| Library / Tipiṭaka / ತಿಪಿಟಕ • Tipiṭaka / ಪರಿವಾರಪಾಳಿ • Parivārapāḷi |
ದುತಿಯಗಾಥಾಸಙ್ಗಣಿಕಂ
Dutiyagāthāsaṅgaṇikaṃ
೧. ಕಾಯಿಕಾದಿಆಪತ್ತಿ
1. Kāyikādiāpatti
೪೭೪. ಕತಿ ಆಪತ್ತಿಯೋ ಕಾಯಿಕಾ, ಕತಿ ವಾಚಸಿಕಾ ಕತಾ।
474. Kati āpattiyo kāyikā, kati vācasikā katā.
ಛಾದೇನ್ತಸ್ಸ ಕತಿ ಆಪತ್ತಿಯೋ, ಕತಿ ಸಂಸಗ್ಗಪಚ್ಚಯಾ॥
Chādentassa kati āpattiyo, kati saṃsaggapaccayā.
ಛಾಪತ್ತಿಯೋ ಕಾಯಿಕಾ, ಛ ವಾಚಸಿಕಾ ಕತಾ।
Chāpattiyo kāyikā, cha vācasikā katā;
ಛಾದೇನ್ತಸ್ಸ ತಿಸ್ಸೋ ಆಪತ್ತಿಯೋ, ಪಞ್ಚ ಸಂಸಗ್ಗಪಚ್ಚಯಾ॥
Chādentassa tisso āpattiyo, pañca saṃsaggapaccayā.
ಅರುಣುಗ್ಗೇ ಕತಿ ಆಪತ್ತಿಯೋ, ಕತಿ ಯಾವತತಿಯಕಾ।
Aruṇugge kati āpattiyo, kati yāvatatiyakā;
ಕತೇತ್ಥ ಅಟ್ಠ ವತ್ಥುಕಾ, ಕತಿಹಿ ಸಬ್ಬಸಙ್ಗಹೋ॥
Katettha aṭṭha vatthukā, katihi sabbasaṅgaho.
ಅರುಣುಗ್ಗೇ ತಿಸ್ಸೋ ಆಪತ್ತಿಯೋ, ದ್ವೇ ಯಾವತತಿಯಕಾ।
Aruṇugge tisso āpattiyo, dve yāvatatiyakā;
ಏಕೇತ್ಥ ಅಟ್ಠ ವತ್ಥುಕಾ, ಏಕೇನ ಸಬ್ಬಸಙ್ಗಹೋ॥
Ekettha aṭṭha vatthukā, ekena sabbasaṅgaho.
ವಿನಯಸ್ಸ ಕತಿ ಮೂಲಾನಿ, ಯಾನಿ ಬುದ್ಧೇನ ಪಞ್ಞತ್ತಾ।
Vinayassa kati mūlāni, yāni buddhena paññattā;
ವಿನಯಗರುಕಾ ಕತಿ ವುತ್ತಾ, ದುಟ್ಠುಲ್ಲಚ್ಛಾದನಾ ಕತಿ॥
Vinayagarukā kati vuttā, duṭṭhullacchādanā kati.
ವಿನಯಸ್ಸ ದ್ವೇ ಮೂಲಾನಿ, ಯಾನಿ ಬುದ್ಧೇನ ಪಞ್ಞತ್ತಾ।
Vinayassa dve mūlāni, yāni buddhena paññattā;
ವಿನಯಗರುಕಾ ದ್ವೇ ವುತ್ತಾ, ದ್ವೇ ದುಟ್ಠುಲ್ಲಚ್ಛಾದನಾ॥
Vinayagarukā dve vuttā, dve duṭṭhullacchādanā.
ಗಾಮನ್ತರೇ ಕತಿ ಆಪತ್ತಿಯೋ, ಕತಿ ನದಿಪಾರಪಚ್ಚಯಾ।
Gāmantare kati āpattiyo, kati nadipārapaccayā;
ಕತಿಮಂಸೇಸು ಥುಲ್ಲಚ್ಚಯಂ, ಕತಿಮಂಸೇಸು ದುಕ್ಕಟಂ॥
Katimaṃsesu thullaccayaṃ, katimaṃsesu dukkaṭaṃ.
ಗಾಮನ್ತರೇ ಚತಸ್ಸೋ ಆಪತ್ತಿಯೋ, ಚತಸ್ಸೋ ನದಿಪಾರಪಚ್ಚಯಾ।
Gāmantare catasso āpattiyo, catasso nadipārapaccayā;
ಏಕಮಂಸೇ ಥುಲ್ಲಚ್ಚಯಂ, ನವಮಂಸೇಸು ದುಕ್ಕಟಂ॥
Ekamaṃse thullaccayaṃ, navamaṃsesu dukkaṭaṃ.
ಕತಿ ವಾಚಸಿಕಾ ರತ್ತಿಂ, ಕತಿ ವಾಚಸಿಕಾ ದಿವಾ।
Kati vācasikā rattiṃ, kati vācasikā divā;
ದದಮಾನಸ್ಸ ಕತಿ ಆಪತ್ತಿಯೋ, ಪಟಿಗ್ಗಣ್ಹನ್ತಸ್ಸ ಕಿತ್ತಕಾ॥
Dadamānassa kati āpattiyo, paṭiggaṇhantassa kittakā.
ದ್ವೇ ವಾಚಸಿಕಾ ರತ್ತಿಂ, ದ್ವೇ ವಾಚಸಿಕಾ ದಿವಾ।
Dve vācasikā rattiṃ, dve vācasikā divā;
ದದಮಾನಸ್ಸ ತಿಸ್ಸೋ ಆಪತ್ತಿಯೋ, ಚತ್ತಾರೋ ಚ ಪಟಿಗ್ಗಹೇ॥
Dadamānassa tisso āpattiyo, cattāro ca paṭiggahe.
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಪರಿವಾರ-ಅಟ್ಠಕಥಾ • Parivāra-aṭṭhakathā / (೧) ಕಾಯಿಕಾದಿಆಪತ್ತಿವಣ್ಣನಾ • (1) Kāyikādiāpattivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಕಾಯಿಕಾದಿಆಪತ್ತಿವಣ್ಣನಾ • Kāyikādiāpattivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಕಾಯಿಕಾದಿಆಪತ್ತಿವಣ್ಣನಾ • Kāyikādiāpattivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಕಾಯಿಕಾದಿಆಪತ್ತಿವಣ್ಣನಾ • Kāyikādiāpattivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / (೧) ಕಾಯಿಕಾದಿಆಪತ್ತಿವಣ್ಣನಾ • (1) Kāyikādiāpattivaṇṇanā
