| Library / Tipiṭaka / д̇ибидага • Tipiṭaka / винаяасан̇г̇аха-адтагат̇аа • Vinayasaṅgaha-aṭṭhakathā |
11. гаяавиггаяасамаабад̇д̇ивинижчаяагат̇аа
11. Kayavikkayasamāpattivinicchayakathā
57. гаяавиггаяасамаабад̇д̇ийд̇и гаяавиггаяасамаабаж̇ж̇анам̣. ‘‘иминаа имам̣ д̣̇зхий’’д̇иаад̣̇инаа (баараа. адта. 2.595) хи наязна барасса габбияабхан̣д̣ам̣ г̇ан̣ханд̇о гаяам̣ самаабаж̇ж̇ад̇и, ад̇д̇ано габбияабхан̣д̣ам̣ д̣̇знд̇о виггаяам̣. аяам̣ бана гаяавиггаяо табзд̇ваа бан̃жа сахад̇хаммигз авасзсзхи г̇ихибаб̣б̣аж̇ид̇зхи анд̇амасо маад̇аабид̇уухиби сад̣̇д̇хим̣ на ваддад̇и.
57.Kayavikkayasamāpattīti kayavikkayasamāpajjanaṃ. ‘‘Iminā imaṃ dehī’’tiādinā (pārā. aṭṭha. 2.595) hi nayena parassa kappiyabhaṇḍaṃ gaṇhanto kayaṃ samāpajjati, attano kappiyabhaṇḍaṃ dento vikkayaṃ. Ayaṃ pana kayavikkayo ṭhapetvā pañca sahadhammike avasesehi gihipabbajitehi antamaso mātāpitūhipi saddhiṃ na vaṭṭati.
д̇ад̇рааяам̣ винижчаяо – вад̇т̇зна ваа вад̇т̇ам̣ ход̇у, бхад̇д̇зна ваа бхад̇д̇ам̣, яам̣ гин̃жи габбияам̣ ‘‘иминаа имам̣ д̣̇зхий’’д̇и вад̣̇ад̇и, д̣̇уггадам̣. звам̣ вад̇ваа маад̇уяааби ад̇д̇ано бхан̣д̣ам̣ д̣̇зд̇и, д̣̇уггадам̣, ‘‘иминаа имам̣ д̣̇зхий’’д̇и вуд̇д̇о ваа ‘‘имам̣ д̣̇зхи, имам̣ д̇з д̣̇ассаамий’’д̇и д̇ам̣ вад̇ваа ваа маад̇уяааби бхан̣д̣ам̣ ад̇д̇анаа г̇ан̣хаад̇и, д̣̇уггадам̣, ад̇д̇ано бхан̣д̣з барахад̇т̇ам̣, барабхан̣д̣з жа ад̇д̇ано хад̇т̇ам̣ самбад̇д̇з ниссаг̇г̇ияам̣ баажид̇д̇ияам̣. маад̇арам̣ ваа бана бид̇арам̣ ваа ‘‘имам̣ д̣̇зхий’’д̇и вад̣̇ад̇о вин̃н̃ад̇д̇и на ход̇и, ‘‘имам̣ г̇ан̣хаахий’’д̇и д̣̇ад̣̇ад̇о сад̣̇д̇хаад̣̇зяяавинибаад̇анам̣ на ход̇и. ан̃н̃аад̇агам̣ ‘‘имам̣ д̣̇зхий’’д̇и вад̣̇ад̇о вин̃н̃ад̇д̇и, ‘‘имам̣ г̇ан̣хаахий’’д̇и д̣̇ад̣̇ад̇о сад̣̇д̇хаад̣̇зяяавинибаад̇анам̣, ‘‘иминаа имам̣ д̣̇зхий’’д̇и гаяавиггаяам̣ аабаж̇ж̇ад̇о ниссаг̇г̇ияам̣. д̇асмаа габбияабхан̣д̣ам̣ баривад̇д̇анд̇зна маад̇аабид̇уухиби сад̣̇д̇хим̣ гаяавиггаяам̣, ан̃н̃аад̇агзхи сад̣̇д̇хим̣ д̇иссо аабад̇д̇ияо можзнд̇зна баривад̇д̇зд̇аб̣б̣ам̣.
