| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၃. ကာယသုတ္တံ
3. Kāyasuttaṃ
၂၃. ‘‘အတ္ထိ , ဘိက္ခဝေ, ဓမ္မာ ကာယေန ပဟာတဗ္ဗာ, နော ဝာစာယ။ အတ္ထိ, ဘိက္ခဝေ, ဓမ္မာ ဝာစာယ ပဟာတဗ္ဗာ, နော ကာယေန။ အတ္ထိ, ဘိက္ခဝေ, ဓမ္မာ နေဝ ကာယေန ပဟာတဗ္ဗာ နော ဝာစာယ, ပညာယ ဒိသ္ဝာ 1 ပဟာတဗ္ဗာ။
23. ‘‘Atthi , bhikkhave, dhammā kāyena pahātabbā, no vācāya. Atthi, bhikkhave, dhammā vācāya pahātabbā, no kāyena. Atthi, bhikkhave, dhammā neva kāyena pahātabbā no vācāya, paññāya disvā 2 pahātabbā.
‘‘ကတမေ စ, ဘိက္ခဝေ, ဓမ္မာ ကာယေန ပဟာတဗ္ဗာ, နော ဝာစာယ? ဣဓ, ဘိက္ခဝေ, ဘိက္ခု အကုသလံ အာပန္နော ဟောတိ ကိဉ္စိ ဒေသံ 3 ကာယေန။ တမေနံ အနုဝိစ္စ ဝိညူ သဗ္ရဟ္မစာရီ ဧဝမာဟံသု – ‘အာယသ္မာ ခော အကုသလံ အာပန္နော ကိဉ္စိ ဒေသံ ကာယေန။ သာဓု ဝတာယသ္မာ ကာယဒုစ္စရိတံ ပဟာယ ကာယသုစရိတံ ဘာဝေတူ’တိ။ သော အနုဝိစ္စ ဝိညူဟိ သဗ္ရဟ္မစာရီဟိ ဝုစ္စမာနော ကာယဒုစ္စရိတံ ပဟာယ ကာယသုစရိတံ ဘာဝေတိ။ ဣမေ ဝုစ္စန္တိ, ဘိက္ခဝေ, ဓမ္မာ ကာယေန ပဟာတဗ္ဗာ, နော ဝာစာယ။
‘‘Katame ca, bhikkhave, dhammā kāyena pahātabbā, no vācāya? Idha, bhikkhave, bhikkhu akusalaṃ āpanno hoti kiñci desaṃ 4 kāyena. Tamenaṃ anuvicca viññū sabrahmacārī evamāhaṃsu – ‘āyasmā kho akusalaṃ āpanno kiñci desaṃ kāyena. Sādhu vatāyasmā kāyaduccaritaṃ pahāya kāyasucaritaṃ bhāvetū’ti. So anuvicca viññūhi sabrahmacārīhi vuccamāno kāyaduccaritaṃ pahāya kāyasucaritaṃ bhāveti. Ime vuccanti, bhikkhave, dhammā kāyena pahātabbā, no vācāya.
‘‘ကတမေ စ, ဘိက္ခဝေ, ဓမ္မာ ဝာစာယ ပဟာတဗ္ဗာ, နော ကာယေန? ဣဓ, ဘိက္ခဝေ, ဘိက္ခု အကုသလံ အာပန္နော ဟောတိ ကိဉ္စိ ဒေသံ ဝာစာယ။ တမေနံ အနုဝိစ္စ ဝိညူ သဗ္ရဟ္မစာရီ ဧဝမာဟံသု – ‘အာယသ္မာ ခော အကုသလံ အာပန္နော ကိဉ္စိ ဒေသံ ဝာစာယ။ သာဓု ဝတာယသ္မာ ဝစီဒုစ္စရိတံ ပဟာယ ဝစီသုစရိတံ ဘာဝေတူ’တိ။ သော အနုဝိစ္စ ဝိညူဟိ သဗ္ရဟ္မစာရီဟိ ဝုစ္စမာနော ဝစီဒုစ္စရိတံ ပဟာယ ဝစီသုစရိတံ ဘာဝေတိ။ ဣမေ ဝုစ္စန္တိ, ဘိက္ခဝေ, ဓမ္မာ ဝာစာယ ပဟာတဗ္ဗာ, နော ကာယေန။
‘‘Katame ca, bhikkhave, dhammā vācāya pahātabbā, no kāyena? Idha, bhikkhave, bhikkhu akusalaṃ āpanno hoti kiñci desaṃ vācāya. Tamenaṃ anuvicca viññū sabrahmacārī evamāhaṃsu – ‘āyasmā kho akusalaṃ āpanno kiñci desaṃ vācāya. Sādhu vatāyasmā vacīduccaritaṃ pahāya vacīsucaritaṃ bhāvetū’ti. So anuvicca viññūhi sabrahmacārīhi vuccamāno vacīduccaritaṃ pahāya vacīsucaritaṃ bhāveti. Ime vuccanti, bhikkhave, dhammā vācāya pahātabbā, no kāyena.
