| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
182. கேணியஜடிலவத்து²கதா²
182. Keṇiyajaṭilavatthukathā
300. காஜேஹீதி எத்த² காஜஸ்ஸ க³ணனங் த³ஸ்ஸெந்தோ ஆஹ ‘‘பஞ்சஹி காஜஸதேஹீ’’தி. ஏகேன காஜேன த்³வின்னங் குடானங் க³ஹிதத்தா வுத்தங் ‘‘குடஸஹஸ்ஸ’’ந்தி. வோதி தும்ஹே. ஸுட்டு² பஸன்னோதி ஸம்ப³ந்தோ⁴.
300.Kājehīti ettha kājassa gaṇanaṃ dassento āha ‘‘pañcahi kājasatehī’’ti. Ekena kājena dvinnaṃ kuṭānaṃ gahitattā vuttaṃ ‘‘kuṭasahassa’’nti. Voti tumhe. Suṭṭhu pasannoti sambandho.
தத்தா²தி ‘‘அட்ட² பானானீ’’தி பாடே², அட்ட²ஸு பானேஸு வா. ‘‘அம்பே³ஹி கதபான’’ந்தி இமினா மஜ்ஜே²லோபஸமாஸங் த³ஸ்ஸேதி. தத்தா²தி ஆமபக்கேஸு. கரொந்தேன காதப்³ப³ந்தி ஸம்ப³ந்தோ⁴. ஆதி³ச்சபாகேனாதி ஆதி³ச்சஹேதுனா பசனேன. புரேப⁴த்தமேவ கப்பதீதி பி⁴க்கு²னா ஸயங் கதத்தா புரேப⁴த்தமேவ கப்பதி. தேன வுத்தங் ‘‘அனுபஸம்பன்னேஹீ’’திஆதி³. கதங் அம்ப³பானந்தி ஸம்ப³ந்தோ⁴. ஸப்³ப³பானேஸூதி ஜம்பு³பானாதீ³ஸு ஸப்³பே³ஸு பானேஸு.
Tatthāti ‘‘aṭṭha pānānī’’ti pāṭhe, aṭṭhasu pānesu vā. ‘‘Ambehi katapāna’’nti iminā majjhelopasamāsaṃ dasseti. Tatthāti āmapakkesu. Karontena kātabbanti sambandho. Ādiccapākenāti ādiccahetunā pacanena. Purebhattameva kappatīti bhikkhunā sayaṃ katattā purebhattameva kappati. Tena vuttaṃ ‘‘anupasampannehī’’tiādi. Kataṃ ambapānanti sambandho. Sabbapānesūti jambupānādīsu sabbesu pānesu.
தேஸூதி ஜம்பு³பானாதீ³ஸு ஸத்தஸு பானேஸு. பனஸத்³தோ³ விஸேஸத்த²ஜோதகோ. ஜம்பு³ப²லேஹீதி ஆமேஹி வா பக்கேஹி வா ஜம்பு³ப²லேஹி. அட்டி²கேஹீதி அட்டி² அஸ்மிமத்தீ²தி அட்டி²கங் ப²லங். ஜாதிரஸேனாதி யதா²ஜாதேன ரஸேன. இமினா மது⁴ஸக்க²ரகப்புராதீ³ஹி ந யோஜேதப்³போ³தி த³ஸ்ஸேதி. தங் பனாதி மது⁴கபானங் பன. முத்³தி³காதி முத்³தி³கப²லானி. ஸாலுகேதி கந்தே³. ஸத்தன்னங் த⁴ஞ்ஞானங் ப²லரஸந்தி தண்டு³லதோ⁴வனோத³கங். ‘‘பக்கடா³கரஸ’’ந்தி இமினா அபக்கடா³கரஸங் வட்டதீதி தீ³பேதி. ஹீதி ஸச்சங், வித்தா²ரோ வா. ரஸோதி பக்கரஸோ. படிக்³க³ஹெத்வா ட²பிதஸப்³பி³ஆதீ³ஹி பக்கானங் யாவஜீவிகானங் பத்தானங் ரஸோதி யோஜனா. பக்கங் யாவஜீவிகபத்தரஸந்தி ஸம்ப³ந்தோ⁴. யாவகாலிகபத்தானம்பீதி பிஸத்³தோ³ பகே³வ யாவஜீவிகபத்தானந்தி த³ஸ்ஸேதி. யங் பானந்தி யங் மது⁴கபுப்ப²ரஸபானங். ஸோதி மது⁴கபுப்ப²ரஸோ. தேனாதி மது⁴கபுப்பே²ன. யதோ காலதோ பட்டா²ய மஜ்ஜங் ந கரொந்தி, ததோதி யோஜனா. உச்சு²ரஸோ நிகஸடோ பச்சா²ப⁴த்தங் வட்டதி ஸத்தாஹகாலிகத்தா. இமே சத்தாரோ ரஸாதி ப²லபத்தபுப்ப²உச்சு²ரஸஸங்கா²தா இமே சத்தாரோ ரஸா. அக்³கி³ஹுத்தமுகா²தி யஞ்ஞா அக்³கி³ஹுதமுகா², அக்³கி³ஹுதஸெட்டா²தி அத்தோ².
Tesūti jambupānādīsu sattasu pānesu. Panasaddo visesatthajotako. Jambuphalehīti āmehi vā pakkehi vā jambuphalehi. Aṭṭhikehīti aṭṭhi asmimatthīti aṭṭhikaṃ phalaṃ. Jātirasenāti yathājātena rasena. Iminā madhusakkharakappurādīhi na yojetabboti dasseti. Taṃ panāti madhukapānaṃ pana. Muddikāti muddikaphalāni. Sāluketi kande. Sattannaṃ dhaññānaṃ phalarasanti taṇḍuladhovanodakaṃ. ‘‘Pakkaḍākarasa’’nti iminā apakkaḍākarasaṃ vaṭṭatīti dīpeti. Hīti saccaṃ, vitthāro vā. Rasoti pakkaraso. Paṭiggahetvā ṭhapitasabbiādīhi pakkānaṃ yāvajīvikānaṃ pattānaṃ rasoti yojanā. Pakkaṃ yāvajīvikapattarasanti sambandho. Yāvakālikapattānampīti pisaddo pageva yāvajīvikapattānanti dasseti. Yaṃ pānanti yaṃ madhukapuppharasapānaṃ. Soti madhukapuppharaso. Tenāti madhukapupphena. Yato kālato paṭṭhāya majjaṃ na karonti, tatoti yojanā. Ucchuraso nikasaṭo pacchābhattaṃ vaṭṭati sattāhakālikattā. Ime cattāro rasāti phalapattapupphaucchurasasaṅkhātā ime cattāro rasā. Aggihuttamukhāti yaññā aggihutamukhā, aggihutaseṭṭhāti attho.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 182. கேணியஜடிலவத்து² • 182. Keṇiyajaṭilavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / கேணியஜடிலவத்து²கதா² • Keṇiyajaṭilavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கேணியஜடிலவத்து²கதா²வண்ணனா • Keṇiyajaṭilavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / கேணியஜடிலவத்து²கதா²வண்ணனா • Keṇiyajaṭilavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கேணியஜடிலவத்து²கதா²வண்ணனா • Keṇiyajaṭilavatthukathāvaṇṇanā
