaḍḍetuṃ vaṭṭatīti siddhaṃ. Keḷāpayitunti āmasitvā ito cito ca sañcāretuṃ. Vuttanti mahāaṭṭhakathāyaṃ vuttaṃ. Kacavarameva harituṃ vaṭṭatīti gopakā vā hontu aññe vā, hatthena puñchitvā kacavaraṃ apanetuṃ vaṭṭati, malampi pamajjituṃ vaṭṭati evāti vadanti, taṃ aṭṭhakathāya na sameti keḷāyanasadisattā. Ārakūṭalohanti suvaṇṇavaṇṇo kittimalohaviseso. Tividhañhi kittimalohaṃ kaṃsalohaṃ vaṭṭalohaṃ hārakūṭalohanti. Tattha tiputambe missetvā kataṃ kaṃsalohaṃ nāma. Sīsatambe missetvā kataṃ vaṭṭalohaṃ. Rasatambe missetvā kataṃ hārakūṭalohaṃ nāma. Taṃ pana ‘‘jātarūpagatika’’nti vuttattā uggaṇhato nissaggiyampi hotīti keci vadanti. Rūpiyesu pana agaṇitattā nissaggiyaṃ na hoti, āmasane, sampaṭicchane ca dukkaṭamevāti veditabbaṃ. Sabbakappiyoti yathāvuttasuvaṇṇādimayānaṃ senāsanaparikkhārānaṃ āmasanagopanādivasena paribhogo sabbathā kappiyoti adhippāyo. Tenāha ‘‘tasmā’’tiādi. ‘‘Bhikkhūnaṃ dhammavinayavaṇṇanaṭṭhāne’’ti vuttattā saṅghikameva suvaṇṇādimayaṃ senāsanaṃ, senāsanaparikkhārā ca vaṭṭanti, na puggalikānīti gahetabbaṃ.
பி⁴ந்தி³த்வாதி பட²மமேவ அனாமஸித்வா பாஸாணாதி³னா கிஞ்சிமத்தங் பே⁴த³ங் கத்வா பச்சா² கப்பியப⁴ண்ட³த்தா²ய அதி⁴ட்ட²ஹித்வா ஹத்தே²ன க³ஹேதுங் வட்டதி. தேனாஹ ‘‘கப்பியப⁴ண்ட³ங் கரிஸ்ஸாமீதி ஸப்³ப³ம்பி ஸம்படிச்சி²துங் வட்டதீ’’தி. எத்தா²பி கிஞ்சி பி⁴ந்தி³த்வா, வியோஜெத்வா வா ஆமஸிதப்³ப³.
Bhinditvāti paṭhamameva anāmasitvā pāsāṇādinā kiñcimattaṃ bhedaṃ katvā pacchā kappiyabhaṇḍatthāya adhiṭṭhahitvā hatthena gahetuṃ vaṭṭati. Tenāha ‘‘kappiyabhaṇḍaṃ karissāmīti sabbampi sampaṭicchituṃ vaṭṭatī’’ti. Etthāpi kiñci bhinditvā, viyojetvā vā āmasitabba.
ப²லகஜாலிகாதீ³னீதி எத்த² ஸரபரித்தாணாய ஹத்தே²ன க³ஹேதப்³ப³ங் கிடிகாப²லகங் அக்கி²ரக்க²ணத்தா²ய அயலோஹாதீ³ஹி ஜாலாகாரேன கத்வா ஸீஸாதீ³ஸு படிமுஞ்சிதப்³ப³ங் ஜாலிகங் நாம . ஆதி³-ஸத்³தே³ன கவசாதி³ங் ஸங்க³ண்ஹாதி. அனாமாஸானீதி மச்ச²ஜாலாதி³பரூபரோத⁴கங் ஸந்தா⁴ய வுத்தங், ந ஸரபரித்தாணங் தஸ்ஸ ஆவுத⁴ப⁴ண்ட³த்தாபா⁴வா. தேனேவ வக்க²தி ‘‘பரூபரோத⁴னிவாரணங் ஹீ’’திஆதி³. ஆஸனஸ்ஸாதி சேதியஸ்ஸ ஸமந்தா கதபரிப⁴ண்ட³ஸ்ஸ. ப³ந்தி⁴ஸ்ஸாமீதி காகாதீ³ஹி அதூ³ஸனத்தா²ய ப³ந்தி⁴ஸ்ஸாமி.