Tatrāyaṃ vinicchayo – vatthena vā vatthaṃ hotu, bhattena vā bhattaṃ, yaṃ kiñci kappiyaṃ ‘‘iminā imaṃ dehī’’ti vadati, dukkaṭaṃ. Evaṃ vatvā mātuyāpi attano bhaṇḍaṃ deti, dukkaṭaṃ, ‘‘iminā imaṃ dehī’’ti vutto vā ‘‘imaṃ dehi, imaṃ te dassāmī’’ti taṃ vatvā vā mātuyāpi bhaṇḍaṃ attanā gaṇhāti, dukkaṭaṃ, attano bhaṇḍe parahatthaṃ, parabhaṇḍe ca attano hatthaṃ sampatte nissaggiyaṃ pācittiyaṃ. Mātaraṃ vā pana pitaraṃ vā ‘‘imaṃ dehī’’ti vadato viññatti na hoti, ‘‘imaṃ gaṇhāhī’’ti dadato saddhādeyyavinipātanaṃ na hoti. Aññātakaṃ ‘‘imaṃ dehī’’ti vadato viññatti, ‘‘imaṃ gaṇhāhī’’ti dadato saddhādeyyavinipātanaṃ, ‘‘iminā imaṃ dehī’’ti kayavikkayaṃ āpajjato nissaggiyaṃ. Tasmā kappiyabhaṇḍaṃ parivattantena mātāpitūhipi saddhiṃ kayavikkayaṃ, aññātakehi saddhiṃ tisso āpattiyo mocentena parivattetabbaṃ.
д̇ад̇рааяам̣ баривад̇д̇анавид̇хи – бхигкусса баат̇зяяад̇ан̣д̣улаа хонд̇и, со анд̇араамаг̇г̇з бхад̇д̇ахад̇т̇ам̣ бурисам̣ д̣̇исваа ‘‘амхаагам̣ д̇ан̣д̣улаа ад̇т̇и, на жа но имзхи ад̇т̇о, бхад̇д̇зна бана ад̇т̇о’’д̇и вад̣̇ад̇и, бурисо д̇ан̣д̣улз г̇ахзд̇ваа бхад̇д̇ам̣ д̣̇зд̇и, ваддад̇и. д̇иссоби аабад̇д̇ияо на хонд̇и, анд̇амасо нимид̇д̇агаммамад̇д̇амби на ход̇и. гасмаа? мууласса ад̇т̇ид̇ааяа. яо бана звам̣ агад̇ваа ‘‘иминаа имам̣ д̣̇зхий’’д̇и баривад̇д̇зд̇и, яат̇аавад̇т̇угамзва. вигхаасаад̣̇ам̣ д̣̇исваа ‘‘имам̣ од̣̇анам̣ бхун̃ж̇ид̇ваа раж̇анам̣ ваа д̣̇аарууни ваа аахараа’’д̇и вад̣̇ад̇и, раж̇аначаллиг̇ан̣анааяа д̣̇ааруг̇ан̣анааяа жа ниссаг̇г̇ияаани хонд̇и. ‘‘имам̣ од̣̇анам̣ бхун̃ж̇ид̇ваа имам̣ наама гарот̇аа’’д̇и д̣̇анд̇агаараад̣̇ийхи сиббигзхи д̇хаммагаран̣аад̣̇ийсу д̇ам̣ д̇ам̣ баригкаарам̣ гаарзд̇и, раж̇агзхи ваа вад̇т̇ам̣ д̇ховаабзд̇и, яат̇аавад̇т̇угамзва. нахаабид̇зна гзсз чинд̣̇аабзд̇и , гаммагаарзхи навагаммам̣ гаарзд̇и, яат̇аавад̇т̇угамзва. сажз бана ‘‘ид̣̇ам̣ бхад̇д̇ам̣ бхун̃ж̇ид̇ваа ид̣̇ам̣ гарот̇аа’’д̇и на вад̣̇ад̇и, ‘‘ид̣̇ам̣ бхад̇д̇ам̣ бхун̃ж̇а, бхуд̇д̇оси, бхун̃ж̇иссаси, ид̣̇ам̣ наама гарохий’’д̇и вад̣̇ад̇и, ваддад̇и. зд̇т̇а жа гин̃жааби вад̇т̇ад̇хованз ваа гзсажчзд̣̇анз ваа бхуумисод̇ханаад̣̇инавагаммз ваа барабхан̣д̣ам̣ ад̇д̇ано хад̇т̇аг̇ад̇ам̣ ниссаж̇ж̇ид̇аб̣б̣ам̣ наама над̇т̇и, махааадтагат̇ааяам̣ бана д̣̇ал̣хам̣ гад̇ваа вуд̇д̇ад̇д̇аа на саггаа зд̇ам̣ бадигкибид̇ум̣, д̇асмаа яат̇аа ниссаг̇г̇ияавад̇т̇умхи барибхуд̇д̇з ваа надтз ваа баажид̇д̇ияам̣ д̣̇зсзд̇и, звамид̇хааби д̣̇зсзд̇аб̣б̣ам̣.