‘‘ကတမေ စ, ဘိက္ခဝေ, ဓမ္မာ နေဝ ကာယေန ပဟာတဗ္ဗာ နော ဝာစာယ, ပညာယ ဒိသ္ဝာ ပဟာတဗ္ဗာ? လောဘော, ဘိက္ခဝေ, နေဝ ကာယေန ပဟာတဗ္ဗော နော ဝာစာယ, ပညာယ ဒိသ္ဝာ ပဟာတဗ္ဗော။ ဒောသော , ဘိက္ခဝေ။ပေ.။ မောဟော။ ကောဓော။ ဥပနာဟော။ မက္ခော။ ပဠာသော ။ မစ္ဆရိယံ, ဘိက္ခဝေ, နေဝ ကာယေန ပဟာတဗ္ဗံ နော ဝာစာယ, ပညာယ ဒိသ္ဝာ ပဟာတဗ္ဗံ။
‘‘Katame ca, bhikkhave, dhammā neva kāyena pahātabbā no vācāya, paññāya disvā pahātabbā? Lobho, bhikkhave, neva kāyena pahātabbo no vācāya, paññāya disvā pahātabbo. Doso , bhikkhave…pe… moho… kodho… upanāho… makkho… paḷāso … macchariyaṃ, bhikkhave, neva kāyena pahātabbaṃ no vācāya, paññāya disvā pahātabbaṃ.
‘‘ပာပိကာ , ဘိက္ခဝေ, ဣသ္သာ နေဝ ကာယေန ပဟာတဗ္ဗာ နော ဝာစာယ, ပညာယ ဒိသ္ဝာ ပဟာတဗ္ဗာ။ ကတမာ စ, ဘိက္ခဝေ, ပာပိကာ ဣသ္သာ? ဣဓ, ဘိက္ခဝေ, ဣဇ္ဈတိ ဂဟပတိသ္သ ဝာ ဂဟပတိပုတ္တသ္သ ဝာ ဓနေန ဝာ ဓညေန ဝာ ရဇတေန ဝာ ဇာတရူပေန ဝာ။ တတ္ရာညတရသ္သ ဒာသသ္သ ဝာ ဥပဝာသသ္သ ဝာ ဧဝံ ဟောတိ – ‘အဟော ဝတိမသ္သ ဂဟပတိသ္သ ဝာ ဂဟပတိပုတ္တသ္သ ဝာ န ဣဇ္ဈေယ္ယ ဓနေန ဝာ ဓညေန ဝာ ရဇတေန ဝာ ဇာတရူပေန ဝာ’တိ။ သမဏော ဝာ ပန ဗ္ရာဟ္မဏော ဝာ လာဘီ ဟောတိ စီဝရပိဏ္ဍပာတသေနာသနဂိလာနပစ္စယဘေသဇ္ဇပရိက္ခာရာနံ။ တတ္ရာညတရသ္သ သမဏသ္သ ဝာ ဗ္ရာဟ္မဏသ္သ ဝာ ဧဝံ ဟောတိ – ‘အဟော ဝတ အယမာယသ္မာ န လာဘီ အသ္သ စီဝရပိဏ္ဍပာတသေနာသနဂိလာနပစ္စယဘေသဇ္ဇပရိက္ခာရာန’န္တိ။ အယံ ဝုစ္စတိ, ဘိက္ခဝေ, ပာပိကာ ဣသ္သာ။
‘‘Pāpikā , bhikkhave, issā neva kāyena pahātabbā no vācāya, paññāya disvā pahātabbā. Katamā ca, bhikkhave, pāpikā issā? Idha, bhikkhave, ijjhati gahapatissa vā gahapatiputtassa vā dhanena vā dhaññena vā rajatena vā jātarūpena vā. Tatrāññatarassa dāsassa vā upavāsassa vā evaṃ hoti – ‘aho vatimassa gahapatissa vā gahapatiputtassa vā na ijjheyya dhanena vā dhaññena vā rajatena vā jātarūpena vā’ti. Samaṇo vā pana brāhmaṇo vā lābhī hoti cīvarapiṇḍapātasenāsanagilānapaccayabhesajjaparikkhārānaṃ. Tatrāññatarassa samaṇassa vā brāhmaṇassa vā evaṃ hoti – ‘aho vata ayamāyasmā na lābhī assa cīvarapiṇḍapātasenāsanagilānapaccayabhesajjaparikkhārāna’nti. Ayaṃ vuccati, bhikkhave, pāpikā issā.
