| Library / Tipiṭaka / ཏིཔིཊཀ • Tipiṭaka / ཝིམཏིཝིནོདནཱི-ཊཱིཀཱ • Vimativinodanī-ṭīkā |
ཀེཎིཡཛཊིལཝཏྠུཀཐཱཝཎྞནཱ
Keṇiyajaṭilavatthukathāvaṇṇanā
༣༠༠. ཛཊིལོཏི ཨཱཧརིམཛཊཱདྷརོ ཏཱཔསཝེསདྷཱརཀོ ཡཉྙཡུཏྟོ ལོཀཔཱུཛིཏོ བྲཱཧྨཎོ། པཝཏྟཱརོ པཱཝཙནཝསེན ཝཏྟཱརོ། ཡེསཾ སནྟཀམིདཾ, ཡེཧི ཝཱ ཨིདཾ གཱིཏནྟི ཨཏྠོ། གཱིཏཾ པཝུཏྟཾ སམིཧིཏནྟི ཨཉྙམཉྙསྶ པརིཡཱཡཝཙནཾ ཝུཏྟནྟི ཨཏྠོ། ཏདནུགཱཡནྟཱིཏི ཏཾ ཏེཧི པུབྦེ གཱིཏཾ ཨནུགཱཡནྟི། ཨེཝཾ སེསེསུ ཙ།
300.Jaṭiloti āharimajaṭādharo tāpasavesadhārako yaññayutto lokapūjito brāhmaṇo. Pavattāro pāvacanavasena vattāro. Yesaṃ santakamidaṃ, yehi vā idaṃ gītanti attho. Gītaṃ pavuttaṃ samihitanti aññamaññassa pariyāyavacanaṃ vuttanti attho. Tadanugāyantīti taṃ tehi pubbe gītaṃ anugāyanti. Evaṃ sesesu ca.
ཡཱཝཀཱལིཀཔཀྐཱནནྟི པཀྐེ སནྡྷཱཡ ཝུཏྟཾ, ཨཱམཱནི པན ཨནུཔསམྤནྣེཧི སཱིཏུདཀེ མདྡིཏྭཱ པརིསྶཱཝེཏྭཱ དིནྣཔཱནཾ པཙྪཱབྷཏྟམྤི ཀཔྤཏི ཨེཝ། ཨཡཉྩ ཨཏྠོ མཧཱཨཊྛཀཐཱཡཾ སརཱུཔཏོ ཨཝུཏྟོཏི ཨཱཧ ‘‘ཀུརུནྡིཡཾ པནཱ’’ཏིཨཱདི། ‘‘ཨུཙྪུརསོ ནིཀསཊོ’’ཏི ཨིདཾ པཱཏབྦསཱམཉྙེན ཡཱམཀཱལིཀཀཐཱཡཾ ཝུཏྟཾ, ཏཾ པན སཏྟཱཧཀཱལིཀམེཝཱཏི གཧེཏབྦཾ། ཨིམེ ཙཏྟཱརོ རསཱཏི ཕལཔཏྟཔུཔྥཨུཙྪུརསཱ ཙཏྟཱརོ།
Yāvakālikapakkānanti pakke sandhāya vuttaṃ, āmāni pana anupasampannehi sītudake madditvā parissāvetvā dinnapānaṃ pacchābhattampi kappati eva. Ayañca attho mahāaṭṭhakathāyaṃ sarūpato avuttoti āha ‘‘kurundiyaṃ panā’’tiādi. ‘‘Ucchuraso nikasaṭo’’ti idaṃ pātabbasāmaññena yāmakālikakathāyaṃ vuttaṃ, taṃ pana sattāhakālikamevāti gahetabbaṃ. Ime cattāro rasāti phalapattapupphaucchurasā cattāro.
པཱལི༹ཡཾ ཨགྒིཧུཏྟམུཁཱཏི ཨགྒིཛུཧནཔུབྦཀཱ། ཚནྡསོཏི ཝེདསྶ། སཱཝིཏྟཱི མུཁཾ པཋམཾ སཛ྄ཛྷཱཡིཏབྦཱཏི ཨཏྠོ། ཏཔཏནྟི ཝིཛོཏནྟཱནཾ།
Pāḷiyaṃ aggihuttamukhāti aggijuhanapubbakā. Chandasoti vedassa. Sāvittī mukhaṃ paṭhamaṃ sajjhāyitabbāti attho. Tapatanti vijotantānaṃ.
ཀེཎིཡཛཊིལཝཏྠུཀཐཱཝཎྞནཱ ནིཊྛིཏཱ།
Keṇiyajaṭilavatthukathāvaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝགྒཔཱལི༹ • Mahāvaggapāḷi / ༡༨༢. ཀེཎིཡཛཊིལཝཏྠུ • 182. Keṇiyajaṭilavatthu
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / ཀེཎིཡཛཊིལཝཏྠུཀཐཱ • Keṇiyajaṭilavatthukathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཀེཎིཡཛཊིལཝཏྠུཀཐཱཝཎྞནཱ • Keṇiyajaṭilavatthukathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཀེཎིཡཛཊིལཝཏྠུཀཐཱཝཎྞནཱ • Keṇiyajaṭilavatthukathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༨༢. ཀེཎིཡཛཊིལཝཏྠུཀཐཱ • 182. Keṇiyajaṭilavatthukathā