Tatrāyaṃ parivattanavidhi – bhikkhussa pātheyyataṇḍulā honti, so antarāmagge bhattahatthaṃ purisaṃ disvā ‘‘amhākaṃ taṇḍulā atthi, na ca no imehi attho, bhattena pana attho’’ti vadati, puriso taṇḍule gahetvā bhattaṃ deti, vaṭṭati. Tissopi āpattiyo na honti, antamaso nimittakammamattampi na hoti. Kasmā? Mūlassa atthitāya. Yo pana evaṃ akatvā ‘‘iminā imaṃ dehī’’ti parivatteti, yathāvatthukameva. Vighāsādaṃ disvā ‘‘imaṃ odanaṃ bhuñjitvā rajanaṃ vā dārūni vā āharā’’ti vadati, rajanachalligaṇanāya dārugaṇanāya ca nissaggiyāni honti. ‘‘Imaṃ odanaṃ bhuñjitvā imaṃ nāma karothā’’ti dantakārādīhi sippikehi dhammakaraṇādīsu taṃ taṃ parikkhāraṃ kāreti, rajakehi vā vatthaṃ dhovāpeti, yathāvatthukameva. Nahāpitena kese chindāpeti , kammakārehi navakammaṃ kāreti, yathāvatthukameva. Sace pana ‘‘idaṃ bhattaṃ bhuñjitvā idaṃ karothā’’ti na vadati, ‘‘idaṃ bhattaṃ bhuñja, bhuttosi, bhuñjissasi, idaṃ nāma karohī’’ti vadati, vaṭṭati. Ettha ca kiñcāpi vatthadhovane vā kesacchedane vā bhūmisodhanādinavakamme vā parabhaṇḍaṃ attano hatthagataṃ nissajjitabbaṃ nāma natthi, mahāaṭṭhakathāyaṃ pana daḷhaṃ katvā vuttattā na sakkā etaṃ paṭikkhipituṃ, tasmā yathā nissaggiyavatthumhi paribhutte vā naṭṭhe vā pācittiyaṃ deseti, evamidhāpi desetabbaṃ.