‘‘ပာပိကာ, ဘိက္ခဝေ, ဣစ္ဆာ နေဝ ကာယေန ပဟာတဗ္ဗာ နော ဝာစာယ, ပညာယ ဒိသ္ဝာ ပဟာတဗ္ဗာ။ ကတမာ စ, ဘိက္ခဝေ, ပာပိကာ ဣစ္ဆာ? 5 ဣဓ, ဘိက္ခဝေ, ဧကစ္စော အသ္သဒ္ဓော သမာနော ‘သဒ္ဓောတိ မံ ဇာနေယ္ယု’န္တိ ဣစ္ဆတိ; ဒုသ္သီလော သမာနော ‘သီလဝာတိ မံ ဇာနေယ္ယု’န္တိ ဣစ္ဆတိ; အပ္ပသ္သုတော သမာနော ‘ဗဟုသ္သုတောတိ မံ ဇာနေယ္ယု’န္တိ ဣစ္ဆတိ; သင္ဂဏိကာရာမော သမာနော ‘ပဝိဝိတ္တောတိ မံ ဇာနေယ္ယု’န္တိ ဣစ္ဆတိ; ကုသီတော သမာနော ‘အာရဒ္ဓဝီရိယောတိ မံ ဇာနေယ္ယု’န္တိ ဣစ္ဆတိ; မုဋ္ဌသ္သတိ သမာနော ‘ဥပဋ္ဌိတသ္သတီတိ မံ ဇာနေယ္ယု’န္တိ ဣစ္ဆတိ; အသမာဟိတော သမာနော ‘သမာဟိတောတိ မံ ဇာနေယ္ယု’န္တိ ဣစ္ဆတိ; ဒုပ္ပညော သမာနော ‘ပညဝာတိ မံ ဇာနေယ္ယု’န္တိ ဣစ္ဆတိ; အခီဏာသဝော သမာနော ‘ခီဏာသဝောတိ မံ ဇာနေယ္ယု’န္တိ ဣစ္ဆတိ။ အယံ ဝုစ္စတိ, ဘိက္ခဝေ, ပာပိကာ ဣစ္ဆာ။ ဣမေ ဝုစ္စန္တိ, ဘိက္ခဝေ, ဓမ္မာ နေဝ ကာယေန ပဟာတဗ္ဗာ နော ဝာစာယ, ပညာယ ဒိသ္ဝာ ပဟာတဗ္ဗာ။
‘‘Pāpikā, bhikkhave, icchā neva kāyena pahātabbā no vācāya, paññāya disvā pahātabbā. Katamā ca, bhikkhave, pāpikā icchā? 6 Idha, bhikkhave, ekacco assaddho samāno ‘saddhoti maṃ jāneyyu’nti icchati; dussīlo samāno ‘sīlavāti maṃ jāneyyu’nti icchati; appassuto samāno ‘bahussutoti maṃ jāneyyu’nti icchati; saṅgaṇikārāmo samāno ‘pavivittoti maṃ jāneyyu’nti icchati; kusīto samāno ‘āraddhavīriyoti maṃ jāneyyu’nti icchati; muṭṭhassati samāno ‘upaṭṭhitassatīti maṃ jāneyyu’nti icchati; asamāhito samāno ‘samāhitoti maṃ jāneyyu’nti icchati; duppañño samāno ‘paññavāti maṃ jāneyyu’nti icchati; akhīṇāsavo samāno ‘khīṇāsavoti maṃ jāneyyu’nti icchati. Ayaṃ vuccati, bhikkhave, pāpikā icchā. Ime vuccanti, bhikkhave, dhammā neva kāyena pahātabbā no vācāya, paññāya disvā pahātabbā.
