| Library / Tipiṭaka / ติปิฎก • Tipiṭaka / กงฺขาวิตรณี-อภินว-ฎีกา • Kaṅkhāvitaraṇī-abhinava-ṭīkā |
๑๐. กยวิกฺกยสิกฺขาปทวณฺณนา
10. Kayavikkayasikkhāpadavaṇṇanā
รูปิยสํโวหารสฺส ปน เหฎฺฐาสิกฺขาปเทน คหิตตฺตา กปฺปิยภณฺฑานเมเวตฺถ คหณนฺติ อาห ‘‘จีวราทีน’’นฺติอาทิฯ ตตฺถ จีวราทีนํ กปฺปิยภณฺฑานนฺติ อนฺตมโส ทสิกสุตฺตํ อุปาทาย จีวรปิณฺฑปาตเสนาสนคิลานปจฺจยานํ เยสํ เกสญฺจิ กปฺปิยภณฺฑานํฯ กยํ นาม ปรภณฺฑสฺส คหณํฯ วิกฺกยํ นาม อตฺตโน ภณฺฑสฺส ทานํฯ เตนาห ‘‘อิมินา อิมํ เทหี’’ติอาทิฯ ปรสฺสาติ ฐเปตฺวา ปญฺจ สหธมฺมิเก อญฺญสฺสฯ เอตฺถ จ ‘‘อหํ, ภเนฺต, นานปฺปการกํ กยวิกฺกยํ สมาปชฺชิํ, อิทํ เม นิสฺสคฺคิยํ, อิมาหํ สงฺฆสฺส นิสฺสชฺชามี’’ติอาทินา (ปารา. ๕๙๕) นเยน นิสฺสชฺชิตพฺพํฯ เตนาห ‘‘วุตฺตลกฺขณวเสนา’’ติอาทิฯ นนุ เจตฺถ จีวรโธวเน วา เกสเจฺฉทเน วา ภูมิโสธนาทินวกเมฺม วา ปรภณฺฑํ อตฺตโน หตฺถคตํ นิสฺสชฺชิตพฺพํ นาม นตฺถิ, ตตฺถ กิํ กาตพฺพนฺติ อาห ‘‘อสเนฺต ปาจิตฺติยํ เทเสตพฺพเมวา’’ติฯ ยถา นิสฺสคฺคิยวตฺถุมฺหิ ปริภุเตฺต วา นเฎฺฐ วา ปาจิตฺติยํ เทเสติ, เอวํ อิธาปิ เทเสตพฺพเมวาติ อธิปฺปาโยฯ
Rūpiyasaṃvohārassa pana heṭṭhāsikkhāpadena gahitattā kappiyabhaṇḍānamevettha gahaṇanti āha ‘‘cīvarādīna’’ntiādi. Tattha cīvarādīnaṃ kappiyabhaṇḍānanti antamaso dasikasuttaṃ upādāya cīvarapiṇḍapātasenāsanagilānapaccayānaṃ yesaṃ kesañci kappiyabhaṇḍānaṃ. Kayaṃ nāma parabhaṇḍassa gahaṇaṃ. Vikkayaṃ nāma attano bhaṇḍassa dānaṃ. Tenāha ‘‘iminā imaṃ dehī’’tiādi. Parassāti ṭhapetvā pañca sahadhammike aññassa. Ettha ca ‘‘ahaṃ, bhante, nānappakārakaṃ kayavikkayaṃ samāpajjiṃ, idaṃ me nissaggiyaṃ, imāhaṃ saṅghassa nissajjāmī’’tiādinā (pārā. 595) nayena nissajjitabbaṃ. Tenāha ‘‘vuttalakkhaṇavasenā’’tiādi. Nanu cettha cīvaradhovane vā kesacchedane vā bhūmisodhanādinavakamme vā parabhaṇḍaṃ attano hatthagataṃ nissajjitabbaṃ nāma natthi, tattha kiṃ kātabbanti āha ‘‘asante pācittiyaṃ desetabbamevā’’ti. Yathā nissaggiyavatthumhi paribhutte vā naṭṭhe vā pācittiyaṃ deseti, evaṃ idhāpi desetabbamevāti adhippāyo.
อิทํ อมฺหากํ อตฺถีติ อิทํ ปฎิคฺคหิตํ เตลํ วา สปฺปิ วา อมฺหากํ สํวิชฺชติฯ อมฺหากญฺจ อิมินา จ อิมินา จ อโตฺถติ อมฺหากญฺจ ตทเญฺญน อิมินา จ อิมินา จ อปฺปฎิคฺคหิตเกน อโตฺถฯ ‘‘รูปิยสํโวหาเร วุตฺตนยเมวา’’ติ อิมินา ‘‘ติกปาจิตฺติยํ อกยวิกฺกเย กยวิกฺกยสญฺญิโน จ เวมติกสฺส จ ทุกฺกฎ’’นฺติ อิมํ นยมติทิสติฯ
Idaṃamhākaṃ atthīti idaṃ paṭiggahitaṃ telaṃ vā sappi vā amhākaṃ saṃvijjati. Amhākañca iminā ca iminā ca atthoti amhākañca tadaññena iminā ca iminā ca appaṭiggahitakena attho. ‘‘Rūpiyasaṃvohāre vuttanayamevā’’ti iminā ‘‘tikapācittiyaṃ akayavikkaye kayavikkayasaññino ca vematikassa ca dukkaṭa’’nti imaṃ nayamatidisati.
กยวิกฺกยสิกฺขาปทวณฺณนา นิฎฺฐิตาฯ
Kayavikkayasikkhāpadavaṇṇanā niṭṭhitā.
เอฬกโลมวโคฺค ทุติโยฯ
Eḷakalomavaggo dutiyo.
