| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
10. කයවික්‌කයසික්‌ඛාපදවණ්‌ණනා
10. Kayavikkayasikkhāpadavaṇṇanā
593-5. දසමෙ පාළියං ජානාහීති ඉදානෙව උපධාරෙහි, ඉදං පච්‌ඡා ඡඩ්‌ඩෙතුං න සක්‌කාති අධිප්‌පායො. ඉමිනාති භික්‌ඛුනා දිය්‍යමානං වුත්‌තං. ඉමන්‌ති පරෙන පටිදිය්‍යමානං. සෙසඤාතකෙසු සද්‌ධාදෙය්‍යවිනිපාතසම්‌භවතො තදභාවට්‌ඨානම්‌පි දස්‌සෙතුං ‘‘මාතරං පන පිතරං වා’’ති වුත්‌තං. න සක්‌කා තං පටික්‌ඛිපිතුන්‌ති එත්‌ථ යථා රූපියං භතකානං දත්‌වා අස්‌සාමිකභූමියං අයොබීජසමුට්‌ඨාපනෙ භතියා ඛණන්‌තානං සන්‌තිකා ගහිතභණ්‌ඩකභාවෙපි පාචිත්‌තියං හොති, එවමිධාපීති කෙචි වදන්‌ති, තං න යුත්‌තං. යඤ්‌හි අස්‌සාමිකභූමිං ඛණිත්‌වා සමුට්‌ඨාපිතං අයොබීජං, තං භතකානං සන්‌තකං නාම හොති, තදත්‌ථඤ්‌ච තෙසං රූපියං දෙන්‌තස්‌ස රූපියසංවොහාරොව හොති අකප්‌පියවොහාරෙන රජනච්‌ඡල්‌ලිආදීනං ආහරාපනෙ කයවික්‌කයො විය, තාදිසම්‌පි පරභණ්‌ඩං ඉධ වත්‌ථධොවනාදීසු නත්‌ථි, තස්‌මා අට්‌ඨකථාපමාණෙනෙවෙත්‌ථ පාචිත්‌තියං ගහෙතබ්‌බං.
593-5. Dasame pāḷiyaṃ jānāhīti idāneva upadhārehi, idaṃ pacchā chaḍḍetuṃ na sakkāti adhippāyo. Imināti bhikkhunā diyyamānaṃ vuttaṃ. Imanti parena paṭidiyyamānaṃ. Sesañātakesu saddhādeyyavinipātasambhavato tadabhāvaṭṭhānampi dassetuṃ ‘‘mātaraṃ pana pitaraṃ vā’’ti vuttaṃ. Na sakkā taṃ paṭikkhipitunti ettha yathā rūpiyaṃ bhatakānaṃ datvā assāmikabhūmiyaṃ ayobījasamuṭṭhāpane bhatiyā khaṇantānaṃ santikā gahitabhaṇḍakabhāvepi pācittiyaṃ hoti, evamidhāpīti keci vadanti, taṃ na yuttaṃ. Yañhi assāmikabhūmiṃ khaṇitvā samuṭṭhāpitaṃ ayobījaṃ, taṃ bhatakānaṃ santakaṃ nāma hoti, tadatthañca tesaṃ rūpiyaṃ dentassa rūpiyasaṃvohārova hoti akappiyavohārena rajanacchalliādīnaṃ āharāpane kayavikkayo viya, tādisampi parabhaṇḍaṃ idha vatthadhovanādīsu natthi, tasmā aṭṭhakathāpamāṇenevettha pācittiyaṃ gahetabbaṃ.
597. පුඤ්‌ඤං භවිස්‌සතීති දෙතීති එත්‌ථ සචෙ භික්‌ඛු අත්‌තනො භණ්‌ඩස්‌ස අප්‌පග්‌ඝතං ඤත්‌වාපි අකථෙත්‌වා ‘‘ඉදානෙව උපපරික්‌ඛිත්‌වා ගණ්‌හ, මා පච්‌ඡා විප්‌පටිසාරී හොහී’’ති වදති, ඉතරො ච අත්‌තනො දිය්‍යමානස්‌ස මහග්‌ඝතං අජානන්‌තො ‘‘ඌනං වා අධිකං වා තුම්‌හාකමෙවා’’ති දත්‌වා ගච්‌ඡති, භික්‌ඛුස්‌ස අනාපත්‌ති උපනන්‌දස්‌ස විය පරිබ්‌බාජකවත්‌ථුග්‌ගහණෙ. විප්‌පටිසාරිස්‌ස පුන සකසඤ්‌ඤාය ආගතස්‌ස යං අධිකං ගහිතං, තං දාතබ්‌බං. යෙන යං පරිවත්‌තෙති, තෙසං උභින්‌නං කප්‌පියවත්‌ථුතා, අසහධම්‌මිකතා, කයවික්‌කයාපජ්‌ජනඤ්‌චාති ඉමානෙත්‌ථ තීණි අඞ්‌ගානි.
597.Puññaṃbhavissatīti detīti ettha sace bhikkhu attano bhaṇḍassa appagghataṃ ñatvāpi akathetvā ‘‘idāneva upaparikkhitvā gaṇha, mā pacchā vippaṭisārī hohī’’ti vadati, itaro ca attano diyyamānassa mahagghataṃ ajānanto ‘‘ūnaṃ vā adhikaṃ vā tumhākamevā’’ti datvā gacchati, bhikkhussa anāpatti upanandassa viya paribbājakavatthuggahaṇe. Vippaṭisārissa puna sakasaññāya āgatassa yaṃ adhikaṃ gahitaṃ, taṃ dātabbaṃ. Yena yaṃ parivatteti, tesaṃ ubhinnaṃ kappiyavatthutā, asahadhammikatā, kayavikkayāpajjanañcāti imānettha tīṇi aṅgāni.
කයවික්‌කයසික්‌ඛාපදවණ්‌ණනා නිට්‌ඨිතා.
Kayavikkayasikkhāpadavaṇṇanā niṭṭhitā.
නිට්‌ඨිතො කොසියවග්‌ගො දුතියො.
Niṭṭhito kosiyavaggo dutiyo.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 10. කයවික්‌කයසික්‌ඛාපදං • 10. Kayavikkayasikkhāpadaṃ
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 10. කයවික්‌කයසික්‌ඛාපදවණ්‌ණනා • 10. Kayavikkayasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 10. කයවික්‌කයසික්‌ඛාපදවණ්‌ණනා • 10. Kayavikkayasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 10. කයවික්‌කයසික්‌ඛාපදවණ්‌ණනා • 10. Kayavikkayasikkhāpadavaṇṇanā
