| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
10. கயவிக்கயஸிக்கா²பத³வண்ணனா
10. Kayavikkayasikkhāpadavaṇṇanā
593. தேன ஸமயேனாதி கயவிக்கயஸிக்கா²பத³ங். தத்த² கதி ஹிபி த்யாயந்தி கதி தே அயங், ஹிகாரோ பனெத்த² பத³பூரணோ, பிகாரோ க³ரஹாயங், அயங் து³ப்³ப³லஸங்கா⁴டி தவ கதி தி³வஸானி ப⁴விஸ்ஸதீதி அத்தோ². அத² வா கதிஹம்பி த்யாயந்திபி பாடோ². தத்த² கதிஹந்தி கதி அஹானி, கதி தி³வஸானீதி வுத்தங் ஹோதி. ஸேஸங் வுத்தனயமேவ. கதிஹிபி ம்யாயந்தி இத³ம்பி ஏதேனேவ நயேன வேதி³தப்³ப³ங். கி³ஹீபி நங் கி³ஹிஸ்ஸாதி எத்த² நந்தி நாமத்தே² நிபாதோ, கி³ஹீ நாம கி³ஹிஸ்ஸாதி வுத்தங் ஹோதி.
593.Tenasamayenāti kayavikkayasikkhāpadaṃ. Tattha kati hipi tyāyanti kati te ayaṃ, hikāro panettha padapūraṇo, pikāro garahāyaṃ, ayaṃ dubbalasaṅghāṭi tava kati divasāni bhavissatīti attho. Atha vā katihampi tyāyantipi pāṭho. Tattha katihanti kati ahāni, kati divasānīti vuttaṃ hoti. Sesaṃ vuttanayameva. Katihipi myāyanti idampi eteneva nayena veditabbaṃ. Gihīpi naṃ gihissāti ettha nanti nāmatthe nipāto, gihī nāma gihissāti vuttaṃ hoti.
594. நானப்பகாரகந்தி சீவராதீ³னங் கப்பியப⁴ண்டா³னங் வஸேன அனேகவித⁴ங். தேனேவஸ்ஸ பத³பா⁴ஜனே சீவரங் ஆதி³ங் கத்வா த³ஸிகஸுத்தபரியோஸானங் கப்பியப⁴ண்ட³மேவ த³ஸ்ஸிதங். அகப்பியப⁴ண்ட³பரிவத்தனஞ்ஹி கயவிக்கயஸங்க³ஹங் ந க³ச்ச²தி. கயவிக்கயந்தி கயஞ்சேவ விக்கயஞ்ச. ‘‘இமினா இமங் தே³ஹீ’’திஆதி³னா ஹி நயேன பரஸ்ஸ கப்பியப⁴ண்ட³ங் க³ண்ஹந்தோ கயங் ஸமாபஜ்ஜதி, அத்தனோ கப்பியப⁴ண்ட³ங் தெ³ந்தோ விக்கயங் .
594.Nānappakārakanti cīvarādīnaṃ kappiyabhaṇḍānaṃ vasena anekavidhaṃ. Tenevassa padabhājane cīvaraṃ ādiṃ katvā dasikasuttapariyosānaṃ kappiyabhaṇḍameva dassitaṃ. Akappiyabhaṇḍaparivattanañhi kayavikkayasaṅgahaṃ na gacchati. Kayavikkayanti kayañceva vikkayañca. ‘‘Iminā imaṃ dehī’’tiādinā hi nayena parassa kappiyabhaṇḍaṃ gaṇhanto kayaṃ samāpajjati, attano kappiyabhaṇḍaṃ dento vikkayaṃ .
