| Library / Tipiṭaka / តិបិដក • Tipiṭaka / បរិវារបាឡិ • Parivārapāḷi |
ទុតិយគាថាសង្គណិកំ
Dutiyagāthāsaṅgaṇikaṃ
១. កាយិកាទិអាបត្តិ
1. Kāyikādiāpatti
៤៧៤. កតិ អាបត្តិយោ កាយិកា, កតិ វាចសិកា កតា។
474. Kati āpattiyo kāyikā, kati vācasikā katā.
ឆាទេន្តស្ស កតិ អាបត្តិយោ, កតិ សំសគ្គបច្ចយា។
Chādentassa kati āpattiyo, kati saṃsaggapaccayā.
ឆាបត្តិយោ កាយិកា, ឆ វាចសិកា កតា;
Chāpattiyo kāyikā, cha vācasikā katā;
ឆាទេន្តស្ស តិស្សោ អាបត្តិយោ, បញ្ច សំសគ្គបច្ចយា។
Chādentassa tisso āpattiyo, pañca saṃsaggapaccayā.
អរុណុគ្គេ កតិ អាបត្តិយោ, កតិ យាវតតិយកា;
Aruṇugge kati āpattiyo, kati yāvatatiyakā;
កតេត្ថ អដ្ឋ វត្ថុកា, កតិហិ សព្ពសង្គហោ។
Katettha aṭṭha vatthukā, katihi sabbasaṅgaho.
អរុណុគ្គេ តិស្សោ អាបត្តិយោ, ទ្វេ យាវតតិយកា;
Aruṇugge tisso āpattiyo, dve yāvatatiyakā;
ឯកេត្ថ អដ្ឋ វត្ថុកា, ឯកេន សព្ពសង្គហោ។
Ekettha aṭṭha vatthukā, ekena sabbasaṅgaho.
វិនយស្ស កតិ មូលានិ, យានិ ពុទ្ធេន បញ្ញត្តា;
Vinayassa kati mūlāni, yāni buddhena paññattā;
វិនយគរុកា កតិ វុត្តា, ទុដ្ឋុល្លច្ឆាទនា កតិ។
Vinayagarukā kati vuttā, duṭṭhullacchādanā kati.
វិនយស្ស ទ្វេ មូលានិ, យានិ ពុទ្ធេន បញ្ញត្តា;
Vinayassa dve mūlāni, yāni buddhena paññattā;
វិនយគរុកា ទ្វេ វុត្តា, ទ្វេ ទុដ្ឋុល្លច្ឆាទនា។
Vinayagarukā dve vuttā, dve duṭṭhullacchādanā.
គាមន្តរេ កតិ អាបត្តិយោ, កតិ នទិបារបច្ចយា;
Gāmantare kati āpattiyo, kati nadipārapaccayā;
កតិមំសេសុ ថុល្លច្ចយំ, កតិមំសេសុ ទុក្កដំ។
Katimaṃsesu thullaccayaṃ, katimaṃsesu dukkaṭaṃ.
គាមន្តរេ ចតស្សោ អាបត្តិយោ, ចតស្សោ នទិបារបច្ចយា;
Gāmantare catasso āpattiyo, catasso nadipārapaccayā;
ឯកមំសេ ថុល្លច្ចយំ, នវមំសេសុ ទុក្កដំ។
Ekamaṃse thullaccayaṃ, navamaṃsesu dukkaṭaṃ.
កតិ វាចសិកា រត្តិំ, កតិ វាចសិកា ទិវា;
Kati vācasikā rattiṃ, kati vācasikā divā;
ទទមានស្ស កតិ អាបត្តិយោ, បដិគ្គណ្ហន្តស្ស កិត្តកា។
Dadamānassa kati āpattiyo, paṭiggaṇhantassa kittakā.
ទ្វេ វាចសិកា រត្តិំ, ទ្វេ វាចសិកា ទិវា;
Dve vācasikā rattiṃ, dve vācasikā divā;
ទទមានស្ស តិស្សោ អាបត្តិយោ, ចត្តារោ ច បដិគ្គហេ។
Dadamānassa tisso āpattiyo, cattāro ca paṭiggahe.
Related texts:
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / បរិវារ-អដ្ឋកថា • Parivāra-aṭṭhakathā / (១) កាយិកាទិអាបត្តិវណ្ណនា • (1) Kāyikādiāpattivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / កាយិកាទិអាបត្តិវណ្ណនា • Kāyikādiāpattivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / កាយិកាទិអាបត្តិវណ្ណនា • Kāyikādiāpattivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / កាយិកាទិអាបត្តិវណ្ណនា • Kāyikādiāpattivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / (១) កាយិកាទិអាបត្តិវណ្ណនា • (1) Kāyikādiāpattivaṇṇanā
