| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
দুতিযগাথাসঙ্গণিকং
Dutiyagāthāsaṅgaṇikaṃ
১. কাযিকাদিআপত্তি
1. Kāyikādiāpatti
৪৭৪. কতি আপত্তিযো কাযিকা, কতি ৰাচসিকা কতা।
474. Kati āpattiyo kāyikā, kati vācasikā katā.
ছাদেন্তস্স কতি আপত্তিযো, কতি সংসগ্গপচ্চযা॥
Chādentassa kati āpattiyo, kati saṃsaggapaccayā.
ছাপত্তিযো কাযিকা, ছ ৰাচসিকা কতা।
Chāpattiyo kāyikā, cha vācasikā katā;
ছাদেন্তস্স তিস্সো আপত্তিযো, পঞ্চ সংসগ্গপচ্চযা॥
Chādentassa tisso āpattiyo, pañca saṃsaggapaccayā.
অরুণুগ্গে কতি আপত্তিযো, কতি যাৰততিযকা।
Aruṇugge kati āpattiyo, kati yāvatatiyakā;
কতেত্থ অট্ঠ ৰত্থুকা, কতিহি সব্বসঙ্গহো॥
Katettha aṭṭha vatthukā, katihi sabbasaṅgaho.
অরুণুগ্গে তিস্সো আপত্তিযো, দ্ৰে যাৰততিযকা।
Aruṇugge tisso āpattiyo, dve yāvatatiyakā;
একেত্থ অট্ঠ ৰত্থুকা, একেন সব্বসঙ্গহো॥
Ekettha aṭṭha vatthukā, ekena sabbasaṅgaho.
ৰিনযস্স কতি মূলানি, যানি বুদ্ধেন পঞ্ঞত্তা।
Vinayassa kati mūlāni, yāni buddhena paññattā;
ৰিনযগরুকা কতি ৰুত্তা, দুট্ঠুল্লচ্ছাদনা কতি॥
Vinayagarukā kati vuttā, duṭṭhullacchādanā kati.
ৰিনযস্স দ্ৰে মূলানি, যানি বুদ্ধেন পঞ্ঞত্তা।
Vinayassa dve mūlāni, yāni buddhena paññattā;
ৰিনযগরুকা দ্ৰে ৰুত্তা, দ্ৰে দুট্ঠুল্লচ্ছাদনা॥
Vinayagarukā dve vuttā, dve duṭṭhullacchādanā.
গামন্তরে কতি আপত্তিযো, কতি নদিপারপচ্চযা।
Gāmantare kati āpattiyo, kati nadipārapaccayā;
কতিমংসেসু থুল্লচ্চযং, কতিমংসেসু দুক্কটং॥
Katimaṃsesu thullaccayaṃ, katimaṃsesu dukkaṭaṃ.
গামন্তরে চতস্সো আপত্তিযো, চতস্সো নদিপারপচ্চযা।
Gāmantare catasso āpattiyo, catasso nadipārapaccayā;
একমংসে থুল্লচ্চযং, নৰমংসেসু দুক্কটং॥
Ekamaṃse thullaccayaṃ, navamaṃsesu dukkaṭaṃ.
কতি ৰাচসিকা রত্তিং, কতি ৰাচসিকা দিৰা।
Kati vācasikā rattiṃ, kati vācasikā divā;
দদমানস্স কতি আপত্তিযো, পটিগ্গণ্হন্তস্স কিত্তকা॥
Dadamānassa kati āpattiyo, paṭiggaṇhantassa kittakā.
দ্ৰে ৰাচসিকা রত্তিং, দ্ৰে ৰাচসিকা দিৰা।
Dve vācasikā rattiṃ, dve vācasikā divā;
দদমানস্স তিস্সো আপত্তিযো, চত্তারো চ পটিগ্গহে॥
Dadamānassa tisso āpattiyo, cattāro ca paṭiggahe.
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / (১) কাযিকাদিআপত্তিৰণ্ণনা • (1) Kāyikādiāpattivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / কাযিকাদিআপত্তিৰণ্ণনা • Kāyikādiāpattivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / কাযিকাদিআপত্তিৰণ্ণনা • Kāyikādiāpattivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / কাযিকাদিআপত্তিৰণ্ণনা • Kāyikādiāpattivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / (১) কাযিকাদিআপত্তিৰণ্ণনা • (1) Kāyikādiāpattivaṇṇanā