595. அஜ்ஜா²சரதீதி அபி⁴ப⁴வித்வா சரதி, வீதிக்கமவாசங் பா⁴ஸதீதி அத்தோ². யதோ கயிதஞ்ச ஹோதி விக்கயிதஞ்சாதி யதா³ கயிதஞ்ச ஹோதி பரப⁴ண்ட³ங் அத்தனோ ஹத்த²க³தங் கரொந்தேன, விக்கீதஞ்ச அத்தனோ ப⁴ண்ட³ங் பரஹத்த²க³தங் கரொந்தேன. ‘‘இமினா இம’’ந்திஆதி³வசனானுரூபதோ பன பாடே² பட²மங் அத்தனோ ப⁴ண்ட³ங் த³ஸ்ஸிதங்.
595.Ajjhācaratīti abhibhavitvā carati, vītikkamavācaṃ bhāsatīti attho. Yato kayitañca hoti vikkayitañcāti yadā kayitañca hoti parabhaṇḍaṃ attano hatthagataṃ karontena, vikkītañca attano bhaṇḍaṃ parahatthagataṃ karontena. ‘‘Iminā ima’’ntiādivacanānurūpato pana pāṭhe paṭhamaṃ attano bhaṇḍaṃ dassitaṃ.
நிஸ்ஸஜ்ஜிதப்³ப³ந்தி ஏவங் பரஸ்ஸ ஹத்த²தோ கயவஸேன க³ஹிதகப்பியப⁴ண்ட³ங் நிஸ்ஸஜ்ஜிதப்³ப³ங். அயஞ்ஹி கயவிக்கயோ ட²பெத்வா பஞ்ச ஸஹத⁴ம்மிகே அவஸேஸேஹி கி³ஹிபப்³ப³ஜிதேஹி அந்தமஸோ மாதாபிதூஹிபி ஸத்³தி⁴ங் ந வட்டதி.
Nissajjitabbanti evaṃ parassa hatthato kayavasena gahitakappiyabhaṇḍaṃ nissajjitabbaṃ. Ayañhi kayavikkayo ṭhapetvā pañca sahadhammike avasesehi gihipabbajitehi antamaso mātāpitūhipi saddhiṃ na vaṭṭati.
தத்ராயங் வினிச்ச²யோ – வத்தே²ன வா வத்த²ங் ஹோது ப⁴த்தேன வா ப⁴த்தங், யங் கிஞ்சி கப்பியங் ‘‘இமினா இமங் தே³ஹீ’’தி வத³தி, து³க்கடங். ஏவங் வத்வா மாதுயாபி அத்தனோ ப⁴ண்ட³ங் தே³தி, து³க்கடங். ‘‘இமினா இமங் தே³ஹீ’’தி வுத்தோ வா ‘‘இமங் தே³ஹி, இமங் தே த³ஸ்ஸாமீ’’தி வத்வா வா மாதுயாபி ப⁴ண்ட³ங் அத்தனா க³ண்ஹாதி, து³க்கடங். அத்தனோ ப⁴ண்டே³ பரஹத்த²ங் பரப⁴ண்டே³ ச அத்தனோ ஹத்த²ங் ஸம்பத்தே நிஸ்ஸக்³கி³யங். மாதரங் பன பிதரங் வா ‘‘இமங் தே³ஹீ’’தி வத³தோ விஞ்ஞத்தி ந ஹோதி. ‘‘இமங் க³ண்ஹாஹீ’’தி வத³தோ ஸத்³தா⁴தெ³ய்யவினிபாதனங் ந ஹோதி. அஞ்ஞாதகங் ‘‘இமங் தே³ஹீ’’தி வத³தோ விஞ்ஞத்தி ஹோதி. ‘‘இமங் க³ண்ஹாஹீ’’தி வத³தோ ஸத்³தா⁴தெ³ய்யவினிபாதனங் ஹோதி. ‘‘இமினா இமங் தே³ஹீ’’தி கயவிக்கயங் ஆபஜ்ஜதோ நிஸ்ஸக்³கி³யங். தஸ்மா கப்பியப⁴ண்ட³ங் பரிவத்தெந்தேன மாதாபிதூஹிபி ஸத்³தி⁴ங் கயவிக்கயங் அஞ்ஞாதகேஹி ஸத்³தி⁴ங் திஸ்ஸோ ஆபத்தியோ மோசெந்தேன பரிவத்தேதப்³ப³ங்.
