| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
5. කෙසකම්‌බලසුත්‌තං
5. Kesakambalasuttaṃ
138. ‘‘සෙය්‍යථාපි, භික්‌ඛවෙ, යානි කානිචි තන්‌තාවුතානං වත්‌ථානං, කෙසකම්‌බලො තෙසං පටිකිට්‌ඨො අක්‌ඛායති. කෙසකම්‌බලො, භික්‌ඛවෙ, සීතෙ සීතො, උණ්‌හෙ උණ්‌හො, දුබ්‌බණ්‌ණො, දුග්‌ගන්‌ධො, දුක්‌ඛසම්‌ඵස්‌සො. එවමෙවං ඛො, භික්‌ඛවෙ, යානි කානිචි පුථුසමණබ්‍රාහ්‌මණවාදානං 1 මක්‌ඛලිවාදො තෙසං පටිකිට්‌ඨො අක්‌ඛායති.
138. ‘‘Seyyathāpi, bhikkhave, yāni kānici tantāvutānaṃ vatthānaṃ, kesakambalo tesaṃ paṭikiṭṭho akkhāyati. Kesakambalo, bhikkhave, sīte sīto, uṇhe uṇho, dubbaṇṇo, duggandho, dukkhasamphasso. Evamevaṃ kho, bhikkhave, yāni kānici puthusamaṇabrāhmaṇavādānaṃ 2 makkhalivādo tesaṃ paṭikiṭṭho akkhāyati.
‘‘මක්‌ඛලි, භික්‌ඛවෙ, මොඝපුරිසො එවංවාදී එවංදිට්‌ඨි – ‘නත්‌ථි කම්‌මං, නත්‌ථි කිරියං, නත්‌ථි වීරිය’න්‌ති. යෙපි තෙ, භික්‌ඛවෙ, අහෙසුං අතීතමද්‌ධානං අරහන්‌තො සම්‌මාසම්‌බුද්‌ධා, තෙපි භගවන්‌තො කම්‌මවාදා චෙව අහෙසුං කිරියවාදා ච වීරියවාදා ච. තෙපි, භික්‌ඛවෙ, මක්‌ඛලි මොඝපුරිසො පටිබාහති – ‘නත්‌ථි කම්‌මං, නත්‌ථි කිරියං, නත්‌ථි වීරිය’න්‌ති. යෙපි තෙ, භික්‌ඛවෙ, භවිස්‌සන්‌ති අනාගතමද්‌ධානං අරහන්‌තො සම්‌මාසම්‌බුද්‌ධා, තෙපි භගවන්‌තො කම්‌මවාදා චෙව භවිස්‌සන්‌ති කිරියවාදා ච වීරියවාදා ච. තෙපි, භික්‌ඛවෙ, මක්‌ඛලි මොඝපුරිසො පටිබාහති – ‘නත්‌ථි කම්‌මං, නත්‌ථි කිරියං, නත්‌ථි වීරිය’න්‌ති. අහම්‌පි, භික්‌ඛවෙ, එතරහි අරහං සම්‌මාසම්‌බුද්‌ධො කම්‌මවාදො චෙව කිරියවාදො ච වීරියවාදො ච. මම්‌පි, භික්‌ඛවෙ, මක්‌ඛලි මොඝපුරිසො පටිබාහති – ‘නත්‌ථි කම්‌මං, නත්‌ථි කිරියං, නත්‌ථි වීරිය’’’න්‌ති.
‘‘Makkhali, bhikkhave, moghapuriso evaṃvādī evaṃdiṭṭhi – ‘natthi kammaṃ, natthi kiriyaṃ, natthi vīriya’nti. Yepi te, bhikkhave, ahesuṃ atītamaddhānaṃ arahanto sammāsambuddhā, tepi bhagavanto kammavādā ceva ahesuṃ kiriyavādā ca vīriyavādā ca. Tepi, bhikkhave, makkhali moghapuriso paṭibāhati – ‘natthi kammaṃ, natthi kiriyaṃ, natthi vīriya’nti. Yepi te, bhikkhave, bhavissanti anāgatamaddhānaṃ arahanto sammāsambuddhā, tepi bhagavanto kammavādā ceva bhavissanti kiriyavādā ca vīriyavādā ca. Tepi, bhikkhave, makkhali moghapuriso paṭibāhati – ‘natthi kammaṃ, natthi kiriyaṃ, natthi vīriya’nti. Ahampi, bhikkhave, etarahi arahaṃ sammāsambuddho kammavādo ceva kiriyavādo ca vīriyavādo ca. Mampi, bhikkhave, makkhali moghapuriso paṭibāhati – ‘natthi kammaṃ, natthi kiriyaṃ, natthi vīriya’’’nti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 5. කෙසකම්‌බලසුත්‌තවණ්‌ණනා • 5. Kesakambalasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 5-10. කෙසකම්‌බලසුත්‌තාදිවණ්‌ණනා • 5-10. Kesakambalasuttādivaṇṇanā