Phalakajālikādīnīti ettha saraparittāṇāya hatthena gahetabbaṃ kiṭikāphalakaṃ akkhirakkhaṇatthāya ayalohādīhi jālākārena katvā sīsādīsu paṭimuñcitabbaṃ jālikaṃ nāma . Ādi-saddena kavacādiṃ saṅgaṇhāti. Anāmāsānīti macchajālādiparūparodhakaṃ sandhāya vuttaṃ, na saraparittāṇaṃ tassa āvudhabhaṇḍattābhāvā. Teneva vakkhati ‘‘parūparodhanivāraṇaṃ hī’’tiādi. Āsanassāti cetiyassa samantā kataparibhaṇḍassa. Bandhissāmīti kākādīhi adūsanatthāya bandhissāmi.
‘‘பே⁴ரிஸங்கா⁴டோதி ஸங்க⁴டிதசம்மபே⁴ரீ. வீணாஸங்கா⁴டோதி ஸங்க⁴டிதசம்மவீணா’’தி ஸாரத்த²தீ³பனியங் (ஸாரத்த²॰ டீ॰ 2.281) வுத்தங். ‘‘சம்மவினத்³தா⁴னி வீணாபே⁴ரிஆதீ³னீ’’தி மஹாஅட்ட²கதா²யங் வுத்தவசனதோ விஸேஸாபா⁴வா, ‘‘குருந்தி³யங் பனா’’திஆதி³னா ததோ விஸேஸஸ்ஸ வத்துமாரத்³த⁴த்தா ச பே⁴ரிஆதீ³னங் வினத்³த⁴னோபகரணஸமூஹோ பே⁴ரிவீணாஸங்கா⁴டோதி வேதி³தப்³ப³ங் ஸங்க⁴டிதப்³போ³தி ஸங்கா⁴டோதி கத்வா. துச்ச²பொக்க²ரந்தி அவினத்³த⁴சம்மபே⁴ரிவீணானங் பொக்க²ரங். ஆரோபிதசம்மந்தி புப்³பே³ ஆரோபிதங் ஹுத்வா பச்சா² ததோ அபனெத்வா விஸுங் ட²பிதமுக²சம்மமத்தங், ந ஸேஸோபகரணஸஹிதங். ஸஹிதங் பன ஸங்கா⁴டோதி அயங் விஸேஸோ. ஓனஹிதுந்தி பே⁴ரிபொக்க²ராதீ³னி சம்மங் ஆரோபெத்வா சம்மவட்டிஆதீ³ஹி ஸப்³பே³ஹி உபகரணேஹி வினந்தி⁴துங்.
‘‘Bherisaṅghāṭoti saṅghaṭitacammabherī. Vīṇāsaṅghāṭoti saṅghaṭitacammavīṇā’’ti sāratthadīpaniyaṃ (sārattha. ṭī. 2.281) vuttaṃ. ‘‘Cammavinaddhāni vīṇābheriādīnī’’ti mahāaṭṭhakathāyaṃ vuttavacanato visesābhāvā, ‘‘kurundiyaṃ panā’’tiādinā tato visesassa vattumāraddhattā ca bheriādīnaṃ vinaddhanopakaraṇasamūho bherivīṇāsaṅghāṭoti veditabbaṃ saṅghaṭitabboti saṅghāṭoti katvā. Tucchapokkharanti avinaddhacammabherivīṇānaṃ pokkharaṃ. Āropitacammanti pubbe āropitaṃ hutvā pacchā tato apanetvā visuṃ ṭhapitamukhacammamattaṃ, na sesopakaraṇasahitaṃ. Sahitaṃ pana saṅghāṭoti ayaṃ viseso. Onahitunti bheripokkharādīni cammaṃ āropetvā cammavaṭṭiādīhi sabbehi upakaraṇehi vinandhituṃ.
