| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༣. ཀཱཡསུཏྟཾ
3. Kāyasuttaṃ
༢༣. ‘‘ཨཏྠི , བྷིཀྑཝེ, དྷམྨཱ ཀཱཡེན པཧཱཏབྦཱ, ནོ ཝཱཙཱཡ། ཨཏྠི, བྷིཀྑཝེ, དྷམྨཱ ཝཱཙཱཡ པཧཱཏབྦཱ, ནོ ཀཱཡེན། ཨཏྠི, བྷིཀྑཝེ, དྷམྨཱ ནེཝ ཀཱཡེན པཧཱཏབྦཱ ནོ ཝཱཙཱཡ, པཉྙཱཡ དིསྭཱ 1 པཧཱཏབྦཱ།
23. ‘‘Atthi , bhikkhave, dhammā kāyena pahātabbā, no vācāya. Atthi, bhikkhave, dhammā vācāya pahātabbā, no kāyena. Atthi, bhikkhave, dhammā neva kāyena pahātabbā no vācāya, paññāya disvā 2 pahātabbā.
‘‘ཀཏམེ ཙ, བྷིཀྑཝེ, དྷམྨཱ ཀཱཡེན པཧཱཏབྦཱ, ནོ ཝཱཙཱཡ? ཨིདྷ, བྷིཀྑཝེ, བྷིཀྑུ ཨཀུསལཾ ཨཱཔནྣོ ཧོཏི ཀིཉྩི དེསཾ 3 ཀཱཡེན། ཏམེནཾ ཨནུཝིཙྩ ཝིཉྙཱུ སབྲཧྨཙཱརཱི ཨེཝམཱཧཾསུ – ‘ཨཱཡསྨཱ ཁོ ཨཀུསལཾ ཨཱཔནྣོ ཀིཉྩི དེསཾ ཀཱཡེན། སཱདྷུ ཝཏཱཡསྨཱ ཀཱཡདུཙྩརིཏཾ པཧཱཡ ཀཱཡསུཙརིཏཾ བྷཱཝེཏཱུ’ཏི། སོ ཨནུཝིཙྩ ཝིཉྙཱུཧི སབྲཧྨཙཱརཱིཧི ཝུཙྩམཱནོ ཀཱཡདུཙྩརིཏཾ པཧཱཡ ཀཱཡསུཙརིཏཾ བྷཱཝེཏི། ཨིམེ ཝུཙྩནྟི, བྷིཀྑཝེ, དྷམྨཱ ཀཱཡེན པཧཱཏབྦཱ, ནོ ཝཱཙཱཡ།
‘‘Katame ca, bhikkhave, dhammā kāyena pahātabbā, no vācāya? Idha, bhikkhave, bhikkhu akusalaṃ āpanno hoti kiñci desaṃ 4 kāyena. Tamenaṃ anuvicca viññū sabrahmacārī evamāhaṃsu – ‘āyasmā kho akusalaṃ āpanno kiñci desaṃ kāyena. Sādhu vatāyasmā kāyaduccaritaṃ pahāya kāyasucaritaṃ bhāvetū’ti. So anuvicca viññūhi sabrahmacārīhi vuccamāno kāyaduccaritaṃ pahāya kāyasucaritaṃ bhāveti. Ime vuccanti, bhikkhave, dhammā kāyena pahātabbā, no vācāya.
‘‘ཀཏམེ ཙ, བྷིཀྑཝེ, དྷམྨཱ ཝཱཙཱཡ པཧཱཏབྦཱ, ནོ ཀཱཡེན? ཨིདྷ, བྷིཀྑཝེ, བྷིཀྑུ ཨཀུསལཾ ཨཱཔནྣོ ཧོཏི ཀིཉྩི དེསཾ ཝཱཙཱཡ། ཏམེནཾ ཨནུཝིཙྩ ཝིཉྙཱུ སབྲཧྨཙཱརཱི ཨེཝམཱཧཾསུ – ‘ཨཱཡསྨཱ ཁོ ཨཀུསལཾ ཨཱཔནྣོ ཀིཉྩི དེསཾ ཝཱཙཱཡ། སཱདྷུ ཝཏཱཡསྨཱ ཝཙཱིདུཙྩརིཏཾ པཧཱཡ ཝཙཱིསུཙརིཏཾ བྷཱཝེཏཱུ’ཏི། སོ ཨནུཝིཙྩ ཝིཉྙཱུཧི སབྲཧྨཙཱརཱིཧི ཝུཙྩམཱནོ ཝཙཱིདུཙྩརིཏཾ པཧཱཡ ཝཙཱིསུཙརིཏཾ བྷཱཝེཏི། ཨིམེ ཝུཙྩནྟི, བྷིཀྑཝེ, དྷམྨཱ ཝཱཙཱཡ པཧཱཏབྦཱ, ནོ ཀཱཡེན།
‘‘Katame ca, bhikkhave, dhammā vācāya pahātabbā, no kāyena? Idha, bhikkhave, bhikkhu akusalaṃ āpanno hoti kiñci desaṃ vācāya. Tamenaṃ anuvicca viññū sabrahmacārī evamāhaṃsu – ‘āyasmā kho akusalaṃ āpanno kiñci desaṃ vācāya. Sādhu vatāyasmā vacīduccaritaṃ pahāya vacīsucaritaṃ bhāvetū’ti. So anuvicca viññūhi sabrahmacārīhi vuccamāno vacīduccaritaṃ pahāya vacīsucaritaṃ bhāveti. Ime vuccanti, bhikkhave, dhammā vācāya pahātabbā, no kāyena.
