| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
10. கயவிக்கயஸிக்கா²பத³வண்ணனா
10. Kayavikkayasikkhāpadavaṇṇanā
593-5. த³ஸமே பாளியங் ஜானாஹீதி இதா³னேவ உபதா⁴ரேஹி, இத³ங் பச்சா² ச²ட்³டே³துங் ந ஸக்காதி அதி⁴ப்பாயோ. இமினாதி பி⁴க்கு²னா தி³ய்யமானங் வுத்தங். இமந்தி பரேன படிதி³ய்யமானங். ஸேஸஞாதகேஸு ஸத்³தா⁴தெ³ய்யவினிபாதஸம்ப⁴வதோ தத³பா⁴வட்டா²னம்பி த³ஸ்ஸேதுங் ‘‘மாதரங் பன பிதரங் வா’’தி வுத்தங். ந ஸக்கா தங் படிக்கி²பிதுந்தி எத்த² யதா² ரூபியங் ப⁴தகானங் த³த்வா அஸ்ஸாமிகபூ⁴மியங் அயோபீ³ஜஸமுட்டா²பனே ப⁴தியா க²ணந்தானங் ஸந்திகா க³ஹிதப⁴ண்ட³கபா⁴வேபி பாசித்தியங் ஹோதி, ஏவமிதா⁴பீதி கேசி வத³ந்தி, தங் ந யுத்தங். யஞ்ஹி அஸ்ஸாமிகபூ⁴மிங் க²ணித்வா ஸமுட்டா²பிதங் அயோபீ³ஜங், தங் ப⁴தகானங் ஸந்தகங் நாம ஹோதி, தத³த்த²ஞ்ச தேஸங் ரூபியங் தெ³ந்தஸ்ஸ ரூபியஸங்வோஹாரோவ ஹோதி அகப்பியவோஹாரேன ரஜனச்ச²ல்லிஆதீ³னங் ஆஹராபனே கயவிக்கயோ விய, தாதி³ஸம்பி பரப⁴ண்ட³ங் இத⁴ வத்த²தோ⁴வனாதீ³ஸு நத்தி², தஸ்மா அட்ட²கதா²பமாணேனேவெத்த² பாசித்தியங் க³ஹேதப்³ப³ங்.
593-5. Dasame pāḷiyaṃ jānāhīti idāneva upadhārehi, idaṃ pacchā chaḍḍetuṃ na sakkāti adhippāyo. Imināti bhikkhunā diyyamānaṃ vuttaṃ. Imanti parena paṭidiyyamānaṃ. Sesañātakesu saddhādeyyavinipātasambhavato tadabhāvaṭṭhānampi dassetuṃ ‘‘mātaraṃ pana pitaraṃ vā’’ti vuttaṃ. Na sakkā taṃ paṭikkhipitunti ettha yathā rūpiyaṃ bhatakānaṃ datvā assāmikabhūmiyaṃ ayobījasamuṭṭhāpane bhatiyā khaṇantānaṃ santikā gahitabhaṇḍakabhāvepi pācittiyaṃ hoti, evamidhāpīti keci vadanti, taṃ na yuttaṃ. Yañhi assāmikabhūmiṃ khaṇitvā samuṭṭhāpitaṃ ayobījaṃ, taṃ bhatakānaṃ santakaṃ nāma hoti, tadatthañca tesaṃ rūpiyaṃ dentassa rūpiyasaṃvohārova hoti akappiyavohārena rajanacchalliādīnaṃ āharāpane kayavikkayo viya, tādisampi parabhaṇḍaṃ idha vatthadhovanādīsu natthi, tasmā aṭṭhakathāpamāṇenevettha pācittiyaṃ gahetabbaṃ.
597. புஞ்ஞங் ப⁴விஸ்ஸதீதி தே³தீதி எத்த² ஸசே பி⁴க்கு² அத்தனோ ப⁴ண்ட³ஸ்ஸ அப்பக்³க⁴தங் ஞத்வாபி அகதெ²த்வா ‘‘இதா³னேவ உபபரிக்கி²த்வா க³ண்ஹ, மா பச்சா² விப்படிஸாரீ ஹோஹீ’’தி வத³தி, இதரோ ச அத்தனோ தி³ய்யமானஸ்ஸ மஹக்³க⁴தங் அஜானந்தோ ‘‘ஊனங் வா அதி⁴கங் வா தும்ஹாகமேவா’’தி த³த்வா க³ச்ச²தி, பி⁴க்கு²ஸ்ஸ அனாபத்தி உபனந்த³ஸ்ஸ விய பரிப்³பா³ஜகவத்து²க்³க³ஹணே. விப்படிஸாரிஸ்ஸ புன ஸகஸஞ்ஞாய ஆக³தஸ்ஸ யங் அதி⁴கங் க³ஹிதங், தங் தா³தப்³ப³ங். யேன யங் பரிவத்தேதி, தேஸங் உபி⁴ன்னங் கப்பியவத்து²தா, அஸஹத⁴ம்மிகதா, கயவிக்கயாபஜ்ஜனஞ்சாதி இமானெத்த² தீணி அங்கா³னி.
597.Puññaṃbhavissatīti detīti ettha sace bhikkhu attano bhaṇḍassa appagghataṃ ñatvāpi akathetvā ‘‘idāneva upaparikkhitvā gaṇha, mā pacchā vippaṭisārī hohī’’ti vadati, itaro ca attano diyyamānassa mahagghataṃ ajānanto ‘‘ūnaṃ vā adhikaṃ vā tumhākamevā’’ti datvā gacchati, bhikkhussa anāpatti upanandassa viya paribbājakavatthuggahaṇe. Vippaṭisārissa puna sakasaññāya āgatassa yaṃ adhikaṃ gahitaṃ, taṃ dātabbaṃ. Yena yaṃ parivatteti, tesaṃ ubhinnaṃ kappiyavatthutā, asahadhammikatā, kayavikkayāpajjanañcāti imānettha tīṇi aṅgāni.
கயவிக்கயஸிக்கா²பத³வண்ணனா நிட்டி²தா.
Kayavikkayasikkhāpadavaṇṇanā niṭṭhitā.
நிட்டி²தோ கோஸியவக்³கோ³ து³தியோ.
Niṭṭhito kosiyavaggo dutiyo.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 10. கயவிக்கயஸிக்கா²பத³ங் • 10. Kayavikkayasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 10. கயவிக்கயஸிக்கா²பத³வண்ணனா • 10. Kayavikkayasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 10. கயவிக்கயஸிக்கா²பத³வண்ணனா • 10. Kayavikkayasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 10. கயவிக்கயஸிக்கா²பத³வண்ணனா • 10. Kayavikkayasikkhāpadavaṇṇanā