Tatrāyaṃ vinicchayo – vatthena vā vatthaṃ hotu bhattena vā bhattaṃ, yaṃ kiñci kappiyaṃ ‘‘iminā imaṃ dehī’’ti vadati, dukkaṭaṃ. Evaṃ vatvā mātuyāpi attano bhaṇḍaṃ deti, dukkaṭaṃ. ‘‘Iminā imaṃ dehī’’ti vutto vā ‘‘imaṃ dehi, imaṃ te dassāmī’’ti vatvā vā mātuyāpi bhaṇḍaṃ attanā gaṇhāti, dukkaṭaṃ. Attano bhaṇḍe parahatthaṃ parabhaṇḍe ca attano hatthaṃ sampatte nissaggiyaṃ. Mātaraṃ pana pitaraṃ vā ‘‘imaṃ dehī’’ti vadato viññatti na hoti. ‘‘Imaṃ gaṇhāhī’’ti vadato saddhādeyyavinipātanaṃ na hoti. Aññātakaṃ ‘‘imaṃ dehī’’ti vadato viññatti hoti. ‘‘Imaṃ gaṇhāhī’’ti vadato saddhādeyyavinipātanaṃ hoti. ‘‘Iminā imaṃ dehī’’ti kayavikkayaṃ āpajjato nissaggiyaṃ. Tasmā kappiyabhaṇḍaṃ parivattentena mātāpitūhipi saddhiṃ kayavikkayaṃ aññātakehi saddhiṃ tisso āpattiyo mocentena parivattetabbaṃ.
தத்ராயங் பரிவத்தனவிதி⁴ – பி⁴க்கு²ஸ்ஸ பாதெ²ய்யதண்டு³லா ஹொந்தி, ஸோ அந்தராமக்³கே³ ப⁴த்தஹத்த²ங் புரிஸங் தி³ஸ்வா ‘‘அம்ஹாகங் தண்டு³லா அத்தி², ந ச நோ இமேஹி அத்தோ², ப⁴த்தேன பன அத்தோ²’’தி வத³தி. புரிஸோ தண்டு³லே க³ஹெத்வா ப⁴த்தங் தே³தி, வட்டதி. திஸ்ஸோபி ஆபத்தியோ ந ஹொந்தி. அந்தமஸோ நிமித்தகம்மமத்தம்பி ந ஹோதி. கஸ்மா? மூலஸ்ஸ அத்தி²தாய. பரதோ ச வுத்தமேவ ‘‘இத³ங் அம்ஹாகங் அத்தி², அம்ஹாகஞ்ச இமினா ச இமினா ச அத்தோ²தி ப⁴ணதீ’’தி. யோ பன ஏவங் அகத்வா ‘‘இமினா இமங் தே³ஹீ’’தி பரிவத்தேதி; யதா²வத்து²கமேவ . விகா⁴ஸாத³ங் தி³ஸ்வா ‘‘இமங் ஓத³னங் பு⁴ஞ்ஜித்வா, ரஜனங் வா தா³ரூனி வா ஆஹரா’’தி வத³தி, ரஜனச²ல்லிக³ணனாய தா³ருக³ணனாய ச நிஸ்ஸக்³கி³யானி ஹொந்தி. ‘‘இமங் ஓத³னங் பு⁴ஞ்ஜித்வா இத³ங் நாம கரோதா²’’தி த³ந்தகாராதீ³ஹி ஸிப்பிகேஹி த⁴மகரணாதீ³ஸு தங் தங் பரிக்கா²ரங் காரேதி, ரஜகேஹி வா வத்த²ங் தோ⁴வாபேதி; யதா²வத்து²கமேவ. ந்ஹாபிதேன கேஸே சி²ந்தா³பேதி, கம்மகாரேஹி நவகம்மங் காரேதி; யதா²வத்து²கமேவ. ஸசே பன ‘‘இத³ங் ப⁴த்தங் பு⁴ஞ்ஜித்வா இத³ங் கரோதா²’’தி ந வத³தி ‘‘இத³ங் ப⁴த்தங் பு⁴ஞ்ஜ பு⁴த்தோஸி பு⁴ஞ்ஜிஸ்ஸஸி, இத³ங் நாம கரோஹீ’’தி வத³தி, வட்டதி. எத்த² ச கிஞ்சாபி வத்த²தோ⁴வனே வா கேஸச்சே²த³னே வா பூ⁴மிஸோத⁴னாதி³னவகம்மே வா பரப⁴ண்ட³ங் அத்தனோ ஹத்த²க³தங் நிஸ்ஸஜ்ஜிதப்³ப³ங் நாம நத்தி². மஹாஅட்ட²கதா²யங் பன த³ள்ஹங் கத்வா வுத்தத்தா ந ஸக்கா ஏதங் படிக்கி²பிதுங், தஸ்மா யதா² நிஸ்ஸக்³கி³யவத்து²ம்ஹி பரிபு⁴த்தே வா நட்டே² வா பாசித்தியங் தே³ஸேதி, ஏவமிதா⁴பி தே³ஸேதப்³ப³ங்.
Tatrāyaṃ parivattanavidhi – bhikkhussa pātheyyataṇḍulā honti, so antarāmagge bhattahatthaṃ purisaṃ disvā ‘‘amhākaṃ taṇḍulā atthi, na ca no imehi attho, bhattena pana attho’’ti vadati. Puriso taṇḍule gahetvā bhattaṃ deti, vaṭṭati. Tissopi āpattiyo na honti. Antamaso nimittakammamattampi na hoti. Kasmā? Mūlassa atthitāya. Parato ca vuttameva ‘‘idaṃ amhākaṃ atthi, amhākañca iminā ca iminā ca atthoti bhaṇatī’’ti. Yo pana evaṃ akatvā ‘‘iminā imaṃ dehī’’ti parivatteti; yathāvatthukameva . Vighāsādaṃ disvā ‘‘imaṃ odanaṃ bhuñjitvā, rajanaṃ vā dārūni vā āharā’’ti vadati, rajanachalligaṇanāya dārugaṇanāya ca nissaggiyāni honti. ‘‘Imaṃ odanaṃ bhuñjitvā idaṃ nāma karothā’’ti dantakārādīhi sippikehi dhamakaraṇādīsu taṃ taṃ parikkhāraṃ kāreti, rajakehi vā vatthaṃ dhovāpeti; yathāvatthukameva. Nhāpitena kese chindāpeti, kammakārehi navakammaṃ kāreti; yathāvatthukameva. Sace pana ‘‘idaṃ bhattaṃ bhuñjitvā idaṃ karothā’’ti na vadati ‘‘idaṃ bhattaṃ bhuñja bhuttosi bhuñjissasi, idaṃ nāma karohī’’ti vadati, vaṭṭati. Ettha ca kiñcāpi vatthadhovane vā kesacchedane vā bhūmisodhanādinavakamme vā parabhaṇḍaṃ attano hatthagataṃ nissajjitabbaṃ nāma natthi. Mahāaṭṭhakathāyaṃ pana daḷhaṃ katvā vuttattā na sakkā etaṃ paṭikkhipituṃ, tasmā yathā nissaggiyavatthumhi paribhutte vā naṭṭhe vā pācittiyaṃ deseti, evamidhāpi desetabbaṃ.
