| Library / Tipiṭaka / तिपिटक • Tipiṭaka / पाचित्यादियोजनापाळि • Pācityādiyojanāpāḷi |
अपरदुतियगाथासङ्गणिकं
Aparadutiyagāthāsaṅgaṇikaṃ
(१) कायिकादिआपत्तिवण्णना
(1) Kāyikādiāpattivaṇṇanā
४७४. छ आपत्तियो कायिकाति एत्थ छ आपत्तियो नाम काति आह ‘‘अन्तरपेय्याले’’तिआदि। अन्तरपेय्याले वुत्ताति सम्बन्धो। ‘‘कायद्वारे समुट्ठितत्ता’’ति इमिना काये समुट्ठन्तीति कायिकाति वचनत्थं दस्सेति। तस्मिंयेव अन्तरपेय्याले वुत्ताति सम्बन्धो। ‘‘वज्जपटिच्छादिकाया’’तिआदिना छादेन्तस्स तिस्सोति एत्थ तिण्णं सरूपं दस्सेति। ‘‘भिक्खुनिया’’तिआदिना पञ्च संसग्गपच्चयाति एत्थ पञ्चन्नं सरूपं दस्सेति।
474.Chaāpattiyo kāyikāti ettha cha āpattiyo nāma kāti āha ‘‘antarapeyyāle’’tiādi. Antarapeyyāle vuttāti sambandho. ‘‘Kāyadvāre samuṭṭhitattā’’ti iminā kāye samuṭṭhantīti kāyikāti vacanatthaṃ dasseti. Tasmiṃyeva antarapeyyāle vuttāti sambandho. ‘‘Vajjapaṭicchādikāyā’’tiādinā chādentassa tissoti ettha tiṇṇaṃ sarūpaṃ dasseti. ‘‘Bhikkhuniyā’’tiādinā pañca saṃsaggapaccayāti ettha pañcannaṃ sarūpaṃ dasseti.
‘‘एकरत्त’’इतिआदिना अरुणुग्गे तिस्सोति एत्थ तिण्णं सरूपं दस्सेति। द्वे यावततियकाति संवण्णेतब्बेन ‘‘एकादस यावततियका नामा’’ति संवण्णनाय विरुद्धभावं पटिक्खिपन्तो आह ‘‘पञ्ञत्तिवसेन पना’’तिआदि। ‘‘इमस्मिं सासने’’ति इमिना एत्थसद्दस्स विसयं दस्सेति। एकेन सब्बसङ्गहोति एत्थ एको नाम को, सब्बानि नाम कानीति आह ‘‘यस्स सिया’’तिआदि। ‘‘निदानुद्देसेना’’ति इमिना एकस्स सरूपं दस्सेति। ‘‘सिक्खापदानञ्च पातिमोक्खुद्देसानञ्चा’’ति इमेहि पदेहि सब्बसरूपं दस्सेति। सङ्गह सद्देन कम्मछट्ठीसमासो।
‘‘Ekaratta’’itiādinā aruṇugge tissoti ettha tiṇṇaṃ sarūpaṃ dasseti. Dve yāvatatiyakāti saṃvaṇṇetabbena ‘‘ekādasa yāvatatiyakā nāmā’’ti saṃvaṇṇanāya viruddhabhāvaṃ paṭikkhipanto āha ‘‘paññattivasena panā’’tiādi. ‘‘Imasmiṃ sāsane’’ti iminā etthasaddassa visayaṃ dasseti. Ekena sabbasaṅgahoti ettha eko nāma ko, sabbāni nāma kānīti āha ‘‘yassa siyā’’tiādi. ‘‘Nidānuddesenā’’ti iminā ekassa sarūpaṃ dasseti. ‘‘Sikkhāpadānañca pātimokkhuddesānañcā’’ti imehi padehi sabbasarūpaṃ dasseti. Saṅgaha saddena kammachaṭṭhīsamāso.
‘‘वज्जपटिच्छादिकाया’’तिआदिना द्वे दुट्ठुल्लच्छादनाति एत्थ द्विन्नं सरूपं दस्सेति।
‘‘Vajjapaṭicchādikāyā’’tiādinā dve duṭṭhullacchādanāti ettha dvinnaṃ sarūpaṃ dasseti.
‘‘भिक्खु भिक्खुनिया’’तिआदिना गामन्तरे चतस्सोति एत्थ चतस्सन्नं सरूपं दस्सेति। पुन ‘‘भिक्खु भिक्खुनिया’’तिआदिना चेतस्सा नदिपारपच्चयाति एत्थ चतस्सन्नमेव सरूपं दस्सेति। ‘‘चीवरदाने पाचित्तिय’’न्ति इमिना पाचित्तियभावेन सदिसत्ता सङ्ख्याविसेसो न कातब्बोति दस्सेति।
‘‘Bhikkhu bhikkhuniyā’’tiādinā gāmantare catassoti ettha catassannaṃ sarūpaṃ dasseti. Puna ‘‘bhikkhu bhikkhuniyā’’tiādinā cetassā nadipārapaccayāti ettha catassannameva sarūpaṃ dasseti. ‘‘Cīvaradāne pācittiya’’nti iminā pācittiyabhāvena sadisattā saṅkhyāviseso na kātabboti dasseti.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / परिवारपाळि • Parivārapāḷi / १. कायिकादिआपत्ति • 1. Kāyikādiāpatti
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / परिवार-अट्ठकथा • Parivāra-aṭṭhakathā / (१) कायिकादिआपत्तिवण्णना • (1) Kāyikādiāpattivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / कायिकादिआपत्तिवण्णना • Kāyikādiāpattivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / कायिकादिआपत्तिवण्णना • Kāyikādiāpattivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / कायिकादिआपत्तिवण्णना • Kāyikādiāpattivaṇṇanā
