| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
২. কাযসুত্তৰণ্ণনা
2. Kāyasuttavaṇṇanā
১৮৩. দুতিযে আহারট্ঠিতিকোতি পচ্চযট্ঠিতিকো। আহারং পটিচ্চাতি পচ্চযং পটিচ্চ। সুভনিমিত্তন্তি সুভম্পি সুভনিমিত্তং, সুভস্স আরম্মণম্পি সুভনিমিত্তং। অযোনিসোমনসিকারোতি অনুপাযমনসিকারো উপ্পথমনসিকারো অনিচ্চে ‘‘নিচ্চ’’ন্তি ৰা, দুক্খে ‘‘সুখ’’ন্তি, অনত্তনি ‘‘অত্তা’’তি ৰা, অসুভে ‘‘সুভ’’ন্তি ৰা, মনসিকারো। তং তস্মিং সুভারম্মণে বহুলং পৰত্তযতো কামচ্ছন্দো উপ্পজ্জতি। তেন ৰুত্তং ‘‘অত্থি, ভিক্খৰে, সুভনিমিত্ত’’ন্তিআদি। এৰং সব্বনীৰরণেসু যোজনা ৰেদিতব্বা।
183. Dutiye āhāraṭṭhitikoti paccayaṭṭhitiko. Āhāraṃ paṭiccāti paccayaṃ paṭicca. Subhanimittanti subhampi subhanimittaṃ, subhassa ārammaṇampi subhanimittaṃ. Ayonisomanasikāroti anupāyamanasikāro uppathamanasikāro anicce ‘‘nicca’’nti vā, dukkhe ‘‘sukha’’nti, anattani ‘‘attā’’ti vā, asubhe ‘‘subha’’nti vā, manasikāro. Taṃ tasmiṃ subhārammaṇe bahulaṃ pavattayato kāmacchando uppajjati. Tena vuttaṃ ‘‘atthi, bhikkhave, subhanimitta’’ntiādi. Evaṃ sabbanīvaraṇesu yojanā veditabbā.
পটিঘনিমিত্তন্তিআদীসু পন পটিঘোপি পটিঘনিমিত্তং পটিঘারম্মণম্পি। অরতীতি উক্কণ্ঠিতা। যং সন্ধায ৰুত্তং – ‘‘তত্থ কতমা অরতি? পন্তেসু ৰা সেনাসনেসু অঞ্ঞতরঞ্ঞতরেসু ৰা অধিকুসলেসু ধম্মেসু অরতি অরতিতা অনভিরতি অনভিরমনা উক্কণ্ঠিতা পরিতস্সিতা, অযং ৰুচ্চতি অরতী’’তি (ৰিভ॰ ৮৫৬)।
Paṭighanimittantiādīsu pana paṭighopi paṭighanimittaṃ paṭighārammaṇampi. Aratīti ukkaṇṭhitā. Yaṃ sandhāya vuttaṃ – ‘‘tattha katamā arati? Pantesu vā senāsanesu aññataraññataresu vā adhikusalesu dhammesu arati aratitā anabhirati anabhiramanā ukkaṇṭhitā paritassitā, ayaṃ vuccati aratī’’ti (vibha. 856).
তন্দীতি অতিসীতাদিপচ্চযা উপ্পন্নং আগন্তুককাযালসিযং। যস্মিং উপ্পন্নে ‘‘অতিসীতং অতিউণ্হং অতিচ্ছাতোস্মি অতিধাতোস্মি অতিদূরমগ্গং গতোস্মী’’তি ৰদতি, যং সন্ধায ৰুত্তং ‘‘তত্থ কতমা তন্দি , যা তন্দী তন্দিযনা তন্দিমনকতা আলস্যং আলস্যাযনা আলস্যাযিতত্তং, অযং ৰুচ্চতি তন্দী’’তি (ৰিভ॰ ৮৫৭)।
Tandīti atisītādipaccayā uppannaṃ āgantukakāyālasiyaṃ. Yasmiṃ uppanne ‘‘atisītaṃ atiuṇhaṃ aticchātosmi atidhātosmi atidūramaggaṃ gatosmī’’ti vadati, yaṃ sandhāya vuttaṃ ‘‘tattha katamā tandi , yā tandī tandiyanā tandimanakatā ālasyaṃ ālasyāyanā ālasyāyitattaṃ, ayaṃ vuccati tandī’’ti (vibha. 857).
ৰিজম্ভিতাতি কিলেসৰসেন কাযৰিনমনা। যং সন্ধায ৰুত্তং – ‘‘তত্থ কতমা ৰিজম্ভিতা? যা কাযস্স জম্ভনা ৰিজম্ভনা আনমনা ৰিনমনা সন্নমনা পণমনা ব্যাধিযকং, অযং ৰুচ্চতি ৰিজম্ভিতা’’তি (ৰিভ॰ ৮৫৮)।
Vijambhitāti kilesavasena kāyavinamanā. Yaṃ sandhāya vuttaṃ – ‘‘tattha katamā vijambhitā? Yā kāyassa jambhanā vijambhanā ānamanā vinamanā sannamanā paṇamanā byādhiyakaṃ, ayaṃ vuccati vijambhitā’’ti (vibha. 858).