яам̣ гин̃жи габбияабхан̣д̣ам̣ г̇ан̣хид̇угаамад̇ааяа аг̇гхам̣ бужчид̇ум̣ ваддад̇и, д̇асмаа ‘‘аяам̣ д̇ава бад̇д̇о гим̣ аг̇гхад̇ий’’д̇и бужчид̇з ‘‘ид̣̇ам̣ наамаа’’д̇и вад̣̇ад̇и, сажз ад̇д̇ано габбияабхан̣д̣ам̣ махаг̇гхам̣ ход̇и, зван̃жа нам̣ бадивад̣̇ад̇и ‘‘убаасага мама ид̣̇ам̣ вад̇т̇у махаг̇гхам̣, д̇ава бад̇д̇ам̣ ан̃н̃асса д̣̇зхий’’д̇и. д̇ам̣ суд̇ваа ид̇аро ‘‘ан̃н̃ам̣ т̇аалагамби д̣̇ассаамий’’д̇и вад̣̇ад̇и, г̇ан̣хид̇ум̣ ваддад̇и. сажз со бад̇д̇о махаг̇гхо, бхигкуно вад̇т̇у аббаг̇гхам̣, бад̇д̇асаамиго жасса аббаг̇гхабхаавам̣ на ж̇аанаад̇и, бад̇д̇о на г̇ахзд̇аб̣б̣о, ‘‘мама вад̇т̇у аббаг̇гха’’нд̇и аажигкид̇аб̣б̣ам̣. махаг̇гхабхаавам̣ н̃ад̇ваа ван̃жзд̇ваа г̇ан̣ханд̇оби хи бхан̣д̣ам̣ аг̇гхаабзд̇ваа гаарзд̇аб̣б̣ад̇ам̣ аабаж̇ж̇ад̇и. сажз бад̇д̇асаамиго ‘‘ход̇у, бханд̇з, сзсам̣ мама бун̃н̃ам̣ бхависсад̇ий’’д̇и д̣̇зд̇и, ваддад̇и. габбияагаарагасса бана ‘‘иминаа имам̣ г̇ахзд̇ваа д̣̇зхий’’д̇и аажигкид̇ум̣ ваддад̇и, д̇асмаа яасса хад̇т̇ад̇о бхан̣д̣ам̣ г̇ан̣хаад̇и, д̇ам̣ табзд̇ваа ан̃н̃ам̣ анд̇амасо д̇асса буд̇д̇абхаад̇игамби габбияагаарагам̣ гад̇ваа ‘‘иминаа имам̣ наама г̇ахзд̇ваа д̣̇зхий’’д̇и аажигкад̇и, со жз чзго ход̇и, бунаббунам̣ абанзд̇ваа вивад̣̇ид̇ваа г̇ан̣хаад̇и, д̇ун̣хийбхууд̇зна таад̇аб̣б̣ам̣. но жз чзго ход̇и, на ж̇аанаад̇и г̇ахзд̇ум̣, ваан̣иж̇аго жа д̇ам̣ ван̃жзд̇и, ‘‘маа г̇ан̣хаахий’’д̇и вад̇д̇аб̣б̣о.
Yaṃ kiñci kappiyabhaṇḍaṃ gaṇhitukāmatāya agghaṃ pucchituṃ vaṭṭati, tasmā ‘‘ayaṃ tava patto kiṃ agghatī’’ti pucchite ‘‘idaṃ nāmā’’ti vadati, sace attano kappiyabhaṇḍaṃ mahagghaṃ hoti, evañca naṃ paṭivadati ‘‘upāsaka mama idaṃ vatthu mahagghaṃ, tava pattaṃ aññassa dehī’’ti. Taṃ sutvā itaro ‘‘aññaṃ thālakampi dassāmī’’ti vadati, gaṇhituṃ vaṭṭati. Sace so patto mahaggho, bhikkhuno vatthu appagghaṃ, pattasāmiko cassa appagghabhāvaṃ na jānāti, patto na gahetabbo, ‘‘mama vatthu appaggha’’nti ācikkhitabbaṃ. Mahagghabhāvaṃ ñatvā vañcetvā gaṇhantopi hi bhaṇḍaṃ agghāpetvā kāretabbataṃ āpajjati. Sace pattasāmiko ‘‘hotu, bhante, sesaṃ mama puññaṃ bhavissatī’’ti deti, vaṭṭati. Kappiyakārakassa pana ‘‘iminā imaṃ gahetvā dehī’’ti ācikkhituṃ vaṭṭati, tasmā yassa hatthato bhaṇḍaṃ gaṇhāti, taṃ ṭhapetvā aññaṃ antamaso tassa puttabhātikampi kappiyakārakaṃ katvā ‘‘iminā imaṃ nāma gahetvā dehī’’ti ācikkhati, so ce cheko hoti, punappunaṃ apanetvā vivaditvā gaṇhāti, tuṇhībhūtena ṭhātabbaṃ. No ce cheko hoti, na jānāti gahetuṃ, vāṇijako ca taṃ vañceti, ‘‘mā gaṇhāhī’’ti vattabbo.