‘‘ཀཏམེ ཙ, བྷིཀྑཝེ, དྷམྨཱ ནེཝ ཀཱཡེན པཧཱཏབྦཱ ནོ ཝཱཙཱཡ, པཉྙཱཡ དིསྭཱ པཧཱཏབྦཱ? ལོབྷོ, བྷིཀྑཝེ, ནེཝ ཀཱཡེན པཧཱཏབྦོ ནོ ཝཱཙཱཡ, པཉྙཱཡ དིསྭཱ པཧཱཏབྦོ། དོསོ , བྷིཀྑཝེ…པེ॰… མོཧོ… ཀོདྷོ… ཨུཔནཱཧོ… མཀྑོ… པལཱ༹སོ … མཙྪརིཡཾ, བྷིཀྑཝེ, ནེཝ ཀཱཡེན པཧཱཏབྦཾ ནོ ཝཱཙཱཡ, པཉྙཱཡ དིསྭཱ པཧཱཏབྦཾ།
‘‘Katame ca, bhikkhave, dhammā neva kāyena pahātabbā no vācāya, paññāya disvā pahātabbā? Lobho, bhikkhave, neva kāyena pahātabbo no vācāya, paññāya disvā pahātabbo. Doso , bhikkhave…pe… moho… kodho… upanāho… makkho… paḷāso … macchariyaṃ, bhikkhave, neva kāyena pahātabbaṃ no vācāya, paññāya disvā pahātabbaṃ.
‘‘པཱཔིཀཱ , བྷིཀྑཝེ, ཨིསྶཱ ནེཝ ཀཱཡེན པཧཱཏབྦཱ ནོ ཝཱཙཱཡ, པཉྙཱཡ དིསྭཱ པཧཱཏབྦཱ། ཀཏམཱ ཙ, བྷིཀྑཝེ, པཱཔིཀཱ ཨིསྶཱ? ཨིདྷ, བྷིཀྑཝེ, ཨིཛ྄ཛྷཏི གཧཔཏིསྶ ཝཱ གཧཔཏིཔུཏྟསྶ ཝཱ དྷནེན ཝཱ དྷཉྙེན ཝཱ རཛཏེན ཝཱ ཛཱཏརཱུཔེན ཝཱ། ཏཏྲཱཉྙཏརསྶ དཱསསྶ ཝཱ ཨུཔཝཱསསྶ ཝཱ ཨེཝཾ ཧོཏི – ‘ཨཧོ ཝཏིམསྶ གཧཔཏིསྶ ཝཱ གཧཔཏིཔུཏྟསྶ ཝཱ ན ཨིཛ྄ཛྷེཡྻ དྷནེན ཝཱ དྷཉྙེན ཝཱ རཛཏེན ཝཱ ཛཱཏརཱུཔེན ཝཱ’ཏི། སམཎོ ཝཱ པན བྲཱཧྨཎོ ཝཱ ལཱབྷཱི ཧོཏི ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཱནཾ། ཏཏྲཱཉྙཏརསྶ སམཎསྶ ཝཱ བྲཱཧྨཎསྶ ཝཱ ཨེཝཾ ཧོཏི – ‘ཨཧོ ཝཏ ཨཡམཱཡསྨཱ ན ལཱབྷཱི ཨསྶ ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཱན’ནྟི། ཨཡཾ ཝུཙྩཏི, བྷིཀྑཝེ, པཱཔིཀཱ ཨིསྶཱ།
‘‘Pāpikā , bhikkhave, issā neva kāyena pahātabbā no vācāya, paññāya disvā pahātabbā. Katamā ca, bhikkhave, pāpikā issā? Idha, bhikkhave, ijjhati gahapatissa vā gahapatiputtassa vā dhanena vā dhaññena vā rajatena vā jātarūpena vā. Tatrāññatarassa dāsassa vā upavāsassa vā evaṃ hoti – ‘aho vatimassa gahapatissa vā gahapatiputtassa vā na ijjheyya dhanena vā dhaññena vā rajatena vā jātarūpena vā’ti. Samaṇo vā pana brāhmaṇo vā lābhī hoti cīvarapiṇḍapātasenāsanagilānapaccayabhesajjaparikkhārānaṃ. Tatrāññatarassa samaṇassa vā brāhmaṇassa vā evaṃ hoti – ‘aho vata ayamāyasmā na lābhī assa cīvarapiṇḍapātasenāsanagilānapaccayabhesajjaparikkhārāna’nti. Ayaṃ vuccati, bhikkhave, pāpikā issā.
‘‘པཱཔིཀཱ, བྷིཀྑཝེ, ཨིཙྪཱ ནེཝ ཀཱཡེན པཧཱཏབྦཱ ནོ ཝཱཙཱཡ, པཉྙཱཡ དིསྭཱ པཧཱཏབྦཱ། ཀཏམཱ ཙ, བྷིཀྑཝེ, པཱཔིཀཱ ཨིཙྪཱ? 5 ཨིདྷ, བྷིཀྑཝེ, ཨེཀཙྩོ ཨསྶདྡྷོ སམཱནོ ‘སདྡྷོཏི མཾ ཛཱནེཡྻུ’ནྟི ཨིཙྪཏི; དུསྶཱིལོ སམཱནོ ‘སཱིལཝཱཏི མཾ ཛཱནེཡྻུ’ནྟི ཨིཙྪཏི; ཨཔྤསྶུཏོ སམཱནོ ‘བཧུསྶུཏོཏི མཾ ཛཱནེཡྻུ’ནྟི ཨིཙྪཏི; སངྒཎིཀཱརཱམོ སམཱནོ ‘པཝིཝིཏྟོཏི མཾ ཛཱནེཡྻུ’ནྟི ཨིཙྪཏི; ཀུསཱིཏོ སམཱནོ ‘ཨཱརདྡྷཝཱིརིཡོཏི མཾ ཛཱནེཡྻུ’ནྟི ཨིཙྪཏི; མུཊྛསྶཏི སམཱནོ ‘ཨུཔཊྛིཏསྶཏཱིཏི མཾ ཛཱནེཡྻུ’ནྟི ཨིཙྪཏི; ཨསམཱཧིཏོ སམཱནོ ‘སམཱཧིཏོཏི མཾ ཛཱནེཡྻུ’ནྟི ཨིཙྪཏི; དུཔྤཉྙོ སམཱནོ ‘པཉྙཝཱཏི མཾ ཛཱནེཡྻུ’ནྟི ཨིཙྪཏི; ཨཁཱིཎཱསཝོ སམཱནོ ‘ཁཱིཎཱསཝོཏི མཾ ཛཱནེཡྻུ’ནྟི ཨིཙྪཏི། ཨཡཾ ཝུཙྩཏི, བྷིཀྑཝེ, པཱཔིཀཱ ཨིཙྪཱ། ཨིམེ ཝུཙྩནྟི, བྷིཀྑཝེ, དྷམྨཱ ནེཝ ཀཱཡེན པཧཱཏབྦཱ ནོ ཝཱཙཱཡ, པཉྙཱཡ དིསྭཱ པཧཱཏབྦཱ།
‘‘Pāpikā, bhikkhave, icchā neva kāyena pahātabbā no vācāya, paññāya disvā pahātabbā. Katamā ca, bhikkhave, pāpikā icchā? 6 Idha, bhikkhave, ekacco assaddho samāno ‘saddhoti maṃ jāneyyu’nti icchati; dussīlo samāno ‘sīlavāti maṃ jāneyyu’nti icchati; appassuto samāno ‘bahussutoti maṃ jāneyyu’nti icchati; saṅgaṇikārāmo samāno ‘pavivittoti maṃ jāneyyu’nti icchati; kusīto samāno ‘āraddhavīriyoti maṃ jāneyyu’nti icchati; muṭṭhassati samāno ‘upaṭṭhitassatīti maṃ jāneyyu’nti icchati; asamāhito samāno ‘samāhitoti maṃ jāneyyu’nti icchati; duppañño samāno ‘paññavāti maṃ jāneyyu’nti icchati; akhīṇāsavo samāno ‘khīṇāsavoti maṃ jāneyyu’nti icchati. Ayaṃ vuccati, bhikkhave, pāpikā icchā. Ime vuccanti, bhikkhave, dhammā neva kāyena pahātabbā no vācāya, paññāya disvā pahātabbā.
‘‘ཏཉྩེ, བྷིཀྑཝེ, བྷིཀྑུཾ ལོབྷོ ཨབྷིབྷུཡྻ ཨིརིཡཏི, དོསོ… མོཧོ… ཀོདྷོ… ཨུཔནཱཧོ… མཀྑོ… པལཱ༹སོ… མཙྪརིཡཾ… པཱཔིཀཱ ཨིསྶཱ… པཱཔིཀཱ ཨིཙྪཱ ཨབྷིབྷུཡྻ ཨིརིཡཏི། སོ ཨེཝམསྶ ཝེདིཏབྦོ – ‘ནཱཡམཱཡསྨཱ ཏཐཱ པཛཱནཱཏི ཡཐཱ པཛཱནཏོ ལོབྷོ ན ཧོཏི, ཏཐཱཧིམཾ ཨཱཡསྨནྟཾ ལོབྷོ ཨབྷིབྷུཡྻ ཨིརིཡཏི; ནཱཡམཱཡསྨཱ ཏཐཱ པཛཱནཱཏི ཡཐཱ པཛཱནཏོ དོསོ ན ཧོཏི… མོཧོ… ཀོདྷོ… ཨུཔནཱཧོ… མཀྑོ… པལཱ༹སོ… མཙྪརིཡཾ… པཱཔིཀཱ ཨིསྶཱ… པཱཔིཀཱ ཨིཙྪཱ ན ཧོཏི, ཏཐཱཧིམཾ ཨཱཡསྨནྟཾ པཱཔིཀཱ ཨིཙྪཱ ཨབྷིབྷུཡྻ ཨིརིཡཏཱི’ཏི།
‘‘Tañce, bhikkhave, bhikkhuṃ lobho abhibhuyya iriyati, doso… moho… kodho… upanāho… makkho… paḷāso… macchariyaṃ… pāpikā issā… pāpikā icchā abhibhuyya iriyati. So evamassa veditabbo – ‘nāyamāyasmā tathā pajānāti yathā pajānato lobho na hoti, tathāhimaṃ āyasmantaṃ lobho abhibhuyya iriyati; nāyamāyasmā tathā pajānāti yathā pajānato doso na hoti… moho… kodho… upanāho… makkho… paḷāso… macchariyaṃ… pāpikā issā… pāpikā icchā na hoti, tathāhimaṃ āyasmantaṃ pāpikā icchā abhibhuyya iriyatī’ti.
‘‘ཏཉྩེ , བྷིཀྑཝེ, བྷིཀྑུཾ ལོབྷོ ནཱབྷིབྷུཡྻ ཨིརིཡཏི, དོསོ… མོཧོ… ཀོདྷོ… ཨུཔནཱཧོ… མཀྑོ… པལཱ༹སོ… མཙྪརིཡཾ… པཱཔིཀཱ ཨིསྶཱ… པཱཔིཀཱ ཨིཙྪཱ ནཱབྷིབྷུཡྻ ཨིརིཡཏི, སོ ཨེཝམསྶ ཝེདིཏབྦོ – ‘ཏཐཱ ཨཡམཱཡསྨཱ པཛཱནཱཏི ཡཐཱ པཛཱནཏོ ལོབྷོ ན ཧོཏི, ཏཐཱཧིམཾ ཨཱཡསྨནྟཾ ལོབྷོ ནཱབྷིབྷུཡྻ ཨིརིཡཏི; ཏཐཱ ཨཡམཱཡསྨཱ པཛཱནཱཏི ཡཐཱ པཛཱནཏོ དོསོ ན ཧོཏི… མོཧོ… ཀོདྷོ … ཨུཔནཱཧོ… མཀྑོ… པལཱ༹སོ… མཙྪརིཡཾ… པཱཔིཀཱ ཨིསྶཱ… པཱཔིཀཱ ཨིཙྪཱ ན ཧོཏི, ཏཐཱཧིམཾ ཨཱཡསྨནྟཾ པཱཔིཀཱ ཨིཙྪཱ ནཱབྷིབྷུཡྻ ཨིརིཡཏཱི’’’ཏི། ཏཏིཡཾ།
‘‘Tañce , bhikkhave, bhikkhuṃ lobho nābhibhuyya iriyati, doso… moho… kodho… upanāho… makkho… paḷāso… macchariyaṃ… pāpikā issā… pāpikā icchā nābhibhuyya iriyati, so evamassa veditabbo – ‘tathā ayamāyasmā pajānāti yathā pajānato lobho na hoti, tathāhimaṃ āyasmantaṃ lobho nābhibhuyya iriyati; tathā ayamāyasmā pajānāti yathā pajānato doso na hoti… moho… kodho … upanāho… makkho… paḷāso… macchariyaṃ… pāpikā issā… pāpikā icchā na hoti, tathāhimaṃ āyasmantaṃ pāpikā icchā nābhibhuyya iriyatī’’’ti. Tatiyaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༣. ཀཱཡསུཏྟཝཎྞནཱ • 3. Kāyasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༢-༤. ཨདྷིཝུཏྟིཔདསུཏྟཱདིཝཎྞནཱ • 2-4. Adhivuttipadasuttādivaṇṇanā