ভত্তসম্মদোতি ভত্তপরিল়াহো। যং সন্ধায ৰুত্তং – ‘‘তত্থ কতমো ভত্তসম্মদো? যা ভুত্তাৰিস্স ভত্তমুচ্ছা ভত্তকিলমথো ভত্তপরিল়াহো কাযদুট্ঠুল্লং, অযং ৰুচ্চতি ভত্তসম্মদো’’তি (ৰিভ॰ ৮৫৯)।
Bhattasammadoti bhattapariḷāho. Yaṃ sandhāya vuttaṃ – ‘‘tattha katamo bhattasammado? Yā bhuttāvissa bhattamucchā bhattakilamatho bhattapariḷāho kāyaduṭṭhullaṃ, ayaṃ vuccati bhattasammado’’ti (vibha. 859).
চেতসো চ লীনত্তন্তি চিত্তস্স লীযনাকারো, যং সন্ধায ৰুত্তং – ‘‘তত্থ কতমং চেতসো লীনত্তং? যা চিত্তস্স অকল্যতা অকম্মঞ্ঞতা ওলীযনা সল্লীযনা লীনং লীযনা লীযিতত্তং থিনং থিযনা থিযিতত্তং চিত্তস্স, ইদং ৰুচ্চতি চেতসো লীনত্ত’’ন্তি (ৰিভ॰ ৮৬০)।
Cetaso ca līnattanti cittassa līyanākāro, yaṃ sandhāya vuttaṃ – ‘‘tattha katamaṃ cetaso līnattaṃ? Yā cittassa akalyatā akammaññatā olīyanā sallīyanā līnaṃ līyanā līyitattaṃ thinaṃ thiyanā thiyitattaṃ cittassa, idaṃ vuccati cetaso līnatta’’nti (vibha. 860).
চেতসো অৰূপসমোতি যথা নাম ৰীতচ্চিকোপি অঙ্গারো নেৰ তাৰ সন্নিসীদতি পতাপং করোতিযেৰ, যথা চ পত্তপচনট্ঠানে নেৰ তাৰ সন্নিসীদতি পতাপং করোতিযেৰ, এৰং চিত্তস্স অৰূপসন্তাকারো, অত্থতো পনেতং উদ্ধচ্চকুক্কুচ্চমেৰ হোতি।
Cetaso avūpasamoti yathā nāma vītaccikopi aṅgāro neva tāva sannisīdati patāpaṃ karotiyeva, yathā ca pattapacanaṭṭhāne neva tāva sannisīdati patāpaṃ karotiyeva, evaṃ cittassa avūpasantākāro, atthato panetaṃ uddhaccakukkuccameva hoti.
ৰিচিকিচ্ছট্ঠানীযা ধম্মাতি ৰিচিকিচ্ছায আরম্মণধম্মা। অযোনিসোমনসিকারো সব্বত্থ ৰুত্তনযোৰ। এৰমেত্থ কামচ্ছন্দো ৰিচিকিচ্ছাতি ইমে দ্ৰে ধম্মা আরম্মণেন কথিতা, ব্যাপাদো আরম্মণেন চ উপনিস্সযেন চ, সেসা সহজাতেন চ উপনিস্সযেন চাতি।
Vicikicchaṭṭhānīyā dhammāti vicikicchāya ārammaṇadhammā. Ayonisomanasikāro sabbattha vuttanayova. Evamettha kāmacchando vicikicchāti ime dve dhammā ārammaṇena kathitā, byāpādo ārammaṇena ca upanissayena ca, sesā sahajātena ca upanissayena cāti.
সতিসম্বোজ্ঝঙ্গট্ঠানীযা ধম্মাতি সতিযা আরম্মণধম্মা সত্ততিংস বোধিপক্খিযা চ নৰ লোকুত্তরধম্মা চ। তত্থ যোনিসোমনসিকারবহুলীকারোতি তত্থ উপাযমনসিকারস্স পুনপ্পুনং করণং।
Satisambojjhaṅgaṭṭhānīyā dhammāti satiyā ārammaṇadhammā sattatiṃsa bodhipakkhiyā ca nava lokuttaradhammā ca. Tattha yonisomanasikārabahulīkāroti tattha upāyamanasikārassa punappunaṃ karaṇaṃ.
