| Library / Tipiṭaka / तिपिटक • Tipiṭaka / विमानवत्थुपाळि • Vimānavatthupāḷi |
१७. केसकारीविमानवत्थु
17. Kesakārīvimānavatthu
१५०.
150.
‘‘इदं विमानं रुचिरं पभस्सरं, वेळुरियथम्भं सततं सुनिम्मितं।
‘‘Idaṃ vimānaṃ ruciraṃ pabhassaraṃ, veḷuriyathambhaṃ satataṃ sunimmitaṃ;
सुवण्णरुक्खेहि समन्तमोत्थतं, ठानं ममं कम्मविपाकसम्भवं॥
Suvaṇṇarukkhehi samantamotthataṃ, ṭhānaṃ mamaṃ kammavipākasambhavaṃ.
१५१.
151.
‘‘तत्रूपपन्ना पुरिमच्छरा इमा, सतं सहस्सानि सकेन कम्मुना।
‘‘Tatrūpapannā purimaccharā imā, sataṃ sahassāni sakena kammunā;
तुवंसि अज्झुपगता यसस्सिनी, ओभासयं तिट्ठसि पुब्बदेवता॥
Tuvaṃsi ajjhupagatā yasassinī, obhāsayaṃ tiṭṭhasi pubbadevatā.
१५२.
152.
‘‘ससी अधिग्गय्ह यथा विरोचति, नक्खत्तराजारिव तारकागणं।
‘‘Sasī adhiggayha yathā virocati, nakkhattarājāriva tārakāgaṇaṃ;
तथेव त्वं अच्छरासङ्गणं 1 इमं, दद्दल्लमाना यससा विरोचसि॥
Tatheva tvaṃ accharāsaṅgaṇaṃ 2 imaṃ, daddallamānā yasasā virocasi.
१५३.
153.
‘‘कुतो नु आगम्म अनोमदस्सने, उपपन्ना त्वं भवनं ममं इदं।
‘‘Kuto nu āgamma anomadassane, upapannā tvaṃ bhavanaṃ mamaṃ idaṃ;
ब्रह्मंव देवा तिदसा सहिन्दका, सब्बे न तप्पामसे दस्सनेन त’’न्ति॥
Brahmaṃva devā tidasā sahindakā, sabbe na tappāmase dassanena ta’’nti.
१५४.
154.
‘‘यमेतं सक्क अनुपुच्छसे ममं, ‘कुतो चुता त्वं इध आगता’ति 3।
‘‘Yametaṃ sakka anupucchase mamaṃ, ‘kuto cutā tvaṃ idha āgatā’ti 4;
बाराणसी नाम पुरत्थि कासिनं, तत्थ अहोसिं पुरे केसकारिका॥
Bārāṇasī nāma puratthi kāsinaṃ, tattha ahosiṃ pure kesakārikā.
१५५.
155.
‘‘बुद्धे च धम्मे च पसन्नमानसा, सङ्घे च एकन्तगता असंसया।
‘‘Buddhe ca dhamme ca pasannamānasā, saṅghe ca ekantagatā asaṃsayā;
अखण्डसिक्खापदा आगतप्फला, सम्बोधिधम्मे नियता अनामया’’ति॥
Akhaṇḍasikkhāpadā āgatapphalā, sambodhidhamme niyatā anāmayā’’ti.
१५६.
156.
‘‘तन्त्याभिनन्दामसे स्वागतञ्च 5 ते, धम्मेन च त्वं यससा विरोचसि।
‘‘Tantyābhinandāmase svāgatañca 6 te, dhammena ca tvaṃ yasasā virocasi;
बुद्धे च धम्मे च पसन्नमानसे, सङ्घे च एकन्तगते असंसये।
Buddhe ca dhamme ca pasannamānase, saṅghe ca ekantagate asaṃsaye;
अखण्डसिक्खापदे आगतप्फले, सम्बोधिधम्मे नियते अनामये’’ति॥
Akhaṇḍasikkhāpade āgatapphale, sambodhidhamme niyate anāmaye’’ti.
केसकारीविमानं सत्तरसमं।
Kesakārīvimānaṃ sattarasamaṃ.
पीठवग्गो पठमो निट्ठितो।
Pīṭhavaggo paṭhamo niṭṭhito.
तस्सुद्दानं –
Tassuddānaṃ –
पञ्च पीठा तयो नावा, दीपतिलदक्खिणा द्वे।
Pañca pīṭhā tayo nāvā, dīpatiladakkhiṇā dve;
पति द्वे सुणिसा उत्तरा, सिरिमा केसकारिका।
Pati dve suṇisā uttarā, sirimā kesakārikā;
वग्गो तेन पवुच्चतीति॥
Vaggo tena pavuccatīti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / विमानवत्थु-अट्ठकथा • Vimānavatthu-aṭṭhakathā / १७. केसकारीविमानवण्णना • 17. Kesakārīvimānavaṇṇanā