பாளியங் பண்ட³கஸ்ஸாதி பண்ட³கேன. பாராஜிகப்பஹோனககாலேதி அகுதி²தகாலே. காயஸங்ஸக்³க³ராகா³தி³பா⁴வே ஸப்³பா³வத்தா²யபி இத்தி²யா ஸண்டா²னே பஞ்ஞாயமானே அனாமாஸது³க்கடங் ந விக³ச்ச²தீதி த³ட்ட²ப்³ப³ங். ஸங்கமாதீ³னங் டா²னாசாவனவஸேன அசாலேதப்³ப³தாய ந காயப்படிப³த்³த⁴வோஹாரோதி து³க்கடங் வுத்தங்.
Pāḷiyaṃ paṇḍakassāti paṇḍakena. Pārājikappahonakakāleti akuthitakāle. Kāyasaṃsaggarāgādibhāve sabbāvatthāyapi itthiyā saṇṭhāne paññāyamāne anāmāsadukkaṭaṃ na vigacchatīti daṭṭhabbaṃ. Saṅkamādīnaṃ ṭhānācāvanavasena acāletabbatāya na kāyappaṭibaddhavohāroti dukkaṭaṃ vuttaṃ.
282. ஏகபதி³கஸங்கமோதி தனுகஸேது. ‘‘ஆவிஞ்ச²ந்தோ’’தி வுத்தத்தா சாலேதுங் யுத்தாய ஏவ ரஜ்ஜுயா து²ல்லச்சயங், ந இதராய பி⁴த்தித²ம்பா⁴தி³க³திகத்தாதி ஆஹ ‘‘யா மஹாரஜ்ஜு ஹோதீ’’திஆதி³. தேன சாலேதுங் யுத்தே தனுகரஜ்ஜுத³ண்ட³கே அசாலெத்வா பு²ஸந்தஸ்ஸாபி து²ல்லச்சயமேவாதி தீ³பிதந்தி வேதி³தப்³ப³ங். படிச்சா²தே³தப்³பா³தி சா²த³னாதி³வஸேன கூ³ஹிதப்³பா³. மனுஸ்ஸித்தீ², மனுஸ்ஸித்தி²ஸஞ்ஞிதா, காயஸங்ஸக்³க³ராகோ³, வாயாமோ, தேன ஹத்தா²தீ³ஸு பு²ஸனந்தி இமானெத்த² பஞ்ச அங்கா³னி.
282.Ekapadikasaṅkamoti tanukasetu. ‘‘Āviñchanto’’ti vuttattā cāletuṃ yuttāya eva rajjuyā thullaccayaṃ, na itarāya bhittithambhādigatikattāti āha ‘‘yā mahārajju hotī’’tiādi. Tena cāletuṃ yutte tanukarajjudaṇḍake acāletvā phusantassāpi thullaccayamevāti dīpitanti veditabbaṃ. Paṭicchādetabbāti chādanādivasena gūhitabbā. Manussitthī, manussitthisaññitā, kāyasaṃsaggarāgo, vāyāmo, tena hatthādīsu phusananti imānettha pañca aṅgāni.
காயஸங்ஸக்³க³ஸிக்கா²பத³வண்ணனா நிட்டி²தா.
Kāyasaṃsaggasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. காயஸங்ஸக்³க³ஸிக்கா²பத³ங் • 2. Kāyasaṃsaggasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. காயஸங்ஸக்³க³ஸிக்கா²பத³வண்ணனா • 2. Kāyasaṃsaggasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. காயஸங்ஸக்³க³ஸிக்கா²பத³வண்ணனா • 2. Kāyasaṃsaggasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā
2. காயஸங்ஸக்³க³ஸிக்கா²பத³வண்ணனா • 2. Kāyasaṃsaggasikkhāpadavaṇṇanā
பத³பா⁴ஜனீயவண்ணனா • Padabhājanīyavaṇṇanā
வினீதவத்து²வண்ணனா • Vinītavatthuvaṇṇanā
