| Library / Tipiṭaka / තිපිටක • Tipiṭaka / කඞ්‌ඛාවිතරණී-අභිනව-ටීකා • Kaṅkhāvitaraṇī-abhinava-ṭīkā |
10. කයවික්‌කයසික්‌ඛාපදවණ්‌ණනා
10. Kayavikkayasikkhāpadavaṇṇanā
රූපියසංවොහාරස්‌ස පන හෙට්‌ඨාසික්‌ඛාපදෙන ගහිතත්‌තා කප්‌පියභණ්‌ඩානමෙවෙත්‌ථ ගහණන්‌ති ආහ ‘‘චීවරාදීන’’න්‌තිආදි. තත්‌ථ චීවරාදීනං කප්‌පියභණ්‌ඩානන්‌ති අන්‌තමසො දසිකසුත්‌තං උපාදාය චීවරපිණ්‌ඩපාතසෙනාසනගිලානපච්‌චයානං යෙසං කෙසඤ්‌චි කප්‌පියභණ්‌ඩානං. කයං නාම පරභණ්‌ඩස්‌ස ගහණං. වික්‌කයං නාම අත්‌තනො භණ්‌ඩස්‌ස දානං. තෙනාහ ‘‘ඉමිනා ඉමං දෙහී’’තිආදි. පරස්‌සාති ඨපෙත්‌වා පඤ්‌ච සහධම්‌මිකෙ අඤ්‌ඤස්‌ස. එත්‌ථ ච ‘‘අහං, භන්‌තෙ, නානප්‌පකාරකං කයවික්‌කයං සමාපජ්‌ජිං, ඉදං මෙ නිස්‌සග්‌ගියං, ඉමාහං සඞ්‌ඝස්‌ස නිස්‌සජ්‌ජාමී’’තිආදිනා (පාරා. 595) නයෙන නිස්‌සජ්‌ජිතබ්‌බං. තෙනාහ ‘‘වුත්‌තලක්‌ඛණවසෙනා’’තිආදි. නනු චෙත්‌ථ චීවරධොවනෙ වා කෙසච්‌ඡෙදනෙ වා භූමිසොධනාදිනවකම්‌මෙ වා පරභණ්‌ඩං අත්‌තනො හත්‌ථගතං නිස්‌සජ්‌ජිතබ්‌බං නාම නත්‌ථි, තත්‌ථ කිං කාතබ්‌බන්‌ති ආහ ‘‘අසන්‌තෙ පාචිත්‌තියං දෙසෙතබ්‌බමෙවා’’ති. යථා නිස්‌සග්‌ගියවත්‌ථුම්‌හි පරිභුත්‌තෙ වා නට්‌ඨෙ වා පාචිත්‌තියං දෙසෙති, එවං ඉධාපි දෙසෙතබ්‌බමෙවාති අධිප්‌පායො.
Rūpiyasaṃvohārassa pana heṭṭhāsikkhāpadena gahitattā kappiyabhaṇḍānamevettha gahaṇanti āha ‘‘cīvarādīna’’ntiādi. Tattha cīvarādīnaṃ kappiyabhaṇḍānanti antamaso dasikasuttaṃ upādāya cīvarapiṇḍapātasenāsanagilānapaccayānaṃ yesaṃ kesañci kappiyabhaṇḍānaṃ. Kayaṃ nāma parabhaṇḍassa gahaṇaṃ. Vikkayaṃ nāma attano bhaṇḍassa dānaṃ. Tenāha ‘‘iminā imaṃ dehī’’tiādi. Parassāti ṭhapetvā pañca sahadhammike aññassa. Ettha ca ‘‘ahaṃ, bhante, nānappakārakaṃ kayavikkayaṃ samāpajjiṃ, idaṃ me nissaggiyaṃ, imāhaṃ saṅghassa nissajjāmī’’tiādinā (pārā. 595) nayena nissajjitabbaṃ. Tenāha ‘‘vuttalakkhaṇavasenā’’tiādi. Nanu cettha cīvaradhovane vā kesacchedane vā bhūmisodhanādinavakamme vā parabhaṇḍaṃ attano hatthagataṃ nissajjitabbaṃ nāma natthi, tattha kiṃ kātabbanti āha ‘‘asante pācittiyaṃ desetabbamevā’’ti. Yathā nissaggiyavatthumhi paribhutte vā naṭṭhe vā pācittiyaṃ deseti, evaṃ idhāpi desetabbamevāti adhippāyo.
ඉදං අම්‌හාකං අත්‌ථීති ඉදං පටිග්‌ගහිතං තෙලං වා සප්‌පි වා අම්‌හාකං සංවිජ්‌ජති. අම්‌හාකඤ්‌ච ඉමිනා ච ඉමිනා ච අත්‌ථොති අම්‌හාකඤ්‌ච තදඤ්‌ඤෙන ඉමිනා ච ඉමිනා ච අප්‌පටිග්‌ගහිතකෙන අත්‌ථො. ‘‘රූපියසංවොහාරෙ වුත්‌තනයමෙවා’’ති ඉමිනා ‘‘තිකපාචිත්‌තියං අකයවික්‌කයෙ කයවික්‌කයසඤ්‌ඤිනො ච වෙමතිකස්‌ස ච දුක්‌කට’’න්‌ති ඉමං නයමතිදිසති.
Idaṃamhākaṃ atthīti idaṃ paṭiggahitaṃ telaṃ vā sappi vā amhākaṃ saṃvijjati. Amhākañca iminā ca iminā ca atthoti amhākañca tadaññena iminā ca iminā ca appaṭiggahitakena attho. ‘‘Rūpiyasaṃvohāre vuttanayamevā’’ti iminā ‘‘tikapācittiyaṃ akayavikkaye kayavikkayasaññino ca vematikassa ca dukkaṭa’’nti imaṃ nayamatidisati.
කයවික්‌කයසික්‌ඛාපදවණ්‌ණනා නිට්‌ඨිතා.
Kayavikkayasikkhāpadavaṇṇanā niṭṭhitā.
එළකලොමවග්‌ගො දුතියො.
Eḷakalomavaggo dutiyo.
