| Library / Tipiṭaka / तिपिटक • Tipiṭaka / परिवारपाळि • Parivārapāḷi |
दुतियगाथासङ्गणिकं
Dutiyagāthāsaṅgaṇikaṃ
१. कायिकादिआपत्ति
1. Kāyikādiāpatti
४७४. कति आपत्तियो कायिका, कति वाचसिका कता।
474. Kati āpattiyo kāyikā, kati vācasikā katā.
छादेन्तस्स कति आपत्तियो, कति संसग्गपच्चया॥
Chādentassa kati āpattiyo, kati saṃsaggapaccayā.
छापत्तियो कायिका, छ वाचसिका कता।
Chāpattiyo kāyikā, cha vācasikā katā;
छादेन्तस्स तिस्सो आपत्तियो, पञ्च संसग्गपच्चया॥
Chādentassa tisso āpattiyo, pañca saṃsaggapaccayā.
अरुणुग्गे कति आपत्तियो, कति यावततियका।
Aruṇugge kati āpattiyo, kati yāvatatiyakā;
कतेत्थ अट्ठ वत्थुका, कतिहि सब्बसङ्गहो॥
Katettha aṭṭha vatthukā, katihi sabbasaṅgaho.
अरुणुग्गे तिस्सो आपत्तियो, द्वे यावततियका।
Aruṇugge tisso āpattiyo, dve yāvatatiyakā;
एकेत्थ अट्ठ वत्थुका, एकेन सब्बसङ्गहो॥
Ekettha aṭṭha vatthukā, ekena sabbasaṅgaho.
विनयस्स कति मूलानि, यानि बुद्धेन पञ्ञत्ता।
Vinayassa kati mūlāni, yāni buddhena paññattā;
विनयगरुका कति वुत्ता, दुट्ठुल्लच्छादना कति॥
Vinayagarukā kati vuttā, duṭṭhullacchādanā kati.
विनयस्स द्वे मूलानि, यानि बुद्धेन पञ्ञत्ता।
Vinayassa dve mūlāni, yāni buddhena paññattā;
विनयगरुका द्वे वुत्ता, द्वे दुट्ठुल्लच्छादना॥
Vinayagarukā dve vuttā, dve duṭṭhullacchādanā.
गामन्तरे कति आपत्तियो, कति नदिपारपच्चया।
Gāmantare kati āpattiyo, kati nadipārapaccayā;
कतिमंसेसु थुल्लच्चयं, कतिमंसेसु दुक्कटं॥
Katimaṃsesu thullaccayaṃ, katimaṃsesu dukkaṭaṃ.
गामन्तरे चतस्सो आपत्तियो, चतस्सो नदिपारपच्चया।
Gāmantare catasso āpattiyo, catasso nadipārapaccayā;
एकमंसे थुल्लच्चयं, नवमंसेसु दुक्कटं॥
Ekamaṃse thullaccayaṃ, navamaṃsesu dukkaṭaṃ.
कति वाचसिका रत्तिं, कति वाचसिका दिवा।
Kati vācasikā rattiṃ, kati vācasikā divā;
ददमानस्स कति आपत्तियो, पटिग्गण्हन्तस्स कित्तका॥
Dadamānassa kati āpattiyo, paṭiggaṇhantassa kittakā.
द्वे वाचसिका रत्तिं, द्वे वाचसिका दिवा।
Dve vācasikā rattiṃ, dve vācasikā divā;
ददमानस्स तिस्सो आपत्तियो, चत्तारो च पटिग्गहे॥
Dadamānassa tisso āpattiyo, cattāro ca paṭiggahe.
Related texts:
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / परिवार-अट्ठकथा • Parivāra-aṭṭhakathā / (१) कायिकादिआपत्तिवण्णना • (1) Kāyikādiāpattivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / कायिकादिआपत्तिवण्णना • Kāyikādiāpattivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / कायिकादिआपत्तिवण्णना • Kāyikādiāpattivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / कायिकादिआपत्तिवण्णना • Kāyikādiāpattivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / (१) कायिकादिआपत्तिवण्णना • (1) Kāyikādiāpattivaṇṇanā