596. கயவிக்கயே கயவிக்கயஸஞ்ஞீதிஆதி³ம்ஹி யோ கயவிக்கயங் ஸமாபஜ்ஜதி, ஸோ தஸ்மிங் கயவிக்கயஸஞ்ஞீ வா ப⁴வது வேமதிகோ வா, ந கயவிக்கயஸஞ்ஞீ வா நிஸ்ஸக்³கி³யபாசித்தியமேவ. சூளத்திகே த்³வீஸு பதே³ஸு து³க்கடமேவாதி ஏவமத்தோ² த³ட்ட²ப்³போ³.
596.Kayavikkaye kayavikkayasaññītiādimhi yo kayavikkayaṃ samāpajjati, so tasmiṃ kayavikkayasaññī vā bhavatu vematiko vā, na kayavikkayasaññī vā nissaggiyapācittiyameva. Cūḷattike dvīsu padesu dukkaṭamevāti evamattho daṭṭhabbo.
597. அக்³க⁴ங் புச்ச²தீதி ‘‘அயங் தவ பத்தோ கிங் அக்³க⁴தீ’’தி புச்ச²தி. ‘‘இத³ங் நாமா’’தி வுத்தே பன ஸசே தஸ்ஸ கப்பியப⁴ண்ட³ங் மஹக்³க⁴ங் ஹோதி, ஏவஞ்ச நங் படிவத³தி ‘‘உபாஸக, மம இத³ங் வத்து² மஹக்³க⁴ங், தவ பத்தங் அஞ்ஞஸ்ஸ தே³ஹீ’’தி. தங் ஸுத்வா இதரோ ‘‘அஞ்ஞங் தா²லகம்பி த³ஸ்ஸாமீ’’தி வத³தி க³ண்ஹிதுங் வட்டதி, ‘‘இத³ங் அம்ஹாகங் அத்தீ²’’தி வுத்தலக்க²ணே பததி . ஸசே ஸோ பத்தோ மஹக்³கோ⁴, பி⁴க்கு²னோ வத்து² அப்பக்³க⁴ங், பத்தஸாமிகோ சஸ்ஸ அப்பக்³க⁴பா⁴வங் ந ஜானாதி, பத்தோ ந க³ஹேதப்³போ³, ‘‘மம வத்து² அப்பக்³க⁴’’ந்தி ஆசிக்கி²தப்³ப³ங். மஹக்³க⁴பா⁴வங் ஞத்வா வஞ்செத்வா க³ண்ஹந்தோ ஹி க³ஹிதப⁴ண்ட³ங் அக்³கா⁴பெத்வா காரேதப்³ப³தங் ஆபஜ்ஜதி. ஸசே பத்தஸாமிகோ ‘‘ஹோது, ப⁴ந்தே, ஸேஸங் மம புஞ்ஞங் ப⁴விஸ்ஸதீ’’தி தே³தி, வட்டதி.
597.Agghaṃ pucchatīti ‘‘ayaṃ tava patto kiṃ agghatī’’ti pucchati. ‘‘Idaṃ nāmā’’ti vutte pana sace tassa kappiyabhaṇḍaṃ mahagghaṃ hoti, evañca naṃ paṭivadati ‘‘upāsaka, mama idaṃ vatthu mahagghaṃ, tava pattaṃ aññassa dehī’’ti. Taṃ sutvā itaro ‘‘aññaṃ thālakampi dassāmī’’ti vadati gaṇhituṃ vaṭṭati, ‘‘idaṃ amhākaṃ atthī’’ti vuttalakkhaṇe patati . Sace so patto mahaggho, bhikkhuno vatthu appagghaṃ, pattasāmiko cassa appagghabhāvaṃ na jānāti, patto na gahetabbo, ‘‘mama vatthu appaggha’’nti ācikkhitabbaṃ. Mahagghabhāvaṃ ñatvā vañcetvā gaṇhanto hi gahitabhaṇḍaṃ agghāpetvā kāretabbataṃ āpajjati. Sace pattasāmiko ‘‘hotu, bhante, sesaṃ mama puññaṃ bhavissatī’’ti deti, vaṭṭati.
