| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
10. கயவிக்கயஸிக்கா²பத³வண்ணனா
10. Kayavikkayasikkhāpadavaṇṇanā
ரூபியஸங்வோஹாரஸ்ஸ பன ஹெட்டா²ஸிக்கா²பதே³ன க³ஹிதத்தா கப்பியப⁴ண்டா³னமேவெத்த² க³ஹணந்தி ஆஹ ‘‘சீவராதீ³ன’’ந்திஆதி³. தத்த² சீவராதீ³னங் கப்பியப⁴ண்டா³னந்தி அந்தமஸோ த³ஸிகஸுத்தங் உபாதா³ய சீவரபிண்ட³பாதஸேனாஸனகி³லானபச்சயானங் யேஸங் கேஸஞ்சி கப்பியப⁴ண்டா³னங். கயங் நாம பரப⁴ண்ட³ஸ்ஸ க³ஹணங். விக்கயங் நாம அத்தனோ ப⁴ண்ட³ஸ்ஸ தா³னங். தேனாஹ ‘‘இமினா இமங் தே³ஹீ’’திஆதி³. பரஸ்ஸாதி ட²பெத்வா பஞ்ச ஸஹத⁴ம்மிகே அஞ்ஞஸ்ஸ. எத்த² ச ‘‘அஹங், ப⁴ந்தே, நானப்பகாரகங் கயவிக்கயங் ஸமாபஜ்ஜிங், இத³ங் மே நிஸ்ஸக்³கி³யங், இமாஹங் ஸங்க⁴ஸ்ஸ நிஸ்ஸஜ்ஜாமீ’’திஆதி³னா (பாரா॰ 595) நயேன நிஸ்ஸஜ்ஜிதப்³ப³ங். தேனாஹ ‘‘வுத்தலக்க²ணவஸேனா’’திஆதி³. நனு செத்த² சீவரதோ⁴வனே வா கேஸச்சே²த³னே வா பூ⁴மிஸோத⁴னாதி³னவகம்மே வா பரப⁴ண்ட³ங் அத்தனோ ஹத்த²க³தங் நிஸ்ஸஜ்ஜிதப்³ப³ங் நாம நத்தி², தத்த² கிங் காதப்³ப³ந்தி ஆஹ ‘‘அஸந்தே பாசித்தியங் தே³ஸேதப்³ப³மேவா’’தி. யதா² நிஸ்ஸக்³கி³யவத்து²ம்ஹி பரிபு⁴த்தே வா நட்டே² வா பாசித்தியங் தே³ஸேதி, ஏவங் இதா⁴பி தே³ஸேதப்³ப³மேவாதி அதி⁴ப்பாயோ.
Rūpiyasaṃvohārassa pana heṭṭhāsikkhāpadena gahitattā kappiyabhaṇḍānamevettha gahaṇanti āha ‘‘cīvarādīna’’ntiādi. Tattha cīvarādīnaṃ kappiyabhaṇḍānanti antamaso dasikasuttaṃ upādāya cīvarapiṇḍapātasenāsanagilānapaccayānaṃ yesaṃ kesañci kappiyabhaṇḍānaṃ. Kayaṃ nāma parabhaṇḍassa gahaṇaṃ. Vikkayaṃ nāma attano bhaṇḍassa dānaṃ. Tenāha ‘‘iminā imaṃ dehī’’tiādi. Parassāti ṭhapetvā pañca sahadhammike aññassa. Ettha ca ‘‘ahaṃ, bhante, nānappakārakaṃ kayavikkayaṃ samāpajjiṃ, idaṃ me nissaggiyaṃ, imāhaṃ saṅghassa nissajjāmī’’tiādinā (pārā. 595) nayena nissajjitabbaṃ. Tenāha ‘‘vuttalakkhaṇavasenā’’tiādi. Nanu cettha cīvaradhovane vā kesacchedane vā bhūmisodhanādinavakamme vā parabhaṇḍaṃ attano hatthagataṃ nissajjitabbaṃ nāma natthi, tattha kiṃ kātabbanti āha ‘‘asante pācittiyaṃ desetabbamevā’’ti. Yathā nissaggiyavatthumhi paribhutte vā naṭṭhe vā pācittiyaṃ deseti, evaṃ idhāpi desetabbamevāti adhippāyo.
இத³ங் அம்ஹாகங் அத்தீ²தி இத³ங் படிக்³க³ஹிதங் தேலங் வா ஸப்பி வா அம்ஹாகங் ஸங்விஜ்ஜதி. அம்ஹாகஞ்ச இமினா ச இமினா ச அத்தோ²தி அம்ஹாகஞ்ச தத³ஞ்ஞேன இமினா ச இமினா ச அப்படிக்³க³ஹிதகேன அத்தோ². ‘‘ரூபியஸங்வோஹாரே வுத்தனயமேவா’’தி இமினா ‘‘திகபாசித்தியங் அகயவிக்கயே கயவிக்கயஸஞ்ஞினோ ச வேமதிகஸ்ஸ ச து³க்கட’’ந்தி இமங் நயமதிதி³ஸதி.
Idaṃamhākaṃ atthīti idaṃ paṭiggahitaṃ telaṃ vā sappi vā amhākaṃ saṃvijjati. Amhākañca iminā ca iminā ca atthoti amhākañca tadaññena iminā ca iminā ca appaṭiggahitakena attho. ‘‘Rūpiyasaṃvohāre vuttanayamevā’’ti iminā ‘‘tikapācittiyaṃ akayavikkaye kayavikkayasaññino ca vematikassa ca dukkaṭa’’nti imaṃ nayamatidisati.
கயவிக்கயஸிக்கா²பத³வண்ணனா நிட்டி²தா.
Kayavikkayasikkhāpadavaṇṇanā niṭṭhitā.
ஏளகலோமவக்³கோ³ து³தியோ.
Eḷakalomavaggo dutiyo.