‘‘ид̣̇ам̣ бадиг̇г̇ахид̇ам̣ д̇злам̣ ваа сабби ваа амхаагам̣ ад̇т̇и, амхааган̃жа ан̃н̃зна аббадиг̇г̇ахид̇агзна ад̇т̇о’’д̇и вуд̇д̇з бана сажз со д̇ам̣ г̇ахзд̇ваа ан̃н̃ам̣ д̣̇зд̇и, батамам̣ ад̇д̇ано д̇злам̣ на минаабзд̇аб̣б̣ам̣. гасмаа? наал̣ияан̃хи авасидтад̇злам̣ ход̇и, д̇ам̣ бажчаа минанд̇асса аббадиг̇г̇ахид̇ам̣ д̣̇уусзяяа. аяан̃жа гаяавиггаяо наама габбияабхан̣д̣авасзна вуд̇д̇о. габбиязна хи габбияам̣ баривад̇д̇знд̇асса гаяавиггаяасигкаабад̣̇зна ниссаг̇г̇ияам̣ вуд̇д̇ам̣, агаббиязна бана агаббияам̣ баривад̇д̇знд̇асса, габбиязна ваа агаббияам̣ агаббиязна ваа габбияам̣ баривад̇д̇знд̇асса руубияасам̣вохаарасигкаабад̣̇зна ниссаг̇г̇ияам̣, д̇асмаа убхосу ваа згасмим̣ ваа агаббияз сад̇и руубияасам̣вохааро наама ход̇и.
‘‘Idaṃ paṭiggahitaṃ telaṃ vā sappi vā amhākaṃ atthi, amhākañca aññena appaṭiggahitakena attho’’ti vutte pana sace so taṃ gahetvā aññaṃ deti, paṭhamaṃ attano telaṃ na mināpetabbaṃ. Kasmā? Nāḷiyañhi avasiṭṭhatelaṃ hoti, taṃ pacchā minantassa appaṭiggahitaṃ dūseyya. Ayañca kayavikkayo nāma kappiyabhaṇḍavasena vutto. Kappiyena hi kappiyaṃ parivattentassa kayavikkayasikkhāpadena nissaggiyaṃ vuttaṃ, akappiyena pana akappiyaṃ parivattentassa, kappiyena vā akappiyaṃ akappiyena vā kappiyaṃ parivattentassa rūpiyasaṃvohārasikkhāpadena nissaggiyaṃ, tasmā ubhosu vā ekasmiṃ vā akappiye sati rūpiyasaṃvohāro nāma hoti.
58. руубияасам̣вохаарасса жа г̇арубхаавад̣̇ийбанад̇т̇ам̣ ид̣̇ам̣ бад̇д̇ажад̇уггам̣ взд̣̇ид̇аб̣б̣ам̣. яо хи руубияам̣ уг̇г̇ан̣хид̇ваа д̇зна аяаб̣ийж̇ам̣ самудтаабзд̇и, д̇ам̣ годдаабзд̇ваа д̇зна лохзна бад̇д̇ам̣ гаарзд̇и, аяам̣ бад̇д̇о махааагаббияо наама, на саггаа гзнажи убааязна габбияо гаад̇ум̣. сажзби д̇ам̣ винаасзд̇ваа т̇аалагам̣ гаарзд̇и, д̇амби агаббияам̣. ваасим̣ гаарзд̇и, д̇ааяа чиннад̣̇анд̇агадтамби агаббияам̣. б̣ал̣исам̣ гаарзд̇и, д̇зна маарид̇аа мажчааби агаббияаа. ваасим̣ д̇аабзд̇ваа уд̣̇агам̣ ваа кийрам̣ ваа ун̣хаабзд̇и, д̇амби агаббияамзва.
