Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya

    ༥. ཀེསཀམྦལསུཏྟཾ

    5. Kesakambalasuttaṃ

    ༡༣༨. ‘‘སེཡྻཐཱཔི, བྷིཀྑཝེ, ཡཱནི ཀཱནིཙི ཏནྟཱཝུཏཱནཾ ཝཏྠཱནཾ, ཀེསཀམྦལོ ཏེསཾ པཊིཀིཊྛོ ཨཀྑཱཡཏི། ཀེསཀམྦལོ, བྷིཀྑཝེ, སཱིཏེ སཱིཏོ, ཨུཎྷེ ཨུཎྷོ, དུབྦཎྞོ, དུགྒནྡྷོ, དུཀྑསམྥསྶོ། ཨེཝམེཝཾ ཁོ, བྷིཀྑཝེ, ཡཱནི ཀཱནིཙི པུཐུསམཎབྲཱཧྨཎཝཱདཱནཾ 1 མཀྑལིཝཱདོ ཏེསཾ པཊིཀིཊྛོ ཨཀྑཱཡཏི།

    138. ‘‘Seyyathāpi, bhikkhave, yāni kānici tantāvutānaṃ vatthānaṃ, kesakambalo tesaṃ paṭikiṭṭho akkhāyati. Kesakambalo, bhikkhave, sīte sīto, uṇhe uṇho, dubbaṇṇo, duggandho, dukkhasamphasso. Evamevaṃ kho, bhikkhave, yāni kānici puthusamaṇabrāhmaṇavādānaṃ 2 makkhalivādo tesaṃ paṭikiṭṭho akkhāyati.

    ‘‘མཀྑལི, བྷིཀྑཝེ, མོགྷཔུརིསོ ཨེཝཾཝཱདཱི ཨེཝཾདིཊྛི – ‘ནཏྠི ཀམྨཾ, ནཏྠི ཀིརིཡཾ, ནཏྠི ཝཱིརིཡ’ནྟི། ཡེཔི ཏེ, བྷིཀྑཝེ, ཨཧེསུཾ ཨཏཱིཏམདྡྷཱནཾ ཨརཧནྟོ སམྨཱསམྦུདྡྷཱ, ཏེཔི བྷགཝནྟོ ཀམྨཝཱདཱ ཙེཝ ཨཧེསུཾ ཀིརིཡཝཱདཱ ཙ ཝཱིརིཡཝཱདཱ ཙ། ཏེཔི, བྷིཀྑཝེ, མཀྑལི མོགྷཔུརིསོ པཊིབཱཧཏི – ‘ནཏྠི ཀམྨཾ, ནཏྠི ཀིརིཡཾ, ནཏྠི ཝཱིརིཡ’ནྟི། ཡེཔི ཏེ, བྷིཀྑཝེ, བྷཝིསྶནྟི ཨནཱགཏམདྡྷཱནཾ ཨརཧནྟོ སམྨཱསམྦུདྡྷཱ, ཏེཔི བྷགཝནྟོ ཀམྨཝཱདཱ ཙེཝ བྷཝིསྶནྟི ཀིརིཡཝཱདཱ ཙ ཝཱིརིཡཝཱདཱ ཙ། ཏེཔི, བྷིཀྑཝེ, མཀྑལི མོགྷཔུརིསོ པཊིབཱཧཏི – ‘ནཏྠི ཀམྨཾ, ནཏྠི ཀིརིཡཾ, ནཏྠི ཝཱིརིཡ’ནྟི། ཨཧམྤི, བྷིཀྑཝེ, ཨེཏརཧི ཨརཧཾ སམྨཱསམྦུདྡྷོ ཀམྨཝཱདོ ཙེཝ ཀིརིཡཝཱདོ ཙ ཝཱིརིཡཝཱདོ ཙ། མམྤི, བྷིཀྑཝེ, མཀྑལི མོགྷཔུརིསོ པཊིབཱཧཏི – ‘ནཏྠི ཀམྨཾ, ནཏྠི ཀིརིཡཾ, ནཏྠི ཝཱིརིཡ’’’ནྟི།

    ‘‘Makkhali, bhikkhave, moghapuriso evaṃvādī evaṃdiṭṭhi – ‘natthi kammaṃ, natthi kiriyaṃ, natthi vīriya’nti. Yepi te, bhikkhave, ahesuṃ atītamaddhānaṃ arahanto sammāsambuddhā, tepi bhagavanto kammavādā ceva ahesuṃ kiriyavādā ca vīriyavādā ca. Tepi, bhikkhave, makkhali moghapuriso paṭibāhati – ‘natthi kammaṃ, natthi kiriyaṃ, natthi vīriya’nti. Yepi te, bhikkhave, bhavissanti anāgatamaddhānaṃ arahanto sammāsambuddhā, tepi bhagavanto kammavādā ceva bhavissanti kiriyavādā ca vīriyavādā ca. Tepi, bhikkhave, makkhali moghapuriso paṭibāhati – ‘natthi kammaṃ, natthi kiriyaṃ, natthi vīriya’nti. Ahampi, bhikkhave, etarahi arahaṃ sammāsambuddho kammavādo ceva kiriyavādo ca vīriyavādo ca. Mampi, bhikkhave, makkhali moghapuriso paṭibāhati – ‘natthi kammaṃ, natthi kiriyaṃ, natthi vīriya’’’nti.

    ‘‘སེཡྻཐཱཔི , བྷིཀྑཝེ, ནདཱིམུཁེ ཁིཔྤཾ ཨུཌྜེཡྻ 3 བཧཱུནཾ 4 མཙྪཱནཾ ཨཧིཏཱཡ དུཀྑཱཡ ཨནཡཱཡ བྱསནཱཡ; ཨེཝམེཝཾ ཁོ, བྷིཀྑཝེ, མཀྑལི མོགྷཔུརིསོ མནུསྶཁིཔྤཾ མཉྙེ ལོཀེ ཨུཔྤནྣོ བཧཱུནཾ སཏྟཱནཾ ཨཧིཏཱཡ དུཀྑཱཡ ཨནཡཱཡ བྱསནཱཡཱ’’ཏི། པཉྩམཾ།

    ‘‘Seyyathāpi , bhikkhave, nadīmukhe khippaṃ uḍḍeyya 5 bahūnaṃ 6 macchānaṃ ahitāya dukkhāya anayāya byasanāya; evamevaṃ kho, bhikkhave, makkhali moghapuriso manussakhippaṃ maññe loke uppanno bahūnaṃ sattānaṃ ahitāya dukkhāya anayāya byasanāyā’’ti. Pañcamaṃ.




    Next: ༦. སམྤདཱསུཏྟཾ • 6. Sampadāsuttaṃ




    Footnotes:
    1. སམཎཔྤཝཱདཱནཾ (སཱི॰ སྱཱ॰ ཀཾ॰ པཱི॰)
    2. samaṇappavādānaṃ (sī. syā. kaṃ. pī.)
    3. ཨོཌྜེཡྻ (སཱི॰)
    4. བཧུནྣཾ (སཱི॰ སྱཱ॰ ཀཾ॰ པཱི॰)
    5. oḍḍeyya (sī.)
    6. bahunnaṃ (sī. syā. kaṃ. pī.)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༥. ཀེསཀམྦལསུཏྟཝཎྞནཱ • 5. Kesakambalasuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༥-༡༠. ཀེསཀམྦལསུཏྟཱདིཝཎྞནཱ • 5-10. Kesakambalasuttādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact