| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. காயஸுத்தவண்ணனா
2. Kāyasuttavaṇṇanā
183. து³தியே ஆஹாரட்டி²திகோதி பச்சயட்டி²திகோ. ஆஹாரங் படிச்சாதி பச்சயங் படிச்ச. ஸுப⁴னிமித்தந்தி ஸுப⁴ம்பி ஸுப⁴னிமித்தங், ஸுப⁴ஸ்ஸ ஆரம்மணம்பி ஸுப⁴னிமித்தங். அயோனிஸோமனஸிகாரோதி அனுபாயமனஸிகாரோ உப்பத²மனஸிகாரோ அனிச்சே ‘‘நிச்ச’’ந்தி வா, து³க்கே² ‘‘ஸுக²’’ந்தி, அனத்தனி ‘‘அத்தா’’தி வா, அஸுபே⁴ ‘‘ஸுப⁴’’ந்தி வா, மனஸிகாரோ. தங் தஸ்மிங் ஸுபா⁴ரம்மணே ப³ஹுலங் பவத்தயதோ காமச்ச²ந்தோ³ உப்பஜ்ஜதி. தேன வுத்தங் ‘‘அத்தி², பி⁴க்க²வே, ஸுப⁴னிமித்த’’ந்திஆதி³. ஏவங் ஸப்³ப³னீவரணேஸு யோஜனா வேதி³தப்³பா³.
183. Dutiye āhāraṭṭhitikoti paccayaṭṭhitiko. Āhāraṃ paṭiccāti paccayaṃ paṭicca. Subhanimittanti subhampi subhanimittaṃ, subhassa ārammaṇampi subhanimittaṃ. Ayonisomanasikāroti anupāyamanasikāro uppathamanasikāro anicce ‘‘nicca’’nti vā, dukkhe ‘‘sukha’’nti, anattani ‘‘attā’’ti vā, asubhe ‘‘subha’’nti vā, manasikāro. Taṃ tasmiṃ subhārammaṇe bahulaṃ pavattayato kāmacchando uppajjati. Tena vuttaṃ ‘‘atthi, bhikkhave, subhanimitta’’ntiādi. Evaṃ sabbanīvaraṇesu yojanā veditabbā.
படிக⁴னிமித்தந்திஆதீ³ஸு பன படிகோ⁴பி படிக⁴னிமித்தங் படிகா⁴ரம்மணம்பி. அரதீதி உக்கண்டி²தா. யங் ஸந்தா⁴ய வுத்தங் – ‘‘தத்த² கதமா அரதி? பந்தேஸு வா ஸேனாஸனேஸு அஞ்ஞதரஞ்ஞதரேஸு வா அதி⁴குஸலேஸு த⁴ம்மேஸு அரதி அரதிதா அனபி⁴ரதி அனபி⁴ரமனா உக்கண்டி²தா பரிதஸ்ஸிதா, அயங் வுச்சதி அரதீ’’தி (விப⁴॰ 856).
Paṭighanimittantiādīsu pana paṭighopi paṭighanimittaṃ paṭighārammaṇampi. Aratīti ukkaṇṭhitā. Yaṃ sandhāya vuttaṃ – ‘‘tattha katamā arati? Pantesu vā senāsanesu aññataraññataresu vā adhikusalesu dhammesu arati aratitā anabhirati anabhiramanā ukkaṇṭhitā paritassitā, ayaṃ vuccati aratī’’ti (vibha. 856).
தந்தீ³தி அதிஸீதாதி³பச்சயா உப்பன்னங் ஆக³ந்துககாயாலஸியங். யஸ்மிங் உப்பன்னே ‘‘அதிஸீதங் அதிஉண்ஹங் அதிச்சா²தொஸ்மி அதிதா⁴தொஸ்மி அதிதூ³ரமக்³க³ங் க³தொஸ்மீ’’தி வத³தி, யங் ஸந்தா⁴ய வுத்தங் ‘‘தத்த² கதமா தந்தி³ , யா தந்தீ³ தந்தி³யனா தந்தி³மனகதா ஆலஸ்யங் ஆலஸ்யாயனா ஆலஸ்யாயிதத்தங், அயங் வுச்சதி தந்தீ³’’தி (விப⁴॰ 857).
Tandīti atisītādipaccayā uppannaṃ āgantukakāyālasiyaṃ. Yasmiṃ uppanne ‘‘atisītaṃ atiuṇhaṃ aticchātosmi atidhātosmi atidūramaggaṃ gatosmī’’ti vadati, yaṃ sandhāya vuttaṃ ‘‘tattha katamā tandi , yā tandī tandiyanā tandimanakatā ālasyaṃ ālasyāyanā ālasyāyitattaṃ, ayaṃ vuccati tandī’’ti (vibha. 857).
விஜம்பி⁴தாதி கிலேஸவஸேன காயவினமனா. யங் ஸந்தா⁴ய வுத்தங் – ‘‘தத்த² கதமா விஜம்பி⁴தா? யா காயஸ்ஸ ஜம்ப⁴னா விஜம்ப⁴னா ஆனமனா வினமனா ஸன்னமனா பணமனா ப்³யாதி⁴யகங், அயங் வுச்சதி விஜம்பி⁴தா’’தி (விப⁴॰ 858).
Vijambhitāti kilesavasena kāyavinamanā. Yaṃ sandhāya vuttaṃ – ‘‘tattha katamā vijambhitā? Yā kāyassa jambhanā vijambhanā ānamanā vinamanā sannamanā paṇamanā byādhiyakaṃ, ayaṃ vuccati vijambhitā’’ti (vibha. 858).
ப⁴த்தஸம்மதோ³தி ப⁴த்தபரிளாஹோ. யங் ஸந்தா⁴ய வுத்தங் – ‘‘தத்த² கதமோ ப⁴த்தஸம்மதோ³? யா பு⁴த்தாவிஸ்ஸ ப⁴த்தமுச்சா² ப⁴த்தகிலமதோ² ப⁴த்தபரிளாஹோ காயது³ட்டு²ல்லங், அயங் வுச்சதி ப⁴த்தஸம்மதோ³’’தி (விப⁴॰ 859).
Bhattasammadoti bhattapariḷāho. Yaṃ sandhāya vuttaṃ – ‘‘tattha katamo bhattasammado? Yā bhuttāvissa bhattamucchā bhattakilamatho bhattapariḷāho kāyaduṭṭhullaṃ, ayaṃ vuccati bhattasammado’’ti (vibha. 859).
சேதஸோ ச லீனத்தந்தி சித்தஸ்ஸ லீயனாகாரோ, யங் ஸந்தா⁴ய வுத்தங் – ‘‘தத்த² கதமங் சேதஸோ லீனத்தங்? யா சித்தஸ்ஸ அகல்யதா அகம்மஞ்ஞதா ஓலீயனா ஸல்லீயனா லீனங் லீயனா லீயிதத்தங் தி²னங் தி²யனா தி²யிதத்தங் சித்தஸ்ஸ, இத³ங் வுச்சதி சேதஸோ லீனத்த’’ந்தி (விப⁴॰ 860).
Cetaso ca līnattanti cittassa līyanākāro, yaṃ sandhāya vuttaṃ – ‘‘tattha katamaṃ cetaso līnattaṃ? Yā cittassa akalyatā akammaññatā olīyanā sallīyanā līnaṃ līyanā līyitattaṃ thinaṃ thiyanā thiyitattaṃ cittassa, idaṃ vuccati cetaso līnatta’’nti (vibha. 860).
சேதஸோ அவூபஸமோதி யதா² நாம வீதச்சிகோபி அங்கா³ரோ நேவ தாவ ஸன்னிஸீத³தி பதாபங் கரோதியேவ, யதா² ச பத்தபசனட்டா²னே நேவ தாவ ஸன்னிஸீத³தி பதாபங் கரோதியேவ, ஏவங் சித்தஸ்ஸ அவூபஸந்தாகாரோ, அத்த²தோ பனேதங் உத்³த⁴ச்சகுக்குச்சமேவ ஹோதி.
Cetaso avūpasamoti yathā nāma vītaccikopi aṅgāro neva tāva sannisīdati patāpaṃ karotiyeva, yathā ca pattapacanaṭṭhāne neva tāva sannisīdati patāpaṃ karotiyeva, evaṃ cittassa avūpasantākāro, atthato panetaṃ uddhaccakukkuccameva hoti.
விசிகிச்ச²ட்டா²னீயா த⁴ம்மாதி விசிகிச்சா²ய ஆரம்மணத⁴ம்மா. அயோனிஸோமனஸிகாரோ ஸப்³ப³த்த² வுத்தனயோவ. ஏவமெத்த² காமச்ச²ந்தோ³ விசிகிச்சா²தி இமே த்³வே த⁴ம்மா ஆரம்மணேன கதி²தா, ப்³யாபாதோ³ ஆரம்மணேன ச உபனிஸ்ஸயேன ச, ஸேஸா ஸஹஜாதேன ச உபனிஸ்ஸயேன சாதி.
Vicikicchaṭṭhānīyā dhammāti vicikicchāya ārammaṇadhammā. Ayonisomanasikāro sabbattha vuttanayova. Evamettha kāmacchando vicikicchāti ime dve dhammā ārammaṇena kathitā, byāpādo ārammaṇena ca upanissayena ca, sesā sahajātena ca upanissayena cāti.
ஸதிஸம்பொ³ஜ்ஜ²ங்க³ட்டா²னீயா த⁴ம்மாதி ஸதியா ஆரம்மணத⁴ம்மா ஸத்ததிங்ஸ போ³தி⁴பக்கி²யா ச நவ லோகுத்தரத⁴ம்மா ச. தத்த² யோனிஸோமனஸிகாரப³ஹுலீகாரோதி தத்த² உபாயமனஸிகாரஸ்ஸ புனப்புனங் கரணங்.
Satisambojjhaṅgaṭṭhānīyā dhammāti satiyā ārammaṇadhammā sattatiṃsa bodhipakkhiyā ca nava lokuttaradhammā ca. Tattha yonisomanasikārabahulīkāroti tattha upāyamanasikārassa punappunaṃ karaṇaṃ.
குஸலாகுஸலா த⁴ம்மாதிஆதீ³ஸு குஸலாதி கோஸல்லஸம்பூ⁴தா அனவஜ்ஜஸுக²விபாகா. அகுஸலாதி அகோஸல்லஸம்பூ⁴தா ஸாவஜ்ஜது³க்க²விபாகா. ஸாவஜ்ஜாதி அகுஸலா. அனவஜ்ஜாதி குஸலா. ஹீனபணீதகண்ஹஸுக்கேஸுபி ஏஸேவ நயோ. ஸப்படிபா⁴கா³தி கண்ஹஸுக்காயேவ. கண்ஹா ஹி கண்ஹவிபாகதா³னதோ , ஸுக்கா ச ஸுக்கவிபாகதா³னதோ ஸப்படிபா⁴கா³ நாம, ஸதி³ஸவிபாககொட்டா²ஸாதி அத்தோ². படிபக்க²பூ⁴தஸ்ஸ வா பா⁴க³ஸ்ஸ அத்தி²தாய ஸப்படிபா⁴கா³. கண்ஹானஞ்ஹி ஸுக்கா படிபக்க²பா⁴கா³, ஸுக்கானஞ்ச கண்ஹா படிபக்க²பா⁴கா³தி ஏவம்பி ஸப்படிபா⁴கா³. ஸப்படிபா³ஹிதட்டே²ன வா ஸப்படிபா⁴கா³. அகுஸலஞ்ஹி குஸலங் படிபா³ஹித்வா அத்தனோ விபாகங் தே³தி, குஸலஞ்ச அகுஸலங் படிபா³ஹித்வாதி ஏவம்பி கண்ஹஸுக்கா ஸப்படிபா⁴கா³.
Kusalākusalā dhammātiādīsu kusalāti kosallasambhūtā anavajjasukhavipākā. Akusalāti akosallasambhūtā sāvajjadukkhavipākā. Sāvajjāti akusalā. Anavajjāti kusalā. Hīnapaṇītakaṇhasukkesupi eseva nayo. Sappaṭibhāgāti kaṇhasukkāyeva. Kaṇhā hi kaṇhavipākadānato , sukkā ca sukkavipākadānato sappaṭibhāgā nāma, sadisavipākakoṭṭhāsāti attho. Paṭipakkhabhūtassa vā bhāgassa atthitāya sappaṭibhāgā. Kaṇhānañhi sukkā paṭipakkhabhāgā, sukkānañca kaṇhā paṭipakkhabhāgāti evampi sappaṭibhāgā. Sappaṭibāhitaṭṭhena vā sappaṭibhāgā. Akusalañhi kusalaṃ paṭibāhitvā attano vipākaṃ deti, kusalañca akusalaṃ paṭibāhitvāti evampi kaṇhasukkā sappaṭibhāgā.
ஆரம்ப⁴தா⁴தூதி பட²மாரம்ப⁴வீரியங். நிக்கமதா⁴தூதி கோஸஜ்ஜதோ நிக்க²ந்தத்தா ததோ ப³லவதரங். பரக்கமதா⁴தூதி பரங் பரங் டா²னங் அக்கமனதாய ததோபி ப³லவதரந்தி தீஹிபி பதே³ஹி வீரியமேவ கதி²தங்.
Ārambhadhātūti paṭhamārambhavīriyaṃ. Nikkamadhātūti kosajjato nikkhantattā tato balavataraṃ. Parakkamadhātūti paraṃ paraṃ ṭhānaṃ akkamanatāya tatopi balavataranti tīhipi padehi vīriyameva kathitaṃ.
பீதிஸம்பொ³ஜ்ஜ²ங்க³ட்டா²னீயாதி பீதியா ஆரம்மணத⁴ம்மா. காயபஸ்ஸத்³தீ⁴தி திண்ணங் க²ந்தா⁴னங் த³ரத²பஸ்ஸத்³தி⁴. சித்தபஸ்ஸத்³தீ⁴தி விஞ்ஞாணக்க²ந்த⁴ஸ்ஸ த³ரத²பஸ்ஸத்³தி⁴. ஸமத²னிமித்தந்தி ஸமதோ²பி ஸமத²னிமித்தங், ஆரம்மணம்பி. அப்³யக்³க³னிமித்தந்தி தஸ்ஸேவ வேவசனங்.
Pītisambojjhaṅgaṭṭhānīyāti pītiyā ārammaṇadhammā. Kāyapassaddhīti tiṇṇaṃ khandhānaṃ darathapassaddhi. Cittapassaddhīti viññāṇakkhandhassa darathapassaddhi. Samathanimittanti samathopi samathanimittaṃ, ārammaṇampi. Abyagganimittanti tasseva vevacanaṃ.
உபெக்கா²ஸம்பொ³ஜ்ஜ²ங்க³ட்டா²னீயாதி உபெக்கா²ய ஆரம்மணத⁴ம்மா, அத்த²தோ பன மஜ்ஜ²த்தாகாரோ உபெக்கா²ட்டா²னீயா த⁴ம்மோதி வேதி³தப்³போ³. ஏவமெத்த² ஸதித⁴ம்மவிசயஉபெக்கா²ஸம்பொ³ஜ்ஜ²ங்கா³ ஆரம்மணேன கதி²தா, ஸேஸா ஆரம்மணேனபி உபனிஸ்ஸயேனபி.
Upekkhāsambojjhaṅgaṭṭhānīyāti upekkhāya ārammaṇadhammā, atthato pana majjhattākāro upekkhāṭṭhānīyā dhammoti veditabbo. Evamettha satidhammavicayaupekkhāsambojjhaṅgā ārammaṇena kathitā, sesā ārammaṇenapi upanissayenapi.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. காயஸுத்தங் • 2. Kāyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. காயஸுத்தவண்ணனா • 2. Kāyasuttavaṇṇanā