কুসলাকুসলা ধম্মাতিআদীসু কুসলাতি কোসল্লসম্ভূতা অনৰজ্জসুখৰিপাকা। অকুসলাতি অকোসল্লসম্ভূতা সাৰজ্জদুক্খৰিপাকা। সাৰজ্জাতি অকুসলা। অনৰজ্জাতি কুসলা। হীনপণীতকণ্হসুক্কেসুপি এসেৰ নযো। সপ্পটিভাগাতি কণ্হসুক্কাযেৰ। কণ্হা হি কণ্হৰিপাকদানতো , সুক্কা চ সুক্কৰিপাকদানতো সপ্পটিভাগা নাম, সদিসৰিপাককোট্ঠাসাতি অত্থো। পটিপক্খভূতস্স ৰা ভাগস্স অত্থিতায সপ্পটিভাগা। কণ্হানঞ্হি সুক্কা পটিপক্খভাগা, সুক্কানঞ্চ কণ্হা পটিপক্খভাগাতি এৰম্পি সপ্পটিভাগা। সপ্পটিবাহিতট্ঠেন ৰা সপ্পটিভাগা। অকুসলঞ্হি কুসলং পটিবাহিত্ৰা অত্তনো ৰিপাকং দেতি, কুসলঞ্চ অকুসলং পটিবাহিত্ৰাতি এৰম্পি কণ্হসুক্কা সপ্পটিভাগা।
Kusalākusalā dhammātiādīsu kusalāti kosallasambhūtā anavajjasukhavipākā. Akusalāti akosallasambhūtā sāvajjadukkhavipākā. Sāvajjāti akusalā. Anavajjāti kusalā. Hīnapaṇītakaṇhasukkesupi eseva nayo. Sappaṭibhāgāti kaṇhasukkāyeva. Kaṇhā hi kaṇhavipākadānato , sukkā ca sukkavipākadānato sappaṭibhāgā nāma, sadisavipākakoṭṭhāsāti attho. Paṭipakkhabhūtassa vā bhāgassa atthitāya sappaṭibhāgā. Kaṇhānañhi sukkā paṭipakkhabhāgā, sukkānañca kaṇhā paṭipakkhabhāgāti evampi sappaṭibhāgā. Sappaṭibāhitaṭṭhena vā sappaṭibhāgā. Akusalañhi kusalaṃ paṭibāhitvā attano vipākaṃ deti, kusalañca akusalaṃ paṭibāhitvāti evampi kaṇhasukkā sappaṭibhāgā.
আরম্ভধাতূতি পঠমারম্ভৰীরিযং। নিক্কমধাতূতি কোসজ্জতো নিক্খন্তত্তা ততো বলৰতরং। পরক্কমধাতূতি পরং পরং ঠানং অক্কমনতায ততোপি বলৰতরন্তি তীহিপি পদেহি ৰীরিযমেৰ কথিতং।
Ārambhadhātūti paṭhamārambhavīriyaṃ. Nikkamadhātūti kosajjato nikkhantattā tato balavataraṃ. Parakkamadhātūti paraṃ paraṃ ṭhānaṃ akkamanatāya tatopi balavataranti tīhipi padehi vīriyameva kathitaṃ.
পীতিসম্বোজ্ঝঙ্গট্ঠানীযাতি পীতিযা আরম্মণধম্মা। কাযপস্সদ্ধীতি তিণ্ণং খন্ধানং দরথপস্সদ্ধি। চিত্তপস্সদ্ধীতি ৰিঞ্ঞাণক্খন্ধস্স দরথপস্সদ্ধি। সমথনিমিত্তন্তি সমথোপি সমথনিমিত্তং, আরম্মণম্পি। অব্যগ্গনিমিত্তন্তি তস্সেৰ ৰেৰচনং।
Pītisambojjhaṅgaṭṭhānīyāti pītiyā ārammaṇadhammā. Kāyapassaddhīti tiṇṇaṃ khandhānaṃ darathapassaddhi. Cittapassaddhīti viññāṇakkhandhassa darathapassaddhi. Samathanimittanti samathopi samathanimittaṃ, ārammaṇampi. Abyagganimittanti tasseva vevacanaṃ.
উপেক্খাসম্বোজ্ঝঙ্গট্ঠানীযাতি উপেক্খায আরম্মণধম্মা, অত্থতো পন মজ্ঝত্তাকারো উপেক্খাট্ঠানীযা ধম্মোতি ৰেদিতব্বো। এৰমেত্থ সতিধম্মৰিচযউপেক্খাসম্বোজ্ঝঙ্গা আরম্মণেন কথিতা, সেসা আরম্মণেনপি উপনিস্সযেনপি।
Upekkhāsambojjhaṅgaṭṭhānīyāti upekkhāya ārammaṇadhammā, atthato pana majjhattākāro upekkhāṭṭhānīyā dhammoti veditabbo. Evamettha satidhammavicayaupekkhāsambojjhaṅgā ārammaṇena kathitā, sesā ārammaṇenapi upanissayenapi.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ২. কাযসুত্তং • 2. Kāyasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২. কাযসুত্তৰণ্ণনা • 2. Kāyasuttavaṇṇanā