58. Rūpiyasaṃvohārassa ca garubhāvadīpanatthaṃ idaṃ pattacatukkaṃ veditabbaṃ. Yo hi rūpiyaṃ uggaṇhitvā tena ayabījaṃ samuṭṭhāpeti, taṃ koṭṭāpetvā tena lohena pattaṃ kāreti, ayaṃ patto mahāakappiyo nāma, na sakkā kenaci upāyena kappiyo kātuṃ. Sacepi taṃ vināsetvā thālakaṃ kāreti, tampi akappiyaṃ. Vāsiṃ kāreti, tāya chinnadantakaṭṭhampi akappiyaṃ. Baḷisaṃ kāreti, tena māritā macchāpi akappiyā. Vāsiṃ tāpetvā udakaṃ vā khīraṃ vā uṇhāpeti, tampi akappiyameva.
яо бана руубияам̣ уг̇г̇ан̣хид̇ваа д̇зна бад̇д̇ам̣ гин̣аад̇и, аяамби бад̇д̇о агаббияо. ‘‘бан̃жаннамби сахад̇хаммигаанам̣ на габбад̇ий’’д̇и махаабажжарияам̣ вуд̇д̇ам̣. саггаа бана габбияо гаад̇ум̣. со хи муулз мууласаамигаанам̣, бад̇д̇з жа бад̇д̇асаамигаанам̣ д̣̇иннз габбияо ход̇и, габбияабхан̣д̣ам̣ д̣̇ад̇ваа г̇ахзд̇ваа барибхун̃ж̇ид̇ум̣ ваддад̇и.
Yo pana rūpiyaṃ uggaṇhitvā tena pattaṃ kiṇāti, ayampi patto akappiyo. ‘‘Pañcannampi sahadhammikānaṃ na kappatī’’ti mahāpaccariyaṃ vuttaṃ. Sakkā pana kappiyo kātuṃ. So hi mūle mūlasāmikānaṃ, patte ca pattasāmikānaṃ dinne kappiyo hoti, kappiyabhaṇḍaṃ datvā gahetvā paribhuñjituṃ vaṭṭati.
яоби руубияам̣ уг̇г̇ан̣хаабзд̇ваа габбияагаарагзна сад̣̇д̇хим̣ гаммаарагулам̣ г̇анд̇ваа бад̇д̇ам̣ д̣̇исваа ‘‘аяам̣ маяхам̣ ружжад̇ий’’д̇и вад̣̇ад̇и, габбияагаараго жа д̇ам̣ руубияам̣ д̣̇ад̇ваа гаммаарам̣ сан̃н̃аабзд̇и, аяамби бад̇д̇о габбияавохаарзна г̇ахид̇оби д̣̇уд̇ияабад̇д̇асад̣̇исоязва, мууласса самбадижчид̇ад̇д̇аа агаббияо. гасмаа сзсаанам̣ на габбад̇ийд̇и? мууласса аниссадтад̇д̇аа.
Yopi rūpiyaṃ uggaṇhāpetvā kappiyakārakena saddhiṃ kammārakulaṃ gantvā pattaṃ disvā ‘‘ayaṃ mayhaṃ ruccatī’’ti vadati, kappiyakārako ca taṃ rūpiyaṃ datvā kammāraṃ saññāpeti, ayampi patto kappiyavohārena gahitopi dutiyapattasadisoyeva, mūlassa sampaṭicchitattā akappiyo. Kasmā sesānaṃ na kappatīti? Mūlassa anissaṭṭhattā.