‘‘တဉ္စေ, ဘိက္ခဝေ, ဘိက္ခုံ လောဘော အဘိဘုယ္ယ ဣရိယတိ, ဒောသော။ မောဟော။ ကောဓော။ ဥပနာဟော။ မက္ခော။ ပဠာသော။ မစ္ဆရိယံ။ ပာပိကာ ဣသ္သာ။ ပာပိကာ ဣစ္ဆာ အဘိဘုယ္ယ ဣရိယတိ။ သော ဧဝမသ္သ ဝေဒိတဗ္ဗော – ‘နာယမာယသ္မာ တထာ ပဇာနာတိ ယထာ ပဇာနတော လောဘော န ဟောတိ, တထာဟိမံ အာယသ္မန္တံ လောဘော အဘိဘုယ္ယ ဣရိယတိ; နာယမာယသ္မာ တထာ ပဇာနာတိ ယထာ ပဇာနတော ဒောသော န ဟောတိ။ မောဟော။ ကောဓော။ ဥပနာဟော။ မက္ခော။ ပဠာသော။ မစ္ဆရိယံ။ ပာပိကာ ဣသ္သာ။ ပာပိကာ ဣစ္ဆာ န ဟောတိ, တထာဟိမံ အာယသ္မန္တံ ပာပိကာ ဣစ္ဆာ အဘိဘုယ္ယ ဣရိယတီ’တိ။
‘‘Tañce, bhikkhave, bhikkhuṃ lobho abhibhuyya iriyati, doso… moho… kodho… upanāho… makkho… paḷāso… macchariyaṃ… pāpikā issā… pāpikā icchā abhibhuyya iriyati. So evamassa veditabbo – ‘nāyamāyasmā tathā pajānāti yathā pajānato lobho na hoti, tathāhimaṃ āyasmantaṃ lobho abhibhuyya iriyati; nāyamāyasmā tathā pajānāti yathā pajānato doso na hoti… moho… kodho… upanāho… makkho… paḷāso… macchariyaṃ… pāpikā issā… pāpikā icchā na hoti, tathāhimaṃ āyasmantaṃ pāpikā icchā abhibhuyya iriyatī’ti.
‘‘တဉ္စေ , ဘိက္ခဝေ, ဘိက္ခုံ လောဘော နာဘိဘုယ္ယ ဣရိယတိ, ဒောသော။ မောဟော။ ကောဓော။ ဥပနာဟော။ မက္ခော။ ပဠာသော။ မစ္ဆရိယံ။ ပာပိကာ ဣသ္သာ။ ပာပိကာ ဣစ္ဆာ နာဘိဘုယ္ယ ဣရိယတိ, သော ဧဝမသ္သ ဝေဒိတဗ္ဗော – ‘တထာ အယမာယသ္မာ ပဇာနာတိ ယထာ ပဇာနတော လောဘော န ဟောတိ, တထာဟိမံ အာယသ္မန္တံ လောဘော နာဘိဘုယ္ယ ဣရိယတိ; တထာ အယမာယသ္မာ ပဇာနာတိ ယထာ ပဇာနတော ဒောသော န ဟောတိ။ မောဟော။ ကောဓော ။ ဥပနာဟော။ မက္ခော။ ပဠာသော။ မစ္ဆရိယံ။ ပာပိကာ ဣသ္သာ။ ပာပိကာ ဣစ္ဆာ န ဟောတိ, တထာဟိမံ အာယသ္မန္တံ ပာပိကာ ဣစ္ဆာ နာဘိဘုယ္ယ ဣရိယတီ’’’တိ။ တတိယံ။
‘‘Tañce , bhikkhave, bhikkhuṃ lobho nābhibhuyya iriyati, doso… moho… kodho… upanāho… makkho… paḷāso… macchariyaṃ… pāpikā issā… pāpikā icchā nābhibhuyya iriyati, so evamassa veditabbo – ‘tathā ayamāyasmā pajānāti yathā pajānato lobho na hoti, tathāhimaṃ āyasmantaṃ lobho nābhibhuyya iriyati; tathā ayamāyasmā pajānāti yathā pajānato doso na hoti… moho… kodho … upanāho… makkho… paḷāso… macchariyaṃ… pāpikā issā… pāpikā icchā na hoti, tathāhimaṃ āyasmantaṃ pāpikā icchā nābhibhuyya iriyatī’’’ti. Tatiyaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၃. ကာယသုတ္တဝဏ္ဏနာ • 3. Kāyasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၂-၄. အဓိဝုတ္တိပဒသုတ္တာဒိဝဏ္ဏနာ • 2-4. Adhivuttipadasuttādivaṇṇanā
