| Library / Tipiṭaka / ติปิฎก • Tipiṭaka / วิมติวิโนทนี-ฎีกา • Vimativinodanī-ṭīkā |
อปรทุติยคาถาสงฺคณิกํ
Aparadutiyagāthāsaṅgaṇikaṃ
กายิกาทิอาปตฺติวณฺณนา
Kāyikādiāpattivaṇṇanā
๔๗๔. ‘‘กติ อาปตฺติโย’’ติอาทินา อุปาลิเตฺถเรน วินยสฺส ปาฎวตฺถํ สยเมว ปุจฺฉิตฺวา วิสฺสชฺชนํ กตํฯ ภิกฺขุนีนํเยว…เป.… อฎฺฐวตฺถุกา นามาติ ภิกฺขุนีนํ ปญฺญตฺตา เอกา เอว อาปตฺติ อฎฺฐวตฺถุกา นามาติ อโตฺถฯ
474.‘‘Katiāpattiyo’’tiādinā upālittherena vinayassa pāṭavatthaṃ sayameva pucchitvā vissajjanaṃ kataṃ. Bhikkhunīnaṃyeva…pe… aṭṭhavatthukā nāmāti bhikkhunīnaṃ paññattā ekā eva āpatti aṭṭhavatthukā nāmāti attho.
๔๗๕. กมฺมญฺจ กมฺมปาทกา จาติ เอตฺถ ยสฺมา ญตฺติกเมฺมสุ ญตฺติ สยเมว กมฺมํ โหติ, ญตฺติทุติยญตฺติจตุเตฺถสุ กเมฺมสุ อนุสฺสาวนสงฺขาตสฺส กมฺมสฺส ญตฺติปาทกภาเวน ติฎฺฐติ, ตสฺมา อิมานิ เทฺว ‘‘ญตฺติกิจฺจานี’’ติ วุตฺตานิฯ
475.Kammañca kammapādakā cāti ettha yasmā ñattikammesu ñatti sayameva kammaṃ hoti, ñattidutiyañatticatutthesu kammesu anussāvanasaṅkhātassa kammassa ñattipādakabhāvena tiṭṭhati, tasmā imāni dve ‘‘ñattikiccānī’’ti vuttāni.
ปาจิตฺติเยน สทฺธิํ ทุกฺกฎา กตาติ ทสสุปิ สิกฺขาปเทสุ เอกโตอุปสมฺปนฺนาย วเสน วุตฺตทุกฺกฎํ สนฺธาย วุตฺตํฯ ปฐมสิกฺขาปทมฺหีติ ภิกฺขุโนวาทวคฺคสฺส ปฐมสิกฺขาปทวิภเงฺค (ปาจิ. ๑๔๔ อาทโย)ฯ อธมฺมกเมฺมติ ภิกฺขุโนวาทกสมฺมุติกเมฺม อธมฺมกเมฺม ชาเต อาปชฺชิตพฺพา เทฺว อาปตฺตินวกา, ธมฺมกเมฺม เทฺว อาปตฺตินวกาติ จตฺตาโร นวกา วุตฺตาฯ อามกธญฺญํ วิญฺญาเปตฺวา ภุญฺชนฺติยา วิญฺญาปนาทิปุพฺพปโยเค ทุกฺกฎํ, อโชฺฌหาเร ปาจิตฺติยํฯ ปาจิตฺติเยน สทฺธิํ ทุกฺกฎา กตาเยวาติ วุตฺตํฯ
Pācittiyena saddhiṃ dukkaṭā katāti dasasupi sikkhāpadesu ekatoupasampannāya vasena vuttadukkaṭaṃ sandhāya vuttaṃ. Paṭhamasikkhāpadamhīti bhikkhunovādavaggassa paṭhamasikkhāpadavibhaṅge (pāci. 144 ādayo). Adhammakammeti bhikkhunovādakasammutikamme adhammakamme jāte āpajjitabbā dve āpattinavakā, dhammakamme dve āpattinavakāti cattāro navakā vuttā. Āmakadhaññaṃ viññāpetvā bhuñjantiyā viññāpanādipubbapayoge dukkaṭaṃ, ajjhohāre pācittiyaṃ. Pācittiyena saddhiṃ dukkaṭā katāyevāti vuttaṃ.
วิชหนฺตี ติฎฺฐตีติอาทีสุ ยทา ภิกฺขุนิยา เอเกน ปาเทน หตฺถปาสํ วิชหิตฺวา ฐตฺวา กิญฺจิ กมฺมํ กตฺวา ตโต อปเรน ปาเทน วิชหิตฺวา ฐาตุกามตา อุปฺปชฺชติ, ตทา สา ยถากฺกมํ ‘‘วิชหนฺตี ติฎฺฐติ, วิชหิตฺวา ติฎฺฐตี’’ติ อิมํ โวหารํ ลภติฯ อญฺญถา หิสฺสา คามูปจารโมกฺกนฺติยา วิเสโส น สิยา หตฺถปาสวิชหนสฺสาปิ คมนตฺตาฯ นิสีทติ วา นิปชฺชติ วาติ เอตฺถาปิ ยถาวุตฺตาธิปฺปาเยน อทฺธาสเนน หตฺถปาสํ วิชหนฺตี นิสีทติ, สกเลน วา อาสเนน วิชหิตฺวา นิสีทติ, อทฺธสรีเรน วิชหนฺตี นิปชฺชติ, สกเลน สรีเรน วิชหิตฺวา นิปชฺชตีติ โยเชตพฺพํฯ
Vijahantī tiṭṭhatītiādīsu yadā bhikkhuniyā ekena pādena hatthapāsaṃ vijahitvā ṭhatvā kiñci kammaṃ katvā tato aparena pādena vijahitvā ṭhātukāmatā uppajjati, tadā sā yathākkamaṃ ‘‘vijahantī tiṭṭhati, vijahitvā tiṭṭhatī’’ti imaṃ vohāraṃ labhati. Aññathā hissā gāmūpacāramokkantiyā viseso na siyā hatthapāsavijahanassāpi gamanattā. Nisīdati vā nipajjati vāti etthāpi yathāvuttādhippāyena addhāsanena hatthapāsaṃ vijahantī nisīdati, sakalena vā āsanena vijahitvā nisīdati, addhasarīrena vijahantī nipajjati, sakalena sarīrena vijahitvā nipajjatīti yojetabbaṃ.
กายิกาทิอาปตฺติวณฺณนา นิฎฺฐิตาฯ
Kāyikādiāpattivaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / ปริวารปาฬิ • Parivārapāḷi
๑. กายิกาทิอาปตฺติ • 1. Kāyikādiāpatti
๒. เทสนาคามินิยาทิอาปตฺติ • 2. Desanāgāminiyādiāpatti
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / ปริวาร-อฎฺฐกถา • Parivāra-aṭṭhakathā
(๑) กายิกาทิอาปตฺติวณฺณนา • (1) Kāyikādiāpattivaṇṇanā
(๒) เทสนาคามินิยาทิวณฺณนา • (2) Desanāgāminiyādivaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā
กายิกาทิอาปตฺติวณฺณนา • Kāyikādiāpattivaṇṇanā
เทสนาคามินิยาทิวณฺณนา • Desanāgāminiyādivaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / กายิกาทิอาปตฺติวณฺณนา • Kāyikādiāpattivaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi
(๑) กายิกาทิอาปตฺติวณฺณนา • (1) Kāyikādiāpattivaṇṇanā
(๒) เทสนาคามินิยาทิวณฺณนา • (2) Desanāgāminiyādivaṇṇanā
