| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၁၀. ကယဝိက္ကယသိက္ခာပဒဝဏ္ဏနာ
10. Kayavikkayasikkhāpadavaṇṇanā
ရူပိယသံဝောဟာရသ္သ ပန ဟေဋ္ဌာသိက္ခာပဒေန ဂဟိတတ္တာ ကပ္ပိယဘဏ္ဍာနမေဝေတ္ထ ဂဟဏန္တိ အာဟ ‘‘စီဝရာဒီန’’န္တိအာဒိ။ တတ္ထ စီဝရာဒီနံ ကပ္ပိယဘဏ္ဍာနန္တိ အန္တမသော ဒသိကသုတ္တံ ဥပာဒာယ စီဝရပိဏ္ဍပာတသေနာသနဂိလာနပစ္စယာနံ ယေသံ ကေသဉ္စိ ကပ္ပိယဘဏ္ဍာနံ။ ကယံ နာမ ပရဘဏ္ဍသ္သ ဂဟဏံ။ ဝိက္ကယံ နာမ အတ္တနော ဘဏ္ဍသ္သ ဒာနံ။ တေနာဟ ‘‘ဣမိနာ ဣမံ ဒေဟီ’’တိအာဒိ။ ပရသ္သာတိ ဌပေတ္ဝာ ပဉ္စ သဟဓမ္မိကေ အညသ္သ။ ဧတ္ထ စ ‘‘အဟံ, ဘန္တေ, နာနပ္ပကာရကံ ကယဝိက္ကယံ သမာပဇ္ဇိံ, ဣဒံ မေ နိသ္သဂ္ဂိယံ, ဣမာဟံ သင္ဃသ္သ နိသ္သဇ္ဇာမီ’’တိအာဒိနာ (ပာရာ. ၅၉၅) နယေန နိသ္သဇ္ဇိတဗ္ဗံ။ တေနာဟ ‘‘ဝုတ္တလက္ခဏဝသေနာ’’တိအာဒိ။ နနု စေတ္ထ စီဝရဓောဝနေ ဝာ ကေသစ္ဆေဒနေ ဝာ ဘူမိသောဓနာဒိနဝကမ္မေ ဝာ ပရဘဏ္ဍံ အတ္တနော ဟတ္ထဂတံ နိသ္သဇ္ဇိတဗ္ဗံ နာမ နတ္ထိ, တတ္ထ ကိံ ကာတဗ္ဗန္တိ အာဟ ‘‘အသန္တေ ပာစိတ္တိယံ ဒေသေတဗ္ဗမေဝာ’’တိ။ ယထာ နိသ္သဂ္ဂိယဝတ္ထုမ္ဟိ ပရိဘုတ္တေ ဝာ နဋ္ဌေ ဝာ ပာစိတ္တိယံ ဒေသေတိ, ဧဝံ ဣဓာပိ ဒေသေတဗ္ဗမေဝာတိ အဓိပ္ပာယော။
Rūpiyasaṃvohārassa pana heṭṭhāsikkhāpadena gahitattā kappiyabhaṇḍānamevettha gahaṇanti āha ‘‘cīvarādīna’’ntiādi. Tattha cīvarādīnaṃ kappiyabhaṇḍānanti antamaso dasikasuttaṃ upādāya cīvarapiṇḍapātasenāsanagilānapaccayānaṃ yesaṃ kesañci kappiyabhaṇḍānaṃ. Kayaṃ nāma parabhaṇḍassa gahaṇaṃ. Vikkayaṃ nāma attano bhaṇḍassa dānaṃ. Tenāha ‘‘iminā imaṃ dehī’’tiādi. Parassāti ṭhapetvā pañca sahadhammike aññassa. Ettha ca ‘‘ahaṃ, bhante, nānappakārakaṃ kayavikkayaṃ samāpajjiṃ, idaṃ me nissaggiyaṃ, imāhaṃ saṅghassa nissajjāmī’’tiādinā (pārā. 595) nayena nissajjitabbaṃ. Tenāha ‘‘vuttalakkhaṇavasenā’’tiādi. Nanu cettha cīvaradhovane vā kesacchedane vā bhūmisodhanādinavakamme vā parabhaṇḍaṃ attano hatthagataṃ nissajjitabbaṃ nāma natthi, tattha kiṃ kātabbanti āha ‘‘asante pācittiyaṃ desetabbamevā’’ti. Yathā nissaggiyavatthumhi paribhutte vā naṭṭhe vā pācittiyaṃ deseti, evaṃ idhāpi desetabbamevāti adhippāyo.
ဣဒံ အမ္ဟာကံ အတ္ထီတိ ဣဒံ ပဋိဂ္ဂဟိတံ တေလံ ဝာ သပ္ပိ ဝာ အမ္ဟာကံ သံဝိဇ္ဇတိ။ အမ္ဟာကဉ္စ ဣမိနာ စ ဣမိနာ စ အတ္ထောတိ အမ္ဟာကဉ္စ တဒညေန ဣမိနာ စ ဣမိနာ စ အပ္ပဋိဂ္ဂဟိတကေန အတ္ထော။ ‘‘ရူပိယသံဝောဟာရေ ဝုတ္တနယမေဝာ’’တိ ဣမိနာ ‘‘တိကပာစိတ္တိယံ အကယဝိက္ကယေ ကယဝိက္ကယသညိနော စ ဝေမတိကသ္သ စ ဒုက္ကဋ’’န္တိ ဣမံ နယမတိဒိသတိ။
Idaṃamhākaṃ atthīti idaṃ paṭiggahitaṃ telaṃ vā sappi vā amhākaṃ saṃvijjati. Amhākañca iminā ca iminā ca atthoti amhākañca tadaññena iminā ca iminā ca appaṭiggahitakena attho. ‘‘Rūpiyasaṃvohāre vuttanayamevā’’ti iminā ‘‘tikapācittiyaṃ akayavikkaye kayavikkayasaññino ca vematikassa ca dukkaṭa’’nti imaṃ nayamatidisati.
ကယဝိက္ကယသိက္ခာပဒဝဏ္ဏနာ နိဋ္ဌိတာ။
Kayavikkayasikkhāpadavaṇṇanā niṭṭhitā.
ဧဠကလောမဝဂ္ဂော ဒုတိယော။
Eḷakalomavaggo dutiyo.