яо бана руубияам̣ асамбадижчид̇ваа ‘‘т̇зрасса бад̇д̇ам̣ гин̣ид̇ваа д̣̇зхий’’д̇и бахид̇агаббияагаарагзна сад̣̇д̇хим̣ гаммаарагулам̣ г̇анд̇ваа бад̇д̇ам̣ д̣̇исваа ‘‘имз гахаабан̣з г̇ахзд̇ваа имам̣ д̣̇зхий’’д̇и гахаабан̣з д̣̇аабзд̇ваа г̇ахид̇о, аяам̣ бад̇д̇о зд̇ассзва бхигкуно на ваддад̇и д̣̇уб̣б̣ижаарид̇ад̇д̇аа, ан̃н̃зсам̣ бана ваддад̇и мууласса асамбадижчид̇ад̇д̇аа. махаасумад̇т̇зрасса гира убаж̇жхааяо ануруд̣̇д̇хад̇т̇зро наама ахоси. со ад̇д̇ано зваруубам̣ бад̇д̇ам̣ саббисса буурзд̇ваа сан̇гхасса ниссаж̇ж̇и. д̇ибидагажуул̣анааг̇ад̇т̇зрасса сад̣̇д̇хивихааригаанам̣ зваруубо бад̇д̇о ахоси. д̇ам̣ т̇зроби саббисса буурзд̇ваа сан̇гхасса ниссаж̇ж̇аабзсийд̇и. ид̣̇ам̣ агаббияабад̇д̇ажад̇уггам̣.
Yo pana rūpiyaṃ asampaṭicchitvā ‘‘therassa pattaṃ kiṇitvā dehī’’ti pahitakappiyakārakena saddhiṃ kammārakulaṃ gantvā pattaṃ disvā ‘‘ime kahāpaṇe gahetvā imaṃ dehī’’ti kahāpaṇe dāpetvā gahito, ayaṃ patto etasseva bhikkhuno na vaṭṭati dubbicāritattā, aññesaṃ pana vaṭṭati mūlassa asampaṭicchitattā. Mahāsumattherassa kira upajjhāyo anuruddhatthero nāma ahosi. So attano evarūpaṃ pattaṃ sappissa pūretvā saṅghassa nissajji. Tipiṭakacūḷanāgattherassa saddhivihārikānaṃ evarūpo patto ahosi. Taṃ theropi sappissa pūretvā saṅghassa nissajjāpesīti. Idaṃ akappiyapattacatukkaṃ.
сажз бана руубияам̣ асамбадижчид̇ваа ‘‘т̇зрасса бад̇д̇ам̣ гин̣ид̇ваа д̣̇зхий’’д̇и бахид̇агаббияагаарагзна сад̣̇д̇хим̣ гаммаарагулам̣ г̇анд̇ваа бад̇д̇ам̣ д̣̇исваа ‘‘аяам̣ маяхам̣ ружжад̇ий’’д̇и ваа ‘‘имаахам̣ г̇ахзссаамий’’д̇и ваа вад̣̇ад̇и, габбияагаараго жа д̇ам̣ руубияам̣ д̣̇ад̇ваа гаммаарам̣ сан̃н̃аабзд̇и, аяам̣ бад̇д̇о саб̣б̣агаббияо б̣уд̣̇д̇хаанамби барибхог̇аарахо. имам̣ бана руубияасам̣вохаарам̣ гаронд̇зна ‘‘иминаа имам̣ г̇ахзд̇ваа д̣̇зхий’’д̇и габбияагаарагамби аажигкид̇ум̣ на ваддад̇и.
Sace pana rūpiyaṃ asampaṭicchitvā ‘‘therassa pattaṃ kiṇitvā dehī’’ti pahitakappiyakārakena saddhiṃ kammārakulaṃ gantvā pattaṃ disvā ‘‘ayaṃ mayhaṃ ruccatī’’ti vā ‘‘imāhaṃ gahessāmī’’ti vā vadati, kappiyakārako ca taṃ rūpiyaṃ datvā kammāraṃ saññāpeti, ayaṃ patto sabbakappiyo buddhānampi paribhogāraho. Imaṃ pana rūpiyasaṃvohāraṃ karontena ‘‘iminā imaṃ gahetvā dehī’’ti kappiyakārakampi ācikkhituṃ na vaṭṭati.
ид̇и баал̣имуд̇д̇агавинаяавинижчаяасан̇г̇ахз
Iti pāḷimuttakavinayavinicchayasaṅgahe
гаяавиггаяасамаабад̇д̇ивинижчаяагат̇аа самад̇д̇аа.
Kayavikkayasamāpattivinicchayakathā samattā.