கப்பியகாரகஸ்ஸ ஆசிக்க²தீதி யஸ்ஸ ஹத்த²தோ ப⁴ண்ட³ங் க³ண்ஹாதி, தங் ட²பெத்வா அஞ்ஞங் அந்தமஸோ தஸ்ஸ புத்தபா⁴திகம்பி கப்பியகாரகங் கத்வா ‘‘இமினா இமங் நாம க³ஹெத்வா தே³ஹீ’’தி ஆசிக்க²தி. ஸோ சே சே²கோ ஹோதி, புனப்புனங் அபனெத்வா விவதி³த்வா க³ண்ஹாதி, துண்ஹீபூ⁴தேன டா²தப்³ப³ங். நோ சே சே²கோ ஹோதி, ந ஜானாதி க³ஹேதுங், வாணிஜகோ தங் வஞ்சேதி, ‘‘மா க³ண்ஹா’’தி வத்தப்³போ³.
Kappiyakārakassaācikkhatīti yassa hatthato bhaṇḍaṃ gaṇhāti, taṃ ṭhapetvā aññaṃ antamaso tassa puttabhātikampi kappiyakārakaṃ katvā ‘‘iminā imaṃ nāma gahetvā dehī’’ti ācikkhati. So ce cheko hoti, punappunaṃ apanetvā vivaditvā gaṇhāti, tuṇhībhūtena ṭhātabbaṃ. No ce cheko hoti, na jānāti gahetuṃ, vāṇijako taṃ vañceti, ‘‘mā gaṇhā’’ti vattabbo.
இத³ங் அம்ஹாகந்திஆதி³ம்ஹி ‘‘இத³ங் படிக்³க³ஹிதங் தேலங் வா ஸப்பி வா அம்ஹாகங் அத்தி², அம்ஹாகஞ்ச அஞ்ஞேன அப்படிக்³க³ஹிதகேன அத்தோ²’’தி ப⁴ணதி. ஸசே ஸோ தங் க³ஹெத்வா அஞ்ஞங் தே³தி, பட²மங் அத்தனோ தேலங் ந மினாபேதப்³ப³ங். கஸ்மா? நாளியஞ்ஹி அவஸிட்ட²தேலங் ஹோதி, தங் பச்சா² மினந்தஸ்ஸ அப்படிக்³க³ஹிதகங் தூ³ஸெய்யாதி. ஸேஸங் உத்தானமேவ.
Idaṃ amhākantiādimhi ‘‘idaṃ paṭiggahitaṃ telaṃ vā sappi vā amhākaṃ atthi, amhākañca aññena appaṭiggahitakena attho’’ti bhaṇati. Sace so taṃ gahetvā aññaṃ deti, paṭhamaṃ attano telaṃ na mināpetabbaṃ. Kasmā? Nāḷiyañhi avasiṭṭhatelaṃ hoti, taṃ pacchā minantassa appaṭiggahitakaṃ dūseyyāti. Sesaṃ uttānameva.
ச²ஸமுட்டா²னங், கிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங், காயகம்மவசீகம்மங், திசித்தங், திவேத³னந்தி.
Chasamuṭṭhānaṃ, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammavacīkammaṃ, ticittaṃ, tivedananti.
கயவிக்கயஸிக்கா²பத³வண்ணனா நிட்டி²தா.
Kayavikkayasikkhāpadavaṇṇanā niṭṭhitā.
நிட்டி²தோ கோஸியவக்³கோ³ து³தியோ.
Niṭṭhito kosiyavaggo dutiyo.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 10. கயவிக்கயஸிக்கா²பத³ங் • 10. Kayavikkayasikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 10. கயவிக்கயஸிக்கா²பத³வண்ணனா • 10. Kayavikkayasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 10. கயவிக்கயஸிக்கா²பத³வண்ணனா • 10. Kayavikkayasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 10. கயவிக்கயஸிக்கா²பத³வண்ணனா • 10. Kayavikkayasikkhāpadavaṇṇanā
